Бызьылэ нуналаз 6 час

Ангелина Снигирева
By Ангелина Снигирева Август 29, 2018 14:07
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Сергей Ардашев дасяське вормыны Мартин Сундбюез

С. Ардашев

1-тӥ-4-тӥ гудырикошконэ Норвегиын Blink ӵошатскон ортчиз. Отын лыжероллеръёсын 60 иськем ортчоно вал. Куасэн бызьылӥсьёс, ӵапак лыжероллеръёсын ворттылыса, толалтэлы дасясько, соин ик отчы дуннеысь трос тодмо куасэн бызьылӥсьёс но биатлонистъёс пыриськизы. Соос пӧлын вал Балезиноысь 19 аресъем Сергей АРДАШЕВ. Классической марафонын пияш 2-тӥ инты басьтӥз.

— Ӵошатсконъёсын пумиськид-а тодмо куасэн бызьылӥсьёсын?

— Мон нырысьсэ ӵошатски Мартин Сундбю, Ийво Нисканен, Сергей Устюгов кадь кизилиосын. Зэмзэ ке, результатэлы туж пайми, дасяськисько вал 20 кужмоез пӧлы ке но сюрыны. Но таӵе тодмо спортсменъёсын артэ вань кужмысь бызьытэк ӧйлась, маке сярысь малпаськыны дыр ӧй вал. Соос азьын вуи ке но, аслым кизили ӧй поты. Тол ваньзэ интыяз пуктоз ай, али ми зэмос ӵошатсконъёслы дасяськиськомы гинэ. Яратоно спортсменъёсы пӧлысь Александр Легковез висъясал, соин ӵош милям кӧня ке тренировкаосмы вал туэ, Александр юрттэт сётэ, валэктэ, кызьы кулэ мугорез кыдатыны.

— Нош кызьы огъя ортчиз марафонэд? Сыӵе кузь сюрес вылын сиськыны но кулэ ук.

— Трассаын сиськон ласянь ваньмыз умой вал — быдэс гонка ӵоже кускам вуэн бачокен мынӥ, тренеръёс трасса вылын гельёс сётъязы на. Инвентарен гинэ шуг-секытъёс вал. 40 иськем ортчеммы бере лидеръёс ӝог мыныны кутскизы, нош мынэсьтым ӵапак соку бодыме тӥязы, соин сэрен мон одӥг минутлы кыльыны кутски азьпалан мынӥсьёслэсь. Выльысь соосты сутыны быгатӥ 53-тӥ иськем бере гинэ. Соку малпай ни вал, туннэ нуналлы ӟеч результат возьматӥ ни шуыса. Пумен азязы потӥ но быгатӥ кошкыны, ӟигары тырмиз финишозь 2-тӥ интыме возьыны.

— Финиш бере кин ке мар ке вераз-а басьтэм интыед пумысен?

— Куд-ог иностранецъёс паймемзэс веразы, тодӥзы но, мыным 19 арес гинэ на шуыса. Норвегиысь тодмо марафонец Ойстейн Петтерсен Твиттераз гожтэм на, 1998-тӥ арын вордскем пиос туж кужмоесь шуыса, вуоно аръёсы соосын ӵошатскыны секыт луоз, пе. Оскисько, ми толалтэ но соослы кужыммес возьматыны быгатом на.

— Нош кытын но ку тон куасэн бызьылыны кутскид?

— Мон Пибаньшур гуртын улӥсько вал, отын ик 1-тӥ классысен куас вылэ султӥ, 6-тӥ классын Балезиное выжи но Николай Леонидович Ложкин дорын мугорме кыдатӥ, ӵапак со али мынам личной тренере. Школаме йылпумъян азьын Удмуртилэн огъя командаяз пыри, нош берло 2 арзэ Россилэн сборнояз тренироваться кариськисько. Куке мон тодӥ, Россилэн сборнояз шеди шуыса, соку ик тренерелы жингыртӥ шумпотэмме вераны. Кема вераськимы соин, кызьы мар луоз шуыса. Собере ветлоно луиз на Москвае функциональной тестирование, 15 юниоръёс пӧлысь 8-эз гинэ Россилэн огъя командаяз кутэмын вал. Соин мон понна со бадӟым вормон.

— Россилэн сборнояз тон туж егит тренерлэн группаяз шедид, мар верасалыд со сярысь?

— Бен, милям тренермылы, Егор Соринлы, 32 арес гинэ. Тренер понна со егит лыдъяське, соин ик ваньмыз паймо, юаллясько со сярысь. Нош мыным Егорен ужаны туж яра, со визьмо, дышетӥз милемыз малпаськыса, пульсмес шӧдыса бызьылыны. Со ми понна машинаысь тахометр кадь. Егор гань-гань улыны уг лэзьы. Асьмеос но табере бадӟымесь но визьмоесьгес ни, валаськомы, режимез тӥятэк улоно шуыса, сиськон вискамы но телефонэн ум пукиське ни, куспамы эшъяськиськом.

— Нош кызьы ортче сборнойысь лыжниклэн нуналэз?

— Сборъёсын котькуд нуналмы одӥг кадь. 8 часын ӵукна ваньмызлы сиськонниын луоно ни, уго 9 часын кутске 1-тӥ тренировка. Со 3 час но кыстӥськыны быгатэ, ми яке пыдын бызьылӥськомы, яке лыжероллеръёсын ворттылӥськомы. Нуназеяммы бере кӧня ке кӧлӥськомы но выльысь тренировкае потӥськомы. Табере ини скоростной яке силовой тренировка лэсьтӥськомы. Ӝыт сиськеммы бере милям шутэтскон дырмы вань. Но 23 часозь одно ик изьыны выдоно.

— Кыле-а тынад дырыд но ӟигарыд дышетсконлы яке шутэтсконлы?

— Арняяз ми 25-30 час тренировкаын ортчытӥськом, ӟигар кыле на, нош дыр уггес. Сборъёсы кошкылӥськом 18-20 нуналлы, соос вискын 8 нунал гинэ вань гуртэ бертылыны яке дышетскон интые ветлыны. Мон Казаньысь спортъя академиын дышетскисько, туэ 2-тӥ курсэз йылпумъяй. Дышетсконъя ваньзэ вуттӥсько, ярам, академиын луонлык вань вотэс пыр ужъёсты келяны. Шутэтскон дыры мынам гуртын гинэ луэ, соин мон кӧттырымонам футболэн шудӥсько но чорыгасько.

— Кыӵе кунъёсы сборъёсы вуылӥськоды? Кытын тыныд тужгес но кельшиз?

— 2 ар куспын мыным удалтӥз ни Эстоние, Болгарие, Австрие, Швейцарие, Норвегие но Италие вуылыны. Зол сюлмам пыриз Австрия, малы ке шуоно отын чебер инкуазез, трос интыоссы тренировка ортчытъяны, гурезь йылэ тубиськод но толалтэ кадь куасэн ветлӥськод, улаз васькиськод — пыласьконо кадь шуныт куазь. Со сяна, Австриын ческыт сюдо, соин шумпотӥсько, нош но нош отчы вуылӥсько ке.

Тросэз сборъёсмы Россиысь спорткомплексъёсын ортчыло, кылсярысь, Пересветын, Сочиын, Тюменьын, Санкт-Петербургын, Кисловодскын. Соос пӧлысь мыным тужгес яра Тюменьысь «Жемчужина Сибири» комплекс, отын ваньмыз туала куронъёсъя лэсьтэмын: роллерной кругзы кузь, рельефез но умой. Эшшо шумпотӥсько, Санкт-Петербургысь «Кавголово» комплексын табере гужем но лымы вылын тренироваться кариськыны луэ шуыса — отчы пуктӥзы Европаын кадь «труба», отын ар ӵоже лымы кылле.

— Нош эшъяськиськод-а мукет кунъёсысь спортсменъёсын? Сочиын ортчем Олимпиада бере трос керетонъёс вал, оло, тӥ шоры кырыж учкисьёс вань?

— Мон ачим кадь егит норвежецен эшъяськисько, англи кылын вераськон секытгес сётӥське ке но, тренировкаос вискын дышетыны тыршисько. Нош Сочи сярысь урод вераськонъёс табере ортчизы ни, Кореяын ортчем Олимпиада бере ваньзы валазы, дыр, Россиын куасэн бызьылӥсьёс туж кужмоесь шуыса. Кужмо, тодмо спортсменъёсмылы Кореяе мыныны ӧз сётэ шуыса, воже потэмын вал. Озьы ке но егит лыжникъёс данмес ӧз уськытэ. Куасэн бызьылонэз сяна, мон, хоккеез учки на, Алина Загитовалэсь нискыламзэ. нырысьсэ учки кёрлингез, вань правилооссэ ӧй вала на, но учкыны яраз.

— Мар малпаськод Удмуртиысь куасэн бызьылонлэн азинскемез сярысь?

— Асьме элькунамы туж трос куасэн бызьылӥсьёс, али Максим Вылегжанинлэн ӵошатсконъёсаз пичи пиос гинэ но 120 кузя пыриськизы. Мон ачим Россилэн но, Удмуртилэн но патриотэз, но вылӥ вормонъёс басьтон понна кулэ ӵемгес потаны сборъёсы. Но жаляса верано, Удмуртилэн командаезлы ӧжыт коньдон висъяське, сборъёсы потало ке но, шер гинэ, ӵемысь нылъёсыз ӵошатсконъёсы но нуыны коньдон уг сюры. Но шумпотымон, али тросгес спонсоръёс шедё ни, спортсменъёсты дӥсяны гинэ но уго трос коньдон кулэ.

— Азьланяз кыӵе ужпумъёс аслыд пуктӥськод?

— Мон аслым вылӥ куронъёс гинэ пуктылӥсько, но соосты ваньмызлы вераме уг поты. Мон егит ай, трос вормонъёсыным ушъяськеме уг луы, эшшо мон уг тодӥськы, мар луоз азьланяз. Мынам тау кареме потэ на Удмуртиысь тренеръёсылы, семьяелы, матысь эшъёсылы мон вӧзын луэмзы понна. Соослэн юрттэменызы гинэ, мынам улонам кылдо вормонъёс.

Алина КРЕСТЬЯНИНОВА

Ангелина Снигирева
By Ангелина Снигирева Август 29, 2018 14:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<