Шумпотонэз коньдонэн уг мертало

Ангелина Снигирева
By Ангелина Снигирева Сентябрь 7, 2018 11:55
Нырысетӥ классэ — цирк пыр

Ижысь цирк усьтӥськем дырысен туэ 1-тӥ сентябре 15 ар тырмиз. Та дыр ӵоже со ӧз куштӥськылы ӟеч сямызлэсь: котькуд дышетскон ар кутскыку, ӟечкыла 1-тӥ классэ вамыштӥсьёсты.

Цирк доры огез бӧрсьы мукетыз ӵуж автобусъёс вуо. Отысь йӧн-йӧн тусын пото нылъёс но пиос. Нылъёслэн йыръёсазы бадӟым тӧдьы бантикъёс, пиос чылк-чылк сузям пыдкукъёсын. Дышетӥсьёссы соослы валэкто: эн йӧнтэмъяське, цирк туж бадӟым, йыромыны шедьтоды.
Пичи Пурга ёросысь Бобья-Уча школаысь дышетӥсь Елена Гавриловна Николаева кема аръёс ӵоже ини покчи классъёсты дышетэ. Соин ик котькуд классэныз цирке ветлэ.
Туэ 5-тӥзэ лыктӥсько ини, — шуэ со. — Но представлениосты умой-умой учкыса но уг вуиськы кадь, синъёсы весь пиналъёсы бордын: ваньмыз-а умой — цирк соослы туж кельше, туж шумпото!
Дышетӥсезлэсь верамзэ сак кылзэ Назар Фролов. Солы, пе, уката но кельшиз, автобуссэс ГИБДД-лэн машинаез мигалкаосын ик келяз шуыса. Ушъяське: цирке, пе, 4-тӥ ползэ лыктӥ ни. Уката но синмаське арена вылысь пӧйшуръёслы.
Нош вӧзаз сылӥсь Катя Глухова цирке нырысьсэ вуэм. Гадь бордаз ошемын бейджик: нимыз-тулыз, кытысь луэмез гожтэмын. Нылашлы со гинэ но туж кельшем ини!
Представление кутскиз гинэ, цирк согиськиз кичабонъёсын. Цирклэн кивалтӥсезлэн воштӥсез Оксана Майшева верамъя, программае 60 пала артистъёс пырисько, 40-эз соос пӧлысь — Ижысь циркъя студие ветлӥсь пиналъёс. Нош кыӵе цирк луоз клоунъёстэк! Соос пиналъёсын мыло-кыдо шудӥзы.
Правительстволэн Тӧро-езлэн воштӥсез Анастасия Муталенко шуиз:
Одӥг мукет улосын но 1-тӥ классэ лыктӥсьёсты цирке уг нулло. Радъяны сое капчи ӧвӧл: пиналъёсты ваёно, сюдоно, куноятоно. Но Правительство та ӟеч сямызлэсь азьланяз но уз куштӥськы. Кыӵе шумпото нылпиос цирклы — тае коньдонэн уд мерта.
Туэ 1-тӥ классэ вамыштӥзы 21 сюрслэсь ятыр нылъёс но пиос. 5-тӥ сентябрьысен 10-тӥ сентябрёзь соос ваньзы вуылозы представлениосы.

Элина Кумачёва

Туспуктӥз Максим Егоров

Ангелина Снигирева
By Ангелина Снигирева Сентябрь 7, 2018 11:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<