ФАП вань — ужась ӧвӧл

Удмурт Дунне
By Удмурт Дунне Ноябрь 9, 2018 16:00

Кизнер ёросысь Тыжмыйыл гурт нюлэс пушкы Тыжмы шур дуре пуксемын. Гурт ёрос центрлэсь кыдёкын — 35 иськемын, отчы уг вуылы рейсовой автобус, ӧвӧл клубзы, озьы ке но гурт ас кужыменыз азинскыны выре.

Выль ФАП

Историез тодыса будо

Тыжмыйыллэн, мукет гуртъёслэн сямен ик, аслаз ортчем сюресэз. Солэсь историзэ эскерон но материал люкан понна сюлмаськем историяя, шаертодонъя дышетӥсь Вера Иванова. Солэн верамезъя, али нокин рос-прос вераны уг тоды ни, кыӵе арын Тыжмы шур йыл котыре гурт пуксиз. Но пересьёс тодэмъя, татчы Ягул гуртысь адямиос шур кузя тубиллям но та интыосты кельшытӥллям — соос вал пӧйшурасьёс. Нырысетӥ улӥсьёс Кадыр но Надыр нимо воргоронъёс вылӥллям. Оло, ӵапак соос бордысен гуртын вӧлмиз Кадыров фамилия, шуэ Вера Иванова.

Гурт калыклэн улонэз мукетъёсызлэсь номырин ӧз висъяськылы — нянь будэтӥзы, пудо, муш вордӥзы, инмаръёслы вӧсяськизы, удмурт сям-йылолъёсты утизы. Тыжмыйыл адӟиз Граждан ожез. Татӥ ортчиз Колчаклэн армиез. Та дырозь гурт пиналъёс возьёсысь, нюлэсъёсысь пуля шедьтыло, нош одӥг пол пыӵал но сюриз. Гуртын секытэн ортчиз коллективизация. Узыр улӥсь Степан Северьянов, Андрей Кольцов, Георгий Кадров воргоронъёслэсь семьяоссэс кулаке поттӥзы, ваньбурзэс талазы. Кылсярысь, А. Кольцов нюлэс поттонэн выре вал. Солэсь бадӟым юртсэ школа каризы, ассэ Сибире келязы. Но 70 аресъем воргорон пегӟыса дор палъёсаз берытскыны быгатӥз. Кин ке со вылэ чагиськем но, пиосмуртэз нош берлань келязы. Кыкетӥзэ со ӧз берытскы ни.

1933-тӥ аръёсы кылдӥз «Горд кизили» колхоз. Ны-рысетӥ председателез вал Константин Кольцов. Со Нырысетӥ дунневыл ожмаськон дыръя пленэ сюрылэм, Германиын хозяйствоез нуон удысэн тодматскем. Гуртысь колхоз азинскыны кутскиз, быгатӥсь адями кие сюрыса. Али но «Звезда» хозяйство ёросын одӥгез адӟем карымонэз. Ог 7 аръёс сое валтэ Валерий Кадров.

Школа

Тыжмыйылын пиналъёс историзэс, ас пал адямиоссэс гажаса, соосын данъяськыса будо. Гуртын Афган, Чечня ожъёс пыр ортчем воргоронъёс ӧжыт ӧвӧл. Уйпал Кавказын ожмаськонэ пыриськиз Алексей Паранин. Пияш, гуртысьтыз школаез, бӧрысь Можгаысь политехнической училищеез йылпумъяса, улонэз но шӧмъяса вуттытэк, «пӧсь» интые сюриз. Отысен семьяезлы со одӥг гинэ гожтэт лэзьыса вуттӥз. 1998-тӥ арын Новолакское черкогурт котырысь блок-постэз утьыкуз, боевикъёс ки улын быриз. Алексейлы соку 19 арес гинэ вал. Ас пал муртсэс буре вайыса, 2007-тӥ арын Тыжмыйыл гуртысь школа борды буре ваён пул юнматэмын. Школаысь музейын Алексей Паранинлы сэрег висъямын, нимысьтыз альбом дасямын.

Чечня ожмаськонэ пыриськизы эшшо 4 пияшъёс — Эдуард Кадров, Александр Иванов, Алексей Анисимов но Алексей Киселёв. Берпуметӥез «Мужество» орденэн данъямын.

Клуб, автобус возьмало

Гуртоос люкаськыло клубын

Тыжмыйылын та нуналлы 81 хозяйство лыдъяське, 200-лэсь уно адямиос уло. Вылӥ Бемыж поселенилэн кивалтӥсез Валентина Чичканова верамъя, гуртын туж ужась калык улэ. Куд-ог семьяос быдэн 5 скал вордо. Но берло дыре тросэз пудо лыдзэс кулэстӥзы, куд-огез воксё но куштӥськиз, угось пудоез вандыны лэземын нимысьтыз интыын гинэ, со понна гуртлэн палэназ мыноно, сӥль но дунтэм дунын вузаське.

Уноез гуртоос Тыжмыйылысь колхозын ужало. Кылсярысь, быдэс улонзэ скал кыскисьын тыршиз Мария Кольцова но.

  • Али гуртын улон капчигес луэ ке но, егитъёслэн татчы кылемзы уг поты ни, — вера 70 аресъем кышномурт. — Азьвыл ай ми асьмеос бадӟым флягаосын йӧл ӝутъямы, али со гумыос кузя кошке. Тани гуртын выль ферма ӝутӥське, но молодёжьлэн кырсь ужен выремез уггес поты ни ук.

Гуртын школа, нылпи сад, магазинъёс ужало. Кӧня ке ар талэсь азьло выль ФАП но усьтӥзы.

  • Медпунктмы выль ке но, висён кырме ке, машина ӧтьыса, Бемыже ветлоно луиськомы, — азинтэ Мария Кольцова. — Угось асьмелэнэз борӟамын. Фельдшермы пенсие потыса, ужаны нокинлы луиз. Арняяз кӧня ке пол врач ветлылэ ик, но висён дыраз вуыны уг вала ук. Собере, сюресъёсмы но уг тупатӥсько. Али документъёс понна Можгае ветлоно, нош отчыозь ог 50 иськем. Сосмак гурт пыр 2 поллы ӝоггес вуыны луэ, но отӥ дэри дыръя уд ик поты. Ку та сюрес борды басьтӥськозы, тодмо ӧвӧл.
Гуртысь синпелет

Тыжмыйылын сюлмаськон кылдэмын клуб ласянь но. Вуж клубзы пу юртын вал, отын эстыса но кезьыт возиськылӥз. Али со но борӟамын, пе. Шулдыръяськонъёссэс гуртоос библиотекаязы ортчытъяло, но отын рос-прос люкаськон инты, сцена ӧвӧл. Бадӟым оскон вань, гуртын клуб ӝутӥськоз шуыса, угось солы проект вань ини. Гуртоослэн эшшо бадӟым сюлмаськонзы — ляб Интернет, связьзы но ӧвӧл.

2004-тӥ арысен татчы ёрос центрысь рейсовой автобус ветлэ вал, но сое, нерентабельной шуыса, ворсазы. Гурт калык, автобус курыса, поселенилэн кивалтӥсезлы вазиськиз. Но шумпотонзы но вань — доразы 2006-тӥ арын газ кыскизы. Улонзы пумен капчигес луэ. Гуртоос оско, Тыжмыйылзы азинскоз шуыса.

Ангелина Снигирёва

Удмурт Дунне
By Удмурт Дунне Ноябрь 9, 2018 16:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<