Ми улонэз яратӥськом!

Ангелина Снигирева
By Ангелина Снигирева 19 ноября, 2018 10:18
Удмуртиысь «Независимость» группа

Ижын ортчизы дуннеысь 2-тӥ Парадельфийской шудонъёс. Искусство удысын вожвылъясько сӧсыр усточиос. Россиысь 50-лэсь ятыр улосысь сяна, эшшо 21 кунысь куноос вуизы.

Ижысь циркын ужрадэз усьтыкуз, Удмуртилэн Тӧроез Александр Бречалов вераз:

— Мон данъяськисько, Удмуртия бордысен кутске тӥляд Россиен тодматсконды. Тӥ кужмогес луиды, улонады шуг-секытэн пумиськыса, соин ми паймиськом но данъяськиськом тӥляд вормонъёсыныды. Оскисько, тӥледлы татын кельшоз, милям республикаямы выль эшъёс шедьтоды. Тау Удмуртиын улӥсьёслы куно пумитаны быгатэмзы понна, уката но тау волонтёръёслы.

Парадельфийской шудонъёсын ӵошатско искусствоысь 8 пӧртэм ӧръёсъя — театр, эктон, кырӟан, гожъяськон, суредан, цирк, фото- но видеоискусство, киын возьматыса кырӟан. Озьы 29 номинациын быгатонлыкъёссэ возьматон понна вожвылъяське 1 сюрс 500 адями.

Удмурт шаермы та шудонъёсты ортчытон понна вожвылъяськиз Россиысь трос мукет улосъёсын. Правительстволэн Тӧроезлэн воштӥсез Анастасия Муталенко верамъя, ужрад протокол вылын гинэ уг ортчы, зэмзэ но трос сюлмаськоно адямиосты нуон-ваён, интыян, ӵошатсконъёсты радъян пумысен. Тани ужрадъёс гинэ 12 интыын ортчо. Та бадӟым шудонъёслы нимысьтыз коньдон висъямын Россилэн Президентэзлэн грантъёсъя фондысьтыз.

— Мон шумпотӥсько, Удмуртилэн Тӧроез милемлы оскиз но шудонъёсты татын ортчытыны басьтӥськиз. Ваньмыз уз но быгатэ кылдытыны сыӵе оргкомитет, кытчы 30 министръёс огазеямын. Ижын ортчем шудонъёсты азинтыса, 2019-тӥ арын Новосибирскын радъяськозы нылпиослэн Парадельфийской шудонъёссы, — шуиз Россиысь Парадельфийской комитетлэн президентэз Лидия Абрамова.

Ижысь эктонъя «Бродвей инклюзив» студия

Возьматы астэ эктыса

Парадельфийской шудонъёс уката ик бадӟым азинскон сётыны кулэ Удмуртиысь сӧсыр пиналъёслы. Асьмелэн сыӵе нылпиосмы 5 сюрслэсь уно. Та быдӟа ужрадэз адӟыса, соослэн но мылкыдзы-кужымзы мед луоз улонын асьсэды шедьтыны, калыке потыны.

Конкурсэ пыриськисьёсты котькуд удысын дунъяло зэмос профессионалъёс. Соос пӧлын Удмуртиысь но кунгож сьӧрысь специалистъёс. Тани «Хореография» номинациын пӧртэм удысъя эктӥсьёс вал: балет но, эстрада но, калык эктон но. Оглом 50 мында коллектив вожвылъяськиз. Ӟуч драмая театрлэн сцена вылысьтыз эктонъёсты 2 нунал ӵоже учкыны луиз.

Жюриын ужаз Сербиысь Златко Стойкович, дораз со спорт эктонъя федерацилэн президентэз луэ. Судьяын ужан опытэз 30 ар люкаськемын. Но Парадельфийской шудонъёсын дунъясь нырысьсэ луэ. Репетициосты адӟыса, мылкыдыз кылдӥз: Удмуртиысь ужрадын туж зол эктӥсьёс ӧвӧл, шоро-кусполэсь ӧжыт вылӥгес дунъяны луэ, пе. Озьы ке но вань кинлэсь дышетскыны: Санкт-Петербургысь коляскаен эктӥсьёс Европаысь ӵошатсконъёсын но вормыло.

Соиз, оло, зэм. Сӧсыр эктӥсьёс куддыръя уг вутто ӵош ӝутскыны, пуксьыны, кизэс-пыдзэс куасалтыны. Со понна эктонзылэн кыӵе ке мукет кужымез вань. Тани Архангельскысь «Простор» группалэн номерез нимаське «Одиночество души».

— Та эктон ми сярысь, ӵош улыны быгатон сярысь, — вакчияк вера кивалтӥсьсы Ольга Аксёнова.

Соос бӧрсьы сцена вылэ потэ Удмуртиысь «Независимость» группа «Ми улонэз яратӥськом» номерен. Ӝыныез эктӥсьёссы коляскаын пуко: кинлэн ке пыдъёсыз сӧсыр, нош огезлэн пияшлэн мугорыз ӝыны гинэ. Нош соос экто! Выремзэс, синъёссэс адӟыса, синкылиос ас кожазы васько. Оло, мон гинэ сыӵе ляб сюлэмо? Нош вӧзам пукись кышномурт но, очкизэ куштыса, синкылизэ ӵушалтэ, залысь потӥсьёслэн но синъёссы котмемын.

Сӧсыресь ӧвӧл!

Театрез гажасьёс 18 номер дасяллям. Соосты учкон 3 нунал ӵоже мынӥз. Уго котькудӥзлы 30 минут ӵоже постановказэ возьматыны дыр висъямын вал.

Москваысь артист Е. Белоголодцев

Жюрилэн ёзчиез, Удмуртиысь калык артистка Раиса Нефёдова синмаськиз Новосибирскысь артистъёслы — «Инклюзион» театрлы.

— Та артистъёс учкисез ас палазы берыктыны быгато. Вылаз ик, сыӵе позыръяськыны-тэтчаны быгато — вань таза артистъёс но озьы уг пӧрмыто. Вӧзам тодмо артистка Вероника Садаева пуке но пайме: «Ма, соос таза адямиос ук, нокыӵе шекъёссы уг адӟисько». Зэм, соос озьы быгато асьсэзыз сцена вылын возьыны, асьсэлэсь висёнзэс берыкто ӟеч палзэс сямен.

Театрын, бӧрдон мылкыд интые, кыӵе ке лопырскон но данъяськон кылдэ. Тани Москваысь артист Евгений Белоголодцев потӥз моноспектаклен. Со возьматӥз Павел Санаевлэн «Похороните меня за плинтусом» повестезъя постановка. Азяз 2 пукон гинэ. Котырак тём-тём. Артист, я 2-тӥ классын дышетскись Саша Савельев кариськыса, вераське, я песянай луэ. Зал сое шокчыны дӥсьтытэк кадь кылзӥз, собере кичабонъёсын согиз, «Браво!» кесяськиз.

Театрын кужымзэс эскеризы Удмуртиысь артистъёс но: 15-тӥ школаысь егитъёс, «Тылобурдо» но «Мечтатели» коллективъёс.

Ваньмаз сямен номинациосын вожвылъяськонъёс йылпумъясько туннэ. Озьыен, тодмо луозы ни вормисьёс. Нош пятницае устоосыз номеръёс возьматэмын луозы Ижысь циркын ортчоно гала-концертын.


Та нуналъёсы пӧртэм ужрадъёсы вуылыкум, малпаськи: кин понна радъямын та шудонъёс? Бен, куспазы вожвылъясько сӧсыръёс. Но соос нырысь ик таза муртъёслы возьмато, кызьы улонэз яратоно, котькуд нунал астэ вормыны быгатоно. Синтэм-а со, суй-пыдтэм-а, ляб кылэ-а, но со сыӵе пуш кужымзэ поттэ. Нош макем быгато таӵе адямиос валче улыны, ог-огзылы юрттыны — тазэ кылъёсын гинэ вераны уг луы, адӟыны но шӧдыны кулэ, дыр.

Парадельфийской шудонъёс — со сӧсыр муртъёслэн искусство но творчество удысын вожвылъяськонзы. Ӵошатсконлэн историез кутске вашкала Грециысь Пифийской нимам шудонъёс бордысен — соос радъясько вал Дельфы городын. Соин спортын ӵошатскон — со Олимпийской шудонъёс, нош искусствоын вожвылъяськон — Дельфийской шудонъёс. Россиын Парадельфийской шудонъёс нырысьсэ ортчизы Москваын 2016-тӥ арын.

Елена Скворцова

Туспуктӥз Максим Егоров

Ангелина Снигирева
By Ангелина Снигирева 19 ноября, 2018 10:18