Калыклэн лулыз ватскемын гуръёсаз

Ангелина Снигирева
By Ангелина Снигирева Ноябрь 26, 2018 16:01

Фольклорист! — шуэ со ачиз сярысь данъяськыса, ужан удысэз сярысь юалляськыкузы. Сыӵе дыръя валаськод но возьдаськиськод — асьмеос та творчествоез зэмзэ но кулэезъя ум дунъяське. Нош К. Герд нимо гимназиысь дышетӥсь Ольга ПЕРЕВОЗЧИКОВА тодэ: выжыосмылэсь лулчеберетсэс шӧдытэк, утьытэк, ӵуказе нуналмы бездоз яке, дуннеысь мукет буёлъёсын сураськыса, пожаськоз.

О. Перевозчикова

Ерпечка

— Пичи дыръям мон ерпечка вылӥськем, тодӥсько на «пиоспинал» шуылэмзэс. Олокытчы но вутскылӥ, номырлэсь ӧй кышкалля. Нош 5 арескам тодӥсько ни вал, кырӟась луо шуыса. Мыным дедкое, Сенька Коля, озьы шуиз ук! Со, палисадник азе пуксьыса, кырӟалля вал:

«Корка берад кут кырӟа,

Корка берад кут кырӟа,

Эх, шу, жингыр шу,

Корка берад кут кырӟа…» Нош ми, пичи пиналъёс, сьӧраз нёжъяса, серекъяса эктылӥм. Дэбес ёросысь Бадӟым Кизьна гуртамы кырӟаллязы кадь котьку.

Школае мынэме бере мон «штатной» кырӟась луи ни — котькуд концертын, котькуд конкурсын. «Ӝужась кизилиос» ёрос конкурсын вормеме понна «Артеке» но ысъязы.

Зэм, со вакытэ Дэбесын крезьгуръя школа ӧй ке усьтӥськысал, трос мукетъёсыз сямен, самодеятельной сямен кыльысал яке воксё но крезьгурчи ӧй луысал, вылды, малпанъёсам уго асме хирурген но адӟылӥ. Но мыным удалтӥз — школа-интернатэз дыраз усьтӥзы, озьы мон 9-тӥ класс бере гуртысь кошки ни. Но одӥг ужпум — кызьы быгатӥськод озьы кырӟаны, мукет — крезьгуръя грамотаез дышетыны, вокалдэ волятыны. Сольфеджио сярысь ноку кылылымтэ муртлы капчи ӧй вал, но мон туж тыршись нылаш, пӧрмытӥ. Собере азьпал улонэ гожтэмын ни вал, шуыны луоз — мынӥ Воткинскысь крезьгуръя колледже.

Татын трос инструментъёсын шудыны дыши, академической амалэн кырӟаны кутски. Секыт ӧй вал ни, куд-ог дыръя мӧзмытгес но потылӥз. Пыриськылӥ пӧртэм удмурт ужрадъёсы.

«Чеберина»

— Озьы вуи «Чеберина» конкурсозь. Кӧберанэ ӧй вал. Тужгес секытэз вал толэзь ӵоже яблок вылын улыны — векчиёмыны озьы выри. Соку мон кыкетӥ луи, но чик ӧй куректы, малы ке шуоно ваньмыз ёрмемын вал вормыны, нош мон ӵошатсконлэсь шумпотон басьтӥ: мон, Оля Васильева (ныл дыр фамилиез — ред.), киям гитараен, баянэн театрлэн сцена вылаз шудӥсько! Ӧй кепыра купальник коже ветлонлэсь но — мон егит, веськрес вал (яблок сиытэк но), мед учкозы, чебер ке потӥсько! Туж ӟечен тодам вайисько со конкурсэз, со туж тунсыко но пайдаё ужрад вал.

Но бӧрысь со мыным люкетыны кутскиз — ялан кытчы ке кыскало, нош мыным со кулэ но ӧй вал ни, дышетсконэз уго нырысетӥ интые пуктылӥ.

Колледжын дышетскыкум, кылдӥзы нырысетӥ кылбур чуръёсы, собере соос кисьтӥськизы кырӟанэ. Но мон соку ӟучъёс пӧлынгес улӥсько вал бере, соин-а, мар-а ӟуч сямен кылбуралляй. Нялтас вераса, мынам папаея дедкое-бабае ӟуч выжыысь, но быдэс улонзэс удмуртъёс пӧлын бере, номырин но ӧз висъяськылэ.

Мыным удмуртлыке сюрес возьматӥз Воткинскысь дышетӥсе Сергей Трофимов — со монэ дэмлам К. Герд нимо гимназилы — дышетыны. «Оля, со тынад сюресэд», — шуиз со.

Гурлась

— Туж шумпотӥ, монэ татын возьмало шуыса. Но асме та улонын шедьтыны но возьматыны туж трос ортчоно-чидано луиз. Ыстӥзы монэ нылпи садэ но школае крезьгуръя дышетӥсь луыса ужаны но… улыны. Бен, бен, со вал 1990-тӥ аръёс, квартира снимать карыны коньдон ӧвӧл — 700 манет уждун сётӥзы (со али 7 сюрсэн ӵошка, дыр). Улӥм садикысь кыӵе ке висъетын раскладушкаос вылын бухгалтерен, прачкаен, поварен ӵош, мон кадь ик егит удмурт нылашъёсын. Коньдон номырлы ӧз тырмылы, сием потыса бӧрдылэме но вань. Юрттӥсь ӧй вал. Но мон озьы но ӧй юскиськылы, ялан малпаськылӥ дышетсконме азьланьтон, «лыз тылобурдоез» кутон сярысь. Мыло-кыдо ветлӥ «Эктон корка» студие. Отын, лычсузьымон эктыса, кырӟаса-вераса, вань секыт мылкыдъёс тӧлӟылӥзы, выль бурдъёс кылдылӥзы.

Выныныз А. Васильевен

Уд оскелэ, мыным нош ик удалтӥз — кин ке мынэсьтым лушкем малпанъёсме кылэм, лэся, шуисько — Удмурт кун университетысь Искусствоосъя факультетын усьтӥськиз калык хоръя отделение! Юри мыным кадь. Тӥни озьы 1999-тӥ арын мон нош ик студентка луи. Мынэсьтым шудоез ӧй вал, дыр. Мон котьку шӧдылӥ, мынам пушкам кыӵе ке усьтымтэ кужым улэ шуыса, но сое поттӥсь ӧй вал, нош татын сюризы сыӵе мастеръёс. Йыбырттӥсько дышетӥсьёсылы Андрей Поздеевлы, Вера Болдыревалы, Ирина Нуриевалы… Со вал верантэм дуно вакытъёс. Соос милемыз специалист карон понна гинэ ӧз тырше, соос фольклор пыр усьтӥзы милемлы дуннеез но асьмемыз! Мон будӥ — туж ӝог, ачим но шӧдылытэк.

Со вакытэ мон бергай: жадёнэз тодытэк, серекъяса-шудыса-кырӟаса-вераса, экспедициосы потаса, эшъёс люкаса. Нош дунне бергаз мон котыртӥ. Нырысетӥ курс бере бызи городысь гуртамы бертась пияшлы, Перевозчикова луи, нырысетӥ пиме, Эдикме, вордӥ. Кӧня ке вис кари но нош дышетсконме азьланьтӥ. Диплом уже вал «Окказиональные обряды удмуртов» (уйпал удмуртъёслэн «Нумыр сюан/келян» йылолзыя). «Окказия» кыл, француз кылысь берыктыса, «учыр», «случай» шуэм луэ. Шуом, гужем, кӧс нуналъёсы, Инмарлы вӧсяськыса, курылӥзы, зор, ю-нянь мед удалтоз шуыса. «Нумыр сюан» сярысь ке верано, пересьёслэн верамзыя, та йылол лэсьтӥське вылэм, кубиста йыръяськыку, сое нумыръёс сиыны кутскыку, ӵапак Выль вакытэ. Пересь кышномурт, нылпиосыз люкаса, сюан гурез кырӟаса, бича вылэм нумыръёсыз вуж кутэ, собере, шур дуре нуыса, вуэтӥ келя. Та уж мыным юрттӥз удмуртъёс шоры мукет синмын учкыны — макем соос инкуазез валасесь, жалясесь вылӥллям! Дипломме ушъязы но ӵектӥзы аспирантурае пырыны. Улон нош мукет сценарий сётӥз.

Пичи дыр

Азьвыл быгатӥсько вал шудыны баянэн, арганэн, фортепианоен, гитараен… Университетын матысь эшъяськи кубызэн, балалайкаен, крезен. Сыӵе быгатонлыкъёсы туж юрттӥзы нылпиосын но ужаны — тон шудӥськод но, кырӟаськод но огдыре, эктыны но быгатӥськод. Университетэз быдтыса, кема малпаськоно ӧз луы, гимназиысь нылпиос понна кылдытӥ «Крезь куара» нимо фольклор ансамбль. Занятиосын нылпиосты калык сям-йылолъёсын, кырӟан-веранъёсын тодматыны кутски. Фольклорлы туала пиналъёс соку ик уг синмасько, но мон тодӥсько, кызьы соослэсь йырзэс берыктыны — ваньзэ тае сётоно озьы, кызьы со вал асьме песянай-песятайёсмылэн зэмос улоназы — шудыса сямен. Озьы ик луиз — кӧня ке улыса, ми фестивальёсы, конкурсъёсы пыриськылӥм ни, котькудысьтыз вормонъёсын бертылӥм. Со пиналъёслэсь мылкыдзэс уката ӝутӥз. Сюрес лёгимы ини Казане, отын фольклорлы сӥзем фестивальёс, трос пӧртэм конкурсъёс ортчыло («Этномириада», «Волжская осень» но мукетъёсыз). Али милемыз дуно куноосты кадь витё ини, мастер-классъёс сётъяны ӧтчало.

Гимназиын сяна, 4 но ӝыны ар ӵоже ужай университетын аслам калык кырӟанъя факультетам. Нуи «Вокальный ансамбль», «Народный танец», «Народный инструмент» дисциплинаосты. Студентъёсын ӵош ачим но дышетски, тодон-валанъёсме юнматӥ, сямме кыдатӥ.

К. Герд нимо гимназиысь нылпиосын

Пиналъёс но студентъёс котьку учко дышетӥсьсы шоры — ачид ке йӧно, соос но сьӧрад кыстӥськозы. Кӧня ке ар талэсь азьло ми, 3 эшъёс: Ирина Пчеловодова, Вероника Фёдорова но мон, «Азвесям» экспериментальной трио кылдытӥмы, малпамы, калык инструментъёсты огазеяса, калык гуръёсты шудыны. Ирина — узьыгумыен, Вероника — крезен, мон — кубызэн. Умой пӧрмиз, калыклы но кельшиз. Кубыз сярысь вераны но солэсь куаразэ кылыны ӧтчаллязы Казаньысь консерваторие но. Но али группамы чалмиз, малы ке шуоно Иринаен кыкнамы нуныосын пукиськом. Но малпанъёсмы вань ини выль репертуар кылдытон сярысь.

Туж шумпотымон, шаерамы кылдытыны быгатӥм Фольклористъёслэсь огазеяськонзэс. Татчы удмурт фольклорчиос гинэ уг пырисько, ӟучез но, бигерез но вань. Милям ужпуммы — калык сямъёсты но йылолъёсты шонер вӧлмытыны, утьыны, фольклор материалэн ужаны дышетыны, юрттэт сётыны. Ортчыло трос пӧртэм научной конференциос, семинаръёс, мастер-классъёс, кытын ас уженызы тодмато Россиысь но Удмуртиысь тодмо фольклористъёс. Фольклористлэн ужез капчи ик ӧвӧл — арысь аре информантъёс ӧжыт кылё. Соин ик, кие диктофон кутыса, лобиськод гуртъёсы вашкала кырӟанъёсты бичаны — оло, кин ке тодаз возе на… Мынам льӧль малпанэ вань — Дэбес ёросысь фольклорлы сӥзем крезьгурен сузьет поттыны.

Кылбурчи но крезьгурчи

Семьяеныз шутэтскон  дыръя

— Соку малы мон потӥ эстрадае? Уг тодӥськы. Сюлэм куриз пачылмем мылкыдме, малпанъёсме кырӟан пыр вераны, та ласянь быгатонлыкме усьтыны. Зэм, асме эстрада кырӟасен уг лыдъяськы.

Кӧня ке ар ӵоже чакласа улӥ «Элькуновидение» конкурсэз. Туж виси вордскем Дэбес ёросэ понна — малы ке нокызьы но азьпал радэ потыны уг пӧрмы. Кылем арын нырысьсэ пыриськи «Палэзьпу юмшан» кырӟанэным. Кылъёсыз но, крезьгурез но аслам. Палэзь — удмуртъёслэн утись писпузы. Палэзен ӵошатэме потэ удмурт нылкышноез но — сыӵе ик чидась, чебер, огдыре ческыт но, кузял но… Юмшан нош — со праздник. Кылъёс ӝог пуксизы рифмае, собере крезьгур но лякиськиз. «Элькуновидениын» выступление, меӵак верано ке, могаса кошкиз — нимме ялӥзы но, мон сцена вылэ потытозь, фонограммаез лэзизы ни. Сылӥськод учкисьёс азьын… янгыштэк янгыш. Фонограммаез, конешно, выльысь пуктӥзы, но валаськоды, луоз, кыӵе со шуккет конкурсэ пыриськись понна. Ӧйтӧд, кызьы асме кутыны быгатӥ. Кырӟасько но шӧдӥсько — залын шып! Иське, ваньмыз умой, мон быгатӥ сюлмазы пырыны! Кырӟан йылпумъяськем бере нош кин ке туж зол «Браво, умница!» шуиз но, ваньзэ чабонъёс согизы. Бӧрысь тодӥ, озьы кеськем Удмуртиысь дано артистка, жюрилэн ёзчиез Валентина Пудова. Собере мыным номыр кулэ ӧй вал ни — баллъёс но, инты но. Озьы 4-тӥ ноябре гань-гань пукси «Элькуновиденилэсь» концертсэ учкыны — конкурс ортчыку, ми, артистъёс, катанчи сьӧрын сюлмаськыса, ас черодмес возьмаса сылӥськом ук — асьмеды но, ог-огмес но ум адӟиське. Но шуак яло: мон — устоез кылбур гожтӥсь! Со вал эшшо одӥг туж вылӥ дунъет, угось мон асме кылбурчи сямен ӧй возьматъя на вал! Газетъёсын, журналъёсын печатласькылэме но ӧвӧл. Гожъясько бен куддыр ас поннам — сюлэм шыпыртэмъя. Мынам Интернетын сыӵе группае но вань, озьы ик нимаське — «Сюлэмысь шыпыртон».

«Элькуновидение» бере кырӟанъёсы «Мынам Удмуртие» радио пыр чузъяськыны кутскизы. Тужгес но шумпотымон, соосты кылзӥсьёс пуктыны куро ке.

Сцена вылын

Туэ конкурсэ пыриськыны ӧй малпа ни вал — умой ӧвӧл кадь астэ арлы быдэ возьматыны. Но конкурслы ялэм дыр йылпумъяське ни, нош дэбесъёслэн заявказы ӧвӧл, кызьы озьы? Лэзе, шуисько, Артемий Гавриловез, вуттом дасяськыса. Нош дыр одӥг толэзь сяна ӧвӧл ни. Светлана Федуловалэн удмуртлыкен герӟаськем кылъёсызъя крезьгур гожтӥ одӥг ӝыт ӵоже! Аранжировкаен юрттӥз выны Антон Васильев (Удмурт театрысь администратор — ред.). Милям пӧрмиз! Дэбесъёслэн номерзы мукетъёссэ туж кыдёке азьпалтӥз.

Та вормонэн мон туж данъяськисько, малы ке шуоно со нимаз Гавриловлэн, Федуловалэн, Перевозчиковалэн ӧвӧл, со — милям яратоно Дэбес ёросмылэн вормонэз! Угось со вордӥз милемды, со кузьмаз кылбураны, крезьгураны быгатонлык.

Но сыӵе яркыт вормонъёс бере быгатыны кулэ огсыр улонэ капчиен берытскыны. Нош тон ас азяд чурытгес куронъёс пуктыны кутскиськод: табере лябгес уг яра ни. Вылаз ик, кытысь ке соку ик кылдо вожъяськисьёс, пышкылӥсьёс, йыркуръяськисьёс — будто тон «Евровидениын» вормид яке шуак узырмид, яке тыныд со пичи гинэ удмурт дан чик тыршытэк, сюлмаськытэк инмысь усиз… Но со монэ уг шуккы — ӵок. Куддыр нош со, оло, юрттэ но маке выльзэ гожтыны — кылбур-крезьгур кылдо ук яке маке тырмымтэ дыръя, яке сюлэм пачылаку. Маин йӧнатӥсько лулме? Конешно, кырӟанэн. Таӵе дыръя фольклорлэн быдӟа кужымез одӥг ӧрлэн но ӧвӧл. Эскере ай юромо вань сюлмысьтыды калык гуръёсты кырӟаса. Но эн кылзэ вашкала гуръёсты выльдыса-таркаса гожтэм трекъёсты. «Эктоникалы» вазиськисько: простить каре, но уг яра калыкез кыӵе ке модифицированной арбериен сюдыны. Мон валасько, тӥ капчияк егитъёсъя кариськиськоды, тӥледлы со дискотекаослы кулэ, но ассэ, ас калык лулчеберетсэ гажась калыклы со кулэ ӧвӧл — тӥ таласькоды солэсь зэмос шӧмзэ, мурдалазэ…

Кин мыным яра? «Сайлент Ву Гур», Павел Александров, Катерина Кенӟали, Наталия Дзыга, Мария Корепанова, Юлия Павлова. Таос тыршо, калыкысь кырӟанэз басьтыса, солэсь мурдалазэ ыштытэк, кырӟаны яке вашкала сямъёсъя ик выль гур малпаны но, калык манеръя аспӧртэмлыко аранжировка лэсьтыса, кырӟанлэсь пуштроссэ, манерзэ утьыны. Кузебай Герд 1920-тӥ аръёсы гожтӥз ни вал зэмос удмурт кырӟанлэсь быремзэ. Вань бен удмурт эстрадаын ӟеч продуктэз дунъясьёс, сое лэсьтӥсьёс, но ӧжыт. Тросэзлэн ужъёссы туж улӥ ӟечлыкен лэсьтэмын: фонограммазы бумбоксэн гожтэмын, кылъёс пумысен мар вераны ик паймод, кырӟан манерзэс — уката но. Мыным туж кельше, улэп оркестр яке инструментальной ансамбль шудэ ке. Та пумысен умой ужало «Арсенал-Бэнд», «Зарни крезь» но «Шулдыр ӝыт».

Анай

— Ньыльдон арескам 3-тӥ пинал вордӥ на. Зэмзэ ке, мон малпасько вал вазьгес вайыны, но инметӥ лобан сяменым арлыдме лыдъяны вунэтӥськем, аслым весь 30 кожасько на вал… Покчи пиелы 7 толэзь, ньыльпыдъяськыса ветлэ ни. Утиськыны туж юртто бадӟымъёсыз: пиелы — 17 арес, нылылы — 8. Картэ мыным котьку дурбасьтэ, калыке потанлэсь уг алы. Оскымон ӧй луысал ке, быгатысал шат концертъёсы пыриськыны, интервьюостӥ ветлыны? Тодӥд ук, кизилиез кышно басьтӥд шуыса, серекъясько. Ачиз со крезьгурлэсь кыдёкын, лэсьтӥськон ужъёсын выре, но быгатэ творчествоез дунъяны. Потэ-а, пиналъёсмы крезьгурен мед вырозы шуыса? Конешно. Крезьгурчи, музыкант ӧз луэ ке но, со юрттоз тодон-валанзэс паськытатыны, дуннеез чебер ласянь шӧдыны. Пимы ветлӥз скрипкая классэ, али дышетске гитараен шудыны. Нылмес пичиен ачим дышетӥсько фортепианоен, крезен шудыны, но тужгес яратэ суредаськыны. Пиналъёслы сётоно ваньзэ, мар быгатӥськом. Кулэзэ соос асьсэос басьтозы ини. Луысал-а туннэ мон таӵе, пичи дыръям атае баян ке ӧй басьтысал? Ӧй, дыр, киыным шонтысал но кыӵе ке мукет ӧре выжысал. Нош ачиз со огшоры тракторист вал ук. Кытысь солэн сыӵе валанэз? Кытысь 5 нылпиё семьялэн сомында коньдонэз? Озьыен, соос вань люкамзэ мон понна быдтӥзы. Мамамы милям чылкыт кырӟаны но, туж капчи эктыны но быгатэ, но со милям укыр удмурт сямо — возьдаське ассэ возьматыны. Со милемлы пыӵатӥз ужез яратон сям. Ужаз дояркаын, ми, сузэр-вынъёс, котьку солы юрттӥськыны ветлӥм — мукетъёсыз вожъясько вал, котькинлэсь ӝог скал кысконмес йылпумъяськом шуыса. Но солэн, конешно, потӥз, ми ваньмы мед дышетском шуыса. Гуртын улон секыт ук. Сюлэмам сюлмаськон — мамаен папа кылемын гуртэ огназы — витьнамы ик семьяосынымы Ижын улӥськом…

Трос нылпиё анай

Творчествоям бадӟым инты басьтэ Антон братэ. Ми соин ог-огмес тужгес умой, дыр, валаськом. Тау солы! Творческой адямиослы, огласянь, секыт — соос весь маке утчасько, валамез возьмало, маке кылдыто ке, яралоз-а, уз-а шуыса сюлмасько, нош мукет ласянь, лякыт. Соос асьсэ ужзылэсь бадӟымгес шумпотон басьто, асьсэды шудоенгес шӧдо. Мыным озьы потэ. Мынам озьы.

Зинаида Рябина

Ангелина Снигирева
By Ангелина Снигирева Ноябрь 26, 2018 16:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<