Калык туж чупрес!

Ангелина Снигирева
By Ангелина Снигирева Ноябрь 19, 2018 13:59
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Шаркан ёрослы матысь аръёсы туж кулэ выль ясли, культурая юрт но вольыт сюресъёс. Районын улӥсьёс таӵе куронъёсын вазиськизы Удмуртилэн Тӧроезлы Александр Бречаловлы, Шарканэ вуылыкуз.

А. Бречалов Шарканысь кивалтӥсьёсын

Вемеез уг вунэто

Шаркан селоысь выль ӝутскись микрорайонэз калыкын Новый нимало. Татын али 8 ульча пуксемын ни. 300 музъем участок пӧлысь 38-эз висъямын трос нылпиё семьяослы но егит специалистъёслы, 35-ез — улон интылы ёрмись семьяослы. Али выль микрорайонын 500 улӥсез ини, пӧлысьтызы 100-эз — пиналъёс. Татын ик пуктэмын ни 190 нылпилы чаклам сад.

Шаркан черкогуртысь муниципал кылдытэтлэн йырыз Елена Перевозчикова верамъя, микрорайонысь улӥсьёс вемеен ужаны быгато — асьсэос котькыӵе ужез лэсьтыны басьтӥсько. Тани жуг-жаг поттонэз но радъяло, ульчаосын утялско, ужрадъёс ортчытъяло, огзэ нылпи площадкаез но ас кужыменызы лэсьтӥзы.

Азьланяз черкогуртын эшшо ясли усьтӥськоз, оскытӥз Удмуртилэн Тӧроез.

— Район азинске, калык туж чупрес. Нылпи сад вань, табере ясли ӝутоно. Солы туж ӟеч инты чакламын, соин 2019-тӥ арын объектэз одно вуттомы, лицензированиез но ортчомы, — шуиз Александр Бречалов.

Ас кожазы уг вормо

Талэсь азьло Шарканэ вуылыкуз, Тӧро район азе ужпумъёс пуктӥз вал. Ёросысь кивалтӥсьёсын кенешонын районлэн йырыз Василий Муклин ивортӥз, кызьы соос быдэсъясько. Озьы тэльын делянка висъямын калыклы пу дасяны. Ляльшурысь школа тупатъямын, отчы нылпи сад усьтэмын. Асьсэ кужымен ик шарканъёс азинто Быгыысь удмурт культурая центрзэс — утӥзы 450 сюрс манет грант, табере чаклам ужъёссы мытэмын ни. Выль сюрес ӝутӥське Вортча гуртэ.

Удмуртилэн Тӧроез кенешонын вераз, кызьы шаерамы быдэстӥське Сюресъёслы сӥзем ар. Ныпъям воз туж бадӟым вал. Озьы ке но чаклам ужъёс быдэстэмын — Удмуртия Россиысь 5 устоез улосъёс пӧлы пыриз, кытын тужгес трос лэсьтэмын но выльдэмын интыысь сюресъёс. Транспортъя но сюрес хозяйствоя министрлы Алексей Горбачёвлы вазиськыса, Тӧро шуиз:

— Вортчае нуись сюреслэсь лэсьтӥськемзэ нимысьтыз чакласа возёно.

Уго ӵапак та сюрес пумысен вылӥ кивалтӥсьлы вазиськизы вал гужем Вортчаын улӥсьёс — школа автобуслы зоро куазен ветлыны кышкыт, соин куддыръя пиналъёсты дышетскыны но ӧз вуттылэ.

Нош куд-ог ужпумъёсты ёрос администрация ас кужыменыз гинэ уз вормы. Тани райцентрысь культурая юрт нокызьы уг быдэсмы.

— Тӥ туж бадӟым но шукырес объект борды басьтӥськиллямды. Со укыр дуно. Но проектэз уд ни вошты. Соин малпам ужез быдэстоно. Республика юрттыны амалъёс утча. Малпасько, 2020-тӥ арлы, Удмуртилэн кунлыкезлы 100 ар тырмонлы, объектэз вуттоно.

Ӟеч тыршисьёслы — путёвка

Ӵап та нуналэ ик 80 арзэ пусйиз Шарканысь трикотаж фабрика. Предприятилэсь поттэм вуззэ яратыса басьто шаерамы улӥсьёс но, Россилэн 80 улосъёсаз но, Казахстанын но, Эстониын но.

Фабрикалэн кивалтӥсез Надежда Зайнакова верамъя, предприятиын 384 мурт ужа. Соос трос пӧртэм профессиен адямиос: вуриськисьёс, технологъёс, керттӥськисьёс, суредасьёс, электромонтёръёс, упаковщикъёс, экономистъёс… 1990-тӥ секыт аръёсы 400 ужан инты пӧлысь утьыны быгатӥзы вал 90-зэ гинэ. Табере выльысь улӟизы. Ужась но вань, барыш но люкаське. Кылем арын 242 миллион манет тыр вуз поттӥзы, нош туэ ӝыны ар ӵоже — 117 миллион манет тыр.

Александр Бречалов предприятиысь устооссэ ужасьёсты данъяз. Правительстволэн Данъян грамотаеныз пусъемын керттӥськись Екатерина Софронова но техник-программист Сергей Пьянков. Удмуртиысь промышленность удысысь дано ужась луиз валтӥсь механик Александр Наговицын. Нош предприятиын кема аръёс ужамзы понна Вяткин кузпалъёслы Тӧро кузьмаз зарезь дуре ветлыны путёвка.

Вань калык шумпотӥз Удмуртилэн Тӧроезлэн мукет кузьымезлы но: фабрикаын ужасьёсты шулдыртыны ветлӥзы Брангуртысь песянайёс но Россиысь дано артистка, шаркан ныл Валентина Пудова.

Сергей Захаров

Ангелина Снигирева
By Ангелина Снигирева Ноябрь 19, 2018 13:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<