«Гудырилы» но И. Наговицынлы сӥзем конференция ортчиз

Ангелина Снигирева
By Ангелина Снигирева 1 ноября, 2018 15:32
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93


Туннэ, 1-тӥ ноябре, Удмурт кун университетын «Гудыри» газетлы 100 ар тырмонлы но кун деятель Иосиф Наговицын вордӥськем дырысен 100 ар тырмонлы сӥзем научно-практической конференция ортчиз.
Ужрадэз радъязы «Удмурт дунне» газет но Удмурт кун университет. Газетлэн валтӥсь редакторез Зинаида Рябинина вераз:

— «Гудырилы» 100 ар, со бадӟым лыдпус. Газет потыны кутскон тупаз историысь одӥгез яркыт вакытэн. Соку асьме кунлыкмы кылдӥз, газет ачиз но история лэсьтӥз. Соин ик со дырез вунэтыны уг яра — калыклы тодэ вайытоно. Та бордын ик научно-практической конференцилэн кулэлыкез. Та ужез тодосчиос вылэ гинэ куштыны уг яра, со асьмелэн но, журналистъёслэн, ужзы. Кызьы 100 ар талэсь азьло удмурт азьветлӥсьёс асьсэлэсь ужзэс быдъясъямзы сяна, калыкез югдытӥзы, мыло-кыдо пыриськизы общественной, политической уже, туннэ озьы ик кулэ ужаны журналистъёс но.
Ужрадэз усьтыса, 1920-тӥ аръёсы удмурт газет-журналъёслэн кылдэмзы, азинскемзы сярысь вераз критик, литературовед, журналист Александр Шкляев. «Гудыри» но «Удмурт дунне» газетъёсты, туала но азьвыл вакытъёсты ӵошатӥз «Удмурт дунне» газетлэн валтӥсь редакторез Зинаида Рябинина. Удмурт автономиез одӥгез кылдытӥсь, государственной деятельлэн Иосиф Наговицынлэн улонысьтыз тодматотэм бамъёссэ шараяз Казаньысь историк, И. Наговицынлэн ӵыжы-выжыез Валентина Хазиахметова.
Конференция дыръя 5 секциос ужазы. Отчы пыриськизы тодосчиос, студентъёс, журналистъёс. Соос тодматӥзы, мар газетъёс гожъязы но гожъяло туала но азьвыл вакытъёсы, кызьы газет-журналъёсын литература возьматэмын, кызьы куспазы герӟаськемын ивор вӧлмытон но дышетон удысъёс но трос мукет. Кызхьы ивортӥзы конференциез радъясьём, ужрад дыръя чузъяськем ужъёс пыртэмын луозы электрон амалэн поттэм бичетэ.
Озьы ик конференция улсын К. Герд нимо музейын адӟытон ужаз, отын тодматскыны луиз И. Наговицынэн герӟаськем документъёсын. Возьматэмын вал дано удмурт пи сярысь фильм.

Ангелина Снигирева
By Ангелина Снигирева 1 ноября, 2018 15:32