Интынимъёс берытско карта вылэ

Удмурт Дунне
By Удмурт Дунне Август 23, 2018 10:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

«ВужМем» вотэмбаме пыртэмын ни 70 интынимъёс

Татарстанысь Кукмор ёросысь Нырья черкогуртысь дышетӥсь Владимир Жуков люканы кутскиз ар удмуртъёслэсь интынимъёссэс. Проектэз борды итӥськизы ни мукет шаерчиос но. Табере интынимъёс сярысь пыр-поч гожъямъёсты шедьтыны луэ вотэсысь Google мутус (карта) вылысь.

— Аслам вордскем гуртэ, со котырысь бусыос, нюкъёс, гурезьёс мыным туж чебер пото. Сыӵе ик чебер но аспӧртэмлыко соослэн нимъёссы но, — вера Владимир Жуков. — Пичи дырысеным кутскем тунсыкъяськонэ выль кужымен ӧръяськыны кутскиз М. Атамановлэн «Язык земли удмуртской» книгаез киям вуэм бере. Шонерзэ ке верано, со быдӟа книгае ми палась тросэз интынимъёс пырытэк кылиллям. Озьы бере, югдурез тупатоно кариськи. Школаын ужасько бере, нылпиосын но соослэн анай-атайёсынызы ӵош утчаськыны, ивортонъёс бичаны кутским.

Мылкыды эшшо но золгес ӝутскиз «ВКонтакте» бамысь «Удмуртлык» огинысь топонимъёсъя гожъямъёсыз лыдӟеме бере, мон но вераськонэ пыриськытэк ӧй чида. Озьы программист Виталий Пронин гожтӥз: туж умой луысал, удмурт интынимъёсыз Google мутус (карта) вылын но возьматысалды ке. Мон вотэс бамъёсын вырисько бере, гугл-мутусэн но ужаны кутски: ас котырысь тодмо удмурт интынимъёсыз со вылэ тодмостӥ. Собере аслэсьтым шумпотонме возьматӥ школаысьтым дышетӥсьёслы, дышетскисьёслы. Озьы соос луизы мынам нырысетӥ юрттӥсьёсы. Каллен та уже кыстӥськиз гурт калык но. Шӧдытэк ик кылимы, кызьы гурт проектмы ёрос проектлы берытскиз. Туннэ нуналлы та уженымы потамы ини Мамадыш но Балтач ёросъёсы, озьы ик вуылӥмы Киров улосвылысь но Марий Элысь удмурт гуртъёсы. Туж шумпотыса вераме потэ: котькуд гуртысь пумитаськомы проектмылы юрттыны дась луись адямиосыз. Тужгес но тау кылъёс вераме потэ Балтач ёросысь удмурт калыклы. Алексей Шмелёв, кудӥз али улэ Санкт-Петербургын, Интернет вамен (пыр) но, бертылыса но дорысьтыз удмурт интынимъёсты люка. Со ик усьтӥз «ВКонтактеын» «ВужМем» огинмес но. Али вань люкам ужъёсмес та огин пыр калыклы вӧлмытӥськом, малпаськомы нимаз вотэс бам но усьтыны.

Та дырлы Интернетысь гугл-карта вылын пусъемын 700 пала интынимъёс. Проект борды итӥськыны быгато мукет улосвылъёсысь, пӧртэм гуртъёсысь шаерчиос но. «ВужМем» огинэ пырыса, Google мутус вылэ соос быгато пусйыны интынимъёсты, вакчияк гожтыны соос сярысь, ватсаны туспуктэмъёс.

М. Атамановлэн «Язык земли удмуртской» книгаяз пыремын 10 сюрслэсь ятыр нимъёс — со Удмуртиысь, Киров, Пермь улосвылъёсысь, Татарстанысь, Марий Элысь, Чувашиысь, Башкортостанысь но мукет улосвылъёсысь интынимъёс. Озьы ке но тросэз отчы шедемын ӧвӧл на.

М. Атаманов «Язык земли удмуртской» книгаезлэн азькылаз гожтэ: интынимъёсты эскерисьёслэн верамзыя, котькуд бадӟым но шоро-куспо гуртын, черкогуртын 120-150 нимъёс лыдъясько. — Пичи гуртъёсты быдтыны кутскемзы азьын асьме пичи Удмуртиын гинэ 3 сюрслэсь ятыр гуртъёс вал. Та лыдпусэз 120 поллы йылтӥд ке, пӧрме 360 сюрс интынимъёс. Кудбыдӟа узырлык!

— Котькуд интынимъя валаны быгатӥськомы калыкмылэсь историзэ, улон шоры учконзэ, ужаса улэмзэ, чеберлыкез валамзэ но мукет, — вера Владимир Жуков. — Мыным тужгес но тунсыко пото Свердловск улосвылысь Турья, Нырья, Ушма, Сурья, Лозьва шур нимъёс — таос ваньмыз ук Кукмор но Балтач ёросысь удмурт воршуд нимъёс. Озьыен, ми палась удмурт калыкмы вашкала перм вакытэ ик вылэм ини. Вераме потэ Нырья Керемет сярысь но. Со интыяськемын ӝужыт гурезь йылын, отысен трос гуртъёс но бусыос адско. Татчы 3 арлы огпол люкаськылӥллям вань матысь ёросъёсысь ог 300-400 муртъёс. Соос вӧсяськылӥллям быдэс арня ӵоже. Тужгес но тунсыко — татын вӧсяллям кык юсьёсыз. Со вӧсям юсьёсыз, чеберъям валэн Ватка шуре нуыса, чыртыязы азвесь коньдон ошыса, кыре лэзьяллям.

Владимир Жуков азьланяз вань удмурт интынимъёсыз огазе люканы, удмурт ёросъёсысь шаерчиосты та проект пыр герӟаны малпа. Со сяна, кулэ, пе, вылэм удмурт литератураысь но, фольклорысь но интынимъёсты эскерыны.

 

Мария ВЕКШИНА

Удмурт Дунне
By Удмурт Дунне Август 23, 2018 10:30 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<