Кивалтӥсьёс арлыдоосты ужысьтызы уллям понна шраф тырозы

Кивалтӥсьёс пенсие потыны вуэм адямиосты ужысьтызы уллямзы понна 200 сюрс манет яке 18 толэзь ӵоже басьтэм уждунзы быдӟа штраф тыроно луозы. Та сярысь вераз Россиысь вице-премьер Татьяна Голикова, пусъе «Риа Новости» информационной агентство.

— Та уж радъямын луоз секытэн нылкышноосты но 3-лэсь трос нылпиосты утись кышномуртъёсты ужысь уллян сярысь закон вылын. Отын та понна 200 сюрс манет тыр но 18 толэзь ӵоже басьтэм уждун мында тыриськон тупатэмын, — вераз Т. Голикова.

Пенсионной реформае таӵе воштӥськонъёс пыртон сярысь Россилэн Президентэз Владимир Путин вераз вал 28-тӥ августэ. Соку со пусйиз: кивалтӥсьёс вылэ административной но куд-ог учыръёсы уголовной уж ӝутэмын луоз, арлыдоосты ужысьтызы уллямзы но уже кутымтэзы понна. Но уголовной уж ӝутон пумысен, кызьы валэктӥз Т. Голикова, вераськоно на предприятиосысь кивалтӥсьёсын но профсоюзъёсын.

В. Путин пусйиз: предпенсионной арлыд, пе, кутскыны кулэ пенсие потон дырлэсь 5 арлы вазьгес. Озьыен, воргоронъёс предпенсионеръёс шуыса лыдъяськозы 60 арескысен, кышномуртъёс — 55-ысен. Но пенсие соос потозы ай та арессэс тырмытэм бере 5 ар ортчыса гинэ.

Сергей Захаров