Бордаз — зарни адямиос

Ангелина Снигирева
By Ангелина Снигирева Август 24, 2018 09:43

Эгра каргуртысь 1 номеро школаын 25 ар ужа ни Лидия Белых. Кылъя но литературая, шаертодонъя урокъёс нуэ. Умой ужамез пусъемын Удмуртиысь Дышетонъя но наукая министерстволэн Данъян грамотаеныз, вормонъёс басьтӥз ни «Арлэн дышетӥсез» но «Удмуртиысь устоез дышетӥсь» конкурсъёсын. 7-тӥ арзэ кивалтэ ёросысь удмурт кылъя но литературая дышетӥсьёслэн огазеяськонэнызы. «Удмурт Кенеш» огазеяськонлэн мыло-кыдо ёзчиез луэ.

Китӥм валтӥз… Анна Федотова

— Дышетӥсь луонме школаысен ик тодӥ ни вал кадь, — веранзэ мытӥз Лидия Николаевна. — Пичи сузэрме но солэсь 2 эшъёссэ котьку визьноданы вырылӥ, дышетӥсен шудылӥмы. Кытчы ке мынӥськомы ке, тодыса но тодытэк, ваньмыз сярысь валэктыны вырылӥ. Ма, собере, ми пичи дыръямы дышетӥсьлэсь но врачлэсь гинэ профессиоссэс тодылӥмы. Папае мынам вань улонзэ колхозын ужамын, мамае — гуртысьтымы медпунктын.

Кузьмовыр гуртамы азьло 8 классъем школамы вал. Отын мон 5 ар дышетски но, сое покчи классъем кельтӥзы, нош табере воксё пытсазы. Озьы 5 арзэ, Эграысь 1 номеро школае ветлыса, дышетсконо луиз. Школаме умой йылпумъяса, Удмурт кун университетысь историяя факультетэ документъёсме сётӥ. Экзаменъёс азьын кӧня ке нуналзэ консультацие ветлоно кариськи. Английской кылэ мынӥ но — ваньмыз валантэм потӥз, обществоведение мынӥ, отысь но долкаса потӥ. Нырысьсэ городэ вуэм маке куалектӥ исторической факультетлэсь, документъёсме кутыса гуртэ, бертыны потӥ ни вал. Ӵапак соку, университетлэн ӧсэтӥз потыкум, Анна Васильевна Федотоваен пумиськи. Со милемыз 6-тӥ классын дышетӥз вал, бӧрысь тодмо тележурналист луиз. Шорам нимын-тулын вазиськемез бере сюлмы буйгаз, вань сюлмаськонъёсме солы шараяй. Тон, пе, мар дауртӥськод, китӥм кутӥз но берен университетэ пыртӥз. Документъёсме филологияя факультетэ сётӥмы. Ватсаз на, дышетӥсьын ужамед ӧз поты ке, телевидение яке радиое, пе, вамыштыны быгатод.

Экзаменъёс дорозь 3 нунал кылемын на вал, гуртысьтымы удмурт кылъя но литературая дышетӥсьмы Лидия Артемьевна Тронина доры мынӥ но книгаоссэ кури. Оло, маке-маке дасяськыса вутто на шуыса, дышетӥсе но визь-кенеш сётӥз на. Озьы мон малпамтэ шорысь филфакысь удмурт группае шеди.

Нош история ялан бордаз кыскиз. 1-тӥ курс бере группаысьтымы куд-ог нылъёсты юридической факультетэ туж ӧтё вал, монэ но. Ватсаса экзамен сётоды но 2-тӥ курсэ кутом, шуизы. Но мон группаысьтымы эшъёсылы дыши ни вал, нош выляз городъёс гинэ луозы шуыса, ӧй мыны. Шонерзэ верано ке, дӥсьтонэ ӧз окмы, туж керпотӥсь вал. Ма, нокудмы но ӧм мынэ.

Егит дыръяз

Синмаськон

— Университетын дышетскон туж яраз. Школаын спортэз яратӥсько вал бере, одӥгаз ӵошатсконын 2-тӥ инты басьтӥ, тренеръёс соку ик дорам вуизы. Одӥгез капчи атлетикае кыске, мукетыз — куасэн бызьылонэ, нош мынам «Чипчирган» ансамбле потэ. Куинез пӧлысь одӥгзэ быръёно луиз, вамыштӥ куасэн бызьылонъя секцие. Университетлэн командаез понна бызьылӥ, Удмуртиын ортчылӥсь ӵошатсконъёсы пыриськем сяна, трос пол потай Киров но Челябинск улосъёсы. Вормонъёсы но вал.

Спортэн эшъяськеме дышетсконын но юнгес луыны юрттӥз. Удмурт, англи но венгер кылъёсты дышетӥмы. 2-тӥ курс бере шуд усиз Венгриысь Сегед городэ вуылыны. Отчы нуллӥзы университетысь тужгес усто студентъёсыз. Кунгож сьӧры потонме тодыса, шумпотонме мамаелы верано кожай. Со ке воксё куалектӥз, вылаз ик, сокугес гинэ рельсаос вылысь кыӵе ке поезд пезьдэмын вал. Ярам коть, папае ӝот-ӝот вазиз, ӧтьыкузы, пе, мед ветлоз. Соку Венгрие ветлэм 10 студентъёс пӧлысь 4-ез Эгра ёросысь вал. Та вакытэ 3-ез ёросысьтымы школаосын удмурт кылэз нуо: мон Эграысь 1-тӥ школаын ужасько, Елена Рафаиловна Агафонова — Зураын, Ольга Геннадьевна Чиркова — Мазьгиын. Дышетӥсьёсмы Валентин Кельмаков но Геннадий Ушаков котьку шуылӥзы: кунгож сьӧры вуыса, ӟеч улэмды потэ ке, словарьысь кылъёсты дышетэ. Номыр кышкытэз вылымтэ. Венгер калык пӧлын толэзь пала улытозямы, кылзэс валам сяна, асьмеос но вераськыны быгатӥськомы ни вал. Сегедлы синмаськи, чебер но трос черкъёссы городзэс эшшо но шулдыргес каро кадь. Мыным отын котьма тунсыко потӥз. Ульчаын жаль-жаль зоре, нош нӧд ӧвӧл. Милям гуртамы резина сапег понытэк ӧй луысал ни.

Кузь сюрес вылэ потаса, чебер дуннелы синмаськыса, историяя факультет сярысь вунэтӥ ни вал. 3-тӥ курс бере мукет сюлмаськон шедиз. Группаысьтымы 2 муртэ, монэ но Валерий Тероковез, Санкт-Петербургысь журналистикая факультетэ дышетскыны ыстом, пе. Мон нош ик малпаськонэ уси. Мамаосын кенешытэк, палэнэ кошкод шат? Гуртэ бертӥ но, мамае нош ик куалектӥз, татын, пе, 2 ар гинэ дышетсконэд кылиз, нош отчы мынӥд ке, эшшо 3 арзэ ветлоно луод на. Валера Тероков но ӧз мыны, мынам но мукет городэ кошкеме ӧз поты ни. Вылаз ик, гуртысьтымы пияшлы синмаськемын вал. Отӥяз сюан ортчытӥмы, нош 5-тӥ курсысен пимы вордскиз.

Егит семья

1 урок 2 пӧртэм сямен

— Диплом басьтыса, гуртэ бертӥ, — веранзэ азьланьтэ Лидия Белых. — 1-тӥ сентябрь вуон азьын Эграысь 4 номеро школае ужаны ӧтизы. Ас поннам малпай, пиналэлы ӝыны арес вань ни, мамаосмы кыкназы ик гуртын, быгатэмзыя юрттӥськозы. Ужаны потонэлы анайёсмы туж пумит вал ке но, мон аслэсьтым кари. 3 нунал ужаса вуттӥ но, нуные секыт висьыны усиз. Озьы пиналэн пуконме азьланьтӥ.

Ар ортчыса, нош ик Эграысь жингыртӥзы. Таяз учыре 1 номеро школае ӧтизы удмурт кылъя урокъёс нуыны. Соглаш кариськи, ас поннам малпай, ичигес часъёс басьто но ваньмыз пумен радъяськоз. Ужаны кутски но, мыным бадӟым класс сётӥзы, часъёсы но ставкалэсь тросгес люкаськизы. Секыт вал ке но, чидай. Со понна 2-тӥ ужан аре капчиенгес сётскиз.

Удмурт кылъя урокъёсты школаямы 2 кузя нуимы. Нырысь аръёсаз Галина Алексеевна Лекомцеваен ӵош ужамы, ас вакытаз монэ но со дышетӥз вал, классэнымы кивалтӥз, ужаны кутскыса но, трос визь-кенеш сётӥз на. Огвакытэ мыным сётылӥзы ӟуч кылъя но литературая, шаертодонъя урокъёсты но. Нунал пумын туж жадьылӥ. Шаертодонъя урокъёс нуыны туж юрттӥз история предметэз яратэме.

Милям школаямы та вакытэ вань пиналъёс удмурт кылэз дышето: ӟучъёс — факультатив амалэн, удмуртъёс понна урок нуиське. Дышетӥсьёсын кенешеммы бере огкылэ вуимы: факультативе ветлӥсьёслы но отметка пуктылоно, сотэк та предметэз кулэ уз каре. Школаен кивалтӥсьмы но ми пала дурбасьтӥз. Бен, куд-ог ӟуч анай-атайёс талы пумит вал, кӧня ке мурт директор доры но ӝожтӥськыны ветлэмын. Собраниосын ваньзэ пыр-поч валэктоно луиз, мылкыд карисьёссэ урокъёсам пукыны ӧтьылӥ. Бӧрысь буйгатскизы кадь. Удмурт кылъя урокъёсам пиналъёсты 2 группалы висъясько но одӥг урокме ик 2 пӧртэм программая нуисько. Выжыязы удмуртсы вань ке, удмурт кылэз валало ке, основной группае выжтӥсько. Кылсярысь, кылем арын 8-тӥ классын 22 пиналъёс вал, со пӧлысь 5-ез гинэ удмуртэз основной предметэз сямен дышетӥзы.

Ӟучомон

— Уг ваты, тазьы ужан понна уроклы дасяськонэз 2 поллы тросгес. Капчигес луысал вань пиналъёсын «Ӟеч-а, бур-а, удмурт кыл» программая ужаны, но соку берпуметӥ удмурт пиналъёсмы но ӟучомозы. 7-тӥ арзэ ёросысьтымы удмурт кылъя но литературая урокъёсты нуисьёслэн огазеяськонэнызы кивалтӥсько бере, та программае дыртыса выжыны уг дэмласькы.

Шудо семья

Жаляса верано, удмуртлыкез ӝутыны тыршиськомы ке но, гуртысь пиналъёсмы арысь аре ӟучомо. Ог 2 ар талэсь азьло гинэ пичи Кузьмовыр гуртамы нылпиос куспазы шалтыр удмурт сямен вераськылӥзы, нош табере удмурт кылэз пересьёслэсь сяна уд кылы. Эграысь 1 номеро школае гурт пиналъёс лыкто ке вал, ваньзы удмурт сямен вераськыны быгатылӥзы, табере Байвалын улӥсьёс ӟучомизы, шуыны луоз, ярам коть, пыдлось Илляпи но Сьӧдпи гуртъёсысь пиналъёсмы удмуртэсь на. Отысь пиналъёсмы зарни интыын. Кылсярысь, Маша Шкляевамы шаерысьтымы удмурт кылъя олимпиадаын вормисьёс пӧлы шедиз.

Трос кыл тодэм нокинлы но ӧз люкеты на. Удмуртэз валась пиналъёсын ӵош, Казане ветлыса, 2-тӥ арзэ ни «Россия — многонациональная страна» научно-практической конференцие пыриськимы. 1-тӥ араз 1 пиналэз нуллӥ, 2-тӥ араз 2 кузя ветлӥмы, туэ мукет дышетӥсьёсты но лӧпкытъясько. Бадӟым ужрадъёсы пыриськыса, нылпиослэн асьсэлы осконзы будэ. Огкылысь ужаськомы «Удмурт Кенеш» огазеяськонлэн ёросысьтымы ёзэныз. Оскем потэ, удмурт пиналъёсмы уз быре, азьланяз но олимпиадаосын вормылом.

Спортэн висён

— Сергеен ми одӥг классын дышетскемын, 1 арзэ одӥг парта сьӧрын но пукимы. Эграе ветлыкумы, эшъёс вал, нош школаез йылпумъяса, улон сюресъёсмы огдырлы люкиськылӥзы. Армиысь бертэмез бере Сергей Ижевскын крановщике дышетскиз. Шутэтскон нуналъёсы автобусын ӵош бертылыны кемдылӥмы, соку ик кылмы тупаз. Табере Стас пимы но Арина нылмы будо, быдэс семьяен спорт понна висиськомы.

Школаын ужаны кутскыса, 7 ар пала Эгра каргуртэ пыдын ветлӥ. Ӟезьы азьысен школаозь лыдъяно ке, ог 8 иськем люкаське. Вазенгес уго школа автобусъёс ӧй вал, нош рейсовой автобусъёс шер ветлӥзы. 20 минутлы ке но автобуслэсь вазьгес вуисько вал гуртам. Пыдын вамышъян тазалыклы но пайдаё. Бертон сямен йыре выль малпанъёс лыктыло.

Мужике но спортэз яратэ. Егит дыръяз ялан футболэн шудэмын. Али но, ваньмон дыр шедьтэ ке, бызьылыны-тэтчаны кошке ни. Кӧня ке ар талэсь азьло гуртысьтымы егитъёс но картэ огазеяськизы но хоккеен шудон инты кылдытӥзы. Толалтэзэ асьсэос ик йӧ кисьто, лымызэ сузяло, ӵем дыръя Эграысь воргоронъёс но доразы шудыны ветло. Гужемзэ хоккей коробкаязы волейболэн я футболэн шудо, но шергес. Спортэз яратон мылкыдмы нылпиосмылы но пыӵаз. Стасмы 2-тӥ классысен хоккеен шудэ, 4-тӥ классысен Глазовысь «Прогресс» командаын вал. Арня шорын тренировкаосы нуллӥмы, нош шутэтскон нуналъёсы командаеныз ӵош ӵошатсконъёсы ветлӥз. Москваысь пинал олимпиецъёсты дасянъя школаысь тренеръёс Глазове ветлӥзы, пимылэсь умой шудэмзэ синйылтӥллям. 7-тӥ классын дышетскись пимес огназэ Москвае келяны жаль потӥз. Отӥяз сое Глазове но, Ижевске но ӧтьылӥзы, но Играын ик дышетскиз. Школазэ йылпумъятозь, весь малпа вал, спортсмен луо шуыса. Лябгес дышетскысал ке, малпаськытэк спортшколае лэзьысал ни, дыр. Ялан индылӥ — спортсмен со профессия ӧвӧл, ваньмон дырез пайдаё ортчытон гинэ шуыса. Нош 11-тӥ классысен Стасмылэн йыраз маке чилектӥз но геологе дышетскыны пыриз. Табере пимылы 26 арес ни, ваньмон дыръяз папаеныз ӵош хоккеен шудэ, ёрослэн командаеныз ӵош Гурт шудонъёсы пыриське.

Анаеныз

Нылмы но спортэн эшъяське — волейболэн, баскетболэн шудэ. Нылпиосмы пичигес дыръя семьяенымы ӵош ёросын ортчылӥсь ӵошатсконъёсы пыриськылӥмы. Табере спорт понна телевизор дорын висиськомы, тужгес но — биатлон мынон нуналъёсы. Вань ужмес вунэтыса, телевизор борды лякиськиськомы.

Быдэс гуртлы — 1 скал

— Сьӧр гуртэ ужаны ветлӥсько ке но, хозяйствомы бадӟым: скал (быдэс гуртлы 1 кылемын), ыжъёс, парсьёс, ӟазегъёс, курегъёс но мулардъёс вордӥськомы, коӵышъёсмы гинэ но 4 кузя. Гуртын улыса, кызьы чидалод пудо-животтэк. Юртъер котырын берганы кузпалы но, нылпиосы но, 79 аресъем анаймы Мария Васильевна но юрттӥсько. Пудо сиён дасян вакытэ вань ӵыжы-выжыосмы люкасько. Сергейлэн семьяяз 4 агай-вынъёсыз, ваньзы сямен гуртын уло, ӵошен кариськыса, трактор басьтӥзы. Одӥгзы турнало, мукетсы утялто. Турнан интыослы ум ёрмиське. Мукет ӵыжы-выжыосмы но юрттӥськыны вуыло. Бакчаямы картошка, кушман мерттӥськомы. Огреч, помидор, кабачок, баклажан но перец сяна, убоосмы вылын арбуз, дыня но виноград будо. Толлы сиёнъёсмы гулбеч тыр люкасько, компотъёсы гинэ 80 банкалэсь трос. Юрт котырын но корка пушкамы турлы сяськаос будэтӥсько. Нырысь фиалкаос вал, собере бегониос, гераньёс, табере орхидея вылэ выжи. Чебер сяськаос капчи мылкыд кузьмало.

25 ар школаын ужатозям, весь малпасько, семьяелы ичигес дыр висъясько кадь шуыса. Токма шуиллямтэ, дыр: умой дышетӥсь луэмед потэ ке, семьядэ вунэты, нош адӟем карымон кузпал ке тон, дышетӥсь луыны туж секыт. Аслым ялан 2 гож вискын кадь потӥсько, семьяме но яратӥсько, пиналъёстэк но улыны уг чидаськы. Куд-ог дыръя, гуртысь вазь ӵукна кошкыса, бер ӝыт гинэ вуисько. Семьяелы тау карисько, кузпалэ мынам зарни, котьма ужез быдэстэ: вуриське но мынэсьтым ӟечгес, пӧраське но ческытгес, пуэн ужаны но усточи, мыным но юрттӥськыса вуэ. Та вакытэ Арина нылмы гурт котырын берганы юрттэ, кулэ дыръяз пудо но сюдоз, скал но кыскоз.

Огкылысь улӥськомы шуыса, вылды, туэ июль толэзе, Семьялэн но яратонлэн нуналэз дыръя, милемыз «За любовь и верность» медален пусйизы. Туж данъяськымон со. Угось семьяын ке ваньмыз ӟеч, нунал но шулдыр ортче, мытэм уж но капчиен радъяське.

 

Валентина ЕМЕЛЬЯНОВА

Ангелина Снигирева
By Ангелина Снигирева Август 24, 2018 09:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<