Нянен гинэ дано ӧвӧл

Удмурт Дунне
By Удмурт Дунне Ноябрь 8, 2018 12:08

«Элькуновидение-2018» конкурслы йылпумъянъёс лэсьтэмын — 4-тӥ ноябре тодмо луизы вань вормисьёслэн нимъёссы. Туэ валтӥсез герой, кизили — Дэбесысь Артемий Гаврилов!

А. Гаврилов

Кин шаплы?

Артемий Гаврилов пумысен, паймоно кадь, ваньмыз огкылысь луизы: ёросъёсысь ыстэм данакез дунъясьёс та нуналэ ик асьсэлэсь вылӥ баллзэс сётӥзы дэбесъёслэн номерзылы — Артемий аслыз синмаськытӥз тусбуеныз, чылкыт кырӟаменыз, кырӟанэзлэн сюлме пыӵась, малпаськытӥсь, нялмыт крезьгуреныз но удмуртлыкез данъясь кылъёсыныз. Зэм, кылъёсыз укыр кесяськисесь (пафосноесь) потӥзы, мурдалазы бордын ужаны луоно на вылэм.

Профессионалъёслэн жюриысьтызы 5 пӧлысь 3-ез озьы ик вылӥ дунъет сётӥзы Дэбесысь номерлы. Озьы та ёрос, «Мон — удмурт!» кырӟанэныз (кылъёсыз С. Федуловалэн, крезьгурез О. Перевозчиковалэн) жюрилэсь тужгес трос — 258 — балл люкаса, вормисе потӥз. Мукетъёсыз конкурсэ пыриськисьёс 100 баллы но солэсь трослы бере кылизы. «Удмурт Кенеш» огазеяськон вормисез пусъёз 40 сюрс манет кузьымен!

Зэм, дэбесъёс укыр вазь буйгатскизы, асьсэ кырӟасьсы понна СМС-куаразэс ӧй ке жалясалзы (оглом 765 балл люкаськиз), соослэн луонлыксы кылдысал на ёросазы эшшо 100 сюрс манет тыр сертификат кыскыны.

Со понна та ласянь шаплы кариськизы вавожъёс. Н. Ефремовалэн но Е. Дементьевалэн «Сёт мыным, Инмаре, нылкышно шудбурдэ» кырӟанзы понна соос 941 куара сётӥзы! Озьы Вавож ёросысь Екатерина Краснова басьтӥз учкисьёслэсь кузьымзэс — 15 сюрс манет. Тазэ кузьымез висъяз Можга ёросысь фермер Галина Белозёрова. Жюрилэсь баллъёссэ но учкисьёслэсь вань куараоссэс ватсаса, вавожъёс оглом 1 сюрс 41 балл люказы но эшшо одӥг бадӟым кузьым утӥзы — Удмуртиысь Лулчеберетъя но туризмъя министерство 100 сюрс манет тыр сертификат сётӥз гуртысь клубез азинтыны (крезьгуро инструмент яке костюмъёс басьтыны).

Кылъёс но гуръёс

Та конкурсын котьку нимысьтыз пусъё тужгес ӟеч крезьгур но текст гожтӥсьёсты. Таоссэ быръё крезьгурчиос но кылбурчиос. Куронъёс, огласянь, туж огшорыесь: крезьгур удмурт шӧмо мед луоз. Но лушкамтэ! Бен, бен, профессионалъёс верамъя, арысь аре сцена вылысен чузъясько асэстэм крезьгуръёс, плагиатъя нимысьтыз программа луысал ке, пӧлысьтызы 90 процентэз сцена вылозь ӧй вуысалзы, дыр. Но радъясьёс соосты жаляло.

Зэм, туэ Ижысь Индустриальной ёросэз, финалэ потэмез вылысь но, палэнтӥзы, угось тодмо луиз: кырӟанзы чик но выль вылымтэ. Индустриальной ёрос «Шулдыр азьын» кырӟанлэсь авторъёссэ сямен пусъем Владимир Корепанов кылбурчиез но Сергей Черезов крезьгурчиез. Но конкурсэз ортчытӥсьёслы вазиськизы Глазов ёросысь культура ёзын ужасьёс, кырӟанлэн зэмос авторъёсыз луо Валерий Корепанов но Геннадий Матвеев, пе. Оргкомитет вазиськиз шаерысьтымы Крезьгурчиослэн огазеяськонзылэн кивалтӥсезлы Марина Ходыревалы, эскерон ортчытыны курыса. Марина Германовна валэктӥз: та кырӟанлы крезьгур гожтӥз Геннадий Матвеев, Сергей Черезов аранжировка гинэ лэсьтӥз. Кырӟан потэмын Г. Матвеевлэн «Вае уломе валче» кырӟанъёсын сборниказ («Удмуртия» издательство, 1991-тӥ ар). Нош конкурслэн условиосызъя выль кырӟан гожтэмын луыны кулэ ёросын улӥсьёсын яке отын вордскем адямиосын. Жаль, Полина Невоструева кырӟась туж яркыт адӟиськиз вал, но конкурслы дасясьёслэн «сьӧлыкенызы» йырин учкисьёслэн син азьысьтызы усиз…

Е. Краснова

Зэмзэ вераса, озьы ик палэнтыны луоно кадь такмак манерен кырӟасьёсты но — соос арысь аре луо. Кылсярысь: Шуд ай золгес, арганчи,/ Кисьты тон шулдыр гурдэ./ Мылкыдмес но кар капчи,/ Возьматы быгатэмдэ… Соин валче малпасько, профессионалъёс ужрадэ финалысен ӧвӧл, быръён (отбор) вакытысен пыриськыны кулэ. Угось туж трос юанъёс текстъёсъя но. Кылсярысь, туэ вал тодмо удмурт кылбурчилэсь Михаил Федотовлэсь кылъёссэ асэстыса кылдытэм текст: Аслым ачим гинэ — чебер. / Юг сюлэмын ӝуа шыртыл. / Оло паллян, оло шонер, / Но буш ӧй бырйылы мон кыл… Кырӟасьёс малы ке кылъёслы саклык воксё уг висъяло, крезьгурен согом но тырмымтэоссэ нокин уз вала кожало, лэся. Учке асьтэос: Эх, кыӵе потэ на вал / Урамтӥ мон ортчысал… Ӵуказе урам кузя/Уг но ветло ни скалъёс. Яке: Кӧня пол йыгаськи, / Киме тӥяса, мон тӥ доры… Пыр тӧдьы, секыт лымы пыры сюлэмез вандылӥз… Кужымме чурыт киям кутӥ… Нялтас вераса, та кырӟанъёслэн крезьгуръёссы чик но уродэсь ӧй вал, но кылъёсыз, вождэс эн вае, пелез тыпак пытсало — мар сярысь со? Оло, киме тӥятозь, ӧсъёсад йыгаськи шуыса валамонгес, ӧвӧл-а?

Мон валасько, туала вакытэ чылкыт гожъяськыны быгатымтэ понна, оло, курланы но уг яра ни — школаосын удмурт кылэз капчиятэм программая дышетӥськом яке воксё ум дышетӥське, но одӥг ужпум, куке асьмеос куспамы суро-пожо вераськиськом, мукет — куке конкурсэ (!) пыриськиськом. Уг ке луы вольыт малпаськемед-гожъяськемед — кур кинэ ке волятыны, малпасько, шумпотыса юрттозы. Нош асьмелэн, янгышсэс валаса вылысь но, диктофонэ-камерае пальпотыса шуо: «мон — чистокровной удмурт, но просто говорить не умею»…

Зэмзэ вераса, текстъёс пӧлын кыӵе ке шедевръёс ӧй вал. Куд-огезлэн кылъёссы текстэ оломар сямен куямын, валаны уг луы, нокыӵе согласованиез но, ма, дырыз гинэ но ӧвӧл. Сямыз понна рифма нерге гинэ пуктылэмын.

Финалэ потэм 12 авторъёс пӧлысь мон ас поннам висъяй 3-зэ: Воткинскысь Л. Ивановалэсь, Кияса ёросысь Н. Бочкарёвалэсь, Вавож ёросысь Н. Ефремовалэсь. Кылбуръёсты ми нимаз учким туж тодмо егит кылбурчиен Богдан Анфиногеновен. Малпай вал, оло, солэн мылкыдыз мукет луоз? Оло, мон кышномурт луэменым таоссэ висъяй? Паймоно кадь — Богдан озьы ик бырйиз Н. Ефремовалэсь «Сёт мыным, Инмаре, кышномурт шудбурдэ» текстсэ. Нина Максимовна та конкурсын одӥг пол вормылӥз ни вал. Малпай вал, конкурсэз ортчытӥсьёс алозы одӥг муртлы кык пол вылӥ дунъет сётыны. Но «Мынам Удмуртие» телекомпаниын ужасьёс туж зэмлыкоесь вылӥллям — быръеменымы соглаш кариськизы.

«Тужгес усто крезьгур» луиз Кияса ёросысь В. Бочкарёвлэн ужез. Тазэ номерез нимысьтыз пусйыны кулэ. Конкурсэ пыриськиз уго быдэс семья. Анайзы Надежда Бочкарёва гожтӥз кылъёссэ, атайзы Владимир — крезьгурзэ, Мария нылзы кырӟаз. Али со Казаньын консерваториын дышетске. Вордскем палъёсты яратон, дорлэсь мӧзмон сярысь туж шуныт кырӟан. Тужгес удмурт шӧмо крезьгур, пусйиз Марина Ходырева. Жюрилэсь ӟеч дунъет 2-тӥ арзэ басьтӥз ни Воткинск городысь кырӟан гожъясь Любовь Иванова, конкурсэ пыриськиз нылыз Лариса Загуляева. Ӧжыт гинэ удалтон уг тырмы, лэся, вормыны.

Туэ понна вормисьёс тодмо. Но «Мынам Удмуртие» телекомпания та ужзэ азинтэ, озьыен, кылдозы выль удмурт кырӟанъёс. Вӧлмозы-а соос калыке, тодом ни, радио кылзыса.

Вормись:

Артемий Гаврилов, Дэбес ёрос.

«Учкисьёслэн синмаськонзы»:

Екатерина Краснова, Вавож ёрос

«Устоез крезьгур»:

Владимир Бочкарёв, Кияса ёрос.

«Устоез кылбур»:

Нина Ефремова, Вавож ёрос.

Жюрилэсь тужгес трос балл люкам кырӟасьёс:

Дэбес ёросысь Артемий Гаврилов (258),

Глазов ёросысь Юрий Князев (142),

Вавож ёросысь Екатерина Краснова (100),

Можгаысь «Ӟаныкай» дуэт (78),

Агрыз ёросысь (Татарстан) Марина Матвеева (68).

Зинаида Рябинина

Туспуктӥз Максим Егоров

Удмурт Дунне
By Удмурт Дунне Ноябрь 8, 2018 12:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<