Музее йыгаськиз удмурт кыл

Ангелина Снигирева
By Ангелина Снигирева Август 24, 2018 15:14

О. Бикузина удмурт кылын экскурсиос нуыны кутскиз

Удмуртиысь Суредан искусствоосъя музейысь адӟытонъёсты сентябрьысен удмурт кылын но нуозы. Али 2 выставка удмурт кылэ берыктэмын ни.

— Милям адӟытонъёсамы трос пӧртэм калыкъёс ветло. Чакламмыя удмуртлыкен герӟаськем адямиос но ӵемгес пыраны кутскизы. Ми, республикаысь музей, соин янгыш, адӟытонъёсмы ӟуч кылын гинэ мыно шуыса, — вераз музейлэн кивалтӥсез Вера Вахрушева.

Озьы музейын эскерыны кутскизы выль амалэз. Вылаз ик, экскурсиос радъянъя отделлэн кивалтӥсез Ольга Бикузина 2 кылэз тодэ. Соин ик та ужез ӵуказелы кельтыны ӧз малпалэ. Нырысь ик эскеризы, удмурт суредасьлэсь Андрей Костылевлэсь «Удмуртпогода» адӟытонзэ берыктыса. Та суредась Чупчи шур дурын вордскемын, солэн ужъёсаз трос удмуртлыкез, пусъёсыз, мистикаез.

Ольга Бикузина малпам ужзэ нырысь эскериз «Инстаудмурточки» марафонын вожвылъяськем нылъёс пӧлын. Нылмурт блогеръёслы та туж кельшиз. Собере Ольга адӟытонэ ӧтиз анайзэ — гуртысь дышетӥсез. Анаез ушъяны сокем ӧз дырты, нырысетӥ экскурсия понна ярам, пе, но малпанэд ӟеч. Экскурсоводлэн мылкыдыз бурдъяськиз но, со эшшо огзэ адӟытонэз — «Природа вещей» — удмурт кылэ берыктӥз.

— Ӵемысь музее пыро городысь арлыдоос но. Удмуртъёс туж шумпото, анай кылзэс кыло ке, соос понна дуногес удмурт сямен вераськон, кенешон. Соин удмурт кылын радъям адӟытонэз уката шумпотыса кылзо, — шуэ Ольга Бикузина.

«Удмуртпогода» адӟытон йылпумъяське ни. Табере ӟуч суредасьлэн ужъёсыз сярысь но анай кылынымы вераны дасясько: сентябре суредан искусствоысь классиклэн Аркадий Пластовлэн выставкаез усьтӥськоз.

Ватсано созэ но: удмурт кылын адӟытонъёсты пӧртэм сямен нуыны чаклало. Бадӟымъёслы ӵемысьгес веран-ивортон тупа ке, нылпиослы кельше шудыны, викторинаын вожвылъяськыны. Али ик музее курисько ни Ижысь нылпи садъёсысь удмурт группаос.

Музейын ужасьёс чакланы малпало, макем тунсыко луозы таӵе адӟытонъёс учкисьёслы. Со дыре ик музейлэн кивалтӥсез Вера Вахрушева сюлмаське, удмурт кылын экскурсиосты одӥг мурт вылэ гинэ куштоно ӧвӧл шуыса.

Оскем потэ, Суредан искусствоосъя музейлэн таӵе удмурт кылэз азинтон мылкыдыз Удмуртиысь мукет музейёслы но адӟем карымон луоз, оло, вожвылъяськон мылкыд но пыӵатоз.

Елена Скворцова

Туспуктэмез авторлэн

Ангелина Снигирева
By Ангелина Снигирева Август 24, 2018 15:14
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<