Гын сапег но карнан вунӥзы

Ангелина Снигирева
By Ангелина Снигирева Ноябрь 2, 2018 17:00

Гын сапег но карнан вунӥзы

Дэри ёросысь Лудорвай гуртын улӥсьёслэн шумпотонзы мертантэм — 26-тӥ октябре доразы кема витем ФАП усьтӥськиз. Со пуктэмын «Гуртъёсты азинтон» федерал программа улсын.

Лудорвайысь вуж медпункт

Чебер, шуныт, югыт юртэз лудорвайёс кемалась возьмало вал ини. 2015-тӥ арысен котькуд гурт кенеш та юан бордысен кутскылӥз. Газетмылэн кылем арын 26-тӥ октябре потэм номераз гуртысь медпункт куашкан калэ вуэмын шуыса материал гожтӥмы вал. Соку ай рос-прос тодмо ӧй на вал, ку Лудорвайын туала эмъяськон юрт кылдоз. Табере, ар ортчыса, гуртоос тазалыксэс выль медпунктын эскерыны быгато ни. Лэсьтӥськон ужъёслы ог 5 миллион манет быдтэмын, уксё висъяськиз Россилэн но Удмуртилэн бюджетъёсысьтызы.

ФАП-ез сӥё-дано усьтон нуналэ зориз ке но, ужрадэ трос калык люкаськиз. Гуртоосты ӟечкыланы вуылӥзы Правительстволэн Тӧроезлэн воштӥсез Анастасия Муталенко, тазалыкез утёнъя министр Юрий Титов. А. Муталенко, гурт калыкез корка пыронэн ӟечкыласа, шуиз:

— Туэ ар пумозь ми эшшо 11 гуртъёсын таӵе ик ФАП-ёс усьтомы на. Нош 2020-тӥ арозь ваньмыз медпунктъёс тупатъямын луозы. Озьы нырысетӥ эмъюрттэт вань пичи гуртъёс дорозь вуоз.

Гуртын выль медпункт мед кылдоз шуыса, трос сюлмаськиз Дэри ёрос больницалэн валтӥсь врачез Валерий Савельев.

— Та вакытэ ёросын 45 ФАП-ёс ужало, Лудорвай — тужгес бадӟымез гурт, — шуиз со. — Татын 1 сюрс 300 пала адями улэ. Арлы быдэ паськыта — татчы егитъёс мыло-кыдо пуктӥсько. Татысь ФАП борды юнматэмын Крестьянка гуртысь адямиос но. Выль юртын ужаны, адямиосты эскерыны ваньмыз тӥрлыксы вань. Со, инвалидъёс сярысь сюлмаськыса но, лэсьтэмын. Табере калык ФАП-е, черодын сылытэк, чаклам дырлы гинэ вуыны быгатоз, со понна луонлык кылдытэмын Интернет пыр гожтӥськыны.

Медпунктэ вуиз Лудорвайын улӥсь Николай Егоров, но таяз радэ тазалыкезлы уг ӝожтӥськы, калыкен валче шумпотэ.

— Арлыды бадӟым, гуртын мынэсьтым пересез ӧвӧл ни, — шуэ воргорон. — Мыным 85 арес. Медпунктамы нуналлы быдэ сямен ветлӥсько. Я пыды висьыны кутске, я давление ӝутске. Врачъёсмы милям умоесь — ваньзэ кылзозы, валэктозы.

Выль юртлэн усьтӥськемез туж бадӟым шумпотон луиз татын ужась врачъёс понна. Лудорвайысь медпункт интыяськемын вал 1958-тӥ арын пулэсь лэсьтэм юртын. Кызьы тодазы ваё эмчиос, куазь жобаськыку, тӧл пельтылӥз, зорыку липетысь ву виялляз. Толалтэзэ юртын гын сапегтэк но шуныт дӥсьтэк ветлыны уг ик луы вал, вулы карнанэн ветлӥзы.

Выжыкылысь кадь туала юрт пумысен шумпотонзэ уг ваты гуртысь фельдшер Капиталина Романова но. Со татысь калыкез 30 ар пала эмъя ни. Шуэ:

Фельдшер К. Романова

— Татчы мон табере рае сямен вуисько. Выль ФАП-мес азьвыл ужан интыеным нокызьы уд ӵошаты — татын чылкыт, югыт, чебер. Ужаны котыр ласянь капчигес луиз. Табере гуртоосмы сакырзэс, холестеринзэс тодон понна палэнэ ветлоно уз луэ ни. Со сяна, сюлэмез эскерыны электрокардиограф, ужатыны — дефибриллятормы кылдӥзы. Нуналлы быдэ медпунктэ ог 30-35 адями лыктэ. Туж умой, туэ май толэзе бордам медсестраез юнматӥзы на, 2 кузя гурт калыкез эскерыны вуттӥськом, эшшо санитаркамы вань. Лудорвае егитъёс мыло-кыдо лыкто бере, татын трос нылпиос вордӥсько. Соин ик оскиськомы, азьланяз акушеркамы но кылдоз шуыса. Та вакытэ 18 аресозь пиналъёс ог 300 пала.

Выль медпунктэз усьтонэ вуылӥзы Ижысь медициная колледжын дышетскисьёс но — вуоно фельдшеръёс. Кияса ёросысь Нӧднюкпочинка гуртысь Наталья Орлова вуоно арын дышетсконзэ йылпумъя ни, уже интыяськон сярысь али ик сюлмаське.

— Туж умой, егит фельдшеръёслы гуртын но ӟеч ужан интыос кылдыто шуыса, — вера нылмурт. — Малпасько, егит специалистъёс озьы гуртэ мыло-кыдогес лыктозы.

Ангелина Снигирева
By Ангелина Снигирева Ноябрь 2, 2018 17:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<