Выпускноез тодэ вайыса

Удмурт Дунне
By Удмурт Дунне Июль 4, 2018 14:20

Выпускной азьын шаерысьтымы тодмо егитъёс школазэс йылпумъян вакытэ мылкыдъёссэс тодазы вайизы.

Алина Антонова, кырӟась:

— Выпускноелы мон дасяськи эшеным ӵош. Ми соин куартолэзьысен бызьылыны потаны кутским мугормес веськресгес карон понна. Милям со туж умой пӧрмиз. Дэрем мон 3 толэзьлы азьлогес ик басьтӥ ни вал. Син азям пуктылӥ, кыӵе мынам луоз чебер дӥсе: корсет но пачка. Со дыре ӧй ик сюлмаськы, мугорыя луоз-а со, уз-а. Малпанъёсысьтым дэремелы синмаськи.  Нош али сыӵезэ нокызьы но ӧй басьтысал. Со интые кузь чебер дэрем дӥсясал.

Богдан Анфиногенов, кырӟась:

— Мон выпускнойлы кема ик ӧй дасяськы. Туж умой тодӥсько на: «Солнышко лесное» кырӟанэз кырӟай, нош собере С. Есенинлэсь «А теперь решено без возврата…» кылбурзэ лыдӟи. Ваньмыз вал капчи, мылысь-кыдысь. Дӥськут ласянь ке, бырйиськыса ӧй улы: агаелэн костюменыз мынӥ. Со ӧжытак бадӟымгес вал, дыр, но, оглом вераса, мыным али ке но кельше.

Алексей Бегешев, журналист, блогер:

— 10-тӥ-11-тӥ классъёс туж секытэн сётӥськизы — ЕГЭ, репетиторъёс, вузэз быръён, факультативъёс. Йырам малпанъёс бергазы — ку йылпумъяло ни та школаез! Одӥгез гинэ шумпоттӥз — физикаен но химиен экзаменъёс ӧвӧл шуыса, угось классэ вал гуманитарной. Номырин ӵошатыны уг луы аттестатэз киям басьтэмме. Чаляк тырши школаысь кошкыны. Мон тодӥсько но оскисько вал, монэ возьмало выль улон, выль эшъёс, эрик! Жаляса верано, 9 ар ортчиз ини со дырысен, но ми али ке но классэнымы ӧм на пумиськылэ, выпускноймес туж усто ортчытӥмы вал ке но.

Марина Пахомова, кылбурчи:

— 5 ар тырмиз ини школаез йылпумъямелы. 2013-тӥ арысь тулыс улонам одӥгез тужгес шудоез. Выпускнойлы дасяськон тодам лыктэ италмас сяськаосын, льӧмпу зынэн но ӵош дышетскись эшъёсыным лабыртонъёсын. Нылъёслэн валтӥсь сюлмаськон — дэрем. Ненег буёло дэрем быръеме потэ вал. Соку, 5 ар талэсь азьло, тужгес но мылкыдыя вал югыт-вож, ӵужалэс-льӧль но куренялэс, йӧллы матын, буёлъёс. Классамы 3 пиос гинэ вал, кыӵе акыльтӥз, дыр, соослы, милям, 9 нылъёслэн, «туфли-дэрем-чыртывесь» вераськонъёсмы. Вож дэремме туж яратыса дӥсяй, Ижкаре медаль басьтыны но соин ик ветлӥ. Али кузь юбкаос мылкыдыя, соин выпускной дырысь дэреме шкафе пыдло ватэмын. Школаез йылпумъякумы, солэн сад-бакчаяз облепихаос мерттӥмы. Малпасько, соос ческыт емышенызы шумпотто ни.

Анна Бурдина

Удмурт Дунне
By Удмурт Дунне Июль 4, 2018 14:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<