Мар сярысь бӧрдо водьёс, ижораос?

Удмурт Дунне
By Удмурт Дунне Август 23, 2018 10:21

Мон, Ижкарын вордскем адями, пичиысен Санкт-Петербургын улӥсько, котькуд гужем ӵужанае доры Удмуртие вуылӥсько. Ас кожам удмурт кылэз дышетӥ, Санкт-Петербургысь кун университетысь филологияя факультетэз йылпумъяй, тунсыкъяськисько фин-угор выжыысь калыкъёслэн культураосынызы. Соин удмуртъёслы ӵыжы-выжы луись Ленинград улосысь калыкъёс сярысь мадеме потэ.

Водьёс кылизы 10 кузя

Водьёс

Водь кылын 8-10 адями гинэ вераськисьёс кылемын ни. Водь кыл — Россиын чузъяськись вань кылъёс пӧлысь тужгес но пичиез. Озьы ке но сое улэп возьыны тыршо. Алигес водь кылын лыдӟон книга потӥз. Котькуд гужем Лужицы нимо водь гуртэ Тартуысь профессор Хейнике Хейнсоо вуылэ, кылъя курсъёс радъялля. Отчы ветло кылэз тодӥсь но сое утён понна сюлмаськись песянайёс но пиналъёс. Соин оскон вань, та кылын азьланяз но вераськозы на шуыса. Мынам водь кылэз ӟеч тодӥсь тодмое вань, соин мон водь праздникъёс дыръя водь кылын вераськисько. Та кыл туж тунсыко, прибалтийско-финской кылъёс пӧлысь татын гинэ k куара с (ч) куаралы воштӥськем. Кылсярысь, фин, ижора, вепс кылъёсын «из» — kivi (киви), нош водь сямен — civi (чиви), «ки» — käsi (кяси), водь кылын — cäsi (чяси), «гурт» — kylä (кюля), водь сямен — cylä (чюля). Ижораос водьёсты азьло вакытэ исаса шуылӥллям: Чюля, чяю черикко, челлоа ё люввя (Свояк, иди в церковь, колокол уже бьёт). Уноез та калыкъёслэн кылъёссы гожтӥськемзыя но кылӥськемзыя ог-огзылы тупало.

Ленинград улосын азьло водь гуртъёс трос вал, нош туннэ одӥгез гинэ кылиз — Лужицы, отын водь культуралы сӥзем музей но вань. Отын ик «Лужицкая складчина» водь праздник ортчытъяло. Но сюлмаськытэ: та гурт вӧзын ик туж трос газовой терминалъёс пуктӥсько, соин сэрен татын омыр кырсёме. Азьвыл вераськонъёс ветлӥзы, терминалъёсын сэрен гурт но бырыны быгатоз шуыса.

Кыл вань, книгаос ӧвӧл

Ижора калык

Ижора кылын 100-150 адями гинэ вераське на, но ваньзы соос арлыдо адямиос ни. Ижора гуртъёс пӧлысь тужгес бадӟымез — Вистино. Та гуртын ижора музей ужа, ижора кылэз азинтонъя курсъёс радъяськыло. Отчы ветлыло песянайёс, кудъёсыз асьсэ кылзэс утён понна сюлмасько. Та кыллэн азьло ньыль диалектэз вал, али кыкез гинэ кылемын. Водь кыл троссэ ижора кылысь басьтӥз: али но водьёс пӧлын вань адямиос, кудъёсыз асьсэ кылын уг верасько, но ижора кылэз тодо. Водьёс ижораосты капчиен валало ке, ижораос водьёсты уг валало. Азьло, водь пиосмурт ижора нылмуртэз кышнолы вае ке вал, вань семья ижора кылын вераськыны кутскылӥз. 1930-тӥ аръёсы школаосын ижора кылын дышетӥзы, дышетскон книгаос поттылӥзы, нош 1937-тӥ арын со дугдытэмын вал. Ижора гуртъёсын али ке но вань адямиос, кудъёсыз ӵапак со вакытэ школаын ижора кылын уно предметъёсты дышетӥзы на. Со кылъя али но туж ичи тодослыко ужъёс: водь кылъя вань грамматикаос, кыллюкамъёс, ижора кылъя номыр ӧвӧл, шуыны луоз, кӧня ке гожтэм эскерон ужъёс, диссертациос сяна.

Нимзы ӟуч, фамилизы фин

Ингерманландской финъёс

Ингерманландской финъёс (яке ингерманландецъёс, инкериос) Ленинград улослэн музъем вылаз мукетъёсызлэсь бергес вуиллям. Соос 17-тӥ даурлэн кутсконаз швед королевствоысь фин выжыысь выжиллям. 18-тӥ даурлэн кутсконаз Пётр I эксэй та музъемез Россилы берыктӥз, финъёс отын ик улыны кылизы. 20-тӥ даурлэн кутсконаз ингерманландской финъёс татын ог 150 сюрс вал. Нош 20-тӥ даур ӵоже соос пӧлысь тросэз репрессиос улэ шедизы, троссэ пудолы чаклам вагонъёсын Сибирьлэн уйпалаз келязы. Нош 1943-тӥ арын вань ингерманландецъёсты, ижораосты но водьёсты Эстониысь концлагерь пыр Финляндие эвакуировать кариллям. Зинаида Савельева, Лужицы гуртын улӥсь водь кышномурт, та концлагерь пыр потэмын вал. Быдӟым ож бере Совето Союз аслэсьтыз гражданъёссэ берыктыны кутскиз. Соос Россилэн шор улосъёсаз келямын вал, вордӥськем гуртъёсазы муртъёс уло вал ни. Ингерманландецъёслы лэземын ӧй вал ас музъемазы берытскыны, соин ик тросэз Карелие яке Эстоние кошкизы. Нош 1990-тӥ аръёсы тросэз ингерманландецъёс фин кылэз дышетӥллям но Финляндие выжиллям. Соин ик али Ленинград улосын ог 6 cюрс гинэ ингерманландецъёс уло, фин кыллэсь ингерманландской диалектсэ туж ӧжытэз тодо, соос но ваньзы сямен арлыдоос. Ингерманландецъёслэн вань культурной ужрадъёссы котьку литературной фин кылын нуиськылӥзы, асьсэлэн литературной кылзы соослэн ноку ӧй вал. Соин ик али Ленинград улосысь гуртъёсын улӥсь ингерманландецъёс доры Петербургысь экспедициос ялан ветло, соослэн кылзы гожтэмын мед луоз шуыса. Ингерманландецез тодманы луэ ӟуч нимызъя но фин фамилиезъя. Кылсярысь, мынам тодмоосы пӧлын вань Елена Риехакайнен, Дарья Ханнолайнен, Александр Кирьянен. Нош водьёслэн но ижораослэн нимъёссы-фамилиоссы ӟучъёслэн кадесь.

Вепс кыл возиське Петрозаводскын

Вепс нылпиос

Вепсъёс Ленинград улослэн шундыӝужан палаз уло, Петербургысен туж кыдёкын. Ленинград улосын соос 1 сюрс 300-лэсь уно, Карелиын — 3 сюрслэсь уно, эшшо 400 пала — Вологда улосын. Вепсъёслэн вань культурной улонзы Петрозаводск карын ортче: отын вепс кылын газет потэ, теле- но радиопередачаос лэсьтӥсько. 1930-тӥ аръёсы, ижораослэн кадь ик, вепсъёслэн литературной кылзы вал но собере соин гожъяськыны, книга поттыны алэмын вал, нош 1980-тӥ аръёслэн пумаз сое улӟытыны кутскизы. Вепс но карел кылъёсын Карелиысь азьветлӥсьёс кутскизы поттыны книгаос, кыллюкамъёс. Вологда улосысь Войлахта гуртысь потэм Нина Григорьевна Зайцева тодосчи вепс кылъя трос эскерон ужъёс лэсьтӥз, уно текстъёсты вепс кылэ берыктӥз, кылсярысь, «Калевалаез» но «Новый Заветэз». Али но со та удысын ужзэ азьланьтэ. Солы луыса вепсъёслэн гожъяськон культуразы улэ, шуыны луоз. Ленинград улосысь вепсъёс но тэк уг пуко: соос дорын, Винницы гуртын, арлы быдэ «Древо жизни» нимо праздник ортче, мукет гуртъёсын эшшо кӧня ке гужем шулдыръяськонъёс вань. Вепс кылэз школаосын но университетъёсын дышето, СМИ-ос ужало, документальной фильмъёс вань. Соин ик котькин валаны кулэ, туала дуннеын пичи кыл но улыны но кутӥськыны быгатэ шуыса. Вераме потэ: ноку но возьдаськыны уг яра анай кыллэсь но соин вераськемлэсь.

Максим КУЗНЕЦОВ

Туспуктэмъёсын юрттӥзы Ольга Конкова но Елизавета Главан

 

Удмурт Дунне
By Удмурт Дунне Август 23, 2018 10:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<