Чеберъяськыса улоно ӧвӧл — лэсьтоно

Ангелина Снигирева
By Ангелина Снигирева Ноябрь 2, 2018 12:22

Вотка ёросысь «Пихтовка» чорыг вордонъя хозяйствоен кивалтӥсь, Удмуртиысь гурт удысысь дано ужась, гурт удыс наукаосъя кандидат Георгий КРЫЛОВ ужаны быгатэмезъя, калыклы юрттэмезъя, Пихтовка черкогуртэз но котырысьтыз гуртъёсты ӝутэмезъя адӟем карымон луэ. Шаермес азинтонын трос лэсьтэмез понна туэ пусъемын «Удмурт Республикалэн Дано адямиез» нимын.

Г. Крылов

— Георгий Степанович, таӵе шумпотон ивор улондэс воштӥз-а?

— Сюлмаськонъёс но, ужан потон мылкыд но азьло сямен ик кылизы. Адями ужзэ зэмос яратэ ке, со пумозяз яратэ ни. Калыклы умойзэ лэсьтыны мылкыд кызьы вал, озьы ик луоз. Инмар мед утёз кизили висёнлэсь. Та быдӟа нимын дунъямзы — со «Пихтовка» хозяйстволэн вормонэз: гуртоос понна сюлмаськеммес кылӥзы-адӟизы. Уно аръёс ӵоже угось хозяйствоез асьсэлы басьтыны турттӥсьёс но, сьӧдмасьёс но сюрылӥзы. Ми ужпум пуктӥмы: «Пихтовкаез» кун предприятиез сямен утёно. Калык но таин соглаш кариськиз. Акционер огазеяськон я кооператив кылдытыса угось, предприятиез ыштыны быгатысалмы.

— Кун предприятие луыса ужаны капчигес-а?

— Меӵак озьы но, тазьы но шуыны шуг. Частной предприятие, кун предприятие сярысь, ужаны кулэ умойгес — со аксиома. Частник ачиз вылэ ужа бере, со нуналысь нуналэ золгес тыршыны, калыкез сярысь сюлмаськыны кулэ. Калык бордысь угось предприятилэн ӵуказе нуналыз потэ. Но ӵемысь частник — ваньзэ аслыз гинэ киултыны, йыръёс вылтӥ кошкыны дась луись, кескич, возьдаськонэз, эсэпез валасьтэм адями. Со малпаське, мар кароно ай выт ӧжытгес тырон, уждунэз шымыртон понна. Сыӵе дыръя кинлы умойгес меда? Котькыӵе предприятие мед луоз, солэн ужез потоз азинскон программаез бордысь. Со программа огшоры ужась адямилэсь улонзэ умойгес карон понна чакламын ке, котькыӵе предприятие зол ужалоз. Кун ачиз ласянь котькуд предприятилы огкадь условиос кылдытыны кулэ, куспазы вожвылъяськыны мед быгатозы шуыса. Отын но, татын но кун заказъёс луыны кулэ. Но заказъёс но уз юрттэ, предприятие калыкен огкылысь ӧз ужа ке.
Пихтовка гуртысь ужасьёсты кенеше люкакум, куддыр соосты юромо малпаськытон вылысь юасько: «Пихтовкалэн» кивалтӥсез визьмо яке ӧвӧл? Визьмо, шуо. Тау дунъямзылы. Но котькыӵе академик лу, вань специалистъёсты огазеяд ке, тон сярысь, соос дэмен визьмогес луозы. Нош вань калыклэн визез специалистъёслэсь но кужмогес луоз. Соин ик калыклэсь визьзэ огазеяны быгатӥсь коллектив но кивалтӥсь трослы кужмо луо.
Тросэз кивалтӥсьёс со сярысь уг ик малпасько. Ужасьёссы маке ӵекто ке, мар ай та монэ дышетэ, шуо. Калыклы оскиськид ке, анархия луоз, пе. Но кивалтӥсь калыкез кылыны быгатыны кулэ. Оло, соин но гуртоос шуо: тӥ ми понна ужаськоды, ми адӟиськом. Котькуд адямилэн сюлэмаз пырыны, сое валаны но солы юрттыны тыршисько. Кин ке ужтэк кыле ке, котьку юасько, малы озьы луиз шуыса. Одно ик интыяны тыршисько хозяйствое. Котьку чакласько гуртысьтымы дышетскись пиналъёслэсь мылкыдъёссэс: маке сярысь куректо ке, озьыен, семьяязы маке умойтэм. Сыӵе дыръя одно ик семьялы юрттыны тыршисько. Кивалтӥсьлэн валтӥсь ужпумез — адямиез адямилыкогес карыны тыршон, специалистлэсь эшшо юнгес специалист будэтон.
Тодам лыктэ Сьӧлта ёросысь вордскем Мугло гуртысьтым Александр Рязанов дедушкае. Сое кулак каризы, Беломорканал лэсьтонэ келязы. Улон юртсэ начальной школалы сётӥзы. Но гурт калык Рязановъёсты гажамысь ӧз дугды. Атае вера вал, бубиз нокинэ но ӝож ӧз карылы шуыса. Етӥн будэтонэн выре вылэм. Тулыс вуыку, дедушкае уже кутэ вылэм Муглоысь начаргес улӥсь гуртоосты. Соослы уждун тырон, улыны юрттон вылысь. Нош вань ужъёс йылпумъяськем бере котькуд семьялы фабричной дӥськут басьтыса сётэ вылэм: дэрем, штан, сапег. Пичи нылпиосты но, пересьёсты но шумпоттылэм. Оло, соин но анай-атае весь шуо вал: тон но адямиослы та улонын тросгес ӟечсэ лэсьты, зэмлыко лу, нокинэ вӧсь эн кары.
Мон ӟуч кылын удмурт акценттэк вераськыны но уг быгатӥськы вал. Семьяямы ми 7 кузя нылпиос. Узыр ноку ӧм улэ. Куд-ог тодмоосы али верало: востэм, кепырась луэмысьтыд, ноку ӧм малпаллялэ, куке-соку директор луод шуыса.

«Пихтовкаын» ужаны кутскон

— Но тӥ «Пихтовкаез» кияды кутӥды тужгес секыт вакытаз, 1992-тӥ арын, калык забастовкае потэм дыръя…

— «Пихтовка» мон понна мурт ӧй вал. Армия бере ужан сюресме татын рыбовод луыса мытӥ. Семья кылдытэме бере Сарапулэ улыны но ужаны выжемелэсь азьвыл гуртоос кыӵеме тодыса, ужамме адӟыса вуттӥзы. Йырме ноку ӧй урдылы — весь калык пӧлын.
«Пихтовка» котьку умой ужа вал. Но 1992-тӥ арын секыт югдур кылдӥз. Калыклэн уксёез ӧвӧлэн чорыг вузаськемысь дугдӥз. 1990-тӥ арын 600 тонна чорыг будэтӥськомы вал. 1992-тӥ арлы 260 тоннаозь уськытӥмы. Чорыгмес сиись ӧвӧл бере, комбикорм басьтыны, чорыг сюдыны немаин луиз. Со сяна, бусыосты гыроно, кизьыны кидыс кулэ. Уждунъя но пунэмъёс люкаськыны кутскизы. Калык чидатэк бугыръяськыны потӥз. Соку адямиос куриллям: Крыловез берыктэ, со хозяйствоез гуысь поттыны быгатоз.
Сарапулысь 24 номеро школаын дышетӥсько вал. Уже кельше. Пичи дырысеным дышетӥсьлэн ужезлы синмаськылӥ. Гуртысьтымы вань грамотной адямиос дышетӥсьёс вал. Соин но, Удмурт кун университетэ пырыса, биолог луи. Пихтовка черкогуртысь калык Сарапулэ вуиз, хозяйствоез кутыны косӥз. Мыным соку 37 арес вал. Семьяме Сарапулэ кельтыса, Пихтовкае берытски. Нялтас вераса, кузпалы, 6 ар ортчыса гинэ, сьӧрам лыктӥз. Ми Ольга Владимировнаен 1-тӥ курсысен ӵош: одӥг факультетын дышетским. 3 нылъёсмы. Бадӟымез Татьяна — мон кадь ик биолог, али Ижысь гурт удысъя академиын ужа, наукаосъя кандидат. Тамара — экономист, огаз банкын валтӥсь бухгалтер, со но наукаен выре. Анастасия бизнесэ кошкиз — оценочной компания кылдытӥз. Одӥг внучкамы.
Хозяйство но семья, Вотка но Сарапул ёросъёс вискын улыны капчи ӧй вал. Но «Пихтовкаез» кельтыны мон ӧй быгаты. Малпаськыны кутски: малы чорыг уг мыны? Магазинъёстӥ котыръяськыны, калыклэсь юалляськыны ӧдъяй. Соку 400-500 граммъем чорыгъёсты вузаны поттӥськомы вал. Валай: Москва кадь бадӟым городъёслы бадӟым чорыг кулэ, Ижын улӥсьёслы — шоро-куспоез. Пересьёс пичизэ басьтом шуизы. Озьы кутскимы пӧртэм быдӟалаен чорыг будэтыны. Ар куспын 3,4 поллы тросгес чорыг вузаны ӧдъямы. Соку ик 200 тонна чорыгез Санкт-Петербурге келямы. Отчыозь Санкт-Петербург сярысь ӧм ик малпаськылэ. Али Россилэн пӧртэм городъёсаз вузмес вуттӥськомы. Уж пӧзьыны кутскиз бере, малпаськыны ӧдъяй: мар карыны луоно чорыг вордон удысэз капчиятон, чорыгез ӝоггес но тросгес будэтон, асдунзэ (себестоимостьсэ) уськытон понна. Быдэс Россиез котыръяно луиз тужгес устооссэ айы карпъёсты «Пихтовкае» вуттон понна. Чорыг будэтон но сюдон технология кылдытӥ.

Удмуртилэн Тӧроеныз

— Но малы технологидылы патент ӧд басьтэ? Россиысь мукет хозяйствоосысь шӧртчиос, тӥ доры дышетскыны ветлыса, технологидэс асьсэ дорын пыӵатыса, патент басьтӥзы, шуо.

— Хозяйствоез ӝутон сярысь сюлмаськыку, патент басьтон тодын но ӧй вал. Но кӧты ӝож ӧвӧл — мед ужалозы. Ми эшшо умойгес технология малпаломы ай.
Котькуд вакытлэн аслаз куронъёсыз. Али йӧл кыскон концепция сярысь ялан вераськиськомы. Огшоры арбериез вунэтӥськомы: нырысь ик ужано музъемен. Кизёно музъемлэн котькуд гектараз 70 сюрс манет поныны кулэ. Выль техника басьтыса, удобрение поттыса, выль технологиосты кутыса, бусы ужаны кутскоз. Соку 1 гектарысь 3 тонна ю-нянь люканы, 1,5 тонна йӧл поттыны но 5 центнер сӥль басьтыны луоз. Озьы гинэ пудо вордон удыс азинтӥськоз, ужан интыос кылдозы, уждун йылоз. Жаляса верано, шаерамы кин ке таин соглаш кариське, кин ке — уг. Но «Пихтовка» со ӧръя мыноз. Ми али та параметръёсъя кытын ке 30, кытын ке 60 процентозь вуимы ни. Хозяйствоысь уждунэз шорлыдын 39 сюрс манетозь ӝутыны быгатӥмы. Туэ уждун 40 сюрс манетлэсь ортчоз. Котькуд гектарлы тросгес уксё кутӥмы ке, выручкамы араз 480 миллион манетозь вуоз. Али со 200 миллион манетлэсь ортче. Огез тодмо: хозяйстволэн вань поттэм доходэз пӧлысь 8 процентэз будосъёсын выремысьтыз потэ ке, озьыен, со рынокын вожвылъяськыны быгатэ. Кылсярысь, 100 миллион доходысьтыз 8 миллионэз, пудо сиён но ю тысь вузаса, поттэмын луыны кулэ. 20-30 миллион манет тыр вузаны пӧрмытэ ке, со кужмо предприятие лыдъяське. 40 миллион манет тыр ке — солы нокыӵе кризис кышкыт ӧвӧл.

— Тӥляд чорыгды вань, соин умой улыны, гуртоос понна трос лэсьтыны быгатӥськоды шуыса, мукет хозяйствоосын кивалтӥсьёс ӵемысь пыкыло…

— Чорыгмы сомында, кӧня ӵыпетамы нормативъёсъя луыны уг быгаты: 360 тонна сяна чорыг будэтыны кулэ ӧвӧл. Нош ми туэ котькуд гектар вуысь 32 центнер чорыг люкамы. Россиын та умоез лыдпус. Оглом 1 сюрс 500 тонна чорыг будэтӥмы, со, кылем арын сярысь, ог 200 тонналы уногес. «Росрыбхоз» огазеяськонлэн правленияз пырисьёс талы паймемын: кызьы кезьыт Удмуртиын чорыг уногес будэтыны быгато, Россилэн лымшор палаз сярысь? Вуоно арын «Пихтовкалэсь» дышетскыны Россиысь тодосчиос, чорыг вордонъя хозяйствоосысь специалистъёс лыктозы. Милям чорыгмылэн себестоимостез но ичи. Котькытын шорлыдын 80 манет ке, милям — 60 манет. Ваньмыз та — вань кужмысь тыршемлэн пайдаез.
Мукет удысъёсын но ми туэ зол ужамы. Белоруссиын котькуд гектарысь 120 центнер ю-нянь басьто. Соослэсь адӟем карыса, ми но бусые тросгес удобрение поттӥмы, музъеммес умойгес дасямы. Озьы урожаймес 40 процентлы йылтӥмы. Туэ нырысьсэ ми дась 1 сюрс тонна ю тысьмес палэнэ вузаны. Азьло ноку но тысьмы уг тырмы вал — али мултэс. Оглом 8 сюрс тонна ю-нянь люкамы. Миым 5 сюрс тонна калтӥмы. Вуоно арын 10 сюрс тонна басьтыны план пуктӥськомы. Соин ик вуоно арын 3 склад пуктыны чакламын.
Йӧл кысконын но туэ рекордозь вуимы: совето вакытэ 800 тонна гинэ кыскиськомы вал. 2017-тӥ арын 2 сюрс 600 тонна люкаськиз. Туэ 200 тонналы уногес йӧл басьтӥмы. Али 335 скалмы. Азьланяз план 7-8 сюрс тоннаозь вуттӥськыны. Туэ тани ош куайытон гид пуктӥмы. Вуоно арын 460 йырлы скал ферма ӝутыны медӥськомы. Азьланяз переработкая цех усьтыны малпанъёс вань. Инты дасямын, тӥрлык басьтэмын. Но вузаны быгатыку, вузано. Переработкатэк улыны уг луы ни шуыса валамы ке, цех усьтӥськоз. Но куддыр со ыштон вае. Кылсярысь, Москва котырысь огаз предприятиын чорыглэсь консерва лэсьтон цех усьтӥзы — 27 миллион манетсэс ыштӥзы — вуззы ӧз мыны. Соин ик дыртыны кулэ ӧвӧл — улон воштӥськемъя ӝог воштӥськыны дась луыны кулэ.

Россиысь блогеръёсын пумиськон

— Совещаниос дыръя ялан тӥлесьтыд адӟем карыны косо. Удмуртилэн Тӧроез Александр Бречалов но ужаны быгатэмдэс умоен пусъе. Секыт-а котьку син шорын возиськыны, адӟем карымон луыны?

— Со сярысь ӧжыт малпаськиськод. Весь йырдэ тӥяськод мукетыз сярысь: эшшо умойгес ужан понна кыӵе луонлыкъёс вань на? Кыӵе ке малпан борды кырмиськыны капчи — ваньзэ лэсьтоно на, со малпанъёсын ужасьёс но мед улозы шуыса. Соку гинэ вормонъёс басьтод. Калык ӧз вала ке мар карыны малпамдэ, шуоз: директор вуылӥз, пудоез мукет сямен утялтон, чорыгез мукет сямен сюдон сярысь оломар вераськиз. Сое, сое лэсьтӥм ке, уждун сомындалы будоз шуыса адями валаз ке, со уйзэ но уз изьы, но лэсьтоз.
Гуртъёсты азинтонъя программа сярысь вераськиськомы. Шуысалзы ке: со программая тынад одӥг но ужтэк кылем адямиед медаз луы, со понна сыӵе-сыӵе луонлыкъёс вань, соку валасал. Пихтовкаын социальной программаез пыӵатон азьын ми нырысь ик калыкез люкамы но юамы: умой улон понна мар тӥледлы кулэ? Веразы. Со бордысь ик юрттэт кылдӥз.
Али хозяйствоысь декретэ потӥсь нылкышнолы 16 сюрс манет премия тыриськомы, сомында ик — кузпалызлы. 2006-тӥ арысен, пиналызлы 1 арес но ӝыны тырмытозь, пособие борды уксё сётӥськомы. Со сяна, толэзьлы быдэ висъяськомы 1,5 килограмм чорыг, 1,5 килограмм сӥль, 15 литр йӧл. Ум вунэтӥське ужась калыкез но. Сӥзьыл ужъёс йылпумъяськем бере ваньзэсты сямен тыршиськомы санаторийёсы дунтэк келяны, зарезь дуре шутэтскыны лэзьяны. Туж потэ, гуртамы азьланяз но нылпиос мед вордӥськозы шуыса. Программа кутэмен, трос нылпиё семьяос йылӥзы. Соин ик школалы но, нылпи садлы но, клублы но, участковой больницалы но котьку юрттӥськомы. Профсоюзмылы ӵемысь шуисько: сакгес кылзӥське адямиосты, оло, соослы эшшо кыӵе ке юрттэт кулэ — ми уксё шедьтом. Экономикаез озьы радъяно, котырысь вань адямиослы умой мед луоз. Кытын но отын вылӥ технологиосты улонэ пыӵато, таин валче адямиосты ужысь кулэсто. Озьы пӧрме: ваньмыз сярысь малпаськимы, нош калык сярысь вунэтӥмы. Гуртэз хозяйство возьыны кулэ, соку гинэ со юнма.

Гуртлэн нуналыз

— Пихтовкаысь калык тӥледыз ки вылаз нуллэ, вылды?

— Калыклы лэсьтэм уж кельше шуыса, шӧдӥсько. Адями ӝог дыше умоезлы. Но эшшо тросгес но тросгес лэсьтэм потэ. Кыӵе анай-атай нылпиез сярысь ӧз сюлмаськы ни? Ваньмы нылпиосмы понна улӥськомы. «Пихтовкаын» ужатозям, ваньзэ лэсьто калык понна. Адямилы умой уждун тыроно. Уксёзы луиз ке, асьсэос тодозы, мар кароно. Корка пуктозы-а, нылпиоссылы квартира басьтозы-а. Мон шумпото. Умой уждун тырыку, юисьёс но быро. Милям но Пихтовкаын юисьёс вал. Али со адямиос ик ужало, но тодмантэм воштӥськизы — уг юо ни. Ёрмонэз адӟытэк улӥсь адями ачиз но, кивалтӥсь азе но чурытгес куронъёс пуктэ. Хозяйствоын али шоро-куспо арлыд 44-48 арес. Мӧйыосыз чорыг вордон бордын ужало — тросэзлы 57 арес. Но соослэн опытсы бадӟым. Соин ик соостэк нокызьы уг луы. Но коллективамы егитъёс но трос. Арлы быдэ 15-17 адямиез трактористэ дышетскыны ыстӥськомы.

— Мар сярысь жаляськоды?

— Анай-атаелы дырме тырмыт ӧй висъя. Атайме малпаса, армие ачим куриськи вал. Монэ армилэсь мозмытыны туртто вал, научной ужен выремысьтым. Соку Камбаркаысь водохранилищеысь чорыгъёслы анализ лэсьтылӥсько вал. 2 бригадаен кивалтӥ. Кызьы армие уд мыны? Атайме 1941-тӥ арын 10-тӥ мартэ фронтэ басьтӥзы. Механик шуыса, сое танке пуктӥзы но Курской дугае келязы. 1943-тӥ арын немец «тигръёслы» пумит ожмаськиз. Горд Кизили орденэн пусъемын. Огпол котыртэме сюриз, пленэ кутӥзы. Концлагерьысь сое мозмытӥзы война бырем бере. 1946-тӥ арын 10-тӥ декабре берытскиз. Юалляськыны кутскыкумы, весь шуэ вал: берло верало. Ӧм вуттэ вераськыны. Весь уж уг быры ук. Тодытэк ик кыли, мар со окопын пукон, приказ возьман. Но ӵапак солы луыса, армиысен кытчы мынод шуыса юазы но, танкист луо шуи. Озьы службае Китай кунгож дорын ортчиз. Китай Вьетнам вылэ омырскемын вал — пӧсь вакыт.

Белорусиысь кунооосын

— Тушмонъёсты вань-а?

— Вань. Кылсярысь, браконьеръёслэсь ӵемысь утёно луэ «Пихтовкалэсь» прудъёссэ. Мон весь тыршисько, котыр порядок медло шуыса. Нош соос пуртъёсын но, пыӵалъёсын но вуо. Улляны тыршиськомы. Огпол машиназэс басьтыны косӥ, ӧд басьтэ, ӧд кошке ке, котырзэ гудомы, уд потэ ни, шуи. Экскаватор келяй. Корка пыризы, быдтонэн кышкатъяны кутскизы…
Ачим но куддыр пыӵал кутылӥсько. Пӧйшураны вет-лӥсько. Но кинэ ке ыбыны киы уг пыры — ваньзэсты жалясь мон, соин ик мон урод пӧйшурась. Со эшъёсын пумиськон выллем луэ.

— Марлэсь кышкаськоды?

— Малпам ужъёсме лэсьтыны уг вутты шуыса. Хозяйствоез утьыны, ӝутыны тыршон тазалык вылын шӧдӥськытэк уг кыльы. Ӟучъёслэн веранзы вань: быть, а не казаться. Та куронъя улӥсько. Уг яратӥськы чеберъяськисьёсты но пӧяськисьёсты.

Елена Сараматова

Ангелина Снигирева
By Ангелина Снигирева Ноябрь 2, 2018 12:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<