Удмурт семьяын — ӟуч пинал?

Ангелина Снигирева
By Ангелина Снигирева Август 24, 2018 09:08

21-тӥ гудырикошконэ быдэс элькунысьтымы удмурт кылъя но литературая дышетӥсьёс, дышетон удысысь кивалтӥсьёс но специалистъёс люкаськылӥзы форуме.

Ӟучомиськом

Форум ортчиз Можга ёросысь Бадӟым Уча черкогуртын «Удмурт Кенеш» огазеяськон но Кун Кенешысь Наукая, дышетонъя, лулчеберетъя, йӧскалык но егитъёсын ужан политикая но спортъя ялан ужась комиссия кичӧлтэмъя. Ужрадлы инты юнме шорысь быръемын ӧй вал — ӵапак Учаын 100 ар талэсь азьло ортчиз дышетӥсьёслэн конференцизы, отысен пумиськиллям но тодматскиллям Ашальчи Окиен Кузебай Герд.

Вань удмурт дышетӥсь­ёсты но дышетонъя специалистъёсты огазеясь таӵе ужрадъёс шаерамы уг ортчытъясько, но соослэн кулэлыксы туж бадӟым. Тужгес но али, анай кылъёсты дышетонъя законэ воштонъёс пыртэм бере. Ӵапак соосты сэрттон-пертчон форумлэн огез валтӥсь ужпумез вал.

— Кызьы ужано анай-атайёсын? Кызьы нылпиослэсь мылкыдзэс ӝутоно анай кылзэс дышетыны? Та юанъёс асьмеды сюлмаськыто, — вазиськиз «Удмурт Кенешлэн» тӧроез, Кун Кенешысь депутат Татьяна Ишматова люкаськем калыклы. — Малпасько, Удмурт Элькунамы национальной юан палэнтэмын яке 2-тӥ интые кельтэмын луыны кулэ ӧвӧл. Соин ик шараялэ шуг-секытъёстэс, гожъялэ, жингыръялэ.

— Милям Лудорвай школамылы 2018-тӥ арын 120 ар тырме, 120 ар ӵоже ик отын дышетӥське удмурт кыл, — ивортӥз Дэри ёросысь Лудорвай шор ёзо школалэн директорез Надежда Мерзлякова.

Лудорвай школаын удмурт кылэз дышето ке но, гурт пумен ӟучоме.

— Лудорвайысь нылпи садэз пытсазы, гуртысьтымы анай-атайёс пиналъёссэс Иже яке бускель гуртъёсысь садъёсы нуллыны ӧдъязы, — вера Надежда Николаевна. — Ми доры мукет интыосысь адямиос вуылыны, пуктӥськыны кутскизы. Со бордысь ик потӥз ӟучомонмы. Нош ми быгатӥм семьяосты ас паламы берыктыны — капчи вазиськеменымы, урокъёсмес аспӧртэмлыко ортчытъяменымы.

— Мон удмурт кылэз валаны кутски, песянай-песятаелэсь адӟем карыса, — вераз нациосын ужан политикая министрлэн воштӥсез Павел Орлов. — Но Ижын будыса, мон рос-прос вераськыны ӧй дышы. Соин ик монэ туж сюлмаськытэ юан: быгатомы-а мон но мон кадь удмуртъёс, песянай-песятай луыса, внукъёсмылы анай кылмес выжтыны? Ум. Со туж бадӟым шугъяськон.

— Мынам песяе ӟуч кылэз чик уг тоды вал, со улытозяз мордва сямен гинэ вераськылӥз, — шуиз Кун Кенешлэн Тӧроез Алексей Прасолов. — Мон, школаын дышетскись маке, гужемъёсы со доры ветлӥсько вал, ог-огмы шоры дол-дол учкылӥм, но пал кыл но вераны ӧм быгатылэ, малы ке шуоно мон мордва кылэз ӧй тоды. Песяе кемалась ӧвӧл ини. Табере внукъёсме мордва кыллы кызьы мон дышетом?

Жаляса верано, туннэ нуналлы бадӟымъёс пӧлын но, пичиос пӧлын но югдур пӧртэм ӧвӧл.

Балезино ёросысь Исак шор ёзо школаысь удмурт кылъя но литературая дышетӥсь Татьяна Захарова куректонзэ вераз, таш-таш удмурт гуртазы но пиналъёс ӟучесь будыны кутскизы шуыса. Песяй-песятайёссы, анай-атайёссы, быгатыса-а, быгатытэк-а, тэшкылиосынызы ӟучен бӧтьырто, пе.

Таӵе югдур Исакын гинэ ӧвӧл, ёросысьтызы мукет гуртъёсын но, шуиз Татьяна Ишматова. Нош умоятыны сое нокинлы — ёрос администрациын национальной юанъёс понна кыл кутӥсь специалист ӧвӧл. Но Т. Захаровалэн дышетэм пиналъёсыз, шуг-секытъёссы шоры учкытэк, удмурт кылъя но литературая олимпиадаосын, вожвылъяськонъёсын вормисьёс пӧлын луо, уноез дышетскыны пыро Удмурт кун университетысь Удмурт филологияя, финно-угроведениея но журналистикая институтэ.

Ӧпкелёно медаз лу

Форум Можга ёросын ортчиз бере, отысь югдурен тодматӥз Можга ёросысь Депутатъёслэн Кенешсылэн тӧроез Галина Королькова.

— Ёросамы удмурт кыл пӧртэм сямен дышетӥське: урок, факультатив, кружок чотын, — ивортӥз Галина Петровна. — 50 процентлэсь уноез дышетскисьёс но 50 процент пала нылпи садъёсы ветлӥсьёс дышето сое анай кыл чотын.

Форуме лыктэмъёс Можга палъёсысь вань гуртъёсысь югдурен тодматскыса ӧз вуттэ, озьы ке но Уча черкогуртын кылдэмез сокем уг шумпотты: отын но пиналъёс удмурт кылэз дышетыны мылкыд туж уг каро.

— Ми дорын 11 пӧртэм калыкъёс уло, — ивортӥз Можга ёрослэн азьвыл йырыз, али — «Россия» огазеяськонлэн кивалтӥсез Аркадий Вершинин. — Татын удмуртъёсын но ӟучъёсын артэ тупаса уло болгаръёс, румынъёс но мукетъёсыз.

Соин но, дыр, учаос ваньзы огъя валамон кылэ выжыны дырто, асьсэ анай кылъёссэс палэнтыса. Но таӵе югдур залэ люкаськемъёслы ӧз яра.

— Мон малпасько, анай-атайёс пӧлын валэктон уж ортчытэм, кенешем бере Учаын но 1 ке но удмурт класс люкаськысал, — малпанзэ шараяз «Удмурт Кенешлэн» тӧроез Татьяна Ишматова.

— Котькуд школа дышетскон планзэ ачиз гожтэ, — шуиз дышетонъя но наукая министрлэн воштӥсез Ирина Крохина. — Со планъя удмурт кылын вераськисьёслы анай кылзэс дышетонлы 4 час висъяське, вераськисьтэмъёсызлы — 3 час. Школа со часъёсты ачиз люкылэ ини: тросгес дышетоно кылэз яке литератураез.

И. Крохина верамъя, туннэ нуналлы шаерамы 27 сюрслэсь уно пиналъёс удмуртэз дышето, соос пӧлысь ог 18 сюрсэз — предмет чотын, 9 сюрслэсь уноез — факультативъёсын яке кружокын. Но валамон, туэ куарусёнэ ини та лыдпусъёс чутрак воштӥськыны быгатозы, уго табере котькуд анай-атай нылпиез понна заявление гожтыны кулэ, кудаз пусъёз, кыӵе кыл со понна анай кыл луэ. Вань пичи кылъёсын оградын анай кыл чотын дышетӥськоз ӟучез но — сое юнматӥз туэ гужем кутэм закон.

— Соя анай кыл дышетскон программаын одно дышетон предметъёс пӧлын кылемын, — валэктӥз Кун Думаысь депутат, история наукаосъя доктор Алексей Загребин. — Ӟуч кыл султӥз анай кылъёсын оградэ.

Депутат валэктэмъя, та законэз кутоно луиз, кунысьтымы куд-огаз элькунъёсын кун кылэз одно ик дышетон сярысь законэз шонертэм, асьсэя каремысь, асьсэ кылъёссэс кужмысь дышетытэмысь. Асьме дорын сыӵе югдур ӧй вал.

Форумын уно ӵектонъёс, сюлэмшугъяськонъёс шараямын вал. Соин ужрад пумын огкылэ вуизы: Удмуртилэн Тӧроезлы вазиськон гожтоно, элькунысьтымы Дышетонъя но наукая министерствоын национальной дышетон понна кыл кутӥсь нимаз ёзэз утёно, та юанъёсты нимысьтыз чакласа возёно.

Кылмес утён понна али сюлмаськоно, бӧрысь ӧпкелёно медам луэ. Уноез удмурт кылъя дышетӥсьёс тае ӟеч валало.

Елена РЯБИНА

Ангелина Снигирева
By Ангелина Снигирева Август 24, 2018 09:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<