Валъёс ворттылыны кулэ

Удмурт Дунне
By Удмурт Дунне 31 июля, 2018 16:07

Ува ёросысь Булай гуртысь «Дружба» хозяйствоын 30 арлэсь кемагес валъёс вордо ни. Та нуналлы пудозы 120 йыр пала лыдъяське.

Азьвыл колхоз ужъёс — гырон-кизён, усыян, пудо сиён дасян, пу, ю-нянь ворттон, кыед поттон — ваньмыз валъёс вылын вал. Туннэ таосты лэсьтэ ни трактор. Соин ик мар пайдаез 21-тӥ даурын сомында валъёс вордонлэн? Та юанлы валэктон сётӥз эштосысь вал вордонъя зоотехник Людмила Семёнова.

— Ми огшоры валъёс ум вордӥське, — вераз со. — Гидъёсамы ог 40 йыр орловской рысакъёс, ог 75 йыр ӟуч тяжеловозъёс. Ӟеч выжы пудо уськытон сярысь сюлмаськиськом. Удмуртиын гинэ ӧвӧл, палэнын но милемыз тодо ни. Тужгес мыло-кыдо басьяло тяжеловозъёсмес. Троссэ келяськом Татарстанэ, Самарае. Кыдёкысь Амур улосысь жингыртӥсьёс луыло. Верало, отысь валъёс Китае кошко шуыса. Отын, пе, валъёсты туж гажало. Шумпотӥськом, туэ 30-лэсь уногес чуньыосмы вордӥськизы. Соос 6 толэзь ӵоже мумыоссы вӧзын уло, собере висъяськомы.

Хозяйствоын 3 вал гидзы. Котькудаз быдэн 40 вал. Соосты утялтыны капчи ӧвӧл. Котькудӥзлэн аслаз сямыз. Одӥгез куртчылӥське, мукетыз ӵыжыны но быгатоз. Но та пудо туж визьмо, сое валан понна психолог луоно, пусъе Л. Семёнова. Ваньмыз соосын огкыл шедьтыны уг быгато, пе.

Л. Семёнова ушъя Вамья фермаысь Валерий Чернышев конюхез. Со 5 арзэ та удысын тырше ни. Сюлэмзэ сётыса ужа. Гидъёсаз котьку чылкыт, утялтэмын. Животъёсты умой-умой сюдытэк одӥг пол но кельтэмез ӧвӧл.

Но сюдэм, вордэм сяна, валъёсты дышетыны но трос дыр кулэ. Со понна Булайын нимаз тренерзы вань. Рысакъёсты кыре ӧд поттылы, нуналлы быдэ трос иськемъёс ӧд ортчыты ке, пайдаез уз луы. Спортсменъёслы сямен ик, соослы но ялан тренировкаос кулэ. Озьытэк пыдъёссы лябӟозы. Та ужен кема аръёс ӵоже выре ини Анатолий Кельдьяров. Со пыриськылэ Россиын ортчылӥсь ӵошатсконъёсы. Ӵемысь вуылэ Казане. Отын 3 кубок утылӥз ни. Вормыны сыӵе ӵошатсконъёсын капчи ӧвӧл.

— Гуртын валъёсты дасяны условиос ӧвӧл, — шуэ Людмила Ивановна. — Кытын ипподромъёссы вань, отын валъёсты дасяло нимысьтыз сюресъёс вылын, нош милемлы дасяськоно луэ бусыосын, лёго-гопо интыосын. Валъёсмы та муген пыдъёссэс ӵемысь вӧсь каро, чутыны кутско. Сыӵе азьын но ужаса, милям валъёсмы мукетъёсызлэсь уродгес уг адӟисько.

Алигес Булайысь хозяйствое вуылӥз Рязаньысь вал вордонъя институтысь валтӥсь специалист Анна Борисова. Со верамъя, татысь ферма ӟуч тяжеловоз выжыез азинтонъя Россиын 3 устоосыз вал вордӥсь хозяйствоос пӧлы пыре. Со ми понна туж вылӥ дунъет, шуиз Л. Семёнова.

Булайысь ужасьёс ӟеч выжы валъёссэс возьматыны вуыло Казане, Ижкаре. Кемалась ик ӧвӧл животъёссэс нуллӥзы Ульяновске, отын ортчиз орловской рысакъёслы сӥзем Россиысь фестиваль. Отын уката синмаськыса учкизы булайёслэн Сибиряк нимо валзы шоры. Но кема бызьыны уз чида шуисьёс но шедизы. Аспӧртэм ветлэ, пыдъёссэ мыдлань пуктэ, пе. Но Сибиряк фестиваль дыръя ортчись ӵошатсконын троссэ валъёсты азьпалтӥз, финише 3-тӥ вуиз. Бӧрысь сое вылтусызъя но экспертъёс вылӥ дунъязы.

Сергей Антонов

Туспуктэм: Людмила Семёнова

Удмурт Дунне
By Удмурт Дунне 31 июля, 2018 16:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<