Тӧр шорын Кун Кенешысь депутат, Можга ёросысь удмурт воргорон Эдуард Петров

Удмурт Дунне
By Удмурт Дунне Август 3, 2018 16:07

Э.Петров

Тылъёс вискын

Кивалтӥсь луыса уг вордӥсько. Кивалтыны дышетско нуналысь нуналэ. Со ныпъетэз нуыны ваньзы уг но быгато. Можгалась удмурт пиосмуртлы Эдуард Степанович Петровлы пӧртэм-пӧртэм удысъёсты оскылӥзы ни. Со Можгалась нылпиослы спорт-школаен но кивалтӥз. Отысь ик пудо эмъянъя колледжез но, директор луыса, ӝутӥз. Али «ЭнергосбыТ Плюс» огазеяськонлэн Удмурт филиалэзлэн Можга ёзэзлэн директорез. Кыкетӥ созывзэ ни Кун Кенешысь депутат. Калык солы оске.

— Нош макем капчи аслыз сётӥське кивалтон?

— Кивалтӥсь луо шуыса, ноку ӧй малпалля, — вера Эдуард Степанович. — Та ужлы ӧй но синмаськылы, шуыны луоз. Мыным 6 арес дыръя атайме Степан Константиновичез, Можга ёросысь Кватчи гурт колхозысь валтӥсь инженерез, ужаны но адямиосын огкыл шедьтыны быгатэмзэ синйылтыса, басьтӥзы Бадӟым Сибы гуртысь «Красный путь» колхозэ предэ. Со ик луиз быдэс семьямылэн Сибые выжемез.

Анае сельсоветэ бухгалтере кутскиз. Ми, 3 пиналъёс, солэсь азьвыл но эркиямын ӧй вал, нош татчы вуыса, анай-атайлэн саклыксы милемлы уката но тырмемысь дугдӥз. Соку валай: председательлэн семьяяз будыны туж секыт. Угось вань калыклы котыр ласянь адӟем карымон луыны кулэ.

Э. Петров анай-атаеныз но агаеныз ӵош

Азьвыл колхозысь картошка утялтон, турын дасян, кушман урон но мукет вань гужем чыры-пыры ужъёс ортчылӥзы пиналъёс вылын. Атаймы шуылӥз: мукет пиналъёслэсь азьвыл уже потыны кулэ председательлэн пиез. Со котькинлы пример луыны кулэ, сьӧраз мукет нылпиос но мед кыстӥськозы. Озьы пичиысен пудо пастуханысь но, комбайн сьӧрысь но, ю тысь шертон-куасьтонысь но ӧй кыльылы.

— Малпасько вал, председательлэн нылпиосызлы та улон лякытэнгес сётӥське, соос ёрмонэз уг адӟыло…

— Калыклэсь ортчыны ӧм тырше — со возьыт но луысал. Нялтас вераса, Чайковскийысь Мугорез кыдатон культурая но спортъя институтэ дышетскыны заочно амалэн пыри, ужаны кутски но, аслым шуи: уждунэ мед тырмоз улыны но, визь люканы но — анай-атаелэн чырты сьӧраз медам пукы. Уксё кулэ дыръя эшъёсылэсь пунэмаськылӥ. Огпол но анай-атаелэсь куреме ӧвӧл. Соос но ялан дышетылӥзы: ачид, пе, ваньзэ мед быгатод.

Калык но котьку семьямы шоры учке вал, кызьы улӥськомы, кызьы ужаськомы, кызьы дышетскиськомы. Та учкемзы ик милемыз котыр ласянь кужмо, оскымон, адӟем карымон, ужась карытӥз, сямез юнматӥз. Умой дышетскон, котьма борды кыстӥськон но та бордысь ик потӥз, вылды.

Адӟисько: эше гитараен, арганэн шудэ. Гондыр пелям лёгиськемын ке но, аслым шуи: мон но та инструментъёсын шудыны быгато. Озьы атае мыным арган басьтӥз, мон клубысь кружоке гожтӥськи. Нотаосты уг тодӥськы ке но, куинь-ньыль гур шудыны али быгатӥсько. Озьы ик эшъёсыя бызьылонъя секцие гожтӥськи. Спортысь вань амалъя ӵошатсконъёсы пыриськыны кутски. Косӥзы ке, шашкилэсь но уг палэнскы. 22-тӥ августэ тани Москвае теннисэн ӵошатсконъёсын «ЭнергосбыТ Плюс» компанилэсь данзэ утьыны дасяськисько. Мыным со тунсыко.

Атай но кузпал

— Кин луэмды потэ вал пичи дыръяды?

— Атаелэн дышетэмез потэ вал электрике. Котьку, пе, аслыд уж шедьтод. Ӧй кылзӥськы. Кык ар талэсь азьло атае кулӥз. Со мыным шуиз: мон тыныд ӵектӥсько вал электрик луыны — ӧд мыны, ачид со удысэ ик вуид…

Монэ котьку бордаз кыскылӥз спорт. Школаез йылпумъякум, малпасько вал яке дышетӥсь, яке тренер луыны. Но Удмурт кун университетэ пырыны ӧй быгаты. Кузьдалае тэтчанын умой отметкаозь ӧй сузьы. 4 метр 20 сантиметр кеме бызьыса тэтчыны кулэ вал. Мон котьку тэтчасько вал 4 метр 40 сантиметрозь. Экзаменын шуо: ӧд быгаты. Тэтчиськод гинэ, экзаменаторъёс пытьыез мажесэн басьто — тэтчем интыме адӟыса но ӧй вутты. Сьӧрам эше ӧй вал учкыны.

Али валасько ни: лишной адямиосты озьы спортъя факультетэ сюронлэсь мажес пыр сӥсъяллязы. Атае тодмоос пыр пырто шуэ вал. Кулэ ӧвӧл, шуи. Со-та вераськонъёс медаз потэ, ачим вормо, малпай. Аре юнме медаз быры шуыса, Можгалась пудо эмъянъя колледже пыри. Пичи дыръям угось валъёс вылысь ӧй васькалля. Колхозын вал вордыны кутскизы атае председатель луэм бӧрсьы. Оло, соин но котырысьтызы ӧй кошкылы. Таин сэрен но пудо эмъян удысэ кыстӥськи.

Тодӥсько вал мукетсэ но: колледжын дышетӥсь но тренер луыса ужа кужмо спортсмен, СССР-ысь но Россиысь дано тренер Сергей Плеханов. Малпай: одӥг арзэ со дорын кыдало, отӥяз выльысь Удмурт кун университетэ пыро. Ар дышетскеме бере Сергей Яковлевич кошкыны ӧз лэзьы, йылпумъя, пе, дышетскондэ. Со ик луиз колледжез быдтэме. Соку мон уг ик малпаськы вал, монэ, нылпиосты дышетонъя диплом басьтымтэ муртэ, кытчы ке тренере но визьнодасе пуктозы шуыса.

Нош Бадӟым Сибы гуртысь школаын монэ возьмало ни вылэм — куасэн бызьылонъя но мукет амалъёсъя ӵошатсконъёсы пыриськылэмъёсы но вормылэмъёсы сярысь кылылытэк кылиллямтэ. Озьы монэ нылпиосты куасэн бызьылыны дасянъя тренере басьтӥзы. Нялтас Чайковские но заочно амалэн дышетскыны пыри. Бурдъяськыса ветлӥ.

Дышетоно нылпиосы угось шаерысьтымы ӵошатсконъёсын вормыны кутскизы. Инъетэз но ӟеч вал — Евгений Батуев, Михаил Шишкин, Михаил Иванов тренеръёс ас вакытазы быгатыса дышетӥзы асме но. Али но Сибыын арлы быдэ ӵошатсконъёс ортчыло. Мон но пӧлазы бызьылӥсько, мытэм уже мед азинтӥськоз кадь потэ.

Тренер луыса Бадӟым Сибы гуртын 3 ар сяна ужаны ӧз кылды — пудо эмъянъя колледже кутӥзы, дышетӥсе пуктӥзы, нылпиосты ӵошатсконъёсы дасяны оскизы. Отӥяз Можга городысь нылпиослы спортшколалы директоре юнматӥзы.

Спортсмен но тренер

 

 

— Егит муртлэсь таӵе удалтон йырзэ ӧз поромыты-а?

— Ёросысь дышетонъя управлениен кивалтӥсь Валерий Орлов спортшколае ӧтиз. Мон соку валаса но ӧй вутты кытчы сюремме. Оскизы бере, кызьы пумит мынод? 1 но ӝыны ар директорын ужаса вуттӥ, 2005-тӥ арын Можга городлэн йырыз Сергей Пантюхин кабинетаз ӧтиз. Вӧзаз пуке гурт удысъя но сиён-юонъя министрлэн воштӥсез Пётр Соболев. Котыръяськыса ӧз улэ, соку ик шуизы: пудо эмъянъя колледжез утьыны но ӝутыны кулэ, тӥледыз директоре пуктӥськомы, быгатоды.

Колледжын соку югдур капчи ӧй вал. Колледжлэн коммунальной услугаос понна 1,5 миллион манет пунэмъёсыз. Котыр ремонт лэсьтоно. Олокытысь ӟигар но мылкыд потӥз, оскизы бере, ужано, шуи. Соку пудо эмъянъя колледж Россиысь Гурт удысъя министерствое пыре вал, кивалтӥсьёс ваньмыз — Москваын. Кенешыны, кыӵе ке ужез лэсьтыны толэзяз кык пол но доразы сокеме ветлоно вал. Поездлы билет ик макем дуно сылэ. Нош колледж сотэк но бадӟымесь пунэмъёсын. Сюрес вылын но кӧня дыр быре.

Бюджетысь уксёез шыръян вылысь сюрес вылэ машинаен потӥськомы вал. Гостиницалы коньдон медам быдтэ шуыса, водителен быдэс уйзэ, ог-огмес вошъяса, Москваозь мынылӥмы. Москва кӧлэ на, ми вуиськом. Ышыг интыын минерал вуэн мисьтӥськисько но министерствое вамыштӥсько.

Быдэс нунал контораостӥ бызьылӥсько, ӝыт нош ик сюрес вылэ. Нош кызьы мукет сямен? Абитуриентъёслы приём усьтӥськом, нош пунэмъёсмы понна коммунальщикъёс шунытэз, тылэз кысо. Анай-атайёс нылпиоссы доры общежитие лыкто но, тыл нокытын ӧвӧл.

Ми тӥледлы пиналъёсмес оскимы, кызьы татчы соосты кельтом шуыса ӝожомо вал. Мыным синъёсазы учкыны туж секыт йӧтылӥз. Москваысь кивалтӥсьёсын вераськыса, валэктыса, пунэмъёсты пытсаны быгатӥм ик. Кабинетъёсын ремонт лэсьтыны но уксё курыны быгатӥ на. Тупатъян-кышъян ужъёс пӧзьыны кутскизы.

Ву изэз но пася, шуо. Озьы ик вань. Кабинетъёсазы ялан пыраменым, москваос монэ кыдёкысен тодмало ни вал. Уж пӧрмыны кутскиз, аслым но кельшыны ӧдъяз. Йырын ялан одӥг малпан вал: колледжын мар эшшо умойзэ пыӵатыны луоно на, кудпала азинсконо?

Россиысь техникумъёсты котыръяно кариськи. Малпай: пудо эмъясьлы дышетэм сяна, мукет специальность усьтоно, соку дорамы лыктӥсь абитуриентъёс эшшо но тросгес луозы. Луэ вал, гань-гань кариськыса, кылсярысь, юристлы дышетонъя специальность усьтыны. Юристлы угось лабораториос, практика ортчонъя производственной база кулэ ӧвӧл. Но та тужгес капчиез ужан амал.

Кун Кенешысь депутат

Мордовие ветлыса, синмаськи ужзылы: татын сӥлез но солэсь лэсьтэм сиёнэз дасянъя технологъёсты дасяло. Ми но Можгалан сыӵе специальность кылдытӥмы, лицензия басьтӥмы, аккредитация пыр потӥмы, дышетӥсьёсты тодон-валанзэс будэтыны ысъямы, коллективез утимы. Озьы эшшо уж кылдӥз. Абитуриентъёс но кыстӥськыны кутскизы. Колледжлы та выль шочкон кадь луиз.

Студентъёсын, дышетӥсь-ёсын, пудо эмъясьёсын валче турттӥськомы вал «Айболит» бригада кылдытыны. Со бригада хозяйствоосы потасалыз, пудоосты эмъясалыз, соин колледжлы уксё вуысалыз, бригадае пырисьёс но уждун басьтысалзы. Колледжез эшшо но азинтыны луонлык кылдысал, данэз республикаямы ӝутӥськысал.

Таин валче туж потэ вал практика ортчонъя ферма, производственной площадка усьтэммы. Пинал дышетскоз но, визь но люкалоз. Москваын но дась вал ни талы. Музъем басьтыны, пуктӥськыны кредитэ пырыны малпасько ни вал… Оскисько: малпанъёсме, проектъёсме азинтӥсь сюроз.

— Асьтэлы мар люкетӥз проекттэс быдэстыны?

— 2012-тӥ арын федерал структураын дышетон учреждениосты кулэстыны, оптимизация ортчытыны кутскизы. Ми кадь колледжъёсты улосъёс вылэ шӧдтэк шорысь куштӥзы. Ми, шаерысьтымы 7 училищеос, Удмуртиысь Дышетонъя но наукая министерстволэн бурд улаз вуимы. Со самой секыт вакыт вал.

Москваын монэ тодо ни вал, учрежденимес но азинскеменыз ушъяллязы. Нош выль структураын ми нокинлы кулэтэм луимы. Уксё люкылэмын ни, учреждениоссы угось лачак. Нокинлэн азинсконъя планъёсмес кылэмез уг поты. Озьы вань малпанъёс ӵогиськизы. Мултэс луон зӥбыны кутскиз.

Ӵапак со вакытэ монэ нош ик ӧтьыны ӧдъязы ёросысьтымы «Энергосбытэн» кивалтыны. Ӝыны ар пала сюлворо ни, весь пумитъяськи, колледж понна маке лэсьтыны быгато на шуыса. Бератаз малпай: малы эскеронтэм? Оло, та удысын маке умойзэ лэсьтыны быгато, шуи.

— Таиз удысты кыӵе?

— Нырысь-валысь туж капчи потӥз, коньдон понна угось мон кыл уг кутӥськы ни. Собере гинэ валаны кутски секытсэ. Маиз секыт? Йӧллы дунъёс усемен, хозяйствоос али так но шуге-леке вуэмын, нош мон пунэмъёссы понна тылзэс вандӥсько. Ачим гуртын будэмын ук. Мон ваньзэ валасько. Но мукет сямен куддыр уг луы. Сыӵе дыръя сюлэм кыклы пилиське. Кык тылъёс вискын кадь улӥсько: огпалаз — калык, мукет палаз — уж.

Куддыр асме буйгатыны вырисько: магазинэ мынӥсько ке, ӝыны колды нянь но дунтэк уг сёто ук. Коммунальной услугаос коммунизм вакытэ кылемын: нырысь тыл сётӥськомы, собере гинэ уксё бичаськомы. Нош тыл — со сыӵе ик вуз. Адями сое басьтӥз ни, нош уксёзэ тырыны уг дырты.

Телефонад коньдонэз быре ке, уксё понытэк, вераськем уг луы ук. Коммунальной услугаосъя но озьы ик луыны кулэ, дыр. Отчы ик вуомы но. Али ваньмызлы учётъя прибор пуктылӥськомы. Но социальной объектъёсты тылтэк уд кельты, котельнойёсты уд кысы. Пунэме кылемъёсын вераськыны секыт.

Куд-огезлэн миллионъёсын пунэмъёссы люкаськемын. Хозяйствоос валало ик: туннэ ми тылзэс кысӥмы ке, йӧл кыскыны уз быгатэ, соин ик дыраз уксё тыро. Нош ЖКХ удысын ужасьёс, калык соослы услугаоссы понна уг тыры шуыса, милемлы но коньдонзэс ӝегато.

Котькуд ужын аслаз кыл кутонэз. Юнгес луыны каллен дышисько ни. Можга городысь, Алнаш, Можга, Кизнер но Грак ёросъёсысь югдур понна кыл кутӥсько.

«Удмурт Кенешлэн» ёзэныз кивалтӥсь

— Тӥ кыӵе кивалтӥсь?

— Турттӥсько нырысь ик валаны, малы озьы я тазьы пӧрмиз шуыса. Кин тодэ, оло, ачим янгыш. Атае лекгес вал, дыр, кожасько. Солэн ужъёсыз пӧрмо вал золгес, умойгес. Мон ваньзэ сюлэм пыртӥм поттӥсь. Буйгатскон понна уж бере мынӥсько тренировкае. Пӧсям вуэн ӵош вань жадеме но сюлмаськонэ кошке кадь.

Нылпиослэсь, дышетонлэсь мӧзмыкум, школаосы, нылпи садъёсы ӵукнаосы зарядка лэсьтыны мынӥсько. Пиналъёс пӧлын мылкыд ӝутӥське. Али гинэ номыр карыны уг быгато вал кадь, син азьын будо, воштӥсько, синъёссы ӝуаны кутско. Мылкыдзэс эшшо но бурдъяме, соос но вормыны быгато шуыса возьматэме потэ. Тужгес но со кулэ начар семьяосысь нылпиослы. Дышетон удысын тыршемлэн емышъёсыз син азьын кисьмало шуыса, шумпотоно.

«Энергосбытын» ужелэн пайдаез угось ар пумын гинэ дебиторской задолженность кулэсмемъя адӟиське. Соин но, дышетонъя организациос зарядка лэсьтыны ӧтьыку, ноку пумит уг луиськы — со сяме пыӵаз ни. Калык но Кун Кенеше депутатэ бырйиз бере, дыр шедьтоно.

— Кыӵе мылкыдъёсын депутатэ мынӥды вал? Быдэсмизы-а осконъёсты?

— Колледжен кивалтыкум ик, Можгалэн йырыз Сергей Пантюхин ӵектӥз: ойдо быръёнэ пыриськыса утчалом. Соку ик тодам лыктӥз: атае но райсоветлэн депутатэз, песянае но гурт поселенилэн депутатэз вал. Асме карьерист уг шуы.

Депутатэ мынӥ, школаос, садъёс, спортъя площадкаос мед луозы шуыса. Ваньзэ луонозэ пиналъёслы лэсьтӥмы ке, соослы сюрес усьтӥмы ке, улонмы азьланьтӥськоз. Азьланез нылпиос киын угось. Али тани Можгаын йӧ дворец ӝутыны кутскизы. Солэсь усьтӥськемзэ дышетӥсьёс но, нылпиос но, анай-атайёс но возьмало ни. Котырзэ шутэтскон интылы пӧрмытомы.

Ваньмыз со дэмен сюлмаськемлэн, валэктэмлэн емышез. Можга педколледжез тупатъянлы уксё висъязы, та понна но сюлмаськи.

— Адямиос кыӵе куронъёсын дорады вуо?

— Коньдон куро. Адями дышемын: тон депутат ке, коньдонэд трос. Коньдонэн ӧд юртты ке, тон алама депутат. Адямиослы «уг» шуыны уг быгатӥськы. Куддыр угось адямилы операцилы уксё кулэ. Эх, ваньмызлы уксё шедьтыны луысал ке…

Город бадӟым бере, шуак тӥяськон учыръёс, олокыӵе но ужрадъёс кылдо — солы но коньдон висъяно. Туж лэсьтэм потэ округысь трос квартираем коркаослэн азбаръёсазы нылпи площадкаос. Милям сыӵе интыос ӧжыт. Одӥг аре пуктӥм площадка. Калык шумпотӥз. Соку угось депутатлы благоустройствоя ужъёслы араз 1 миллион манет висъяллязы. Табере со ӧвӧл ни. Ужъёс гуньдӥзы.

Прудмес тазатыны, котырзэ шутэтскыны тупамон карыны малпаськомы. Можгаын угось паркъёс но ӧвӧл. Та ужез пӧрмытӥмы ке, со командамы понна бадӟым вормон луоз. Собере, городын очистной сооружениос уродэсь, соосты вошъяны депутатъёс гинэ уз ворме — миллионъёс кулэ.

Улон воштӥськиз. Маке лэсьтыны, маке ортчытыны кулэ аслыд коньдон утчаны, бюджетын со ӧвӧл. Предприятиосын, спонсоръёсын ужаськомы. Ремонтлы но, ужрадъёслы но коньдон аслыд шедьтоно. Малпаськыса йыр ик пороме. Мон доры но юрттэтлы лыкто, ачим но мукетъёслэсь кураськисько.

Ижысь кивалтӥсьёсылы но ӵемысь вазиськисько. Тау соослы: кыло, валало, юртто. «Удмурт Кенеш» огазеяськонлэн Можга ёросысь ёзэныз кивалтӥсько бере, удмурт ужрадъёсты ортчытон понна но трос кужым пононо луэ.

Тани выль урожайлы сӥзем Выль элькун праздникез но туэ кыкетӥзэ Можгалан ортчытӥськомы ни. Аслэсьтым но уждунме ужрадъёслы понӥсько. Ваньмыз пӧлэстӥське.

Ужбергатӥсьёсын, предприятиослэн кивалтӥсьёсынызы Можгалан кылдытӥмы «Можга stars» команда, хоккеен но, футболэн но ӵошатсконъёсы пыриськиськом. Хоккеен шудыны асьмелэн йӧмы ӧвӧл на бере, шутэтскон нуналъёслы быдэ Вавоже, 5 часын султыса, ветлӥськомы. Нылпиос сайкаку, дорын луиськомы ни. Озьы спортлы но, семьялы но дыр тырме.

Нялтас вераса, Кирилл но Ростислав пиосме но спортэ кыски. Кузпалы но спортъя школаын ужамын, али — загсын. Ваньмон дыръяз туж чебер эктэ, аслаз коллективез вань, но ми сое но куас вылэ султытӥмы. Семьяен спартакиадаосы пыриськиськомы.

Кылем арын ужасьёс пӧлын ортчытэм элькун спартакиадаын 2-тӥ инты басьтӥмы. Кузпалылы валамезлы, котыр юрттыны турттэмезлы тау. Валасько: семьяелы саклыке ӧжытгес кыле. Ӵукна 7 часын уж дурын уг луиськы ке, сюлэм интызэ уг шедьты ни. Бертӥсько бер. Соин но спортын ке но ми ваньмы дэмен. Эшшо чорыганы яратӥськомы на.

Елена Сараматова

Удмурт Дунне
By Удмурт Дунне Август 3, 2018 16:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<