Кивалтӥсь киын азинскон

Удмурт Дунне
By Удмурт Дунне Август 23, 2018 09:45

Якшур-Бӧдья ёросысь Тыло гуртысь «Старозятцинское» хозяйство ог 5 ар талэсь азьло куашканы кутскылӥз. Татын мукет уж ӧвӧлысь гуртоос куректонэ усизы ни вал. Но туннэ хозяйство ёросысь тужгес кужмоез луэ.

 

А. Абрамова, С. Широбоков, А. Белов

Гаражзы ялан узырме

Тылоос ас вакытаз куспазы керетылыны но кутскылӥзы. Бусыосты но хозяйствоысь бригадаос куспын люкылӥзы. Кинлэн ке кизёнэз я уборкаез йылпумъяське ке, мукетъёсызлы ӧз юрттӥськылэ: ми асьме паймес ужамы ни, шуылӥзы но шутэтскыны кошкылӥзы. Таин сэрен хозяйствоын ужъёс ӝегаллязы. Озьы предприятиез кин кытчы кысканы ӧдъяз.

— Тылое выль кивалтӥсь Андрей Белов вуэмен гинэ, хозяйство ӝутӥськыны кутскиз, коллективын валамтэос чалмизы, кылдӥз юн команда, — шуэ Якшур-Бӧдья ёрос йырлэн воштӥсез Сергей Широбоков. — Андрей Валерьевич дышетскемезъя зоотехник. Соин ик нырысь ик пудо вордон борды рос-прос басьтӥськиз. Туннэ, быдэс ёросэн ӵошатыса, солэн хозяйствояз тужгес трос йӧл кыско: котькуд скаллэсь 17,6 литр йӧл басьто. Закупочной йӧллы дун умой луысал ке, хозяйство эшшо золгес азинскыны быгатысал. Жаляса верано, туэ ӝыны ар ӵоже 1 литр йӧлэз шорлыдын 18 манет но 86 копейкаен сяна заводъёс ӧз басьтэ. Нош кыскем йӧллэн асдуныз (себестоимостез) луиз 18 манет но 92 копейка. Озьыен, барыш поттэм интые, минусэ кылимы. Ӝыны ар ӵоже ёросысь хозяйствоос 20 миллион 600 сюрс манет ыштон адӟизы ни. Соин ик удобрение 2 поллы ичигес басьтӥмы. Куазь сётэмен гинэ, урожай люкаськиз. Тросэзлэн тысь куасьтон но шертон комплексъёсы газ кыскыны мылкыдъёссы вал. «Старозятцинскоеын» но выль КЗС басьтыны малпаськылӥзы. Сотэк ӟеч кидыс дасяны уг луы. Со сяна, эшшо 2 предприятие КЗС басьтыны малпа вал. Ӧз пӧрмытэ. Шумпотоно тылоос понна: мылкыдзэс ӧз куашкатэ. Лизинг амалэн ке но, секыт ар шоры учкытэк, басьтыны быгатӥзы 7 техника.

«Нива» кадь вуж комбайнъёсын уборка дыръя угось трос ю тысь арам луэ. Соин но «Старозятцинское» уксёзэ висъяз сеялкалы, косилкалы, тракторъёслы, вуттӥз 3 комбайн. Таӵе выльдӥськемлы тужгес шумпотӥзы механизаторъёс.

— Выль комбайнэн ужамъя ужам потэ, — шуэ татчыозь трактористын тыршем Александр Липатов. — «Векторын» ваньмыз корабльын кадь: бортовой компьютер котькуд вамышез эскере, бункер ю-нянен тырме ке, ивортэ. Али ке но уг оскиськы на, таӵе визьмо техникаез мыным, арлыдо адямилы, оскизы шуыса. Мылкыд уртче. Уждун умой тыризы ке, эшшо но умойгес луоз.

Уждун хозяйствоын туэ шорлыдын 17 сюрс манет луыны кулэ. Миым 15 сюрс котыр тыризы. Вань ужасез 120 кузя.

Котькуд скаллэсь кунян басьто

— Кадръёслы ум ёрмиське, — шуэ хозяйствоен кивалтӥсь Андрей Белов. — Куд-ог специалистъёсмы кузэн но ужало, кылсярысь, 2 агрономмы, 2 бухгалтермы, 2 пудо першалмы. Ваньзы егитэсь. Мукет азьын уж ӧвӧл бере, кытчы уллялод? Пенсионеръёсты но, ужамзы потыку, уд кулэсты. Малпаськонэ усёно ик, уборка быриз ке, толалтэ ваньзылы мар уж сётом ай шуыса. Огзэ тодӥсько: гань-гань кариськыса ужаны уг сёты. Озьы берлань чигнаны кутскод. Сыӵе вакытъёс мон лыктэмлэсь азьвыл та хозяйствоын вал ни. Кизьыны, бусыосты утялтыны аналскыса, капчи сюрес утчаса, комбикорм, сенаж, силос гинэ но Ува, Кияса ёросъёсысь уксёен басьтылӥзы. Техникаез солань-талань ворттылытыса, коньдонэз тӧлъя лэзьям кадь луылӥз. Кӧттыро сюдод шат озьы пудодэ? Удгес. Сютэм скаллэсь трос йӧл кыскон сярысь вераськонэз ик ӧвӧл. Начар скаллы кунян гинэ но уз сюры. Ужасьёс ганяк улыны дышемын бере, воштӥськонъёслы нырысь-валысь пумитъяськылӥзы но. Кинлы ужатэм кельшоз? Но шуи: нырысь ик трос аръем турынъёс кизёмы. Та культуралы азьвыл 900 гектар гинэ висъяллязы, али 2 сюрс гектарозь вуттӥм. Оглом гыроно-кизёно музъемъёсмы 4 сюрс 500 гектар луизы ни. Кыкетӥ арзэ палэнысь сиён ум басьяське. Сиён дасян технологиез но быдэсак воштӥмы. Азьвыл гуосты силосэн тырмытъямы. Чырса, котыр вия вал. Начар косилкаен ӝог ужаны но ӧм пӧрмытскылэ — нуналаз 40 гектарез калтылӥм. Нош выль косилка басьтӥмы но табере 100 гектарез нуналаз утялтӥськомы. Чупрес ужаса, клевер, люцерна кадь культураосты сяськаямзылэсь азьвыл утялтӥмы. Выль косилкамы сенаж дасяны туж умой тупа. 10-тӥ августлы 11 сюрс 202 тонна сенаж люкамы ни. Викаен суро сезьы трос кизим, чебер будӥз. 1 сюрс 776 сюро таза пудолы куайыны со трос кужым сётоз. Али котькуд йырлы 27,6 центнер сиён дасямын ни. 32 центнерозь вуттыны малпаськомы.

Ӟеч сиёнэн йӧл кысконзы но татын арысь аре йылэ. Кылсярысь, 2016-тӥ арын гинэ котькуд скаллэсь 4 сюрс 600 килограмм люкаськылӥз. Миым 5 сюрс 200 килограммозь вуизы. Али 5 сюрс 900 килограмм басьто ни. Нуналаз 11 тонна йӧл потто. Таӵе лыдпусъёс та хозяйствоын ноку ӧй вал на. Азинскемзы селекциен быгатыса выременызы но герӟаськемын.

— Племенной пудо вордытэк но, трос йӧл поттыны луэ, — шуэ Андрей Белов. — Ми гидысь одӥг скалмес но ӧм воштэ. Но басьтӥмы УЗИ-сканер. Табере, скалэз бызьылытэм бере 32 нунал ортчыса ик, тодыны быгатӥськомы, солы кунян сюремын я ӧвӧл шуыса. Азьвыл, 3 толэзь ортчыса гинэ, тае валаны луылӥз. Ваньзэ лэсьтӥськомы котькуд скаллэсь араз 1 кунян басьтон понна. Азьланяз малпаськомы скал уллёез 700 йырозь вуттыны. Али милям 628 кысконо скалъёсмы. Лыдэз эшшо но бадӟымгес карыны луысал — мылкыдъёс вань. Но со понна гид пуктоно, выльзэ ӝутыны коньдон уггес тырмы на. Али 700-озь тэрытӥськыны вужаз фермае но луоно на. Гид бӧрысьгес одно пуктомы. Али валтӥсь интыын пудо сиён дасян, котькуд гектарысь тросгес урожай басьтыны тыршон. Азьланяз котькуд гектарысь 30 центнер ю тысь калтыны кулэ шуыса ужпум пуктӥ.

Туннэ хозяйство озимой юосты кизьыны потӥз. Ёросын тол улэ 1 сюрс 500 — 1 сюрс 700 гектар кизьыны ӧдъяло ке, та пӧлысь 670 гектарзэ тылоос быдэсто.

Шепын 30 тысез

Та нуналъёсы тылоослэн ужаны быгатэменызы тодматскыны вуылӥз гурт удысъя но сиён-юонъя министр Ольга Абрамова, сьӧраз журналистъёсты но ӧтиз. Бусыостӥ котырскиз. Министр, шепез кияз кутыса, котькуд тысьсэ поттаз но агрономлэсь шуак юаз:

— Одӥг шепын 20 тысез. Ыштонъёстэс лыдӟиды ни-а?

Александр Решетников та юанлы дась ӧй вал, лэся. Ыштонъёсты нокин ӧз лыдъя на. Котькуд шепысь 60-80 тысь басьтыны луэ ик. Но со сортлэсь но потэ, милям 1 шепысь ог 30 тысь люкаське, шуиз хозяйствоысь валтӥсь агроном Александр Решетников. Кытчы будыны вань на. Кидыссы но туэ начаргес вал, тулыс но кезьыт возиськиз.

Нялтас вераса, тылоос котькуд гектарысь 19 центнер ю-нянь калто. Миым 17 центнер потӥз. Ёросын шорлыдын 18-19 центнер люкаськыны кулэ.

— Урожай арысь аре йылэ, — пусйиз агроном. — 140 тонна удобрение муэ понӥмы, кылем арын сярысь, со 20 тонналы уногес. 2016-тӥ арын удобрение воксё но поттэмын ӧй вал. Сортъёсмес выльдӥськомы. Азьланяз эшшо но тросгес ю калтон бордын ужаломы.

Специалистъёслэн кивал-тӥсенызы валче ужамзылэн пайдаез шӧдскымон ик. Ольга Абрамова пусъемъя, тылоослэсь мукетъёсызлы но адӟем карыны кулэ. Ёросэз понна со синмаськымон ужа. Ижлы матын луэ ке но, гуртоослы уж сётэ, производствозэ азинтэ.

Министр котькуд ёросэтӥ котырскыны, ляб но юн палъёссэ чакланы, югдурысь потонъя план лэсьтыны медэ.

— Шаерамы 1 миллион 918 сюрс тонна сиён дасямын ни, — журналистъёслы шуиз Ольга Викторовна. — Кулэяськемлэсь со 20 процентлы уногес. Азьланяз силос люкан вань на. Ю тысь бусыос 15 процентэз утялтэмын. Котькуд гектарысь 22 центнер ю-нянь потэ. Фуражлы ёрмон уз луы. Кидыс но тырмыт люкаськоз. 55 сюрс гектар вылэ озимой киземын ни. Котькуд предприятие азе ужпум пуктэмын: ужъёсты дыраз йылпумъяно, музъемез толлы дасяно. Шуг-секытъёс кылдо топливоен. Федерал центр гуртоослы ватсаса висъяно кариськиз 5 миллиард манет. Та пӧлысь Удмуртилы чакламын ог 92 миллион манет. Со уксё уборкаез йылпумъяны бадӟым юрттэт луоз. Угось котькуд килограмм басьтэм топливоысь гуртоослы берытскоз 5-7 манет.

Елена САРАМАТОВА

Туспуктэмез авторлэн

Удмурт Дунне
By Удмурт Дунне Август 23, 2018 09:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<