Быгатӥсез ялан ӝутӥське

Ангелина Снигирева
By Ангелина Снигирева Сентябрь 7, 2018 16:17

Юн хозяйство гуртэз но ӝутон сярысь сюлмаське, нош лябезлы калыклэн сюлмаськонъёсыз ик кулэ ӧвӧл. Та зол шӧдӥськиз, Вавож ёросэтӥ Кун Кенешысь Президиумлэн ёзчиосыныз котыръяськыку.

Кун Кенешысь депутатъёс тодматско Вавожысь хозяйствоослэн ужан амалъёсынызы

Кионгуртлы кулэ школа

«Удмуртия» хозяйствое уже куриськисез лачак. Татчы мукет ёросъёсысь но адямиос семьяосынызы валче улыны выжо — колхоз лыктӥсьёслы корка висъя. Котькудӥз сое татын 10 ар ужамез бӧрсьы басьтыны но ас вылаз гожтыны быгатэ. Шоро-куспо уждун «Удмуртиын» 36 сюрс манет. Гидъёссы туж чылкытэсь. Скалъёс кыедэн медаз саптаське шуыса, улазы нимысьтыз бактериосын пыӵатэм куро валё: озьы кыед интыяз ик органической удобренилы пӧрме, сое ӝыны арлы огпол бусые потто. Со сяна, Кионгуртын кылем арын скал кыскыны карусель выллем зал лэсьтӥзы, Германиысь установка вуттӥзы. Хозяйствоен кивалтӥсь Аркадий Юшков верамъя, 58 миллион манет тыр усиз со, 1 сюрс 200 скаллы чакламын. Миым зал вӧзы 600 йырлы гид ӝутӥзы. Туэ эшшо со быдӟазэ ик пукто — сӥзьыл вуттыны медо. Скал сьӧры аппаратэн бызьылонэз ӧвӧл ни: кыскыны сигнал чузъяськем бере сюро ачиз кабинкае пыре но карусельын сямен берга, вераосаз ӵашаосты дэмӟытыса гинэ вутты. Котькуд скаллэсь йӧлзэ кыскыны 12 минут быре. Мукет аппаратъёсын кыскон понна 21 минут кошке. Зэм, мукет 3 гуртъёсысь бригадаосын «Карусель» ӧвӧл на. Но отысь но гидъёссэс выльдыны малпало.

  • «Карусель» — со толло технология. Туннэ роботэн ужано ни, — шуэ Аркадий Юшков.

Оглом хозяйствоын 5 сюрс 836 сюро таза пудозы. Та пӧлысь 2 сюрс 10 кысконо скалъёссы. Миым котькуд скаллэсь шорлыдын 7 сюрс 473 килограмм йӧл кыскизы. Саклык висъяны медо ош будэтонлы. 1 сюрс 200 йыр ошъёс куайыто ни. Та удысын ӧжыт хозяйствоос бергало.

Аркадий Юшковез гуртоослэн улон-вылонзы сюлэмшугъяськытэ. Гуртъёсысь вань социальной объектъёсты угось колхоз ас быгатэмезъя ӝутӥз вал ай. Кылсярысь, озьы пуктэмын Кионгуртысь школа. Но со куашканы кутскемын: борддорез пилиськемын, штукатуркаез усьылэ. Аркадий Юшковлэн та школа интые выльзэ ӝутыны мылкыдыз вань. Проект лэсьтыны но кутскемын. Но вужзэ кесяд ке, пуктӥськытозь нылпиосты кытчы карод? Кун Кенешлэн Тӧроез Алексей Прасолов ӵектӥз вӧзаз пристрой ӝутыны, школаез рос-прос тупатъяны. Нош отӥяз улон возьматоз.

Йӧл вӧзы улмо

Мичурин нимо хозяйство, вуж котельнойзэс выльдыса, туэ январе йӧл цех усьтӥз. Зэм, асьсэлэсь вань йӧлзэс пакетъёсы лэзьяны уг дӥсьто на — оглюкетсэ заводъёсы келяло. Туала вакытэ угось рынокын астэ шедьтыны шуг. Уката ик — али кутскисьлы. Со ласянь бадӟым заводъёсын уж радъямын ни.

  • Туннэ переработчикъёслэн ужамзы шугъяськытэ. Со сярысь тулысысен вераськомы ни, — шуэ Алексей Прасолов. — Малпасько, заводъёс йӧл дунэз юромо уськыто. Таин сэрен гуртоос ыштонъёс адӟо. Соин ик малпасько: котькуд ёросын, кӧня ке хозяйствоос огазеяськыса, йӧл цехъёс усьтӥзы ке, умой луоз. Учке ай, кыӵе ческыт йӧлзы Мичурин нимо хозяйствоын. Кытысь 3,4-4 процентъем нап йӧлэз шедьтод на? Асьмеос быгатомы кузятэм, сыр но мукет сиён-юон поттыны. Зэм, магазинъёсы сюрыны секыт. Но та Правительстволэн но Кун Кенешлэн сюлмаськонзы мед луоз.
А. Прасолов тодматске хозяйстволэн ужаменыз

Нялтас вераса, Ӟамбай гуртын йӧл гинэ уг потто. Татын 2 арлэсь ятыр ни сӥльлэсь сиён но лэсьто. Со сяна, нянь пыжон борды басьтӥськизы — колдыоссы Вавож, Ува, Можга, Иж пала кошко. Нош 6 гектар вылэ мерттэм улмооссы кылем арысен урожай сёто ни: вольытэсь, нумыр сиемез но ӧвӧл. Хозяйствоен кивалтӥсь Владимир Капеев пусъемъя, магазинъёсысь но базаръёсысь басьяськисьёс уг ик оско, та асьме музъем вылын будэтэм улмо шуыса. Нош компотъёссы макем ческытэсь!

Дышетӥсь куриське… скал кыскисе

Артысь «Колос» хозяйство но арысь аре пуктӥськеменыз паймытъя. Туннэ, кылсярысь, гуртъёсысь спортзалъёсысь тир уд адӟы, вылды. Нош татын гуртоос, ыбылӥськем сяна, волейболэн но, баскетболэн но шудо. Гуртоослэсь тазалыксэс кыдатонлы хозяйство бадӟым саклык висъя. Уг вунэты шутэтскон дырзэс радъяны. Культурая юртъёссылы городын улӥсьёс но вожъясько. Хозяйство субсидиосты возьмаса уг улы — ачиз выльдӥськонлы уксё кисьтэ. Али тани Выль Бияла 50 миллион манет тыр нылпи сад ӝутӥз. Вужез угось пичи вал, столовоез но палэнын сылӥз. Выль садзы 75 интылы чакламын. Вӧл-вӧл, югыт, спортлы но концертъёслы залэз одӥг бадӟым висъетын. Хозяйствоен кивалтӥсь Владимир Красильников верамъя, ӝоген нылпи сад пумиталоз пиналъёсты. Татчы артысь Валодор но Чудьялуд гуртъёсысь но пичиос ветлозы — асьсэлэн садзы но, школазы но ӧвӧл. Водӟи гурт поселениен кивалтӥсь Дмитрий Шихов пусъемъя, гуртъёсын воспитательёслы но дышетӥсьёслы ёрмо. Кылсярысь, Водӟие Выль Биялась воспитательёс ужаны ветло. Уноез бюджет удысын ужасьёс колхозэ курисько — татын скал кыскись ик шорлыдын 40 сюрс манет басьтэ бере, школаын но садын ӝегатскемзы уг поты. Али физиклы но математиклы ёрмо.

Волипельгалась клуб тырттэм

Волипельгаын улӥсьёс, гуртсы «Колос» хозяйстволэсь 30 иськемлы палэнэ пуксемын ке но, бускельёссылы вожъясько. Гуртысьтызы хозяйство угось лябӟиз, фермаоссэ, техниказэ вузаз. Соин ик школазэс но, садзэс но, клубзэс но выльдӥсь ӧвӧл. Нош улэ татын 900 мурт. Соин ик Удмуртиысь Культурая но туризмъя министерстволэн гуртысь клубъёсты выльдон проектаз пыриськизы. Культурая юртсы угось воксё но вылазы куашканы кутскиз ни вал. Липетэз вия, тӧл шула, ӧсъёсыз ӟирыосазы мырдэм возисько. Эшшо ке клублэн липет улаз ик гурт библиотека но интыяськемын на. Тупатъянзэ лыдъязы но, вань ужъёсты быдэстыны оглом 5 миллион 800 сюрс манет кулэ шуыса шараяськиз. Проектъя волипельгаос кие 1 миллион 700 сюрс манет вуиз. Та луонлык сётӥз вань ӧсъёсты, укноосты воштыны, липетэз профнастилэн шобыртыны, шуныт пыртыны. Клубен кивалтӥсь Валентина Кашина верамъя, 70 процентсэ ужъёсты быдэстоно на.

1 толэзьлы гинэ клубез пытсаллязы, ремонтлы шуыса. Соку но гуртоос ӝожомизы. Мукет люкаськон интызы ӧвӧл угось. Клуб ворсаськемен, библиотекае но сюрес пытсаськиз. Озьы лыдӟиськон сэрегтэк гуртоослы воксё мӧзмыт луиз. Но клуб туэ уз усьтӥськы, вылды. Но библиотека ужаны кулэ, вазиськизы гуртоос Алексей Прасоловлы.

Выль Бияын «Колос» хозяйство ӝутӥз дворец кадь нылпи сад.

Ёрос администрация юртлэсь пырон азьзэ тупатъяны, библиотекалэсь вӧлдэтсэ воштыны, выжзэ выльдыны луонлык утчалоз. Со сяна, пуконъёссы но ӝӧкъёссы куашкан калэ вуэмын, езъёсын кыскамын. Алексей Прасолов но Президиумлэн ёзчиосыз огкылэ вуизы: Кун Кенеш ӝӧкъёс кузьмалоз. Библиотекаез матысь дыре усьтоно, шуиз Алексей Прасолов. Таӵе шумпотон иворлэсь гуртоослэн синъёссы ик осконэн пачылазы. Библиотекамы усьтӥськиз ке, шудолэсь но шудо луомы. 2 сюрс 600 книгаосмес кытын утьыны ик паймиськомы ни вал, шуо библиотекарьёс.

Кун Кенешысь депутатъёс гуртоосын пумиськылӥзы, сюлмаськытӥсь юанъёссэс кылзӥзы.

  • Вавож ёросэ потанлэн валтӥсь мугез — висьытӥсь интыосты утчан. Соосты тупатыса, хозяйствоос эшшо золгес азинскыны быгатозы. Кылдэм ужпумъёсты Правительствоен валче сэрттыны-пертчыны тыршомы, — йылпумъянъёс лэсьтыса, шуиз Алексей Прасолов.

Елена Сараматова

Туспуктэм басьтэмын http://www.udmgossovet.ru/ сайтысь

Ангелина Снигирева
By Ангелина Снигирева Сентябрь 7, 2018 16:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<