Гудӥськисез трос — лэсьтӥсез ӧвӧл

Ангелина Снигирева
By Ангелина Снигирева Август 24, 2018 10:15
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Копам урамъёс

Кизнер ёросысь Выль Трык гуртын 40 коркан ог 90 улӥсез. Гуртысьтызы потыны но, татчы пырыны но уг луы — сюрессы гудэмын. Нянь вортто мотоблокен.

Кизнер вӧзысь удмурт гуртысь улон-вылонэз умоятон вылысь 2016-тӥ арын ӧдъязы выль водобашня пуктыны, ураме колодчаос гудыны, гумыос кыскыны. Тендер пыр татчы Ульяновск кемысь ужасьёс лыктӥзы. Гуртоос талы нырысь-валысь туж шумпотӥзы. Ву башнязы угось 1960-тӥ арын ӝутэмын. Насосэз ялан тӥяськылэ. Напорез быдэс гуртлы уг тырмы. Эшшо ке гумыос пасяськемен, вутэк пукон учыръёс луыло. Гумыосыз асбестлэсь ай.

— Ульяновскъёс ӵектӥзы коркаосы ик ву кыскыны, — шуэ гуртысь Ираида Байбикова. — Кранысь ву вияз ке, кин пумит кариськоз? Арлыдоосмы гуртын лачак, карнанэз ӝутыны уг вормо ни. Соин ик, пенсизэс жалятэк но, гумыос басьязы. Таиз сокем дуно ӧз усьы. Дуногес луиз корка дорозь канава гудытон. Кин ке 10 сюрс манет понӥз, кин ке талэсь но тросгес коньдон кисьтӥз. 1 метрзэ гудон угось 700 манет тыр луылӥз. Нош куд-огезлэн коркаез ву линилэсь 60 метрлы кыдёкын сылэ. Вуэн уломы шуыса, коньдонмес ӧм жалялэ. Но гудӥськисьёс шуак кошкизы, огкылзы, пе, быриз. Озьы ми гудэм ульчаен, кырылэм азбаръёсын но корка ву пыртытэк кылимы.

Малы ужъёсты шуак дугдытӥзы шуыса юанлы бератаз кылӥськиз: луонлык ӧвӧлысь подрядчикъёслы ёрос коньдон тырымтэ. Али ке но со пумысен судъёс мыно. Ярам, колонкаысь ву лыктэ на, шуизы гуртоос. Нош кызьы сюрестэк улод? Выль Трыкысь сюресъёссэс отӥяз донгазы, гуосты пытсазы. Но со сюрес вылтӥ пыдын ортчыны уг луы ни вал сӥзьыл ик. Горд сюй вылтӥ резина сапег гинэ уг нискылты — машинаос но.

— Машинаосмес гурт сьӧры трасса дуре чурен дугдытъяськом. Мукет амал ӧвӧл, — веранзэ азьланьтэ Ираида Ильинична. — Огезлэсь бускельмылэсь машиназэ кин ке донгыса кошкиз ни. Асьмелэн медпунктмы ӧвӧл бере, врачъёсты ӧтиськомы. Нош «скоройлэн» гуртамы пыремез уг луы. Эмчиос дорамы пыдын вамыштоно луо. Нош нылпиосмес тыбыр выламы гурт пумозь поттаськомы. Ӧйтӧд, кызьы соос дышетскыны ветлозы. 10 кузя школьникъёсмы. Автобус трасса дорын возьма. Со дорозь мынонэз 2 иськем пала. Гуртамы угось нылпи сад но, школа но ӧвӧл.

Сюресэз тупатыны курыса, гуртоос ёрос кивалтӥсь-ёслы вазиськизы. Тупатӥсь ӧз сюры. Гурт поселение маин быгатӥз юрттӥз, но щебенез горд сюй ньылӥз. Соку гуртоос азбарысьтызы кин мае быгатэ сюрес вылэ куязы: кин кирпичъёссэ, кин изъёссэ, кин коръёссэ. Собере гинэ мырдэм но кызьы ветлыны луонлык кылдӥз. Туэ августэ Выль Трыке нош ик ву кыскисьёс вуизы. Таяз радэ Сарапулысь подрядчикъёс, тендерын вормыса, гудӥсько. Суп-сап ужаменызы, гуртоослэсь асьсэ кужымен корка дорозязы кыскем гумыоссэс но кесяло.

— Кӧня куаретӥмы ни, милемыз кылӥсь ӧвӧл, — шуэ Ираида Ильинична. — Трубаосты гурт кузя лэзёмы, нош коркаосы кыскыны ум быгатэ, шуо. Ульяновскысь подрядчикъёслэсь ик ужзэс йылаз-пумаз вуттэмды уг луы шат, юаськомы. Уг луы, правомы ӧвӧл, шуо. Асьсэос дасьсэ но кесяло. Тазьы луиз ке, башняысьтымы но ву юэммы уз луы ни ай. Карьер копано кадь бадӟым ковшъёсын гудӥсько. Нош гумызылэн зӧкталаез 32 сантиметр гинэ. Мукетыз, пе, техникамы ӧвӧл.

Липовка гурт поселениен кивалтӥсь Виктор Тимошкин верамъя, сарапулъёс гудӥсько ӝутэм сюресэз таркаса ик. Урдсаз кариськыны луонлыксы ӧвӧл — отӥ Ульяновскысь подрядчикъёслэн гумыоссы лэземын, вӧзтӥз ик газ гумыос кошко. Огзэ но исаны уг яра. Ярам, гудӥсько ке, мед. Но ужзы пумозяз уг быдэсмы: уксёзы тырмымтэен, колодчаос гудыны луонлыксы ӧвӧл. Али гуоссэс ворсазы ке, бератаз гинэ адямиослэн коркаоссы дорозь колодчаос гудыны кутскозы, озьыен, нош ик вань сюресэз быдтозы.

Ярам, али кӧс. Но сӥзьыл нош ик уямзылэсь кышкаса, гуртоос мотоблокен отысь но татысь вортто ни бусы дуре изъёс. Мукет азьтӥ гуртазы пырыны быгатытэк, йӧл нуллӥсь машина бусыетӥ сюрес лёгиз ни. Но сӥзьыл со лудэ нӧдоз. Нош та машинатэк гуртоос уксётэк пуксёзы. Гуртын угось 14 скал вордо на. Куд-огез, уж шедьтытэк, ӵапак скал вордыса, йӧл кыскыса, уксё поттэ. Эшшо ке гуртын фермер но вань. Солэн но скал уллёез бадӟым. Молоковоз пырыны ӧз быгаты ке, йӧлдэ котькытчы кар.

— Сюресмы быре ке, быдэс гуртэн отпуске потӥськомы, — вера Ираида Байбикова. — Коркалэсь кыдёке мыныны уг луы угось. Соин ик отпускмес сӥзьыллы но тулыслы люкетэн-люкетэн кельтӥськомы. Лавкае гинэ но сиён ваеммы уг луы. Мужике райпо магазинын ужа. Со мотоблокен тужгес кулэ луись сиён вайылэ. Мӧйыос Кизнер кеме басьяськыны потыны уг быгато ук. Няньтэк калыкез возёд шат? Собере, магазин — гуртлэн шорсюлмыз. Клубмы, мукет люкаськон интымы ӧвӧлысь отчы иворъёсты тодыны но, кенешыны но вуылӥськомы.

Гуртоос шумпото вал ай, гуртэ егитъёс кылё шуыса. Арлы быдэ 1-тӥ классэ 2-3 мурт лыктоз шуыса чаклало. Туэ 1-тӥ классэ мынозы 2 кузя. Егитъёс пуктӥськыны но тыршо. Нош сюрес быриз ке…

Виктор Тимошкин верамъя, запасын вань щебёнка. Со гурт шорозь, магазин дорозь кисьтыны тырмытозы. Но та луоз вань гудӥськем ужъёсты быдэстэмзы бере. Солэсь вазь кисьтӥд ке, гудӥськыкузы ваньзэ выльысь сюе согозы. Малы магазин дорозь? Татчыозь школа маршрут чакламын. Быдэс гуртысь сюресэз щебёнкаен шобыртыны коньдонзы ӧвӧл.

— Зоръёс кытчы вуэммес возьматозы ай, — вера Виктор Петрович. — Али гуртоос Выль Трык пуме ке но машинаоссэс кельто. Но ву башняез юнматӥзы ке (али фундамент кисьто), 50 метр кемын санитарной зона луоз. Соку котыраз машина пуктылыны уз лэзе ни.

Елена САРАМАТОВА

Туспуктэмез авторлэн

Ангелина Снигирева
By Ангелина Снигирева Август 24, 2018 10:15 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<