Инвисъёсты усьтыны дасесь

Ангелина Снигирева
By Ангелина Снигирева Ноябрь 2, 2018 13:48

Ижысь город администрациын Парадельфийской шудонъёслы дасяськонъя эшшо одӥг пол кенешон радъяськиз.

Н. Крель но Д. Чистяков

Парадельфийской шудонъёс 11-тӥ-17-тӥ ноябре ортчозы. Дорамы вуозы Россилэн 52 улосъёсысьтыз но 24 пӧртэм кунъёсысь — Италиысь, Сербиысь, Франциысь, Грузиысь, Америкаысь, Китайысь, Израильысь но мукет 1 сюрс 300-лэсь тросгес инвалидъёс. Соос 29 номинациосъя вожвылъяськозы. Быгатонлыксэс возьматозы крезьгур, суредаськон, театр, эктон, цирк, литература но мукет удысъёсын.
Та вакытэ шудонъёслы дасяськон мынэ ни. Бадӟым уж нуиське конкурсэз ортчытон площадкаосты инвалидъёслы ярась карон бордын. Отчы сӧсыр муртъёс шугъяськытэк шедьыны мед быгатозы шуыса, лэсьтӥсько пандусъёс, тупатӥсько пыдын ветлон сюресъёс, пуктӥське нимысьтыз тӥрлык. Ваньзэ ужъёсты дыраз йылпумъян понна, шутэтскон нуналъёстэк ужано луомы, вераз Россиысь Парадельфийской комителэн кивалтӥсез Наталья Крель.
Шудонъёсы уг пырисько инвалид нылпиос, но кызьы валэктӥз Наталья Крель, соос но палэнэ кельтэмын уз луэ. Пиналъёс но соослэн анай-атайёссы ужрадъёсты адӟыны ӧтемын луозы, соос понна радъяськозы пӧртэм мастер-классъёс.

— Нылпиос но мумы-бубыос мед адӟозы, кыӵе инвисъёс усьтӥсько соос азьын. Оло, куд-огез ӵапак Парадельфийской шудонъёс бордысен аслэсьтыз быгатонлыкъёссэ усьтыны но азинтыны быгатоз, — шуиз Н. Крель.
Конкурс сяна, шудонъёс дыръя радъяськозы пумиськонъёс, пӧртэм форумъёс. Кылсярысь, Иже вуоз Белоруссиысь суйтэм-пыдтэм ужбергатӥсь Алексей Талай. Со ас улон-вылонэз вылын возьматоз, кызьы адями уно шуг-секытъёсты ворме. Форумъёс дыръя вераськозы, кызьы паркъёсты, шутэтскон интыосты сӧсыр адямиослы тупамонгес кароно. Инвалидъёсын ужан амалъёсын тодматозы Россиысь валтӥсь специалистъёс.
Ижын ортчись шудонъёс сярысь гожъяны, возьматыны вуозы кунгож сьӧрысь журналистъёс. Озьы асьме элькунмы сярысь быдэс дунне тыр верамын луоз.
Город администрацилэн тӧроезлэн воштӥсезлэсь ужзэ быдэсъясь Дмитрий Чистяков верамъя, Ижкар шудонъёслы луыса зол воштӥськоз, нырысь ик, сӧсыр муртъёслы улыны ярамонгес луоз.

Ангелина Снигирёва

Туспуктӥз Ангелина Снигирёва

Ангелина Снигирева
By Ангелина Снигирева Ноябрь 2, 2018 13:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<