Сомында адямиен пумиськоно на…

Ангелина Снигирева
By Ангелина Снигирева Октябрь 15, 2018 10:54
Е. Миннигараева

Алигес Печатья но ивор вӧлмытонъя агентство ялӥз, кинэ туэ ар понна Правительстволэн литературая премиеныз пусйыны дэмла. Сыӵеос пӧлын — «Удмурт дунне» газетлэн валтӥсь редакторезлэн воштӥсез, кылбурчи но писатель Елена МИННИГАРАЕВА.

  • Кӧня ке ар талэсь азьло элькунысьтымы Правительство шаерысьтымы литератураез азинтон вылысь премия юнматӥз. Берло аръёсы зэмен но кӧня ке тунсыко произведениос кылдӥзы. Нош тонэ со вырӟытӥз-а?
  • Котькуд конкурс адямилы луонлык сётэ ассэ эскерыны. Правительстволэн литература удысын сётӥськись премиеныз дунъямзы — со произведенилы гинэ ӧвӧл, огъя творчестволы дунъет, дыр. Но мон понна со кыл кутон но. «Сьӧд сюлык» книгаям пыризы пӧртэм вакытъёсы гожъям веросъёс но повестьёс. Соос, нокыӵе конкурс сярысь малпатэк, мылкыды, сюлэмы курыса, ваньмон дыръя гожъямын, куд-огез — ог 10 ар талэсь азьло ни.

Но творчество удысын конкурсъёслэн кужымзы зэмзэ но вань. Ог 3 ар талэсь азьло Нациосын ужан политикая министерство ялӥз удмурт егитъёслы но пиналъёслы чаклам произведениосъя нырысетӥ элькун вожвылъяськон. Отчы пыриськисьёслэн ужъёссы печатламын луыны кулэ ӧй вал. Озьыен, ӵыжак-выль. Озьыен, сое выльысь гожтоно. Тани та конкурс профессионалъёсты но али гинэ гожъяськыны кутскисьёсты вырӟытӥз. Мыным но со тунсыко вал. Озьы егитъёслы гожтӥ «69 ар ортчыса…» детектив шӧмъем фэнтези. Меӵак верасько: таиз уж ноку ӧй кылдысал, конкурс ке ӧй ортчысал. Шумпотӥсько, произведение нырысетӥ инты басьтӥз, сое «Удмуртия» издательствоын нимаз книгаен поттыны дэмлазы.

  • Тон гожъяськод кылбур но, роман но, публицистика но. Кудӥз тыныд матынгес, кинэн астэ золгес шӧдӥськод?
  • Улонам ваньмыз сӥен-сӥен. Школаын дышетскыкум ай, Пичи Пурга ёросамы ужаз «Пурга гуръёс» литобъединение. Али но тодам отысь дышетӥсьёсы — писатель Владимир Самсонов но «Маяк» газетын ужась Зинаида Титова. Тросгес гожъялляй проза. Быдэ вуон вакытам выжи кылбур дуннее. Ӧвӧл, яратон сярысь гинэ ӧй гожъя, малы ке тросгес — улон, дунне, адӟон, удмуртлык…
Анай-атаеныз, мемееныз но выныныз

Можга педучилищеын дышетскон вакытэ тупаз 1990-тӥ аръёсы удмурт движенилэн ӝутскеменыз. Со ӧре аспӧртэм романтизм мылкыдын мон но шеди. Шедем гинэ ӧвӧл, 1994-тӥ арын вань удмуртъёслэн 5-тӥ съездазы Можга ёрослэсь делегатэ бырйизы. Соку мон вал тужгес егитэз делегат. Тодӥсько на, кыӵе пушсы тырыса, вераськылӥзы сцена вылын адямиос, кыӵе йӧно но визьмо потӥзы мыным соку удмурт азьветлӥсьёс. Та бӧрсьы Можга педучилищеын «Удмурт Кенеш» огазеяськонлэсь ёззэ кылдытӥмы.

Тунсыкъяськи удмурт историен, мифологиен, этнопедагогикаен. Стипендиме люкаса, басьтӥсько вал В. Владыкинлэсь, Л. Христолюбовалэсь, М. Гришкиналэсь, М. Ивановалэсь, Н. Кузнецовлэсь, А. Уваровлэсь соку гинэ потэм книгаоссэс. Со вал паймон, выль дуннеез усьтон, астэ валаны тыршон — со дыре ик со вал поэзия.

Нош УдГУ-ысь удмурт филологияя факультетын дышетскон аръёсы матынгес вал прозалы. Татын мон аслым усьтӥ тодмо философъёсты, кунсьӧр литератураез, со вакытысь туала удмурт литератураез. Татын малпан кылдӥз С. Матвеевлэн «Шузи» романэзлы пумит «Мумы» произведениме кылдытыны. Угось мыным туж ӧз яра пиосмурт гожъясьлэн нылкышно шоры учконэз. «Мумы» книгаен потӥз 2008-тӥ арын. Но сое али но юасьёс вань. УдГУ-ын дышетскыкум ик, юнгес кыстӥськи публицистикае.

Ӵош ужась эшъёсыныз

«Удмурт дунне» газетэ лыктэме — со улонлэн воксё мукет тубатэз. Пуктӥзы политикая но экономикая отделэ. Кыӵе романтика? Татын лыдпусъёс, быръёнъёс, ВВП, законъёс… Но пушкад тэрисьтэм мылкыдэз кытчы ке кароно ук. Озьы кутски выль проектъёс борды, лыдӟись тужгес но яратэ вал «Тангыра» фин-угор баммес, дышетӥсьёс сое вандыса кельтылӥзы, урокъёсазы кутылӥзы. Чидасьтэм мылкыды выльысь кылбуръёсы кыстӥськиз. Мынам блокнотъёсы гинэ но 2 люкетлэсь вал: азьпалаз пресс-конференциос, мышсэ берыктӥськод но — кылбуръёс, эссеос. Пумен, 2010-тӥ арын, «Мон — улӥсько!» кылбур бичетэ потӥз.

Но, тодӥськод-а, мон ведь ноку ӧй малпалля журналист луыны, ялан гожъяськи ке но. Школаын тужгес кельшылӥзы физика, химия но литература. Озьы мон огдыре ик «физик» но «лирик». Малпалляй, режиссёр яке дышетӥсь луо. Эшшо — тодосчи. Туж кельше вал кыӵе ке ужпумез эскерыны, йылаз-пумаз вуттыны. Ялан малпалляй, «Удмурт дунне» — со огдырлы гинэ. Нош али малпасько, «Удмурт дуннелы» луыса мон гожъяськонлэсь ӧй куштӥськы.

Берло дыре кылбур дуннелэсь палэнски. Мар вераме потэ, верай ни кадь. Шуак йырам лыктэм чуръёсты но гожтыкум, малпасько, та сярысь кин ке куке вераз ни ук, мукет сямен гинэ. Мар мон выльзэ усьтом на? Александр Пушкин шуиз вал: «года к суровой прозе клонят…» Аръёс ортчемъя мынам но озьы-а, мар-а. Нош прозаын мынам трос вераме потэ на. Вот али тазьы шуисько но шӧдӥсько: кылбуратэк но уг быгаты ук…

Удмурт азьветлӥсьёсын
  • Гожъяськыкуд адӟись-код-а аслэсьтыд лыдӟисьтэ, донге-а со тонэ азьлань, дугдытэ-а? Оскиськод-а, туала вакытэ книга малы ке дышетыны быгатэ на шуыса?
  • Лыдӟисьме адӟем гинэ ӧвӧл, шӧдӥсько, дыр. Тужгес но прозаын. Но куддыръя туж тунсыко пӧрме: «Мумыез» мон гожтӥ егитъёс понна, нош со книгаен потэм бере пумиськонъёсы, библиотекаосы ӧтчаны кутскизы арлыдоос. Туэ кӧня ке номерын потэм «Сайкатэ монэ, рай вуиз ке…» кузьмадёсэз юромо гожтӥ «Удмурт дуннеез» лыдӟисьёс понна, соосты вырӟытэм, «сайкатэм» потӥз. Трос вал жингыръясьёс, тау карисьёс, но вал одӥг пыкылон: малы, пе, сыӵе вакчи гожтӥды…

Оскисько: книга адямиез воштыны быгатэ. Но туала вакытэ книга но пӧртэм луэ. Куд-ог гожтэмъёс адямиез сӧрыны быгато. Соин ик ки улэ шедьыны кулэ, нырысь ик, визьмо, малпаськытӥсь, адямилыкез улӟытӥсь книга. 19-тӥ дауре ай П. Вяземский критик шуиз: «Беда иной литературы заключается в том, что мыслящие люди не пишут, а пишущие не мыслят». Та гожтэм уж дурысь ӝӧк вадьсам но юнматэмын. Критик ӵапак асьме вакытмы сярысь верам ук: Интернетын, чагыр экранын али маиз но ӧвӧл, будӥсь пиналлы со куркуян пӧлысь туж шуг шедьтыны зэмос литератураез но искусствоез. Бен, чеберлыко литература жаг пӧлысь но вордӥськыны быгатэ. А. Ахматова гожъяз: «Когда б вы знали, из какого сора растут стихи, не ведая стыда…»

Но зэмос гожъяськись со жуг-жаг пӧлысь утча но будэтэ ӟеч произведениез. Со аслэсьтыз лыдӟисьсэ гажа. Нош рифма понна гинэ, дан утчаса яке «макем валантэмгес, сокем визьмогес» шуыса гожъясьёсты мон уг гажаськы. Но, малпасько, соос но луыны кулэ. Ӟечезлэсь дунзэ валан понна-а, мар-а…

  • Улонын тон туж чурыт рамкаосын улӥсь адями, ваньмыз планъя радъямын. Нош творчествоын луэ-а планъя ужаны. Яке нимысьтыз кыӵе ке гожъяськон мылкыдэз, дартэз возьмаськод?
  • Чурыт рамкаослы монэ, дыр, улон дышетӥз ни. Пичи дыръям мон туж шаян вал. Фая эшелэн пересь мемеез монэ «шаян ныл» гинэ шуылӥз. Анае верамъя, Пичи Пурга ёросысь Сосновка посёлокамы тубамтэ писпуэ ӧй вал, 8 арескам пыдме чигтӥ но, эшъёсы гипсэн но писпу вылэ тубыны юрттылӥзы. Али но тодам на, писпуос вылын пукыса, кырӟалляммы. Кыӵе шудо вакыт вал со! Зэм, бӧрысьгес вынме но сузэрме чакласа улоно луиз. Сиён пӧраны туж вазь дыши, 5-тӥ-6-тӥ классысен ик школаысь бертӥсько гинэ, нырысетӥ, кыкетӥ блюдоен сиён пӧрасько, эшшо выныным ӵош мильым, печення пыжиськом, меню лэсьтӥськом, ӝӧкез чебер пуктӥськом — сыӵе яра вал. Анай-атай бертытозь, ваньмыз дась мед луоз. Атай туж яратӥз, ваньмыз радызъя мед луоз шуыса, та ласянь мон солэн нылыз, дыр.
Творческой ӝытэз дыръя

Плантэк троссэ лэсьтыса уд вутты, ачид тодӥськод ук, редакциын чыры-пыры адскисьтэм ужъёс тырмыт, соос ик трос дырез басьто. Но, зэмзэ ке, мон туж уг яратӥськы рамкаосты — ӝоканы ӧдъясько. Соин ик, луонлык кылдэ ке, яратӥсько шуак кытчы ке вырӟыны: губияны, узы-борылы ветлыны. Городын но паркъёстӥ, инкуазетӥ ветлытэк улыны уг чидаськы.

Творчествоын планъя улыны луэ но, кулэ но. Мон али уг вераськы кылбуръёс сярысь. Но прозаез тон нуналъёсын, арняосын, кытӥяз толэзьёсын малпаськод ук. Егитъёслы кузьмадёс гожтыкум, азям ужпум пуктӥ: 2 толэзь ӵоже, бер ӝытъёсы ужаса, произведениез гожтоно. Валамон ини, ваньмыз чакламъя ӧз пӧрмылы: тани пичиез пиналы висьыны усиз, кыӵе роман на? Сыӵе дыръя ваньзэ палэнтӥськод но шуиськод: нырысь ик мон — анай, нош творчество возьмалоз.

  • Мар сётэ но мардэ тала тынэсьтыд газет?
  • Писатель Г. Перевощиков ялан куаретэ вал: малы тон астэ газетын быдтӥськод, газет кылэз кӧсатэ, дышем кабъёсъя гожъяськыны кутскод… Генрих Ксенофонтовичез мон туж вылӥ дунъясько, но озьы верамез туж ӧз яралля. Малпасько, ваньмыз адями бордысь потэ. Ас бордад ужад ке — кылыд уз кӧса. Кӧсам гинэ ӧвӧл, узырмоз. Угось редакциын пӧртэм ёросъёсысь нылъёс-пиос ужало, пӧртэм диалектъёсты кылыса, тынад песьтэред тырогес гинэ луэ.

Нош Учаысь (Ильинск) школаын, тужгес но покчи классъёсын, мыным удмурт кыл капчиен ӧз сётӥськы, удмурт кылбуръёсты бӧрдыса но дышетэме вань. Угось нылпи садын милемын ӟуч сямен вераськизы, эшъёсы но ӟучгес вал. Ма, нырысетӥ кылбуръёсы но ӟуч сямен кылдӥзы ай, «Пионерская правда» газетэ гожъяськыны выри, пӧртэм учыръёс малпаса, эшъёсылы книгаос лэсьялляй. Но огпол классэн кивалтӥсьмы Виктор Алексеевич Иванов шуиз: малы, пе, ӟуч сямен гожъяськод, тон удмурт ук, тыршы ай удмурт сямен… Удмурт сямен? Кылбур? Мынам со йырам но ӧз лыктылы. Кӧня курадӟи тӧдьы дыдык сярысь чуръёсме удмуртэ берыктыны! Бӧрысь удмурт кылъя дышетӥсе Екатерина Владимировна Алексеева юрттӥз анай кылэлэсь чеберлыксэ усьтыны. Мон валай: кулэ кыл уд шедьтӥськы шуыса, удмурт кыл янгыш ӧвӧл, ачид янгыш — аслэсьтыд анай кылдэ умой уд тодӥськы шуыса.

Удмурт азьветлӥсьёсын
  • Тынад журналистика но литература удысын трос вормонъёсыд ни. Нош кыӵе дунъет тон понна тужгес бадӟым луэ?
  • Финляндиысь М. Кастрен нимо огазеяськонлэн журналистика удысъя валтӥсь премиез, дыр. Та премиез нырысьсэ басьтэме дырысен ог 15 ар ортчиз ни, но мон туж умой тодӥсько на, кызьы милемыз Милитина Гаврилова-Решитько но Елена Виноградова журналистъёсын ӵош фин посольствоын данъязы. Нош сюлмыным тужгес матын Э. Батуев нимо премиен дунъямзы. Эшшо туж шумпотӥ, Москваысь «ЭТНОсфера» журналлэн конкурсаз уже устоосыз пӧлы пыртэмын но отын печатламын вал шуыса. Нялтас вераса, туж кельше вал удмурт культура, соку гинэ ӝужась этнотуризм сярысь гожъяны «Финно-угорская газета» издание. Таиз Саранскын потэ. Огвакытэ мон та газетлэн Удмуртияя собкорез луыса ужай.
  • Кыӵе писатель, публицист яке дышетӥсь тон понна адӟем карымон луэ?
  • Можга педучилищеын дышетскыкум, одӥгаз кабинетын борддор кузя интыямын вал дано выпускникъёслэн бадӟым туспуктэмъёссы: В. Владыкин, М. Иванова, Л. Христолюбова, Г. Никитина тодосчиос… Тани та адямиос ик мон понна вал зэмос дышетӥсьёс. Чебересь, йӧноесь, визьмоесь. Урок мынон вискын но мон шоразы учкылӥ, соос кадь луэм потэ вал. Литератураын дышетӥсьёсы вал, дыр, Р. Валишин, Г. Красильников, Г. Перевощиков, С. Матвеев, М. Федотов, В. Ар-Серги, Т. Чернова…

3-тӥ курсын вал ни со, завуч доры ӧтизы. Лев Афанасьевич Смирнов шуиз: малпаськом, пе, тонэ Эстоние дышетскыны келяны, анай-атаеныд вераськы, дасяськы. Педучилищеез йылпумъятэк? Бен, йылпумъятэк… Мон понна со сокем витёнтэм вал. Кызьы мон яратоно педучилищеме кельтом? Уг мыны. Классэн кивалтӥсе Т. Иванова визь тыриз, али кадь ик пель сьӧрам верамез: «Лена, тыныд дышетскыны мыноно, всёравно вылӥ тодон-валан басьтоно, азьланяз адямилэсь аспирантура курозы ни…» Конечно, мынам туж потэ вал дышетскеме, но шуисько: мон семьяямы бадӟымез, бӧрсям эшшо 2 муртэ дышетоно. Анай-атаен вераськи. Соос сюлмаськыны ӧдъязы: бугырес 1990-тӥ аръёс, уждун уг тыро, странаямы бардак… Анай пумит луиз, атай — малпаськоно, пе. Но мыным анае жаль потӥз, ас поннам лушкем бӧрдӥ ке но, уг мыны, шуи.

  • Кузпалэныд кыкнады журналистъёс, Фёдор Миннигараев Кун Кенешлэн пресс-службаеныз кивалтэ. Огвыллем ужъёс-тунсыкъёс семья улонын юртто, дыр?
  • Шуг вераны. Кузпалэным ужан удысмы огвыллем ке но, ми туж пӧртэм адямиос. Мыным ваньзэ туж ӝог лэсьтоно, огдыре ик 2-3 ужез валтоно. Со гань-ганьгес, одӥгзэ йылпумъятэк, мукетыз борды уз кутскы. Кино ке, солы кулэ комедия, мыным — драма. Трос аръёс ӵоже со «Мынам Удмуртие» телерадиокомпаниын ужаз.

Дорын ми уж сярысь шер вераськиськом. Кузпалы уж дураз ӵемысь берозь ӝегано луэ, куддыръя бертэмез бере уйёсы ужа на, куддыръя — шутэтскон нуналъёсы но. Ачим та удысын ӧй ке луысал, мон, дыр, керӟегъяськысал, солэсь ужзэ ӧй валасал. Али дыши ни. Вазьгес бертыны шедьтэ ке, нылы понна со бадӟым праздник. Тужгес яратӥськом толалтэ шутэтскон нуналъёсты. Соку папамы одно ик вис шедьтэ — быдэс семьяен куасэн бызьылыны — спорткомплексэ, нюлэскы потаськом.

Семьяеныз

Мынам но ужея командировкаосы, ӝыт ужрадъёсы потано луэ. Бадӟым юрттӥсе — пие. Но со студент ке но, котькуд нуналыз гожъямын: дышетскон, спорт, студсовет… Али, пие шоры учкыса, асме тодмасько.

  • Тӥляд семьяды адӟем карымон луэ пиналъёсыныды анай кылын вераськеменыды но.
  • Мон уг малпаськы, таин ушъяськоно шуыса. Али гинэ вордӥськем нуныелы кыӵе кылын вазиськоно вал, кыӵе кырӟанъёс кырӟано вал? Бен, вераське-а, уг-а пиналыд анай кылын — со потэ нырысь ик анай бордысь. Туала вакытэ пиналдэ анай кыллы дышетон — со сыӵе ик уж, анайлэн ужез. Мылкыдыд, чиданэд тырмиз ке — пиналыд вераськоз, ӧз ке — уз. Валтӥсез — пинал аслэсьтыз выжызэ, калыксэ мед гажалоз.
  • Кыӵе книга лыдӟид берпуметӥзэ?
  • Вань мынам япон поэзиен зӧк горд книгае. Потэмын ай 1956-тӥ арын. Ог 15 ар ӧй ни усья вал сое, куке-соку удмурт кылэ берыктыны выри ке но. Кемалась ӧвӧл киям вуизы «Шундыкар» лагере ветлэм нылпиослэн япон кылбуръёсъя гожтэм чуръёссы. Бадӟым люкетсэ мон ӧй вала. Малы? Ӟуч кылэ берыктэм япон поэзиен книгаез лыдӟисько но ваньзэ валасько ук. Япон поэзия туж ненег, туж матын удмурт сюлэмлы, лулдуннелы. Валасько: пиналъёсмы анай кылзэс ляб тодо, малпанъёссэс гожтыны шугъясько. Нош мар луоз, эшшо 10 ар ортчыса?
  • Ку потоз выль романэд?
  • Ваньмызлэн аслаз дырыз. Потэ историен герӟаськем произведение гожтэме. Тунсыко ортчем даурлэн кутсконэз, Граждан ож, революция, коллективизация… Асьмеос со вакытъёслы дунъет сётыны яратӥськом, таиз умой, соиз урод вал, шуиськом. Но туала вакытысь адями со дыре шедьысал ке, кызьы ассэ возьысал? Кызьы со — куке агай султэ вынызлы пумит, куке толло эшед туннэ тон шоры пыӵалзэ ӝутэ…

Улын Юриысь тятямы (мамалэн атаез) пичи дырзэ тодаз вайылӥз. Одӥг бадӟым семьяен туж, пе, ӟеч улӥськом вал: йыг-йыг бадӟым корка, кеносъёс, коргид тыр скалъёс, валъёс. Атайзы туж визьмо вылэм, гуртын солэн гинэ мумыкораз дуннелэн картаез ошемын, пе, вал. Но огпол пӧсь гужем, ваньзы возь вылын ужакузы, быдэс хозяйствозы ӝуам. Соку гуртазы кӧня ке юрт ӝуаса бырем. Тятялэн верамезъя, ужысь бертэм атайзы пуксем, пе, пеньӟем юртъерзы азе, номыр верамез уг луы, бам кузяз синкылиосыз гинэ васько. Дораз одӥг пиосмурт матэктэм: малы, пе, бӧрдӥськод, шумпотыны кулэ. Тонэ, пе, кулаке поттыны, ваньбурдэ таласа, вань семьядэ Сибире келяны чакламын вал ук. Нош табере тӥ улэп кылиды, Инмарлы тау кар, тазьы луиз шуыса…

Татямы улэп ӧвӧл ни. Жалясько, ас вакытаз солэсь ӧжыт юалляськи шуыса. Нош кӧня ке ар талэсь азьло улонысь кошкиз атае. Быдэс улон ӧз тырмы кадь одӥг пол рос-прос вераськыса пукыны. Али туж юн валасько: улон сыӵе вакчи, нош сомында лэсьтоно на, сомында муртэн пумиськоно, вераськоно…

Зинаида Рябинина

Ангелина Снигирева
By Ангелина Снигирева Октябрь 15, 2018 10:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<