Кубисталэсь куарзэ ишканы эн дыртэ

Ангелина Снигирева
By Ангелина Снигирева Сентябрь 5, 2018 16:06

Сентябре ву кисьтаны, уриськыны кулэ ӧвӧл ни, соин ик ӵапак дырыз вуоно тулыслы дасяськыны. Макем тросгес али лэсьтоды, сокем ӧжытгес ужъёс кылёзы вуоно арлы.

Толалтэлы убоосты валаса дасяно

— Емышо писпуосты сӥзьыл мерттыса кельтыны луоз — выжыятоно, кезьытъёс вуыны кутскыку. Но инты соослы дасяно али ик: гудӟиськоно, отчы кема кыллем кыед, пень ватсано. Выль интые выжтыкуды, эмезез сяна, мукет емышо пудъёсты, кылсярысь, сутэрез, ӵышкыны уг яра.

— Емышо писпуос улысь музъемез копано — выжыос дорозь омыр, ву каньылэнгес мед вуозы. Со сяна, музъемез бугыръям уг кельшы нымы-кибыослы: оглюкетэз муре согиськыны шедё, тулыс отысь потэмзы уг луы ни, мукетъёсыз, му вылэ кыльыса, кынмо.

— Бушам убоосты копаса кельтоно. Кыед, компост ватсаны луонлыкты ӧвӧл ке, пайдаё луоз ӵужкушман, гордкушман куаръёсты, люпин, фасоль, кӧжы удъёсты убо пушкы ог 15-20 сантиметр мурдалае согыса кельтыны — удобренилы пӧрмозы. Нош ватсады на ке бархатцы, ноготки сяська удъёсты — вуоно арын убояды висёнъёс ӧжытгес кылёзы.

— Кияр пудъёсты ӵужектыны кутскизы ке, куасьмемзэс возьмаса эн улэ. Убодэс сузялэ, небӟытэ но со интые компост, кема кыллем кыед ватсалэ, кизе сидератъёс — горчица, фацелия, сезьы, кӧжы но мукет. Кезьытъёс вуон азьын ини соосты музъемен суро гудыса кельтоды. Эсьмаса, тулысозь убоды выльысь шутэтскыса, витамино суретъёсын узырмыса вуттоз.

— Помидор удъёстэс но убо вылын сьӧдэктытозязы эн возе — бакчаяды висёнъёсты гинэ юнме вӧлмытоды. Нош вуымтэ векчи емышъёсты кытчы карыны шедьтоды — сылалтыны но кисьматыны луоз.

— Ӵужкушмандэс, гордкушмандэс октыны эн дыртэ: гулбечын шуныт на, емышъёсты шуяны кутскозы.

— Кубиста вылэ ву ӧжытгес кисьтано ни — йыръёссы пильылӥськыны кутскозы. Эшшо уг яра ишканы улӥ куаръёссэс — йыръёс соку ик быгыльскемысь дугдозы. Нош убоез котькуд зор, ву кисьтам бере небӟытоно — кубиста выжыос юнмалозы, йырзы ческытгес луоз.

— Кезьыт луэмлэсь кышкало базилик, майоран, муштурын (мелисса) выллем будосъёс. Соосты али бичано, куасьтоно ни, кофемолка пыр поттыса, банкаосы тыроно — толалтэ сиён пӧраны туж иназ луоз.

Кин базиликез яратэ, выжызэ горшоке мерттэ но укно азе пуктэ — со кема шумпоттоз на ческыт зыныныз, вож куаръёсыныз. Озьы ик толлы горшоке мерттыса кельтыны луоз петрушкаез, сельдереез.

Элина Кумачёва

Ангелина Снигирева
By Ангелина Снигирева Сентябрь 5, 2018 16:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<