Уж выль кужым сётэ

Удмурт Дунне
By Удмурт Дунне Август 23, 2018 09:52
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

А. Попов Партчиын крезьлы синпелет лэсьтӥз

Вавож ёросысь Партчи гуртысь Анатолий Попов арлыдызъя пенсие потэмын ни, но дорын пукемез уг поты ай.

 

 

Анатолий Аркадьевич 30 арлэсь кема Партчи школаын физкультурая дышетӥсь луыса ужаз.

— Школалэсь, пиналъёслэсь мӧзмисько ик, дышетӥсьлэн бумага ужез гинэ синазькыль, — шуэ А. Попов. — Но, малпасько, егит ужасьёслы сюрес сётоно. Озьы ке но дорын пукем уг поты ай, пересьёслэсь верамзэс котьку тодам возисько: ас поннад ужаны, улыны вуттод ай, калык понна ужаны тыршы.

Анатолий Попов нокыӵе ужлэсь уг кышка. Нырысь-валысь «Луч» колхозлэн шутэтскон базаяз утялскись луыса ужаны кутскиз, табере сое отчы кивалтӥсе юнматӥзы.

Шутэтскон сэрегазы солэн кичӧлтэмезъя алигес кылдӥз крезьлы синпелет. Сое ас киыныз Анатолий Попов ик лэсьтӥз.

— Марлы гинэ туала вакытэ синпелетъёс пуктэмын ӧвӧл — апельсинлы, пыдкуклы, пельняньлы. Нош крезьлы нокытын ӧвӧл. Со удмурт калыклэн вашкала инструментэз ук, — шуэ Анатолий Аркадьевич, — песянай-песятайёсмы крезь шудэм улсын вань сюлэм ӝожзэс кисьтылӥзы. Вавож палъёсын солы синпелет пуктыны тужгес тупась инты. Ми палан вордӥськемын тодмо удмурт гожъяськись К. Герд. Со кылбуръёсаз крезез данъялляз. Собере асьме гуртысь ик нылпиос вашкала инструментэз улӟыто, Вавожысь искусствоосъя школае дышетскыны ветло.

Партчиысь шутэтскон сэрегын капказы но йӧспӧртэм — 2 нылкышноослэн тусъёссы пуктэмын. Соосты но малпаз, суредаз Анатолий Попов. Вандылӥз гинэ пиез, егит кибашлы Алексей Попов.

— Капка вылын пуктэмын Вало но Ува шур дуръёсын улӥсь нылкышноос, та шуръёс Вавож ёросэтӥ бызё, — вера А. Попов. Кыкез ик нылкышноос улонысь басьтэмын: одӥгез — лякыт сямо, гань-гань, мукетыз — кужмо, кивалтыны яратӥсь.

Нош пуэн вырыны Анатолий Аркадьевич 1990-тӥ секыт аръёсы кутскиз, быгатэмез ик семьязэ сюдыны юрттылӥз. Кибашлы укно янакъёс чибориё вандылыны ӧдъяз, Партчиын, Вавожын сяна, Татарстанын но вань солэн ужъёсыныз уно коркаос.

— Пу монэ ачиз бордаз кыске, — вераз Анатолий Аркадьевич. — Огвакытэ палэнэ улыны кошкылӥ вал, но отын асьме дорын кадь кызъёссы, пужымъёссы ӧвӧл. Соин ик отын кема улыны ӧй чида, туж мӧзми асьме тэльёсмылэн зынзылэсь.

Шуо, быгатӥсь адями котьма ласянь адӟем карымон. Со Анатолий Аркадьевич сярысь кадь верамын. Воргорон кылбуръёс но гожъяны пӧрмытэ вылэм. Вордӥськем Яр ёросысь Бадӟымгуртын. Школаын дышетскыкуз, «Дась лу!» газетэн эшъяськылэм, умой кусып возьылэм Владимир Романов кылбурчиен. Нош кылбурет дуннеез валаны сое дышетэм Ярысь «Сельская правда» газетын ас вакытаз ужам кылбурчи, филолог Георгий Архипов. Туннэ нуналлы Анатолий Аркадьевичлэн уно ужъёсыз люкаськемын ни, чуръёсаз со ӟуч но удмурт кылын улон, яратон сярысь малпанъёссэ, мылкыдъёссэ кисьтэ.

Ангелина СНИГИРЁВА

Удмурт Дунне
By Удмурт Дунне Август 23, 2018 09:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<