20-тӥ дауре медам кыле

Ангелина Снигирева
By Ангелина Снигирева 5 сентября, 2018 12:28

24-тӥ — 25-тӥ августэ Ижын нырысьсэ радъяськиз Дышетонъя элькун салон. Со воштӥз дышетӥсьёслэсь арлы быдэ август толэзе ортчылӥсь август конференцизэс. Мар вылез луыны кулэ таяз дышетскон арын?

Выль дышетскон ар азьын таӵе бадӟым ужрад ортчытыны юнме шорысь малпамын ӧй вал. Салонэз усьтыса, Удмуртилэн Тӧроез Александр Бречалов вераз:

  • Улон туж ӝог воштӥське, выльдӥськонъёс вань удысъёсын ортчо, кызьы кунэн кивалтонын, озьы ик тазалыкез утён, дышетон удысъёсын. Дышетон удыс азьын сылэ валтӥсь ужпум: котькуд адямилы тодон-валанъёссэ будэтыны огкадь луонлыкъёс, дышетӥсьёслы ужаны ӟеч условиос кылдытоно.

Туннэ валаны уг луы, мар луоз ӵуказе, кыӵе выль удысъёс-технологиос кылдозы. Соин ик нылпиосмы дась луыны кулэ котькыӵе воштӥськонъёслы. Улон выльдӥськемъя соослэн тодон-валанзэс будэтыны мылкыдзы мед луоз.

Мар со понна кароно? Кивалтӥсьёс, дышетон удысын ужасьёс, экспертъёс, ужбергатӥсьёс 2 нунал ӵоже 70-лэсь ятыр сессиосын, мастер-классъёсын, дискуссиосын, адӟытонъёсын та сярысь кенешизы. Ужрадъёс огдыре кӧня ке площадкаосын ортчизы: Нылпиослэн творчествозыя юртын, «Кванториум» нылпи технопаркын, «Альтернатива» но быдэ вуымтэослэн реабилитация центръёсазы. Оглом отчы 1 сюрс 500-лэсь ятыр адями пыриськиз. Элькунмылэн палэнысьтыз вуэмъёс но вал — Москваысь, Пермь улосысь, Татарстанысь, Комиысь.

Салонэз сӥё-дано усьтон ортчиз Нылпиослэн творчествозыя юртын. Александр Бречалов пусйиз: шаерысьтымы пиналъёс арысь аре ӟечесь тодон-валанъёссэс возьмато олимпиадаосын, ЕГЭ-ын. Но вань сюлмаськытӥсь ужпумъёс но. Кылсярысь, пиналъёсты выль амалэн сётӥськись экзаменъёслы дасям понна дышетӥсьёслы, технической ужасьёслы компенсация уг тыриськы.

  • Та ужпумез ми Правительствоен эскерим, — пусйиз Удмуртилэн Тӧроез. — Вуоно арлэн бюджетаз уксё — 80 миллион манет — чакламын луоз.

Кыкетӥез сюлмаськытӥсь ужпум — егит специалистъёсты дышетон удысэ кыскон. Элькунысьтымы вузъёсты, техникумъёсты йылпумъясь тросэз егитъёс ӵемысь уже интыясько мукет улосъёсысь дышетон организациосы. Визьнодасьёс уг тырмо котькытын, но уката секыт югдур Ижын. Татысь школаосын али 300 пала буш интыос.

  • Гуртэ ужаны кошкись дышетӥсьёслы кун ласянь пичи ке но юрттэт вань — чакламын одӥг пол сётӥськись пособие, отын тупатэмын куд-ог льготаос, — ватсаз А. Бречалов. — Таӵе ик юрттэт луыны кулэ городъёсысь школаосын ужаны кутскисьёслы но. Вуоно арлы бюджетэз чаклаку, тае лыдэ басьтоно.

Выль сямен ужан сярысь вераськон ӝутӥз дышетонъя но наукая министр Светлана Болотникова но.

  • Специалистъёс верамъя, матысь 20 ар куспын 45 процентсэ ужъёсты быдэсъялозы ни роботъёс, — шуиз со. — Озьыен, азьланьын тросгес кылёз дырмы ог-огенымы пумиськылыны, кенешыны. Пиналъёсты выль вакытлы дасян вылысь школаосы вуыны кулэ выль воштӥськонъёслы дась луись дышетӥсьёс но. 21-тӥ дауре пыӵалозы выль технологиос, дышетӥсьёс 20-тӥ дауре кыльыны кулэ ӧвӧл.

Дышетонъя но наукая министр верамъя, туннэ элькунысьтымы 44 процентаз гинэ школаосын вылӥ ӝоглыкен Интернет вань. Котькуд 10 пиналлы 1 компьютер усе. Но 51 процентэз компьютеръёс вужмемын. Кылем арын гинэ 1 но ӝыны сюрсэз выльдэмын ке но, тырмыт ӧвӧл. Соин ик матысь 2 арлы элькунмы азьын бадӟым ужпум сылэ: 2020-тӥ арозь Интернет вуыны кулэ вань дышетон организациосы.

Дышетон удыслы кадръёс дасян пумысен вераськиз Удмурт кун университетлэн ректорез Галина Мерзлякова. Дышетӥсьёслэсь тодон-валанзэс будэтонъя курсъёс, УдГУ-ын сяна, усьтэмын ни Глазовысь В. Короленко нимо пединститутын но. Курсъёсты табере луоз, пе, онлайн амалэн но ортчытъяны.

Дышетонъя салон августовской конференцилэсь одӥг ӟеч сямзэ кельтӥз — тужгес азинлыко визьнодасьёс дано нимъёсын, грамотаосын пусъемын. «Дышетон удысысь дано ужась» нимын туэ пусъемын 4 дышетӥсь. Одӥгез соос пӧлысь — «Удмурт дунне» газетмылэн матысь эшез, Дэри ёросысь Юськи школаысь удмурт кылъя но литературая дышетӥсь Пётр Давыдов. Шуиз: тазьы данъямзы азьланьын эшшо но ӟечгес ужаны мылкыд сётэ. 

Мылкыдъёс

Анастасия МУТАЛЕНКО,

Правительстволэн Тӧроезлэн воштӥсез:

  • Конференциын трос вераськиськом дышетон удысэ выль технологиосты пыӵатон сярысь — со туала улонлэн куронэз. Но таин ӵош медаз вуны школа азьын сылӥсь валтӥсь ужпум — нылпиосты яратон, соос сярысь сюлмаськон. Куддыръя дышетӥсьёс, анай-атайёсын ӵошатыса, умойгес шӧдо нылпилэсь сюлмаськонъёссэ, кышканъёссэ. Компьютеръёс, планшетъёс сярысь трос вераськыны луоно, но нылпи школаын ассэ уг шедьты, отын солы тунсыко ӧвӧл ке, дышетонлэн пайдаез уз луы. Малпасько, дышетӥсь луон — со профессия гинэ ӧвӧл, со мылкыд, нылпиосты яратон.

Любовь СЕМЁНОВА,

Дышетон удысэз азинтонъя институтысь профессиослы дышетонъя кафедраысь валтӥсь преподаватель:

  • Дышетӥсьёсты выль амалъёслы дышетыны вазенгес кутским ни. Уг ваты: нырысь аръёсаз соос воштӥськонъёслы дасесь ӧй вал. Но али валаны кутскизы: урокын, темаез мӧзмыт верам интые, пайдаёгес луоз, нылпиослы вераськыны-малпаськыны тросгес дыр висъяса. Малпасько, та конференциысь дышетӥсьёс трос выльзэ тодыса-валаса кошкизы. Мон но аслым трос выльзэ басьтӥ, кылсярысь, огдышем урокъёс интые, мастер-классъёс ортчытъяны кутским ини, нош луэ на вылэм сессиос но радъялляны.

Пётр ДАВЫДОВ,

Дэри ёросысь Юськи школаысь удмурт кылъя но литературая дышетӥсь:

  • Нылпиос мыло-кыдо басьтӥсько вылез борды, соослэсь мылкыдзэс гинэ ӝуатыны быгатоно. Жаляса верано, удмурт кылъя урокъёсмес «Ӟеч-а, бур-а, удмурт кыл!» учебникъя нуиськом ни — ӟучо-удмурто нылпиослы со чакламын. Угось классъёсамы чылк-чылк удмурт пиналъёс 2-3 кузя гинэ кыльылэмын. Но школаямы удмурт кылмес утьыны юрттэ «Юнкор» кружокмы. Юськи котырысьтымы 4 гурт быремын — малы озьы луиз, отын но калык ужаз, улӥз ук. Та юан туж сюлмаськытэ. Малпасько, нылпиослы но утчаськон-юалляськон тунсыко потоз.

Марина МАКСИМОВА,

Глазовысь В. Короленко нимо пединститутысь кунгожсьӧр кылъёсъя но удмурт филологияя кафедраен кивалтӥсь:

  • Дышетӥсьёслэсь конференцизэс выль амалэн ортчытон мыным туж яраз. Глазов пединститутамы кужмо тодон-валанъёсын специалистъёс ӧжыт ӧвӧл. Быгатэммыя пӧртэм проектъёсты пыӵатӥськом ни, кылсярысь, англи кылэз мургес дышетонъя школа кылдытӥм — отчы пыриськись школьникъёс, студентъёс олимпиадаосын вормонъёс басьтыло. Туэысен радъяны малпаськом ЕГЭ-лы дасяськонъя онлайн-центр. Отчы палэнысь гуртъёсысь но пиналъёс пыриськыны быгатозы, эсьма, дорысьтызы потанэз уз луы.

Марина СЕРГЕЕВА,

Ижысь егит дышетӥсь:

  • УдГУ-ысь магистратураын дышетскыкум ик, Кузебай Герд нимо гимназие интыяськи. Пиналъёсын ужаны туж кельше, коллектив умой. Но гурт школаосы мынӥсь дышетӥсьёслы кун ласянь пичияк ке но юрттэт вань ке, городын та ласянь секытгес. Мон 1 но ӝыны ставкаен ужасько, классэн кивалтэм, тетрадьёсты эскерем понна пичияк коньдон ватсало — озьы асме сюдыны быгатӥсько ик. Но оген дышетӥсь городын аслыз улон инты басьтыны уз быгаты — ипотекалы быдэс уждунэз кошкоз. Удмуртилэн Тӧроез А. Бречалов кылпум поттылӥз городысь егит дышетӥсьёслы юрттон сярысь — туж умой ӵектон.
  • Элина Кумачёва
  • Туспуктэм басьтэмын http://www.udmurt.ru сайтысь
Ангелина Снигирева
By Ангелина Снигирева 5 сентября, 2018 12:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<