Иж сӥзьылозь улоз йыртэк

Ангелина Снигирева
By Ангелина Снигирева Август 23, 2018 15:52

20-тӥ августэ Иж город Думаын ортчиз азьвыл ялымтэ 26-тӥ сессия. Пуктэмын вал 1 ужпум — шоркарлы тӧро юнматон. Но депутатъёс огкылэ ӧз вуэ.

Вал 13 кандидат

Шоркар матысь дыре озьы ик улоз кивалтӥсьтэк. Эшшо кӧня дыр ӵоже — тодмо ӧвӧл. Иж город администрациысь пресс-служба ивортэмъя, йырез быръёнъя выль конкурс ялэмын луоз, ку со ортчоз — город Дума 30 нунал ӵоже вераны кулэ.

Тодады вайытом: Ижевск йыртэк улэ ни туэ 3-тӥ майысен. Ӵапак соку шоркарлэн азьвыл кивалтӥсез Юрий Тюрин интызэ кельтӥз ас мылкыд каремезъя. Оскытӥзы вал: выль кивалтӥсь быръемын луоз ни 10-тӥ июне — Городлэсь нуналзэ пусъём выль йырын. Но тани ӝоген йылпумъяськоз ни август…

Мар бордын ужпум? Тӧрое кандидатъёс 13 кузя люкаськизы — пӧлысьтызы тросэз ужбергатӥсьёс, воргоронъёс пӧлын 1 нылкышно, данакез — Ижын улӥсьёс, вань Сарапулысь, Глазовысь потэмъёс но, Татарстанысь куриськисьёс но… Огкылын вераса, бырйыны вань кин пӧлысь. Но 10-тӥ июне конкурс ӧз ик ортчы — соку комиссилэн 12 ёзчиосыз пӧлысь 6-ез кенешонэ ӧз лыктэ.

К. Сунцов

Ялэмын вал 2-тӥез конкурс. Комиссия люкаськиз 10-тӥ августэ. Соку тросэз малпазы: пӧлысьтызы тужгес кужмоез — Олег Гарин, Иж город Думалэн тӧроез. 5 час кошкиз вань кандидатъёслэн программаосынызы тодматсконлы. Тужгес трос балл люказы ужбергатӥсь Константин С

унцов но Гуманитарной лицейлэн директорез Михаил Черемных. Соосты ӧжыт гинэ ӧз суты Олег Гарин. Кылемъёсыз депутатъёс трослы бере кылизы. Конкурсъя комиссия финалэ поттӥз 2-сэ кандидатъёсты — Михаил Черемныхез но Константин Сунцовез.

Азьлане — ог 40 арлы

Михаил Черемных яке Константин Сунцов — берло кылзэс вераны кулэ вал город Думаысь депутатъёс. Та мылкыдын ик соос люкаськизы азьвыл ялымтэ 26-тӥ сессиязы. Кенешонэ озьы ик вуизы Удмуртилэн Тӧроез Александр Бречалов, Кун Кенешлэн Тӧроез Алексей Прасолов, шоркарлэн дано кунмуртъёсыз.

Ваньмыз регламентъя: эшшо одӥг пол тодматсконо финалэ потэм кандидатъёслэн программаосынызы, талы 15 минут сётӥське. Собере депутатъёс кандидатъёслы юанъёс сётъяны быгатозы.

Тӧролэн Ижез азинтонъя советникез Константин Сунцов шуиз: Ижевск — со бадӟым луонлыкъёсын но трос сюлмаськытӥсь ужпумъёсын город. Йыре бырйизы ке, нырысь ик басьтӥсько дышетон организациосты дышетскон арлы но городэз толлы дасян борды. 15 минут куспын озьы ик вераса вуттӥз закупкаосъя огъя центр кылдытон, властьлэсь но калыклэсь кусыпъёссэ юнматон сярысь. Валтӥсь ужпум: городэз мед тодозы палэнын но — та понна Россиын, кунгож сьӧрын ортчылӥсь вань адӟытонъёсы пыриськыны турттоно. Инвесторъёсты гочатоно.

Владимир Глухов депутатлэн соку ик юанэз кылдӥз:

— Ӵапак киям возисько тыллы, шунытлы тыриськонъёсын расчёткаез — уксё тыроно «Энергосбытлы». Но адӟиське: та организация пусйиськемын Оренбургын. Озьыен, шоркарын котькуд улӥсь уксёзэ палэнэ келя. Асьме дорысь ужбергатӥсьёс пӧлысь ӝыныезлэсь ятырез пусйиськемын мукет улосъёсын. Мар кароно соосты Удмуртие берыктон вылысь?

— «Энергосбыт» но, палэнэ кошкем мукет компаниос но азьланьын дорамы берытскозы шуыса оскон вань, — шуиз Константин Сунцов. — Та понна трос ужпумъёс кутӥсько.

М. Черемных

Валэктон сётыны юрт­тӥськытэк ӧз чида Удмуртилэн Тӧроез А. Бречалов.

— Ужбергатӥсьёсмы палэнэ кошкемысь дугдӥзы, — шуиз со. — Ми юромо чакласа потӥм: кин кошкиз но кин берытскиз. 2015-тӥ арозь 7 бадӟым компаниос кошкемын, кылсярысь, Тюмене кӧчиз «Фармаимпекс», отысь бюджетэ со арлы быдэ 5 миллиард манет налогъёс тыре. Но кошкем 7 компаниос пӧлысь 2-ез берытскизы ни. Кылемъёсыз но та сярысь малпасько. «Энергосбыт» но, оло, берытскоз ай. Но со али но ваньбурлы налогзэ но НДФЛ-зэ асьме бюджетэ сётэ.

Город администрациын ужасьёсты кулэстонлы мон пумит ӧвӧл, шуиз К. Сунцов. Но солэсь азьло чаклано, пе, кытчы кароно со специалистъёсты — ураме уд потты, шоркарез азинтонын опытсы бадӟым.

Михаил Черемныхлэн аспӧртэм малпаськыны быгатэмезлы вань депутатъёс синмаськизы кадь. Программаез сярысь со нимысьтыз ӧз вера ни — та дыр ӵоже, пе, соин ваньмыз ик тодматскыса вуттӥзы. Но пӧртэм югдуръёсысь потон амалъёс сярысь кема вераны быгатысал, дыр, регламентъя 15 минут гинэ ӧй сётӥськысал ке. Тодаз вайиз Бразилиысь тужгес чылкыт Куритиба городэз — вазен со туж кырсь вал. Отысь кивалтӥсьёс городысь люкам котькуд мешок жуг-жаглы сётъяны кутскизы книга, емышъёс басьтыны, транспортэн ворттылыны талонъёс. Югдур син куспын воштӥськиз.

— Асьмелэн уг тырмо школаос: Ижысь 10 сюрс нылпиос 2-тӥ сменае дышетско, — шуиз М. Черемных. — Нош Россилэн Президентэз куре: 2025-тӥ арозь 2-тӥ сменаос кыльыны кулэ ӧвӧл ни. Республикамылы та курон вормонтэм. Матысь дыре 1 сюрс интыен 10 школа пуктоно — 10 миллиард манетлэсь ятыр кулэ. Нош выльёссэ пуктытозямы, алиосыз вужмозы, соосты выльдоно луоз ни. Мар кароно? Пуктоно 5 бадӟым школа, отчы интыяно ваньзэс бадӟым классъёсын дышетскисьёсты. Дышетонэз радъяны луоз очно-заочно амалэн, куд-ог урокъёс ортчылозы, дистанционной амалэз кутыса но. Туала законэн та алэмын ӧвӧл. Эшшо ке Удмуртилэсь адӟем карыны кутскозы мукет улосъёс но…

Игорь Стыценко депутатлэн юанэз кылдӥз:

— Программаяды сомында ужпумъёс чакламын, соосты быдэстыны ог 7 ар кулэ, нош Ижлы выль йыр матысь 2 арлы гинэ бырйиськом.

— Асьмелэн одӥгез бадӟым висёнмы — азьлане учкыны ум быгатӥське, — вераз М. Черемных. — Адями куд-ог ужпумъёсты ог 40 арлы азьлане чакланы кулэ, тодэ ке но, ог 25 ар сяна уз улы ни шуыса. Солэн мед луозы кивоштӥсьёсыз, ужзэ азинтӥсьёсыз. Асьмеос сюресъёс лэсьтӥськом, ум ке но тодӥське, кӧня арлы. Кутӥськом шоркарлэсь генпланзэ, но отчы пумен воштонъёс пыртӥськом. Город шорысь кыралъёсы коркаос ӝутӥськом — котыраз машина пуктыны, нылпиослы шудыны интыез ӧвӧл. Нош со котырысь нылпи садъёс, школаос кемалась тырмемын ни, кылсярысь, Ижысь Культбаза котырын ик. Мар кароно? Инвесторъёслы пуктӥськыны вӧл-вӧл интыос сётоно, но соос отчы одно мед ӝутозы социальной объектъёс но. Инвесторъёс асьсэос но валаны кулэ: матын школа, садикъёс, больница вань ке, квартиралы дунъёс ог 15-20 процентлы бадӟымгес луыны быгато…

Куара ӧз тырмы

Лэчыт юанъёслы чузъяськизы тунсыко валэктонъёс: депутатъёс ӧз валалэ, кудӥз кандидат кужмогес. Куара сётон лушкем радъяськиз. Тодмо луиз: 10 депутат дурбасьтӥз Михаил Черемных пала, 17-ез — Константин Сунцов пала. 6 бюллетень изъянтэмын. Нош глава луон вылысь кандидат 22 куара люканы кулэ вал.

Экспертъёс-политологъёс кылдэм югдурлы пӧртэм сямен дунъет сёто. Кин ке шуэ, 6 бюллетень юри гожмамын вал, кин ке талы уг оскы.

Озьы-а, тазьы-а, но кин валтоз Ижез матысь 2 ар куспын — та юан ошиськыса кылиз. Иж город администрациысь правовой экспертизая управленилэн кивалтӥсез Дмитрий Чулкин валэктӥз:

— Ижлэн уставезъя город Дума выль конкурс сярысь ялыны кулэ. Ваньмыз выльысь радъяськоз. Выль кандидатъёс кылдыны быгатозы. Нош алиосызлы отчы пыриськон сярысь выль куриськон гожтыны алэмын ӧвӧл.

Ижлэн уставезъя ик выль кивалтӥсез одно бырйыны кулэ, пе, туэ 3-тӥ ноябрёзь — та инты 6 толэзьлэсь кема буш луыны кулэ ӧвӧл.

Элина КУМАЧЁВА

Туспуктэм басьтэмын Izhlife.ru сайтысь

 

Ангелина Снигирева
By Ангелина Снигирева Август 23, 2018 15:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<