Школаын — веме

Ангелина Снигирева
By Ангелина Снигирева Август 27, 2018 12:54

Ӝыны ар талэсь азьло Кузебай Герд нимо элькун гимназилы юнматӥзы выль директор — филология наукаосъя кандидатэз, «Билингва» проектлэсь кивалтӥсьсэ Татьяна Волковаез. Кыӵе воштӥськонъёсын пумита выль дышетскон арез гимназия — со сярысь кенешиськом Татьяна Геннадьевнаен.

Т. Волкова

— Татьяна Геннадьевна, кыӵе малпанъёстэс пыӵатыны луиз ни та дыр ӵоже? Вал-а мылкыддэс куашкатон вакытъёс?

— Ӝыны ар туж ӝог ортчиз. Уг вера, мылкыды куашказ шуыса. Малы ке шуоно вӧзам умой коллектив, кудӥз дась ужаны, дась воштӥськыны. Мон малпасько, со туж умой. Туж тросэз ӵектосъёсынызы ветло. Анай-атайёс но, нылпиос но, дышетӥсьёс но. Тодон-валан сётон удысын дышетӥсьёсын гинэ ужаны уг яра. Юн кусып возьыны кулэ нылпиосын но, анай-атайёсын но. Дышетонлэн шорсюлмыз — нылпи. Одӥг ласянь сое визьма дышетӥсь, дышетонлэн мукет палаз — анай-атай. Али ми кылдытыны турттӥськомы сыӵе огъя дунне — гимназилэн улоназ мыло-кыдо пыриськыны кулэ анай-атайёс но, нылпиос но, соос палэнысен учкыса гинэ медаз улэ. Ӵемысь анай-атайёслэн огъя собраниос азьын кылдэ мылкыдзы: нош ик милемыз люкалозы, нош ик уксё курозы. Нош милемлы али киын юрттэт, визьмын юрттэт кулэ. Ми сое шӧдӥськомы ни.

Гимназилэн 3-тӥ этажаз интыяськемын начальной школа. Нылпи садысь вуэм покчиослы борддоръёс ик мӧзмыт пото. Соин малпамы та этажез пичиослы тупамон карыны. Пыриськод но адӟиськод — татын покчиос. Таӵе малпанэз анай-атайёс туж шумпотыса пумитазы. Асьсэос эскизъёсын но лыктӥзы, ӵектонъёссэс но вайизы. Та бордысь ик вемеен ужаны мылкыдмы потӥз. Кин быгатэ суреданы — суредалоз, кин быгатэ буяськыны — нош ик юрттоз. Мумы-бубыос уг возьмало, ку школа лэсьтоз, татын дасесь ужаны нылпиос но.

— Сыӵе амалъя ик гимназилэн пырон азьыз но туссэ выльдӥз-а?

— Бен, таиз но милям выпускницамылэн Лиза Городиловалэн проектэз. Пӧрмиз озьы: выпускной ӝытэ дорам лыктӥз Лизалэн анаез но вераз нылызлэн тунсыко проектэз сярысь, но сое, пе, ӧз дунъялэ. Мон ӧти соосты. Лиза вайиз эскизъёссэ. Адямилэн мылкыдыз вань, анаез сыӵе сюлмаське, малы луонлык уд сёты? Мар кулэ, юай. Буёлъёс, кисточкаос но скотч. Вань ужез лэсьто 11-тӥ классэз йылпумъям пиналъёс, кивалтӥсьсы — Лиза.

Малпамы, малы ӧвӧл пырон азьын Гердлэн портретэз? Суредасьёслы вазиським — ужамзылы бадӟым дун куро. Огез атай ӵектӥз тодмозэ, киыз туж усто мынэ, пе. Валамон, таиз уж понна пичияк коньдон тыроно луом, но ӵош кариськыса, ваньмыз капчигес радъяське ук.

1-тӥ сентябрьлы гимназилэн выль борддоръёсыз нылпиослы кузьым чот луозы, соку одно ик Лиза лыктоз но вералоз аслаз проектэз сярысь. Кин тодэ, оло, вуоно арын школаез йылпумъясьёс но гимназилы асьсэ киын маке лэсьтыса кельтозы.

— Кыӵеен тӥ адӟиськоды гимназиез, кӧня ке ар ортчыса? Вань-а кыӵе ке модель, кызьы тӥ сое радъясалды, оло, Россиысь, яке фин-угор республикаысь, яке Ижысь школаослэсь адӟем карысалды?

— Мон али утчасько со моделез. Интернет пыр но тодматскисько школаослэн ужаменызы, потасько пӧртэм лицейёсы-гимназиосы. Уг вера, одӥг модель гинэ кельше шуыса. Со кулэ но ӧвӧл, дыр. Малы ке шуоно гимназилэн аслаз тусыз но пуштросэз луыны кулэ. Эшшо но сакгес кулэ кылыны нылпилэсь куаразэ, мар солы уг тырмы, гимназия солы кыкетӥ дор кадь мед потоз, яратыса татчы мед лыктоз. Собере данъяськыса мед верасал: мон дышетски удмурт йӧскалык гимназиын. Но, жаляса верано, тросэз ведь пал кыл но уг поттыло, татын будӥзы шуыса. Нылпи яратэ ке школазэ, дышетске ассэ гажаны, быгатэ аслаз вормонъёсыныз данъяськыны.

Тани Ижысь Дарья Шиляева ноку но ӧз возьдаськылы — ӟуч нылаш дышетӥз удмурт кылэз, кошкиз кунгож сьӧры. Со котьку но данъяськыса вера, удмурт гимназиын дышетскиз шуыса.

Ми кулэ, борддоръёссэ воштэм сямен ик, гимназилэсь пуштроссэ но муромытыны, удмурт шӧмогес карыны. Сӥзьылысен воштӥськомы иворъёсын центрмылэсь форматсэ. Милям кема аръёс ужаз «Уморто» центр, али ужмы мукет амалэн радъяськоз. Пресс-центр кылдытыса, нылпиос асьсэос возьматыны кулэ гимназилэсь улонзэ, мар татын лэсьтӥське, мар ортче. Радиоверанъёс, сюжетъёс 2 кылын мед луозы. Радиомы али быдэс школа тыр уг кылӥськы, сое выльдоно. Медиацентр ивортыны кулэ, маин улэ гимназия.

Али ми Ижкарысь школаослэсь опытсэс чакласькомы. Нош декабре дасяськиськомы егит удмурт журналистъёслэсь но блогеръёслэсь форумзэс ортчытыны. Адӟеммы потэ, кызьы та уж азинтӥське ёросъёсын. Удмурт кыл гимназиын бадӟымгес инты мед басьтоз, ужрадъёсын но удмурт кылъя урокъёсын гинэ медаз чузъяськы. Нылпиосын сыӵе но малпанэ вуиськом — ойдолэ одӥг нуналэ, урокъёсын сяна, удмурт сямен вераськом. Собере асьсэос ик ӵекто: ойдолэ мукет нуналэ англи кылын вераськом! Таиз но умой.

— Татьяна Геннадьевна, кыӵе югдур дышетӥсьёсын? Тани гимназиысь покчи классъёсын ужасьёсты туж ушъяло ке, 5-тӥ классэ потэм пиналъёссылы анай-атайёс ӟечгес школа утчало.

— Али туж бадӟым саклык висъяломы дышетӥсьлэн профессиын будонэзлы. Котькуд педагог одӥг дышетскон арлы кылдытоз аслэсьтыз тодон-валанъёссэ но быгатонлыкъёссэ азинтонъя программа. Мон валасько: гимназия юрттыны кулэ та ужез радъяны. Тани 23-тӥ августэ ортчытомы тренинг, «Личный бренд педагога» нимаське со, лаборатория-практикум кадь луыны кулэ. Уго ми нырысь ик педагогез дышетыны кулэ, кызьы со азинскон программаез дасяно. Сыӵе семинаръёсты котькуд толэзь радъяны чакласькомы.

Бадӟым классъёсын малпаськомы пыртыны индивидуализациез. Арняяз одӥг нуналэ дышетон процесс воштэмын луоз. Соку нылпиослэн дырзы мед луоз проектъёсын вырыны, наукая конференциослы дасяськыны. Нош бадӟым классъёсын саклык луоз огъя кун экзаменэз пырпотыны. Пиналэз эскерыса, анай-атайёсын кенешыса, нылпиослэсь мылкыдзэс лыдэ басьтыса, котькудӥзлы чаклаломы нимаз (индивидуальной) маршрут. Шуом, огез туж кышка экзаменлэсь — иське, стресс сое погыртыны быгатоз, татын психологъёс тросгес ужаны кулэ.

— Котькуд ар гимназия 10-тӥ классэ гуртысь нылъёсты но пиосты ӧте. Ёросъёсысь пиналъёс понна бадӟым дан татын дышетскыны. Туэ кыӵе вожвылъяськон вал?

— Туэ туж визьмоесь пиналъёс лыктӥзы. Но озьы пӧрмиз: милям огъя улонтӥямы 7 гинэ буш интымы. Воштӥськем куронъёсъя котькуд пиналлы 6 квадрат метр инты чаклано. Нош комнатаын 11 квадрат метр ке? Соку татчы 2-тӥ пиналэз пыртыны уг ни луы. Табере 28 муртлы таӵе огъя улонтӥмы вань — со пӧлысь 21 инты чакламын 11-тӥ класслы, 7 инты — 10-тӥ классэ мынӥсьёслы. Та югдурез дышетонъя но наукая министр Светлана Болотникова тодэ, али та юан эскериське.

Милям туэ туж трос куронъёсмы вал: виясь липетэз тупатоно, электропроводкаез, тӥяськем калориферъёсты воштоно но трос мукет ужъёс. Тау шуыны кулэ кивалтӥсьёслы, липетэз тупатъяны дасясько, проводкаез выльдӥзы. Уксё висъязы азбармес югдытыны, калориферъёсты воштыны. Шедьтӥм спонсоръёсты асфальтэз тупатъяны. Оглом 2 миллион манет котыр юрттэт басьтӥмы, нимысьтыз воштонъёс пыртэмын республикалэн бюджетаз — 525 сюрс манет висъяськиз гимназиез выль дышетскон арлы дасяны.

Елена СКВОРЦОВА

Ангелина Снигирева
By Ангелина Снигирева Август 27, 2018 12:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<