Футбол азинскоз

Ангелина Снигирева
By Ангелина Снигирева 2 августа, 2018 13:17
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

А. Алаев

Удмуртие вуылӥз Россиысь Футболъя огазеяськонлэн кивалтӥсезлэсь ужзэ быдэсъясь Александр Алаев. Со тодматскиз та удыслэн шаерамы азинскеменыз.

Москваысь куно эскериз, кызьы выльдӥськиз «Зенит-Ижевск» футболъя клублэн липет улысь интыяськем шудон бусыез. Сое выльдон сярысь кенешемын вал ар но ӝыны талэсь азьло.

— Азьвыл татчы ветлыкумы, адӟимы, макем уродмемын вал ини футболэн шудон бусыды, — вераз А. Алаев. — Россиысь Футболъя огазеяськон но Европаысь футболъя ассоциациослэн огазеяськонзы юрттэмен, сое выльдыны быгатӥм.

Кызьы пусйиз А. Алаев, футболъя огазеяськон Ижысь спортэн вырисьёслы азьланяз но саклык висъялоз. Кылсярысь, вуоно арын футболъя нылпи школалэсь бадӟым бусызэ выльдыны чакламын.

Озьы ик бадӟым куно пумиськылӥз Удмурт Правительстволэн Тӧроезлэн воштӥсеныз Александр Свининэн. Соос кенешизы, матысь 3-5 арлы футболэз азинтонъя нимысьтыз программа дасяно шуыса.

— Та программалы луыса спорт школаосы лыктӥсь нылпиос тодозы, мар соосты азьланяз возьма, кытын азинтыны быгатозы быгатонлыкъёссэс, — вераз А. Свинин.

Футболъя огазеяськонысь адямиос ушъязы, Ижысь командаын шудӥсь уноез спортсменъёс — 25 пӧлысь 20-ез — асьме дорын ик будэм-кыдам адямиос. Умой соиз но, клублэн кивалтӥсез воштӥськем бере со кун бюджет чотын гинэ улыны уг тыршы, палэнысь но коньдон утча.

А. Алаев пумиськон дыръя ик пусйиз:

— Мон адӟи, Удмуртиын футбол азинске шуыса. Сомында нылпиос лыкто спорт школае, шудо ӟеч стадионъёсын. Футбол сярысь татын тодо. Ми тыршом, таӵе улосъёс Россиын тросгес мед луозы шуыса.

Сергей Захаров

Туспуктэм басьтэмын http://www.udmurt.ru сайтысь

Ангелина Снигирева
By Ангелина Снигирева 2 августа, 2018 13:17