Уваын кыдало чемпионъёс

Ангелина Снигирева
By Ангелина Снигирева Октябрь 15, 2018 11:40
С. Кислухин

Ува ёросын умой радъямын нылпи спортэз азинтон. Берло дыре тросэз пиналъёс шумпотыса ветло биатлонэ. Уваысь тренер Сергей Кислухин сюлмыныз висе биатлон понна, туэ со, «Гуртэ — биатлон» проект гожтыса, ӝыны миллион манет тыр грант утӥз.

Ува ёросысь егит спортсменъёс ыбылӥськыны кутскизы 2006-тӥ арын. Со дырысен винтовкаоссэс киысьтызы ӧз куштылэ ни. Нылпиос понна вань сюлэм шунытсэ сётэ Сергей Кислухин. Гуртысь нылпи биатлонэз азинтон вылысь Уваын кылдытӥз «Ясень» клуб.

  • Гуртысь нылпиосты но спортысь та амалэ кыскеме потӥз, — шуэ Сергей Вячеславович. — Пиналъёслы туж кельше ыбылӥськыны. Совето Союз вакытэ котькуд школаын сямен ыбылӥськонъя секциос ужазы, тиръёс вал. Берло дыре пыӵал тӥрлык возён ласянь законъёс чурытазы, школаосысь тиръёс пытсаськизы. Пичи калибръем винтовкаосты туала вакытэ пневматическойёсыз вошто.

Уваын биатлонъя клуб кылдытыса, тренерлэн сюлмаськонъёсыз эшшо но йылӥзы. Со адӟиз, мугорзэс кыдато ёрос центрын улӥсь нылпиос, нош гуртоос палэнэ кылё. Соку дышетӥсьлэн вордскиз «Гуртэ — биатлон» проектэз. Сое улонэ пыӵатыны луонлыкъёсыз но табере кылдӥзы — со 499 сюрс манет тыр грант утӥз.

  • Азьвыл басьтэм винтовкаосмы вужмизы, — веранзэ азинтэ Сергей Кислухин. — Пыӵал пуктылон пу установкаосмы милям вал ни, нош коврикъёс Ижысь А. Демидов нимо спорткомплексысь нуллӥськомы вал. Озьы кураськытозь, малпамы ваньзэ сое асьмелы басьтыны.

Малпамын — лэсьтэмын. Сергей Кислухинлэн проектэзъя вуэм коньдонэн 12 винтовка (одӥгез 30 сюрс манет пала сылэ), 12 коврик (одӥгез 15 сюрс манетэн) но хронометраж басьтӥзы. Табере ёрос ӵошатсконъёссэс капчиен радъяны быгатозы.

  • Арлы быдэ «Кубок надежды» ӵошатскон ортчытъяськомы, туэ но отчы 250 пала нылпиос пыриськизы, куное ӧтьылӥмы Чайковский городысь пинал спортсменъёсты но, — шуэ С. Кислухин. — Соос паймизы шуныт пумитаны быгатэммылы. Угось котькуд ӵошатскон дыръя пиналъёсты ми дунтэк сюдӥськомы. Озьы 17 медаль шудытӥськиз ке, 6-сэ гуртысь пиналъёс утӥзы.

Туннэ нуналлы Ува ёросысь школаос пӧлын биатлонъя кружокъёс умой ужало Нылга, Булай, Мушковай но Красное черкогуртъёсын. Ува ёросын вань чемпионъёссы но. Кылсярысь, дуннелэн чемпионэз луиз ни Никита Лобастов, Россилэн чемпионатаз пырисько ни Мария Блинова, Елизавета Шигарева но Дмитрий Никибауер. Соос шоры ик учкыса, пиналъёс но спортэ кыстӥсько. Та дыре 80 пала нылпиос биатлонъя кружоке ветло, отчы куто 8 аресысен. Нылпиос мугорзэс кыдато но ыбылӥсько. Пиналъёс пӧлын но вань ни чемпионзы: Ксения Кириллова биатлонъя Удмуртилэн 2 полэс чемпионэз луэ.

  • Нылпиос биатлонъя кружоке мыло-кыдо ветло, соосын 2 тренеръёс ужало, — веранзэ азьланьтэ Сергей Вячеславович. — Гуртысь пинал спортсменъёслэн но вормон басьтыны луонлыкъёссы вань, город нылпиослы ми куасэн бызьылонъя ӵошатсконъёсын гинэ келяськомы. Угось тросаз гуртъёсын куас сюресъёс ӧвӧл, ма, Уваын но толалтэ гинэ куас сюресмы кылдэ. Нош вормон понна быдэс ар ӵоже мугорез кыдатоно, гужемзэ питрано куасъёс вылын бызьылоно. Азьланезлы малпанъёсмы бадӟымесь, кылдытыны чакласькомы нимысьтыз база.
Пиналъёс ярато ыбылӥськыны

Соин но, дыр, Уваысь пиналъёсты биатлонистъёс шуыны ым уггес усьтӥськы на. Соослэн ӧвӧл нимысьтыз ыбылӥськон интызы. Туж кулэ дыръяз гинэ стадион шоры коврикъёссэс вӧлдо, пу установкаоссэс бызьылон сюрес вылэ пукто но ыбылӥсько. Соос мугорзэс кыдатыны ӵемгес ветло Ижысь А. Демидов нимо спорткомплексэ, огпала гинэ сюрессы 125 иськем люкаське. Югдурез тупатон вылысь Ува ёросысь Кыйлуд черкогуртысь шутэтсконъя азьвыл базаез куас базалы пӧрмытыны чакламын. Куасэн бызьылон интыосыз Ижысь спорткомплексъёслэсь пӧртэм уз луэ, ыбылӥськон инты но лэсьтозы. Отын ик пинал спортсменъёсты сборъёсы люкалозы, бадӟым ӵошатсконъёс ортчытъялозы. Ӵапак отчы ӧтьылозы Ижысь биатлонъя школаысь тренеръёсты. Озьы кужмо нылпиослэн Удмуртилэн сборной командаяз шедьыны луонлыксы кылдоз.

Гуртысь дышетӥсьлэн юрттӥсьёсыз вань. Кылсярысь, Ижысь Ольга Гуреевалэн учебно-методической центрез та дыре Ува ёросысь шутэтскон базаез выльдэ-тупатъя. Сергей Кислухин басьтэм грантэныз уг буйгатскы, та вакытэ мукет гожтэм проектэзлы дунъет возьма. Таяз учыре дышетӥсь гурт биатлонэз быдэс шаерамы вӧлмытыны медэ. Уваысь биатлонъя школалэн луонлыкез вань, гурт школаосы потаса, ӵошатсконъёс ортчытъяны. Озьы эшшо тросгес нылпиосты биатлонэ кыскыны луысал. Туннэ нуналлы бускель Сьӧлта, Сюмси, Вавож ёросъёсысь нылпи спорт школаос уваослэсь вуэмзэс чидатэк витё, матысь дыре уваос Кияса черкогуртэ потыны дасясько. 

Валентина Емельянова

Ангелина Снигирева
By Ангелина Снигирева Октябрь 15, 2018 11:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<