Сэпын кылдоз кунокуа

Ангелина Снигирева
By Ангелина Снигирева Ноябрь 8, 2018 11:31

4-тӥ ноябре, Калык огазеяськон нуналэ но Удмуртилэн кунлык басьтон нуналаз Удмуртилэн Тӧроез А. Бречалов, Кун Думаысь депутат А. Исаев Эгра ёросэ вуылӥзы.

Кивалтӥсьёс Сэпын

Эграысь «Нефтяник» культурая юртлэн сценаез вылысен Александр Бречалов нырысь ик ӟечкылаз ёросысь адӟем карымон ужасьёсты — данъян грамотаос, дано нимъёс басьтӥзы пудо вордӥсьёс, нянь будэтӥсьёс, культура, эмъян но мукет удысъёсын тыршисьёс.

— Шаермес азинтон вылысь азямы бадӟымесь ужпумъёс пуктӥськом, — шуиз Тӧро, сӥё-дано ужрадэ люкаськемъёслы вазиськыса. — Малпанъёсмес быдэстон вылысь тӥ, интыосын улӥсьёс-ужасьёс, туж трос лэсьтӥськоды. Таин ӵош шӧдӥське Россилэн юрттэмез но. Улосмылы ватсаса 21 школа автобус но 10 «скорой» машина висъяны чакламын. Туэ асьмеос басьтӥм ни туала куронъёслы тупась 3 эмъян комплексъёс. Россиысь Правительствоен уртче чакламы, кыӵе юрттэт луоз шаерысьтымы эмъян удыслы матысь дыре — тупатъян ужъёс мынозы больницаосын, вуоз выль эмъян тӥрлык. Ваньмыз со потэ ог-огмес валаса ужаны быгатэммы бордысь. Удмуртиын туж эшъяськыса уло пӧртэм выжы калыкъёс. Сям-йылолъёссы, культуразы, осконзы пӧртэм ке но, соос огъя мылкыдын басьтӥсько огъя ужпумъёс борды — со туж умой.
Огъя мылкыдын ужамлэн одӥгез емышез — бырем гуртъёслы сӥзем музей. Та тунсыко проект кылдӥз Сэпын. Ёросэ потакузы, Удмуртлэн Тӧроез А. Бречалов но Кун Думалэн депутатэз А. Исаев отчы кожазы, шумпотӥзы гуртоосын ӵош.
Кызьы культура удысын коньдон поттоно, кызьы интыысь бюджетэз юнматоно — Сэп палъёсын табере туж умой тодо. Нялтас вераса, «Бырем гуртъёслэн калык музейзы» та нуналъёсы эшшо 10 миллион манет грант басьтӥз — озьыен, малпанъёссэс улонэ пыӵатыны быгатозы.
Нош малпанъёссы соослэн уг бырыло, шӧдске. Вылаз ик, соосты улонэ пыӵатыны мылкыдзы туж бадӟым. Музей кылдытэмзылэсь азьло соослы уксё висъяны трос пол пумит луылӥзы. Но гуртоос ӧз юскиське — выль но выль конкурсъёсы пыриськылӥзы, асьсэ сярысь веразы. Озьы Потанинлэн фондэзлэсь грант утӥзы! Озьы кылдытӥзы музейзэс!
Нош табере, пе, кулэ на вал куноослы шутэтскон корка. Вӧзаз уз люкеты горд сюйлэсь пӧртэм тӥрлык лэсьтон азбар.
Удмуртилэн Тӧроез но, Кун Думалэн депутатэз но тае умоен гинэ лыдъязы.

Сэпын музей лэсьтӥсьёс

Гончаръёслэн азбарзы вань Суздальын, — вераз Александр Бречалов. — Вераськом, ку сэпъёс отчы мыныны быгатозы шуыса — мон тӥледыз келяло. 2-3 нунал ӵоже учкоды, кызьы соос отын та ужез радъязы. Собере коньдон но тырмыт шедьтом, проект ӝыные медаз кыльы, йӧн-йӧн мед луоз шуыса.
Музейын ужасьёслэн малпамзыя, горд сюен вырисьлэн мастерскоез вашкала дыръёсы кадь мед луоз. Кылсярысь, горд сюйлэсь арбериосты пыжон гур, пе, музъем улын луыны кулэ. Одӥг мастерзы вань ни — Андрей Лекомцев, гончарлэсь ужзэ со туж умой тодэ. Зэм, проектъя горд сюйлэсь арбериос лэсьтыны 3 муртэ дышетыны кулэ. Озьыен, специалистъёсты утчалозы на.
Нош куноослы шутэтскон корка пуктыны кутскозы ни вуоно арын. Отын ӧжытсэ 10 комната луоз, шуо музейчиос. Эгра ёрослэн йырыз Александр Чирков верамъя, корка пуктонэ кызьы кунлэн, озьы ик инвесторлэн уксёзы кутэмын луоз. Корка улэ музъем дась ни. Али коньдон сётӥсь муртэ утчало, оско, тол ӵоже со шедёз шуыса.

Сергей Захаров

Туспуктэм басьтэмын http://www.udmurt.ru/ но Татьяна Мосовалэн «ВКонтакте» вотэсбамысьтыз

Ангелина Снигирева
By Ангелина Снигирева Ноябрь 8, 2018 11:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<