Улонлэсь люке выж

Ангелина Снигирева
By Ангелина Снигирева Август 25, 2018 10:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Глазов ёросысь Сэпыч гурт кыдёкысен бадӟым кадь адӟиське. Но отын али ялан улӥсез 30 мурт сяна ӧвӧл ни, трос куштӥськем юртъёс сыло. Сэпыче дачае сямен шутэтскыны гужемзэ бертыло азьвыл татын улэмъёслэн нылпиоссы. Татчы эшшо уногес адями лыктысал, выжзы шальтрамын ӧй луысал ке, шуэ гурт калык.

Тулыс — пытсэтын

Выжзэс тупатоно шуыса, гуртоос, оло, 30 ар талэсь азьло поттылыны кутскизы ини. Берло вакытэ со воксё шальтраз, пыдын потаны ик кышкыт ни, машинаен отӥ ог 10 ар пала уг ни ветло.

Нош вань гурт улон выж котырын берга. Сэпыче лыктыны, отысь потыны со вамен гинэ луэ. Зэм, гужемзэ гуртоос бусы кузя сюрес возё на, но толалтэ сое сузясь, чаклась ӧвӧл, тулыс, сӥзьыл но отӥ ветлыны уг луы.

Нырысь-валысь гуртысь воргоронъёс огазеяськыса выжез асьсэ кужымен возьыны выризы ай. Но бӧрысь тазьы выремлэн пайдаез ӧз луы ни.

Куашкам выж

Сэпыч выж Трубашурысь колхоз понна но туж кулэ. Хозяйстволэн гыроно-кизёно бусыосыз шур тапалан. Соин колхоз, выжлы ёрмыса, шур вамен техникалы потымон корт трубаос пуктӥз, вылазы сюй донгаз. Отӥ гуртоос ветло ик, но сюрес гопо-гопо, пичи машиналы потыны шуг. Нош тулыс, шур тудӟыку, сюй гылтӥське, отӥ потаны воксё уг луы ни. Соин гуртоос азьлапал быдэс толэзьлы тырмымон сиён-юон басьтыса дасяло. Яке городын улӥсь нылпиоссы Трубашурозь вутто, отӥзэ гуртэ пыдын ваё. Нош выж дорысен Сэпычозь эшшо 3 иськем мыноно на.

Сюлмаськон кылдэ гуртэ «скорой» пырон ласянь но.

Сэпычъёс

— Тани туэ кузпалы шугомылӥз, — вера гуртысь кышномурт Зоя Антонова. — «Скороймы» гуртэ пыриз ик, но ульчаямы тайиз, быдэс час ортчиз, сое поттыны вырыса, трактор гинэ юрттӥз. Ярам ай, кузпалме больницае вуттӥзы. Нош мукет учыре кин тодэ, мар луоз. Медпунктмы Трубашурын гинэ, отчыозь 4 иськем. Милемлы, пенсионеръёслы, отчы вуылыны шуг ини, выж вылтӥ ик ветлыны кышкаськомы. Соин, луонлык вань ке, запас эмъюм тросгес басьтӥськомы. Зэм, куашкам выжмы сярысь ёросын но, элькунын но тодо. А. Соловьев Тӧро дыръя ачиз вуылӥз, А. Бречалов но ми дортӥ ортчиз. Ваньзы выжез тупатоно шуо, но уж интыысьтыз ӧз вырӟы на.

Берытскон

Гуртлэн нуналыз

Али Сэпычын 10 коркан ог 30 улӥсез. 10 аръёс талэсь азьло, пенсие потэмзы бере, вордӥськем палъёсазы берытскизы Антоновъёс. Валерьян Васильевич 31 ар Ижын механик луыса ужаз, Зоя Геннадьевна валтӥсь бухгалтер вал.

— Ми татысь семьяенымы 1977-тӥ арын кошкимы, 2 пиналъёсмы вордӥськемын вал ини, — вера В. Антонов. — Соку колхозъёс куашканы кутскизы. Мон дыръя ай гурт котырамы гинэ 3 юн колхоз ужаз, сомында фермаос вал. Татын ужан инты луысал ке, малпасько, Сэпычысь нокытчы ӧй кошкысалмы. Бен берыктӥським но, вордӥськем интыослэсь мӧзмыса, городын эрик ӧвӧл, омыр секыт. Нош татын юн чебер инкуазь, чылкыт омыр, вӧл-вӧл интыос.

Татысь интыослы синмаськыса ик, гуртэ дачае сямен вуылыны кутскизы куке-соку гуртысь кошкем адямиослэн нылпиоссы. Бен, тросэз, атай юртъёссэс жаляса, гужемлы ке но татчы бертыло. Ӵемгес вуылысалзы, выж луысал ке, верало сэпычъёс.

Гурт ульча

Али гуртын ваньзы сямен пенсионеръёс ни. Трубашурысь «Октябрьский» хозяйствоын 6 мурт ужась вань на. Но Сэпычын номыр ӧвӧл ке но, гуртоос асьсэлы асьсэос мӧзмыны маза уг сёто, нылкышноос бакча ужъёслэсь ваньмон дыръёсазы пыдын поръяны потало. Котькуд ар гуртсылэн нуналаз татчы трос калык люкаське. Сэпычъёслы праздник лэсьто Валерьян Антонов но Геннадий Волков.

— Пиосмуртъёсмы мыло-кыдоесь, тани мынам кузпалы но бускельмы, ӵош кариськыса, вань гурт калыкмес ӝуткало, шуыны луоз, — вера Зоя Антонова. — Гуртмылэн нуналэз азьын ваньмы турнаны потӥськомы, калыкез пумитаны инты дасяськомы. Воргоронъёсмы, гурт калыкез ӧтьыса, ёрос газетэ ялон гожто, ог-огмылы телефон пыр жингыръяськомы. Калык трос люкаське, Трубашурысь клубын ужасьёсты ӧтиськомы, шулдыръяськонмы аргантэк уг ортчылы.

Туэ но тани июне сэпычъёс бадӟым шулдыръяськон каризы, гуртсылэсь 330 аръем юбилейзэ пусйизы. Валерьян Антонов но Геннадий Волков гуртооссылы визь сынан, туспуктэмъёсын стенд дасязы, пумиськонзы туж шуныт но шулдыр ортчиз. Ужрадэз ортчытыны юрттӥз муниципал кылдытэтсы но.

Вашкала Селтакар

Гуртоос

Куке-соку Сэпыч туж узыр но азинскись гурт вылэм. Октябрьской муниципал кылдытэтэ пырись гуртъёслэсь историзэс люкась библиотекарь Валентина Шудегова тодэм: Вяткаысь шаерчилэн Павел Лупповлэн одӥгаз книгаяз пусъемын, 1688-тӥ арын Сэпыч починкае Бадӟым Поломысь 3 семья лыктэм шуыса. Та инты Глазовлэсь 20 верста кемын. Нош Ижысь архивъёсын утиськись документъёсысь тодыны луэ ни, 1811-тӥ арын гуртын Антонов, Емельянов фамилиен 22 семья улэ вылэм шуыса. Нош 1859-тӥ-1873-тӥ аръёсы 27 хозяйство лыдъяськиз, 137 воргоронъёс но 180 кышномуртъёс улӥллям. Гуртын вылӥллям волостной правление но сельской управа. 1929-тӥ арын Сэпычын «Труд» колхоз кылдытэмын вал. 1950-тӥ аръёсы сое артысь «Емельяновка», «Покровка» но «Союз» колхозъёсын огазеязы. Гуртоос верамъя, Сэпычын 100 хозяйство лыдъяськиз.

Эшшо гурт вӧзын Селтакар вашкала кар (городище) интыяськемын, со сярысь пусъемын Михаил Атаманов тодосчилэн ужъёсаз. Но отын ноку нимысьтыз эскерон ужъёс ортчытэмын ӧй вал, гуртоос но номыр вераны уг тодо ни. Эшшо ӝыны иськемын но ӧвӧл Вужшай (гуртоос сое Шайгоп шуо на) интыяськемын. Отын азьвыл ватӥськылӥллям, али ке но гуртоос со интыез палэнтӥ ортчыны выро.

Ангелина СНИГИРЁВА

Ангелина Снигирева
By Ангелина Снигирева Август 25, 2018 10:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<