Скал вераез мисько синвуэн

Ангелина Снигирева
By Ангелина Снигирева Ноябрь 2, 2018 11:35

Пичи Пурга ёросысь Яган-Докъя гуртысь «УАССР-лы 10 ар» хозяйство нош ик банкротэн ялэмын. Татчы 2013-тӥ арын гинэ, куашкась хозяйствозэс ӝутыны шуыса, выль кивалтӥсь вайизы вал. Хозяйствоез киултыны но вузаны малпасьёс кырныжъёс кадь нош ик бергало.

Л. Петухова

1 скаллэсь — 5 литр йӧл

Яган-Докъялан школа, нылпи сад, участковой больница, магазинъёс — маиз но ӧвӧл. Эшшо ке вольыт асфальт, бадӟым ӵыпет. Улэмъя улэмед, ужамъя ужамед потоз. Татысь гурт хозяйство но палэнысен юн адӟиське. Гаражазы ог 15 тракторъёс, комбайнъёс сыло. Тӧдь-тӧдь буям фермаосазы 1 сюрс 100 пала сюро таза пудо вордо. Но гуртысьтызы уноез калык, мукет азьын уж шедьтэ ке, кема малпаськытэк, пегӟе, хозяйстволэн банкрот кылемезлэсь кышкаса. Фермаын ужасьёс пусъемъя, 200 скал вузаны дасямын ни. Оглом хозяйствоын ог 870 йыр скалзы. Но таос начаресь. Кылсярысь, Яган-Докъялась бригадаын 400 скал ке, одӥгезлэсь шорлыдын нуналаз 5 литр сяна йӧл уг кыско. Ар кутсконын гинэ 10-11 литр люкаськылӥз вал. Рос-прос ужась дояркаоссы куашкась хозяйствоысь кошкизы угось.

— Постоянной ужасьёс ик ӧвӧл ни, — шуэ бригадаен кивалтӥсь Любовь Петухова. — Вӧзам одӥг оскымон юрттӥсе вань на. Мукетъёсыз арняен-арняен юо. Скалъёссы кыскемын-а, ӧвӧл-а — уг учко. Ачим интыязы султӥсько. Синвуэн скал вераосты миськисько. Кытчы пырод на? Пудо жаль. Ваньзы маститэн курадӟо ни, соин ик йӧл но ӧжыт сёто.

Любовь Николаевна хозяйствоын Казаньысь пудо эмъянъя институтэз йылпумъямез дырысен 24 ар тырше ни. Табере ачиз першал но, скал бызьылытӥсь но, бригадир но, доярка но. Ужасьёссы тырмымтэен, отпускын но шутэтскыны рос-прос ӧз кылды.

Ӝутскыны ӧз пӧрмы

Туннэ югдурзы капчигес ай. 2013-тӥ арын сиён ӧвӧлысь пудозэс нуналаз 1 пол сяна уг но сюдо ни вал — колхозлэн пунэмъёсыз соку 120 миллион манет котырын люкаськемын вал. 1 миллион манет тыр ужасьёслы тыриськонэз вал. Кивалтӥсез кредитъёс басьяз, нош хозяйствозэ ӝутон, бусыоссэ кизён сярысь ӧз сюлмаськы. Секыт югдурысь поттон вылысь хозяйствое Сергей Пивоваровез вуттӥзы. Соку калыклэн сюлэмъёсазы оскон кенжиз. Лейкозэн черлам скалъёссэс но та аръёс ӵоже таза пудолы воштыны пӧрмытӥз, аналтэм бусыос гыриськыны кутскизы. Тани туэ но толбыт пудоез сюдымон сиён дасяны быгатӥзы. Нош табере выльысь чыртыберазы шуккизы: тӥ банкрот, пе. Азьвыл люкаськем пунэмъёссэс пытсаны ӧз ворме, таин сэрен субсидия басьтыны ӧз быгатэ. Хозяйствоетӥ частникъёс утчаськыса ветло ни. Пудоез, техникаез басьтыны мылкыдъёссы вань. Нош хозяйстволэн 200 миллион манетозь будэм пунэмъёсыз. Хозяйство туннэ выт тыронъёссэ но пытсаны уг быгаты. Аукцион ноябре ортчыны кулэ. Сергей Пивоваров верамъя, дунтэм дунын басьтыны дась адямиос вань. Но дунтэм дунын басьтон ӵемысь асьсэ кисыязы барыш поттонлы, гидъёсты, техникаез вузанлы-качанлы пӧрме.

Техниказы вуж ни

Кун Кенешысь КПРФ фракцие пырись депутатъёс туннэ Правительствое но, Кун Кенеше но вазисько хозяйствоез утён вылысь. Хозяйствоез палэнысь лыктэм адями басьтӥз ке, калык понна уз сюлмаськы, шуэ фракциен кивалтӥсь Алексей Конорюков. Пичи Пурга ёросысь Норъя гуртысь хозяйствоез озьы частник быдтӥз ни: дунтэм дунын басьтӥз, отӥяз фермаысь кыед кошкон дырдыоссэ гинэ но кесяса, бетон плитаосты вузаз.

Кин кинэ кыске гуэ?

— Быриськомы шуыса, сюлэм вӧсь, — шуэ Любовь Петухова. — Милемыз городэ ужаны уз басьтэ ни — пересь карозы. Городэ интыяськемлэн но пайдаез кыӵе? Нылпиосмы школае ветло. Кин соосты гуртын чаклалоз, сюдоз? Быдтыны кема ӧвӧл, нош пудо таръяны ой-ой-ой. Мар татын луоз? Лушкаськыса гинэ ветлозы на…

Нокинлы номыр кулэ ӧвӧл — ёросысь кивалтӥсьёслы но, хозяйствоысь специалистъёслы но. Ужасьёслы азьланяз планъёссэ нокин уг вера.

— Быриськом ке, быдтэ вал, иське. Кельтӥськоды ке, умой пудоез кельтом, умой доярка шедьтом но рос-прос ужаны кутском. Нош тазьы ужаса, доход уд люка, — шуо гуртоос.

Парсь фермаязы югдур эшшо секытгес. 2000-тӥ аръёслэн кутсконазы татын 4 сюрс парсь вордӥзы. Али 800 йыр кылемын. Сиёнзы йӧназ ӧвӧл, шуо, таин сэрен, пе, парсьпиос уг будо.

Зэм, куд-огез бырыны кутсконзэс валатэк но кылизы. Кылсярысь, тракторист Пётр Романов шуэ:

— Уждун дыраз тыро. Соин ик ум оскиське кадь, хозяйство быроз шуыса. Гужем вылтӥ 30 сюрс манетлэсь трос басьямы. Милемыз утёзы кадь потэ.

Ачиз со хозяйствоын 8 ар ужа ни. Эшъёсызъя городэ ӧз кариськы — мынон-ветлонэз вань, гуртын аслад азбаред. Нош гаражен кивалтӥсь Иван Спиридонов воксё но туэ феврале гинэ хозяйствое вуиз. Со татчы нуналлы быдэ Аксакшурысь ветлэ: бензинлы быдтэм уксёзэ хозяйство берыктэ. Бригадир шедьтымтэысьтызы но, Иванэз татчы ӧтизы. Ачиз со 2015-тӥ арын гинэ Ижысь гурт удысъя академиез йылпумъямын. Солэсь азьло «Аксакшур» СПК-ын ужамын, но отын уждун ӧз кельшы. Нялтас вераса, егитъёсты Яган-Докъяысь шер пумиталод. Практикае вуэмъёс гинэ ке шат трактор сьӧры пуксё.

И. Спиридонов

— Азьвыл совхоз турынэн но, ю-нянен но юрттэ вал, калык но талы луыса совхозын ужалляз, — шуэ Иван Спиридонов. — Табере сыӵе симбиоз быриз. Егитъёс йырзэс тапала уз но берыктэ ни: пельысь пеле кылӥське ук совхозлэн секыт улэм-вылэмез. Совхоз нылпимес сӧроз, юись кароз, шуо. Пиналъёссэс городэ интыяны выро.

Ачиз гараже тупатъяны пыртэм 5 тракторъёс котыртӥ гожеръя, мур лулӟылэ. Берло дыре хозяйство бадӟым техника басьтыны ӧз быгаты. Самой вылезлы комбайнзылы 18 ар. 12 метръем усы туэ басьтӥзы ик. Солэсь азьвыл — 2 пичи трактор, но со пӧлысь огез ялан тӥяськылэ.

— Татчы ужаны лыктэмелэсь азьвыл тодӥсько вал, югдур секыт шуыса. Ужаны кутскеме бере эшшо умойгес адӟи: уксё номырлы уг тырмы, нош дунъёс будо, — вера Иван Спиридонов. — Пенсиосъя фондэ но налоговое отчислениос уг келяло. Кредиторъёслы бадӟым пунэммы, шуо. Но ваньмы шыпыт улӥськом — пиос вераськыны уг ярато. Но мукет ласянь, хозяйство быриз ке, тросэз ганяк шокчозы, дыр. Бурдаз ыбем лудӵӧж кадь улӥськомы. Пал бурдыныз, лобӟыны турттыса, кокаське, интыяз берга. Ыб вал — пӧйшурась уг шедьы. Эх, курадӟе…

— Ыбыны капчигес шат? — юасько.

Берло дыре хозяйствомы страшно нерентабельной луиз. Колхозэ вуэм техникаез одно чаклано, утялтоно. Тракторлэсь тани котькуд 500 моточас ужамез бере вӧйзэ воштоно. Нош маин? Ӟеч бригада ӝытлы быдэ техникаез учкыны кулэ. Нош кытын милям сыӵе бригада? Совето Союзысь потэмъёс ужало. Маке куашка ке, вай выльзэ, шуо. Одӥг нуналэн улӥськом. Кышкаса-а возьмаськом аукционэз? Кыӵе инвестор луоз ай. Адямилэн татчы уксёзэ сётэмез потӥз ке но, со быръёз умойёссэ ужасьёсты, нош юисьёсты уллялоз. Адямиослэн ужаны мылкыдзы озьы луысал.

Елена Сараматова

Туспуктӥз Максим Егоров

Ангелина Снигирева
By Ангелина Снигирева Ноябрь 2, 2018 11:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<