Чалмыт но бугырес…

Ангелина Снигирева
By Ангелина Снигирева Ноябрь 21, 2018 16:55

Людмила Кутянова кылбурчилы, литературоведлы 16-тӥ ноябре 65 арес тырмысал. 37 ар ог-огмес тодыса, эшъяськыса улӥм.

Л. Кутянова

Улон сюресамы трос ласянь тупасез вал: вордским одӥг аре, будӥм артысь ёросъёсын, Нылга но Вало шур дуръёсын. Удмурт кун университетын одӥг группаын дышетским, огдыре кылбураны кутским, нырысь книгаосмы ӵош потылӥзы, огвакытэ ик семья но кылдытӥм, Володяослы бызим…

Но арлыд йылэмъя котькудӥзлэн аслаз чутырес кожонъёсыз но ӟиго-ӟуго улон гердъёсыз кылдыло. Мӧйымемъяз адями ас пуш дуннеязгес улыны кутске, уката ик гожъясь-кылбурась мурт пыдлось малпанъёссэ бумагалы гинэ оскыны дыше.
Людмила но, ас быръем сюрессэ волятыса, 55 арес тырмон азяз макем йыг-йыг кылбурчи но тодосчи, журналист но редактор вал ни. «Чагыресь пилемъёс», «Ваче син», «Со аръёс» кылбур бичетъёссэ, «Удмуртское стихосложение» монографизэ, Н. Байтеряковлы сӥзем книгаоссэ поттыны вуиз.Трос сайкыт малпанъёсыз вал азьпаллы. Но… 2008-тӥ арын 2-тӥ гудырикошконэ «ӵашъён» куспетӥ кариз улонзэ. Таӵе ыштонлы али но оскыны уг луы, сюлэм чигиське малпаса.

1971-тӥ-1976-тӥ аръёсы УдГУ-ысь филфакын одӥг группаын ӵош дышетскем эшъёсылы вазиськи. Огазьын ӝӧк сьӧрын пукыса кадь, учким «Удмуртия» ГТРК-лэсь али потэм «Мылысь-кыдысь» передачазэ, кудӥз сӥземын вал Л. Кутяновалы. Редактор Валерий Сидоров уже кутэм 1998-тӥ, 2003-тӥ но 2004-тӥ аръёсысь видеосъёмкаосты, Семён Карповлэсь но Светлана Кибардиналэсь Л. Кутяноваен интервьюоссэс. Передача мылкыдмес бугыртӥз, со ортчем шудо дыръёсмес улӟытӥз.

Лидия Лекомцева (Тимофеева), Эгра ёросысь дышетӥсь:

— Та передачаез бӧрдыса учки, Людаен выльысь пумиськем кадь потӥз. Котькуд кылыз сюлме пыӵа. Со ас понназ, чалмытгес вал ук, нош татын выльысь усьтӥськиз.

Валентина Черыгова (Казанбаева), Вотка карысь дышетӥсь:

— Туж лякыт, гань-гань сямо. Юан сёто ке, малпаськыса гинэ вера. Комнатаямы керетыса кадь вырыкумы, мыняса гинэ кылзӥське вал. Мар туж син азям кылиз: нянез пуртэн уг шорма вал, со, пе, няньлэсь ческытсэ быдтэ. Милесьтым шореммес но ӧз кутылы.

Галина Зиновьева (Конькина), Алнаш ёросысь дышетӥсь:

— Нырысь Людалэсь возьдаськоно кадь потэ вал: пыртӥд потыса учке, дунъя, шӧдэ адямиез. Философ, психолог кадь но потылӥз. Визь-кенешъёсын юрттылӥз, буйгатъяз. Нош ачиз… Одӥг комнатаын улӥм ук, адӟылӥ: занятиысь бертэмез бере, ымнырзэ миндэре карыса, бӧрдэ. Бурмонлы сётскисьтэм висемезлы чидатэк, кожасько вал. Берло валай: яратон мылкыдъёсыз солэсь сюлэмзэ бугыръяса возизы.

Татьяна Четкарёва (Вагинова), «Удмуртия» издательствоысь азьвыл редактор:

— Туж узыр вылэм Людмилалэн лулпуш дуннеез. Ассэ ачиз вормыны, кепырамзэ ватыны но малпанзэ шараяны быгатэ вал. Передачаын «шӧгесь гожъямъёсы» шуиз ке но, со музъем вылтӥ юн вамышъясь кылбурчи вал. Кильтрес тусо ӧвӧл, но умой учконо ке — чебер, пуш ласянь пиштэ чеберлыкез…

Олег Четкарёв, писатель:

— Группаысьтымы нылъёс пӧлын висъяське вал туж сабырлы луэменыз. Ноку лекын, куаразэ будэтыса вераськемез ӧй вал. Син азям пуксе: ураметӥ мынэ, шуген вамышъяса, ас малпаськон дуннеяз выемын…

Л. Кутяновалы сӥзем синпелет доры люкаськизы удмурт нылкышно кылбурчиос

Та борды аслэсьтым кӧня ке гинэ ватсасал. Тулкымъяськыкуз та эше ассэ кутыны быгатылӥз, но сюлэмызлэн сильтӧлэз ваньмыз ымныраз адске вал: шӧдскымон дыректылӥз ымдурыз, кыдёке сузёнтэме учкылӥзы синъёсыз. Нош кулэ дыръяз, маке уг ке яра, Люда чурыт но юн, ӝотырес сямо луылӥз, аслэсьтыз ӵогылӥз.
Мон котьку но синмаськылӥ Людмилалэн бугыръяськись малпанъёссэ мур но вӧлмытлыко вераны быгатэмезлы. Ачиз но шуылӥз ук: «Мур малпаськон чебер кылбуре кисьтӥськыны кулэ».

Людмила Кутянова сярысь мадён-веран — пыдэстэм ошмеслэн визыламез кадь, азьпал аръёслы но кемалы тырмоз. Солэн уго татчыозь эскерымтэ на рукописьёсыз, архивез. Отын ватосэз — зарезь пыдсы уськытэм зарни янчик кадь — шедьтонтэм, усьтонтэм. Адями та дуннеысь кошке ке, соин ӵош дуннеез но кошке, пытсаське. Пытсаське — но сое ялан усьтыны вырозы литератураез эскерисьёс. Уз вунэтэ будӥсь пиналъёс. Арлы быдэ кылбурчилэн вордскем музъем вылаз — Ува ёросысь Булайын — ортчыло буре ваён ужрадъёс.

Татьяна Чернова

Кыкетӥез туспуктэм басьтэмын Татьяна Черновалэн «Вконтакет» вотэсбамысьтыз

КЫЛБУРЕТ ДУННЕ

Бубыли

Бубыли укное йыгаське,
Пияла борддорен
жугиське.
Жадьтозяз бурдъёссэ
лопыръя,
Люкисьсэ йыркурен
ӝабыръя.
Бубыли тыл доры
куриське,
Гадьыз укное шуккиське.
Со тани жуммыса усёз,
Со тани бурдъёссэ тӥялоз.
Ӧвӧл ни кулэ улонэз,
Уг быдэсмы ке малпанэз…
Жаляса мон усьтӥ
укноме,
Лопырскиз бубыли
тыл дуре.
Нош тон монэ ку жалялод?
Ку мыным сюлэмдэ
усьтод?
Адӟы, малпанэ йыгаське
улонад,
Сое жуммытэ
валасьтэм сюлэмыд.

Зорые
Зоры, зоры, зорые,
Котты мертчан
йырсиме,
Гылты пӧсь синкылиме,
Зоры, зоры, зорые.
Ӵуж мертчан но
йырсиме
Со ӧз-а маялля вал?
Возьдаськись сьӧд
синъёсме
Со ӧз-а утчалля вал?
Зоры, зоры, зорые,
Миськы чагыр дэремме,
Котты ӵыжыт
ымдурме,
Зоры, зоры, зорые.
Та чагыр но дэремме
Со ӧз-а яраты вал?
Та ӵыжыт но ымдурме
Со ӧз-а чупалля вал?
Зоры, зоры, зорые,
Кисьты чылкыт
зор вудэ,
Сёты мыным,
сёт шуддэ,
Зоры, зоры, зорые.


Алданчи кылъёссэс
Весь жуго но жуго:
Жон-н-н! Вазе пель сьӧрам,
Жон-н-н! Шуэ шаерам —
Уд но вала:
Кинлы ӟырдытсы?
Мар пумысь
Чусасьтэм мылкыдзы?
Мон ке нош —
Азьвыл кадь ик:
Бакча мерттӥсько,
Нылыным ӵош сое
Урыны потасько…


— Синлысъёсыд
котмиллям,
Оло, бӧрдӥськод-а?

— Уг, кема лыдӟиськи —
Туж жадиськем, дыр…

— Бамъёсыд но
льӧлектӥллям,
Лекъяськиськод-а?

— Уг, кема малпаськи —
Йыры висьытозь ик…

— Кыӵе-сыӵе малпанэд,
Оло, вералод-а?

— Уг, верай ке, дугдод
юамысь,
Дугдод шорам
ваземысь.
Сотэк — мар улон со?


«Инмаре» шуисько ке, —
Вань-а меда вордӥсе,
Вань-а учкись-чакласе,
Улонэтӥм валтӥсе?
Малы уг шедьты амал
Сьӧд пилемлэсь сайяны,
Ӵашъёнъёслэсь ватыны,
Лек йӧзорлэсь утьыны?
Оло, пичи потӥсько:
Мар-о монэн выронэз,
Мар-о юнме юрттонэз,
Мар-о кужым быдтонэз?
Ньӧл кадь огнам чидаса,
Я усисько, пограсько,
Я мон выльысь
ӝутскисько —
Тонэ, Инмаре, утчасько…


Кулыны кулэ, пе,
ас кожад
Улыны кылисьёслэн
ышыгазы —
Пачылась шудзэс медад
пожа,
Медаз ватэ мылкыдзэс
мыжыказы.
Кылдэмын озьы —
ваньмыз быре, кошке,
Кин вуэ пересьмыса,
кин — уг.
Ма, улон озьы ялан
вошке,
Валаны гинэ тае
туж шуг.
Визь уг тырмы ас лулдэ
буйгатыны,
Со ялан оске ай
азьпаллы:
Шудбуро уйвӧтъёслы но
шундыё нуналъёслы…
Но кулэ, кулэ
быгатыны
Ас дыраз ыштӥськыны
ышыгазы —
Медаз ватэ мылкыдзэс
мыжыказы.

Ангелина Снигирева
By Ангелина Снигирева Ноябрь 21, 2018 16:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<