Сю сюрес. Одӥг ульча — быдэс гурт. Дэбес ёросысь Лёго гуртэ пырыку ик чечы зын вӧлме.

Удмурт Дунне
By Удмурт Дунне Август 6, 2018 17:10
Мария Емельянова

Гуртын кыдало вуоно футболистъёс

Дэбес ёросысь Уйвай муниципал кылдытэтэ 6 гурт пыре. Одӥгез соос пӧлысь — Лёго. Лёгоозь Уйвайысь 3 иськем. Гуртъёсты одӥг вырйыл гинэ люке. Мыныку паллян палаз пумиське Дэбес ёрослэн тужгес ӝужыт гурезез — Кизьна. Отысен Уйвай кырымпыдэс вылын кадь адске.

Лёго доры вуыкумы, туж пересь кырыж ваё пужымез адӟимы. Соку ик кыӵе ке кужым шӧдӥськиз кадь. Бӧрысь милем веразы, со инты пӧртмаське шуыса. Азьло отын кулэм муртъёслэсь дӥсьёссэс сутылӥллям. Валамон ини, берлань кошкыкумы, пужымдортӥ велик педальёсмес ӝоггес бергатӥмы.

Гуртэ пыронын ик чечы зын вӧлме. Али 13 корка пӧлысь 4-аз муш вордо на. Азьло солэсь но трос вылӥллям. Колхозын но муш утиллям, вылэм.

— Татчы улыны лыктыкумы, мыным 2 арес пала вал, — шуэ Раиса Васильевна Шестерникова, — мамае колхозын муш возьмаса улӥз. Асьмелэн но мушъёсмы вал, бызи но мушкасьлы. 85-тӥ аресам мынӥсько ни, весь мушъёсын улӥсько. Бен, мон выри ик Лёгоысь городэ пегӟыны, но кытчы паспорттэк кошкод, колхозын ужасько вал бере, кошкыны ӧз лэзе, ужась кулэ шуыса. Озьы ик кыли татчы.

Мария Емельянова

Р. Шестерникова но Ф. Сундукова быдэс улонзэс Лёгоын ортчыто

 

Гуртын трос Шестерниковъёс уло. Со фамилия Ярославской губерниысь татчы вуэмын, пе. Лёгоос верало, татчы пыртосэ со палъёсысь пиосмурт пыремын вал шуыса. Озьы, лэся, выжыоссэ татчы лэзем.

Лёго гуртын котьку но одӥг ульча гинэ вал. Али отын 24 адями улэ, нош вал дыръёс, ку отчы 200 пала адями тэрылӥз, коркаос но тросгес сыло вал, семьяос но бадӟымгес вылӥллям.

— Милям татын улонмы майбыр вал, — азьланьтӥз веранзэ Раиса Васильевна. — Ульча тыр пиналъёс, ми гинэ 8 кузя вал бере. Я али гужем нунокъёсы берто ке, пиналъёс вань кадь шуыса адске ик.

Зэм, Лёгоын школьникъёссы кемалась ӧвӧл ни. Туэ нырысетӥ классэ мынӥсьсы вань ик, со сяна пиналъёс ӧвӧл. Нош гурезь бамалысь сыӵе жон-жон серекъямзы, кесяськемзы кылӥське, уд но малпа гуртын пенсионеръёсгес уло шуыса. Озьы гужем гинэ луылэ, пиналъёс песянайёссы, песятайёссы доры шутэтскыны берто. Лёгоозь футболъя чемпионат но вуэм: пиналъёс шар ӵыжаса дото бызьыло, зэмос футболистъёс сямен озьы но, тазьы но сое бергатыны выро. Но футболын мында шудӥсьёссы ӧвӧл — 3 кузя гинэ.

Мария Емельянова

Шумпотонзы — магазин

Ужан интыос ӧвӧл бере, валамон, егитъёс кошко. Кылем калык но ужаны Уйвае ветлэ: магазинэ, садике, школае, почтае. Лёгоослэн асьсэ магазинзы гинэ вань на. Азьло пичи классъёс понна школазы но вылэм. Отчы матысь гуртъёсысь — Ягвайысь но Иваныысь — пиналъёс но дышетскыны ветлӥзы. Нош 4-тӥ класс бере соос я Уйвае, я Ӟузяе кошкылӥзы, угось татысен Шаркан ёросысь Ӟузяозь 3 иськем гинэ ортчоно. Школа пытсаськем бере пиналъёс Уйвае пыдын ветлылӥзы, интернатын улылӥзы. Берло дыре ни соос дуре автобус ветлӥз, котькуд нунал школае но, школаысь но нуллӥз.

Гурт пумысь вуж коркан азьло медпункт но клуб интыяськизы. Бен, клублэн куке-соку аслаз юртэз но вал. Медпункт 2-3 ар талэсь азьло гинэ пытсаськиз. Отын Ягвайысь Вера Павловна Широбокова ужаз, али со Уйвайысь ФАП-е ужаны интыяськиз.

«Родина» колхоз Лёго, Ягвай но Иваны вискын парсь ферма возиз, лудъёсты кизиз. Али со ӧвӧл ни. Гуртоос доразы гинэ возё на курегъёсты, ӟазегъёсты, ӵӧжъёсты, кечъёсты, 7 скалзы понна нимысьтыз кенер лэсьтӥзы.

Та 3 гуртын улӥсьёс куспазы туэ гербер ортчытӥллям. Лёгоын ӟусъёс, ӝӧк пук-тӥллям. Ог-огенызы адӟись-кыны, огшоры вераськыны трос луонлыкъёс уг кылдо уга. Кошкем калык но вуэм пумиськыны.

Мыным дэмлазы Фаина Апполосовна Сундуковалэсь но юалляськыны, со, пе, трос вераны быгатоз. Кышномуртлы 84 арес ни, пумитамы кык бодыен вамышъяса потӥз.

— Тазьы монэ фотографироватьтэ, куасэн ворттылӥсько гужем куазен но, — серекъяз, собере йылтӥз. — Уд-а мар-а учкиське телевизор? Отын Путин Трампен пумиське.

Тӥни озьы, пичи гуртын улыса но, калык тунсыкъяське политикаен. Луонлыкъёс но вань: телевизорысь пӧртэм каналъёс умой возьмато. Ӟузяын вышкаос сыло бере, телефон но туж умой кутэ, Интернетэ но потыны луэ. Но тросэзлы татын со ӧвӧл но кулэ.

— Милям семьямы азьло выллапалан улӥз, — маде Фаина Апполосовна, — кулак карса, татчы келязы, трос улӥсьёс татчы кулаке поттылэмзы бере вуылӥллям, пе, со вакытэ. Нош мон та коркан ик вордски, татын ик улӥсько. Тазьы ик кемаласьгес гуртмы сярысь юалляськыны ветлӥзы вал студентъёс. Музее вань бичам материалэз пономы шуизы, олокыӵе музее, вылды, нимъёссэс но уг тодӥськы ни табере.

Мария Емельянова

Скалъёсты кенер возьма

Кинэн пумиськи, ваньзылэсь юай: малы гурттэс озьы нималлям? Гуртоос вераны уг быгато, но уртче йылпумъян лэсьтӥмы: гуртсы лёго-гопо интые пуксемын. Ульчазы но улыно-вылыно.

Лёго кылдытэмын ошмес дорын. Но али со ошмес доры сюрес турынэн согиськемын, кулэлыкез ӧвӧл, ваньзылэн гуртазы ву пыртэмын.

Гуртмы пичи ке но, машинаос городын мында ветло, шуо. Лёго пыр калык Иваные, Ягвае берто, узы-боры октыны, губияны мыно. Сюрес ӟеч, дэри дыръя но ортчыны луэ.

Мария Емельянова

Туспуктэм: Мария Емельянова

Удмурт Дунне
By Удмурт Дунне Август 6, 2018 17:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<