Ваньмыз кутске музъем бордысен

Ангелина Снигирева
By Ангелина Снигирева Ноябрь 26, 2018 15:19

Ижысь гурт удысъя академия 75 ар тырмонзэ пусъе. Шаерысьтымы но оглом Россиысь гурт удысын та вылӥ дышетон заведенилэн интыез номырин ӵошатонтэм. Татын ужало но дышетско зэмос патриотъёс, асьсэ музъемзэс, выжыоссэс гажасьёс, гуртэз ӝутӥсьёс. 17 ар ӵоже ни ИжГСХА-ен кивалтэ Кун Кенешлэн 3-тӥ — 6-тӥ ӧтчамъёсызлэн депутатэз, профессор Александр ЛЮБИМОВ.

А. Любимов

— Александр Иванович, тӥ сельхозакадемиын 46 ар ӵоже ни — 1972-тӥ арын студент луыса вуиды но ректор дорозь будӥды. Кыӵе мылкыдын академилэсь юбилейзэ пусйиськоды?

— 75 ар — со сокем трос ӧвӧл. Кутэн ветлӥсь Россия школа партаос сьӧры пуксьыку, Европаын вуоно тодосчиосты-политикъёсты дасяло ни вал. Но та дыр ӵоже наукая но вуз поттонъя ми соосты сутӥм но, куд-ог ужпумъёсъя азьпалтӥм но ини.

Академимылэн сюресэз туж тунсыко но дано. 1954-тӥ арын УАССР-ысь министръёслэн кенешсы но КПСС-лэн обкомез куремъя СССР-ысь Правительство решение кутэ: Москваысь вал вордонъя зоотехнической институтэз (со Москваысь Голицыно но Успенское посёлокъёсын интыяськемын вал) Иже выжтоно. Озьы ик лэсьтэмын вал. Вань ваньбурез нуон понна 100 вагон пала кулэ луэм: сельхозмашинаос, лабораториослы чаклам оборудование, 30 вал… Иже лыктӥзы куд-ог профессоръёс но. Озьы та арын 1-тӥ сентябрьысен ик ини зоотехнической но выль кылдытэм агрономической факультетъёсын студентъёсты дышетыны кутскизы.

75 ар ӵоже академимы 60 сюрслэсь трос выпускникъёсты дасяз. Пӧлысьтызы кык куиньмосэз агропромышленной комплекс удысын ужало. Милям выпускникъёсмы — со специалистъёс гинэ ӧвӧл — зэмос интеллигентъёс. Ужаны но быгато, спортын, культураын, самодеятельностьын но вормонъёс басьто. Студентъёсмылы ялан шуисько: гуртэ мынӥды ке, котырысьтыды адямиос, будӥсь егитъёс шорады учкозы, тӥлесьтыд адӟем карыны тыршозы. Соин ик тӥ асьтэды зэмос дышетскем мурт кадь сабырлы возьыны кулэ.

Пусъеме потэ, выпускникъёсмылы луыса республикаямы утьыны луиз совето вакытъёсысь ӟечсэ — хозяйствоосты СПК амалъя возёнэз. Куд-ог улосъёсын сямен, гурт удысэз быдэсак куашкатыны ӧм сётэ. Со понна тау карыны кулэ гурт хозяйствоя академиямы дышетскем но республикаямы бадӟым кивалтӥсь луыса ужам выпускникъёсмылы но. Туннэ нуналлы Россиын йӧл поттонъя Удмуртия 3-тӥ интыын, Татарстан но Краснодар улос бере. Туж пайдаё ужаськом тылобурдо, парсь вордонын.

— Совето вакытъёсысь сельхозинститут но туала вакытысь академия трослы-а висъясько?

— Студентъёсты дасян ласянь но, преподавательёслэн тодон-валанзыя но туж зол ӝутскон шӧдӥське. Азьвыл студентъёс туж дӥсьтӥсьтэмесь вал. Али — шаплыесь, туж умой тодо, малы татчы дышетскыны лыктӥзы. Занятиос дыръя но трос юанъёс сётъяло. Луонлыкъёссы трослы йылӥзы. Студентъёсмы стажировкаосы вуыло Россилэн пӧртэм улосъёсаз, кунгож сьӧры: Швейцарие, США-е, Великобритание, Финляндие, Германие, Белоруссие. Юн кусып возиськом Венгриысь университетэн, Чехиысь Брно карысь университетэн. Ӵапак татын 19-тӥ дауре ужаз Австриысь туж тодмо биолог но ботаник Иоганн Мендель, татын ик со будосъёс вылын нырысьсэ эскериз выжыысь выжые кылись аспӧртэмлыкъёсты, азьланяз генетика наукалы инъет кылдытӥз.

Али академиямы 12 удысъя (бакалавриат) дышетӥськом: «агроинженерия», «технология продукции и организация общественного питания», «техносферная безопасность», «агрономия», «агрохимия и агропочвоведение», «зоотехния», «технология производства и переработки сельскохозяйственной продукции», «экономика», «менеджмент», «лесное дело», «землеустройство и земельный кадастр», «теплоэнергетика и теплотехника». 9 удысъя магистратурамы, специалитетъя 2 программамы вань. Нош эшшо 5 удысъя аспирантураын дышетскыны, гурт удысъя тодосчиозь будыны луэ.

Иже выжтэм Москваысь зоотехнической институтлэн юртэз

— Озьы ке но улон ӝог воштӥське, выль дышетон ӧръёс (направлениос) усьтон сярысь уд малпаськиське-а?

— Арлы быдэ кыӵе ке выль ӧръёс усьтӥськом. Шуом, алигес дышетыны кутским «Землеустройство и земельный кадастр» направлениея. Та удысъя специалистъёс шаерамы кема аръёс ӵоже кулэ луозы на. Ӝоген агроинженерной факультетамы гидромелиорацияя ӧр усьтомы. Угось туала вакытэ аквакультура азинске, туж кулэ луозы тыметын чорыг будэтыны быгатӥсь специалистъёс. Матысь дыре усьтомы сӥлез, кӧй-вӧйёсты, йӧлэз мур переработкаен вырисьёслы чаклам специализация. Таиз герӟаськемын органической (экология ласянь чылкыт) гурт хозяйство сярысь закон кутэмен. Шоро-куспо, пичи предприятиослы та удысысь специалистъёс азьланяз туж но туж кулэ луозы.

Матысь дыре преподавательёсмы Германие мыныны дасясько, отын мехатроника удысъя выль ужан амалъёсын тодматскозы. Угось вуоно арысен академиямы та ӧръя студентъёсты дасяны кутском. Али со понна программа дасяськом, выль арозь нимысьтыз лаборатория усьтом. Мехатроника — со тракторлэсь, комбайнлэсь механизмзэ тодон гинэ ӧвӧл, со электроникаез ӟеч валан, электрон амалъя ужась техникаез тупатыны быгатон. Но валтӥсь ужпум: мехатроника удысъя тодон-валан басьтэм выпускникъёсмы гурт удысын ужась роботъёсты малпаны но кылдытыны мед быгатозы. Секыт гурт ужез роботъёсын воштыны мед пӧрмытом.

Та удысъя ужась специалистъёсмы вань ини. Кылсярысь, Павел Владимирович Дородов профессор сюлмаське комбайнъёсты, тракторъёсты роботъёсты сямен ужатыны. Руль сьӧрын пукись кулэ уз луы ни, техника ваньзэ ачиз быдэсъялоз. Куд-огез кышкатске: нош сыӵе техника тӥяськиз ке? Мыдлань ужаны кутскиз ке? Ӵапак ваньзэ тае чаклан бордын ик специалистъёс тыршо: медаз тӥяськы, маке луиз ке но, югдурысь ачиз потыны мед быгатоз. Механикая кафедрамылэн та ласянь трос тунсыко малпанъёсыз.

Г. Гильмуллина

— Но луэ шат гурт удысын ваньзэ роботъёсын воштыны?

— Уг. Кулэ но ӧвӧл. Адямилэсь ӟеч кылзэ, пудоез яратэмзэ нокыӵе робот уз вошты. Но куд-ог секыт, акылес ужъёсын роботъёс туж кулэ. Соос адямилэсь ужзэ но капчиятозы, азинскон но ӝоггес мыноз. Но ваньмызлэн эсэпез луыны кулэ.

— Студентъёсты дышетэм сяна, сельхозакадемиын наукая пӧртэм эскеронъёс ортчо. Мынам тодэмея, берло аръёссэ гинэ 60 патент басьтӥды. Тросэз-а со усьтонъёс улонэ пыӵазы?

— 75 ар ӵоже гурт удысъя академиын кӧня ке поколение дышетӥсьёс-профессоръёс ужазы ни. Наукая 400-лэсь трос кандидатъёс дасямын, 40-лэсь трос — докторъёс-профессоръёс. Будэтэм тодосчиосмы асьме дорын гинэ уг ужало, мукет вузъёсын, институтъёсын но. Наукая 30-лэсь трос кандидатъёс шаерысьтымы валтӥсь СПК-осын тыршо, асьсэос хозяйствоез валто. Выпускникъёсмы милемлы ужъя пӧртэм юанъёс сётъяло, ми со ужпумъёсты эскериськом, валэктонъёс утчаськом. Пӧртэм семинаръёс, пумиськонъёс, кенешъёс — ваньмыз та юрттэ гурт удысэз азинтыны. Со дыре ик ваньмыз та выль ужан амалъёсты кылдытыны мылкыд сётэ. Озьы пудо вордон но будосъёс будэтон ласянь вормонъёсмы трос. Кылсярысь, академиысьтымы селекционеръёс кылдытӥзы «Улов» сезьы выжы. Та сорт ӟеч урожай сётэ, нырысь ик сое будэтӥзы Мичурин нимо СПК-ын. Нош табере асьме кылдытэм выжымес Россиысь 50-лэсь трос улосын будэто. Академиямы ик кылдытэмын «Пелюшка» кӧжы выжы. Со туж ӝог вуэ но муосты пӧртэм микроэлементъёсын узырмытэ. Та кӧжыез али туж яратыса куто Киров, Пермь улосъёсын, отын соин пудозэс сюдо.

Академиын берло эскеронъёсъя ик пудоез али тариен сюдыны кутскизы. Азьвыл тари кеньырез адями гинэ сие вал. Но эскеронъёс возьматӥзы: пудолы но со туж пайдаё. Со сяна, тари кӧс аръёсы но ӟеч будэ, урожайтэк ноку уд кыльы. Нош зооинженерной факультетмы пудоослы энергопротеиновой добавка малпаз. Со добавкаын кунгож сьӧрысь туж дуно дунын басьтӥськись шротъёс асьме дорын будэтэм тысен воштэмын — рапсэн, етӥнэн… Али та добавкамес хозяйствоосын туж паськыт куто, пайдаез шӧдӥське ини.

Кемалась ӧвӧл академиысь ик тодосчиосмы музъемлы вакчи дыр куспын анализ лэсьтыны амал малпазы. Соя агроном туж ӝог валаны быгатэ: кыӵе элемент музъемын уг тырмы. Ма, ми пудолы пӧртэм висёнъёслэсь вакцинаос кылдытонэн но выриськом. Нырысь учкыса гинэ, та уж капчи потэ, но котькуд пудоез нимаз чакласьком ук, кызьы солэн иммунитетэз ассэ возе, тупа-а, уг-а вакцина, мар кароно, уг ке тупа…

Али паськыт кутӥсько светодиодной лампаос. Но нокин умой-умой ӧз эскеры, кыӵе югытлыкез луыны кулэ лампалэн, пудо ассэ ӟеч мед шӧдоз, стресс медаз луы, секталазэ медаз ышты шуыса. Сыӵе эскерон ортчытэ академимы. Уж ӝоген йылпумъяськоз ни, со лыдэ басьтӥськоз, пудо фермаосты пуктыку, строительной нормаосты юнматыку. Пусйысал: ваньмыз сямен ик эскеронъёсмы наука понна гинэ чакламын ӧвӧл, соос зэмзэ но улонэ пыӵало.

С. Ермаков

— Студентъёсты мыло-кыдоесь, пӧртэм конкурсъёсы, ужрадъёсы пырисько. Тани али гинэ экономикая факультетады дышетскисьёс шаерысьтымы Национальной банклэн «Финансы и кредит» конкурсаз вормонъёс басьтӥзы, огвакытэ академиысь экономистъёсты дасясь ёзэз ворсан сярысь вераськон мынӥз ке но…

— Зэм но, АПК удысысь вузъёслы экономистъёсты дасяны ӧз ни лэзе вал. Мынам чакламея, со туж малпаськытэк лэсьтэм вамыш. Но ми та ӧрмес утьыны быгатӥм, аккредитация пыр ортчим. Зэм, та ӧръя али бюджет интыос ӧвӧл, но коньдон тырыса-а дышетске адями, бюджет чотын-а — котькудӥз азе одӥг кадь куронъёс пуктӥськом. Малпасько, гурт удысын экономистъёслы но менеджеръёслы кулэяськон будоз гинэ. Кӧня ке аръёс ортчыса, тае шӧдом. Угось мукет вузъёсын дышетскем экономистъёс гуртлэсь аспӧртэмлыксэ уг валало, соос уг адӟо хозяйстволэсь ӵуказе нуналзэ. Сыӵе валась-тодӥсь адямиосты будэто гурт удысъя вузъёс гинэ.

Национальной банклэн конкурсаз пыриськем студентъёсмы «Финансы и кредит» ӧрез бырйизы. Туала вакытэ со кулэ. Но со сяна, асьмелэн республикаямы маркетингъя ужасьёс но уг тырмо. Переработкаен вырись покчи, шоро-куспо предприятиос ёрмо ӟеч маркетологъёслы. Нош азьланяз, кызьы пусйи ни, органической гурт хозяйство сярысь закон пыӵамъя, сыӵе ёрмон эшшо юн шӧдӥськоз. Тросэз хозяйствоос понна маркетинг азьлань ӧтись флаг выллем луоз. Угось продукция поттӥсьёслы туж кулэ луоз асьсэ басьтӥсьсэс шедьтыны, вуззэс со басьтӥсь доры вуттыны. Эн малпалэ, гурт хозяйствоын маркетолог — со вуз карись шуыса. Ӧвӧл, со специалист, кудӥз вӧлмытыны тырше ӟеч продукциез. Со экономика сярысь гинэ уг сюлмаськы, со малпаське продукцилэн котыр ласянь ӟечлыкез сярысь. Со бордысь потоз, макем калык басьтоз асьме вузмес.

— Макем мыло-кыдо али егитъёс сельхозакадемие дышетскыны лыкто?

— Одӥг кылын уд вера. Вань сыӵе удысъёс, кудъёсызъя ужасьёс республикамылы туж кулэ. Но со ужъёс даноосыз (престижнойёсыз) пӧлы уг пыро. Малы? Шуом, котькудӥзлы ик уг кельшы фермаысь зын. Но кызьы воштод отысь омырез? Луэ вентиляция пуктыны. Но кинлы ке эшшо маке уг кельшы. Соин ик дорамы сыӵе удысъёсы лыкто зэмзэ но асьсэды гурт хозяйствоен герӟаны малпасьёс.

Мон оскисько: ортчоз кӧня ке дыр, уждун тырон ласянь воштӥськонъёс луозы. Али, жаляса верано, сиён-юон, вуз поттӥсь адямилэн уждунэз, переработчикен ӵошатыса, пичигес. Россиысь улосъёс пӧлын Удмуртия нырысьёсыз пӧлын кутӥз АПК удыслы кадръёс дасянъя программа. Озьы вузъёсты, ссузъёсты йылпумъяса гуртэ ужаны лыктэмъёслы коньдонэн но, улон инты пуктон ласянь но юрттэт сётӥське. Нырысь вакытъёсаз егитъёслы со туж ӟеч юрттэт луэ. Нялтас вераса, арлы быдэ сельхозакадемимес очно гинэ 650-700 студент йылпумъя.

2-тӥ корпус

— Россиысь гурт удыслэн ӵуказе нуналыз вань-а?

— Россилэн ӵуказе нуналыз — гурт. Кӧня ке дыр ортчыса, каръёсысь оглюкетэз калык улыны гуртъёсы кошкоз, аслэсьтыз хозяйствозэ нуоз. Мон уг вераськы, котькудӥз фермер луоз шуыса. Но гуртын котькин ассэ сюдыны быгатоз. Сюресъёс пумен лэсьтӥсько. Озьыен, гуртлэн луонлыкъёсыз паськытало. Собере, гуртын аслэсьтыд нылпиостэ пыд йылазы султытыны, ужлы дышетыны капчигес.

2010-тӥ арын Россиын кутэмын вал гурт хозяйствоя доктрина. Туннэ нуналлы со быдэстэмын, шуыны луэ, чакламлэсь пичигес люкетсэ гинэ лэсьтыны ӧз луы. Республикаямы гурт удысын вуз поттон йылэ. Али валтӥсь ужпум: со поттэм вузмес Россиын но кунгож сьӧрын вузаны мед быгатом. Нош со понна сюлмаськоно ӟечлыкез сярысь.

Европалэсь, Америкалэсь укыр адӟем кароно ӧвӧл. Продукция поттон амалъёс кык пӧртэм луо ук: ӝогомытыса поттон амал (интенсивный метод) но традиционной, инкуазен огкылысь луыса. Та 2 амалъёсысь зарни виссэ шедьтоно. Юнме шат Европаын али экология ласянь чылкыт продукция поттонлы сыӵе бадӟым саклык висъяны кутскизы. Но со понна соослэн музъемзы уз тырмы. Нош асьмелэн — маке мында. Соин ик Россия нырысь радъёсы потыны кулэ. Нош Удмуртиын азьлане потыны тужгес ӟеч луонлыкъёс. Чаклалэ ай асьтэос, Голландия быдӟалаезъя 42 сюрс квадрат иськем (Удмуртия быдӟа). Отын 15 миллион улӥсез, асьмелэн — 1,5 миллион. Соослэн 1 миллион йыр сюро таза пудо вордо, нош асьмелэн — 130 сюрс гинэ. Тӥни кытын резервъёсмы! Валамон ук, пичи интыын сомында пудо вордо бере, соослэн ваньмыз со — синтетика. Бен, куд-ог учыръёсъя кунсьӧръёслэсь адӟем кароно ик, озьы ке но пудомес сюдоно асьме будэтэм чылкыт, зэмос сиён-юонэн. Улоно, инкуазен тупаса.

— Асьтэос инкуазе ӵем-а потаськоды? Вордӥськем Кизнер ёросады вуылӥсь-коды-а?

— Вордӥськем гуртэ, Анык, кемалась ӧвӧл ни. Но солэн бервылаз вуылӥсько, атай юртмы интыысь льӧмпуос котыртӥ поръясько. Мон ӵужанаеным, ӵужатаеным улӥ. Школае 8 иськеме Короленко гуртэ ветлӥ, соин куасэн туж ӟеч бызьылыны, великен ӝог ворттылыны дыши. Пичи дырысен ик трос муш вордӥськом вал. Али но тодам на, кызьы мушъёсмы черлазы. Ӵужатай вань умортоосты бичаз, шур дуре одӥг интые нуллӥз но сутӥз. Озьы со гуртысь мукет муш семьяосты алясь висёнлэсь утиз. Нош собере толбыт выль умортоос лэсьтӥм. Гужем монэ вӧзысь гуртысь воргорон дышетӥз кыр мушъёсты кутылыны. Озьы мон гуртысьтымы 3-16 иськемысь муш семьяосты кутылӥ, доре нуллӥ. Пасекамы нош ик улӟиз.

Нялтас вераса, сельхозакадемиын ми муш вордӥсьлы но дышетӥськом. Быдэс Россиын 6 адями гинэ муш вордонъя доктор луэ. Со пӧлысь 2-сэ докторез дасяз милям академимы. Удмуртиын муш вордыны туж ӟеч луонлыкъёс, татын кадь мӧль бичанъя турлы-турлы куакъёс, турынъёс бускельёсмылэн ӧвӧл. Соин ик котьма мед шуозы, но Удмуртиысь чечы, бускель республикаосын ӵошатыса, ӟечгес.

Нош оглом гурт хозяйствоя шуысал на: ваньмыз кутске музъем бордысен. Асьмелэн муосамы уг тырмо пӧртэм минерал ватсэтъёс: цинк, кобальт но мукет. Соин нырысь ик сюлмаськоно музъемъёсмес узырмытон сярысь. Музъемысь тае басьтозы отын будӥсь турынъёс, нош турынъёсты, соосын лэсьтэм ватсэтъёсты сиёз пудо — чеберскоз, ӟеч йӧл сётоз. Собере та йӧл вуоз адямилэн ӝӧк вылаз. Тӥни сыӵе со — инкуазен сётэм сюрес.

Елена Миннигараева

Ангелина Снигирева
By Ангелина Снигирева Ноябрь 26, 2018 15:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<