Улонэтӥ ортчиз чагыр тылобурдо… Тӧр шорын Удмуртиысь калык художник Василий Морозов

Удмурт Дунне
By Удмурт Дунне Июль 17, 2018 15:51

В. Морозов

Василий Морозов — шаерысьтымы но Россиысь тодмо суредась, иконописец, Удмурт Элькунлэн Кун премиезлэн лауреатэз, Удмуртиысь калык художник. Искусствоосъя элькун школа-интернатын дышетыса, уно удмурт суредасьёсты будэтӥз. Та нуналъёсы Василий Николаевичлы 60 арес тырмиз.

«Василий, тон суредась луод!»
Адямилэн, пе, 99 процент талантэз потэ тыршемез бордысь. Ӵапак тазьы шуыны луоз, дыр, Василий Морозов суредась сярысь. Со 30 ар ӵоже ни, отпускез тодытэк, ужа, арессэ пичи но уг шӧды, угось туж трос малпанъёсыз, лэсьтоно ужъёсыз.

Василий Морозов вордӥсь-киз Дэри ёросысь Выль Казьмас гуртын. Пичи дырысеныз туж яратӥз суредаськыны. Школаязы ортчылӥллям суредаськонъя конкурсъёс. Пичи Васи котькудаз пыриськылэм. Тужгес кужмо «конкурентэзлэсь», 3-4 ареслы бадӟымгес пияшлэсь, адӟем карыны тыршылэм, 5-тӥ классын дышетскыкуз, сое азьпалтэм ни.

Суредаськыны быгатэмзэ адӟыса, библиотекарьзы Татьяна Ивановна Семёнова пияшез стендъёс лэсьяны курылӥз. Морозов библиотекаын ӵемысь берозь пукылӥз, книга лыдӟыса ӧвӧл — суредаськыса. Зэм, азьланяз суредась луон сярысь ӧз но малпалля, ма, школаязы суредаськонъя дышетӥсьсы но ӧй вал ук. Но ваньзэ витёнтэм вылысь воштӥз одӥг пичи учыр.
— Милям школаямы огдырлы ужаны лыктӥз ӟуч кылъя но литературая дышетӥсь.

Туж интеллигентной нылкышно, чебер, йырсиез ӝутыса лачмытак причёска лэсьтэмын, — тодаз вае Василий Николаевич. — Огпол школаысь бертӥсько, пичи выж дорозь вуи но сылӥсько, маке малпаськыса. Бӧрсям та дышетӥсь мынэ вылэм, выж вамен потыны мед быгатоз шуыса, мон палэнски.

Нош со выжез ортчиз но берытскыса шорам учкиз, ӝот-ӝот вазиз: «Василий, тон суредась луод!» Всё, та кылъёс сюлмысьтым ӧз ни потэ. Отын, одӥг дуннеысь мукет дуннее выжон выж вылын выллем, йырам югак луиз. Гуртын нокин мыным со кылъёсты ӧй верасал ук! Анай-атай, песятай визьмасалзы: тракторист, шофёр, комбайнёр луоно… Но суредась… Со шӧдтэк шорысь верам кылъёс быдэс улонэлы пуктэм ужпумлы пӧрмизы.

Василий Морозов нырысь ик пыре Ижысь ӝытъёсы ужась художественной школае. Татын солэсь трослы — куд-огез ог 10 ареслы но — бадӟымгес нылъёс-пиос дышетскизы ни. Гурт пияшез городъёс серем карылӥзы, ӟуч кылын но, пе, чебер вераськемед уг луы ай. Но удмурт пияшлэн юн сямыз шӧдӥськиз ни. 2 ар ӵоже ялан ас бордаз ужаз но эшъёссэ азьпалтӥз, конкурс пыр потыса, быдэс дуннелы тодмо Палех художественной училищее дышетскыны пыриз.

Эшшо тросгес, эшшо ӟечгес!
— Кызьы монэ, огшоры удмурт пияшез, Инмар сокеме, Иваново областьысь Палех посёлоке, вуттӥз, али но паймисько, — шуэ Василий Морозов.
Но ваньмыз та огшоры ӧй вал, дыр. Угось пичи дыръяз ай кыӵе ке книгаысь адӟиз СССР-ысь калык суредасьлэсь, палех амалъя ужась Анна Котухиналэсь ужзэ — сьӧд буёл вылын лэсьтэм яркыт суред. Зэм, со суредлэсь авторзэ но марзэ но соку ӧз тоды, но сокем синмаськиз — суредлэсь копизэ лэсьтоно кариськиз.

 

Кӧня курадӟиз! Угось палех амалъя суредасьёс нырысь сьӧд буёлэн инъетсэ лэсьто, собере со вылэ суредало. Нош Морозов нырысь суредаз, собере огъя фонзэ сьӧдманы выриз. Со пичи дыр суредзэ дано художник али но утьыса возе. Бӧрысь ини, пӧртэм интыосын дышетскыса, со валаз суредаськон ӧръёслэсь аспӧртэмлыкъёссэс, ужан амалъёссэс, та сярысь трос книгаос лыдӟиз.

— Мынам котьку туж ӟеч дышетӥсьёсы вал, — шуэ суредась. — Тыршись адямиез адӟыса, соос ватсаса тодон-валан сётылӥзы, улыны дышетӥзы.
Палех школаын но суредаськонъя конкурсъёс вал. Нырысь ӝыны арзэ Удмуртиысь пияш 2-тӥ интыос гинэ басьяз, нош собере нокинлы ӧз ни сётскы, нырысетӥ инты котьку солэн вал.
Ӟечлык ласянь гинэ ӧвӧл, лыдзыя но Морозовлэн ужъёсыз висъяськизы. Гужем лэсьтэм ужъёсыныз ӝыны борддорез тырмытъяз, эшъёсызлы асьсэ ужъёссэс ошылыны инты ик ӧз тырмылы.

Тросэз паймылӥзы: кытысь сомында мылкыдыз, тыршонэз? Ачиз Василий Николаевич пусъе:
— Ваньмыз туж огшоры — мынам туж но туж дышетскеме потэ вал! Котькуд ӵукна мон ваньмызлэсь азьло бурдъёс вылын кадь дышетскыны дыртылӥ. Мон сыӵе ӟырдыт ӝуась сюлэмын дышетски: дыртоно, тросгес, эшшо тросгес лэсьтоно, ӟечгес, эшшо ӟечгес пӧрмытоно! Ваньзэ, мар мыным сёто — пушкам-сюлмам пыӵатоно.

Таӵе мылкыдын ик егит суредась дышетскиз Казаньысь художественной училищеын. Нош собере, 1982-тӥ арын, бертӥз Удмуртие, ужаны кутскиз Ижысь искусствоосъя 9 номеро школаын, собере — республикаысь усточи нылпиослэн школа-интернатазы.

Удмурт егитъёслэн «Шундыкар» лагерьзы кылдэм дырысен Василий Морозов отын но ужаз на, быдэс элькунысь тужгес быгатӥсь удмурт нылпиослы творчествое сюрес усьтыны тыршиз.

— Та лагерез кылдытон азяз Светлана Смирнова (соку кивалтӥз Егитъёсын ужанъя комитетэн) ӧз но малпа, вылды, макем бадӟым но азинлыко ужез мытэ. «Шундыкар» сомында удмурт интеллигенциез будэтӥз! Ми но, специалистъёс, отын дышим ужаны, будӥм, бурдъяським.
Дышетӥсь луон — со бадӟым кыл кутон. Тон выль адямиез будэтӥськод ук.

Тани суред лэсьтӥськод, маид ке ӧз пӧрмы, ӧз яра, тон сое ӵушылӥськод но выльзэ лэсьтӥськод. Нош пиналэн озьы ужаны уг луы. Пиналэз, тужгес но быгатӥсь, таланто пиналэз, шонертэм дышетӥд ке, кызьы собере сое воштод? Адямиез, юнмаса вуттымтэ пиналлэсь лулдуннезэ тӥяно луоз ук. Солэн та дуннелы, ӵуказе нуналлы осконэз быроз, художник сямен со та дуннеын ышоз-быроз, — вера нимо-дано суредась.

«Шундыкарын» ужакуз, Василий Николаевич быгатӥсь пиналъёсты нимысьтыз син азяз возиз, соосты усточи нылпиослэн школа-интернатазы дышетскыны ӧтьылӥз. Нош татысь нылпиослы Санкт-Петербургысь, Москваысь академиосы пырыны юрттылӥз, куд-огез азьын Палехысь школае сюрес усьтӥськылӥз.

Кытысь ай пыдлось пичи гуртысь пиналлы Россилэн шоркарысьтыз художественной школаосы шедён! Зэм, ачиз Василий Николаевич куддыръя ӝожоме: шоркаръёсысь вузъёсты йылпумъям нылпиос Удмуртие уг ни берытско. Асьсэ ужъёсынызы, быгатонъёсынызы соос шумпотто ни отын улӥсьёсты, данэ потто огъя Россиез.

Суредэз азьын

Мудор лэсьтон — мур малпаськон
— Мынам атае арганэн туж ӟеч шудэ, — пусъе Василий Морозов. — Кытысь ке кыӵе ке гурез кылоз но соку ик сое арганэныз бичалоз. Мон но 7-тӥ классысен арганэн шудӥсько. Но гуръёсты йырам возьыны уг быгатӥськы. Со понна йырам кылё пӧртэм вакытэ адӟем интыос, буёлъёс.

Тани, шуом, 10 ар талэсь азьвыл Кам дурын лэсьтэм этюдме кытысь ке поттӥ ке, соку ик тодам ваё сое лэсьтон нуналме, со дырысь инкуазез, кытӥ, кыӵе сюрестӥ мынэмме, кыӵе вал соку шунды, кытчы усизы вужеръёс — со нунал-вакыт, со дыр-инты быдэсак азям пуксёзы но мон соосты возьматыны быгато.

Тани В. Ар-Сергилэсь «Душеспи» книгазэ мон, тодэ ваёнъёсы вылэ пыкиськыса, суредай. Ачим Казьмас гуртэ вадьсытӥ, тылобурдо кариськыса, лобай кадь: тани тазьы со вакытэ сылӥзы коркаос, тани тазьы утизы тютюосты… Со гинэ ӧвӧл, мон тырши суредъёсам мылкыд пыӵатыны, нуналлэсь пӧртэм дырзэ возьматыны: тани татын — ӵукна, татын — нуназе…

Жаль, та книга уродос пурысь бумагаен потӥз, соин ик суредъёслэсь вань мурдалазэс адӟыны уг луы. Ӝож, туала вакытэ нылпиослы суредасьёс сюлэмзэс поныса уг ужало, покчиослы журналъёсын суредъёс но кылбур-веранъёс нимаз улонэн уло. Суредась, произведенилэсь пуштроссэ умой-умой валатэк, огвыллемесь ужъёс штамповать каре но тӥни.

Василий Морозов туж шунытэн тодаз вае нылпиослы чаклам удмурт книгаослы суредъёс лэсьтэмзэ, «Анай кыл» учебник бордын тыршемзэ. Таиз бордын ужамез Удмуртилэн Кун премиеныз но пусъемын. Но берло дыре Василий Морозов тужгес тодмо луэ мудор суредаменыз.
Огпол Удмуртиын одӥгаз черкын мудоръёс суредано вал — Василий Морозовлы вазиськизы, Палех школаын дышетскемзэ тодо вал угось.

Бадӟым ужез быдэстон понна В. Морозов ӧтиз Палехын ӵош дышетскем эшъёссэ. Та ужез бригада ӟеч быдэстӥз. Но Василий Николаевич малпаськонэ усиз: малы палэнысь суредасьёсты утчанэз, асьме дорын но сыӵе школа усьтыны луысал ук. Озьы, суредасьлэн сюлмаськеменыз, Удмуртиын кылдӥз иконописья «Ставрос» школа.

10 ар ӵоже та школа 12 храмъёсты суредаз ни, 8 иконостас лэсьтӥз: Ижысь Алексий Святительлэн храмез, Никольской храм (таяз удмурт службаос но ортчо), Свято-Троицкой собор, Якшур-Бӧдьяысь храм, Можга ёросысь Бадӟым Уча гуртысь черк но трос мукет. Удмуртиысь гинэ ӧвӧл, Переславль-Залесский вашкала ӟуч городысь но. Туннэ нуналлы «Ставрос» школазэ йылпумъяз ни 24 адями, 4-6 ар дышетскыса, соос басьтӥзы черклэсь нимысьтыз дипломзэ но иконаос суреданы черклэсь бакельзэ.

 

 

— Мудор суредан — со туж мур уж. Тон ялан со сярысь малпаськиськод, соин улӥськод. Та уж ноку уз гольты (акыльты), — пусъе Василий Морозов. — Али тани Брангуртысь черкез кызьы чеберъян сярысь малпанъёсын улӥсько, иконостассэ лэсьтӥм ини.

Ваньзы одӥг ӧрын
Суредась дуннеез мукет сямен адӟе. Огшоры адямиен ӵошатыса, мургес, яркытгес. Василий Морозовлэн со уж вылын гинэ уг шӧдӥськы, дораз но, семья кусыпъёсаз но. Аслыз корка со 17 ар ӵоже пуктӥз! Ижысь Восточной посёлокын солэн ӟуч модерн амалъя пуктэм бадӟым юртэз — зэмос искусство!
— Та коркае мон вань мылкыдме понӥ, — шуэ суредась, — отын котькуд висъетэз, котькуд борддорез, корез, кирпичез нырысь ик бумага вылэ суредамын, лыдъямын-чакламын вал. Со суредъёс 2 бадӟым папка тыр кылемын. Юрттылӥзы нылпиосмы но.
Василий Морозовлэн 3 пиез. Ваньзы нимаз уло ни, улонзы дизайнэн, архитектураен герӟаськемын. Бадӟымез, Роман, ачиз но выжыкылын кадь йыг-йыг корка пуктӥз. Шоро-куспоез — Михаил — дизайнер, ужа оценочной компаниын, кельше, пе. Тодон-валанзэ будэтон понна ялан Казане, мукет каръёсы вуылэ. Нош покчиез — Сергей — промышленной дизайнэн выре, пулэсь конструкциосыз республикаямы но Россиысь конкурсъёсын вормисе потылэмын.

Яратонзы — быдэс улонлы

— Та дунне вылын мон котьку нырысь интые пуктылӥ семьяме, — шуэ суредась. — Инмарлы тау шуисько Наташа кузпалы понна. Соин мон пумиськи, 9-тӥ школаын ужакум. Наташа практикае лыктӥз, усьтэм урок возьматэ. Нош ми, специалистъёс, бер партаосын пукиськом, дунъяськом. Наташалэн урокез искусстволэн историезлы сӥземын вал. Со классэз ӝомо-югдо кариз, сюсьтылъёс ӝуатӥз но искусство сярысь сыӵе гань-гань но тунсыко мадьыны кутскиз.

Мон шуак малпай: кыӵе та нылашлэсь ӟеч кышно пӧрмысал, кыӵе ӟеч анай со луысал мынам нылпиосылы… Тӥни озьы мон вуоно кузпалылы нылашлы сямен синмаськыны, сое яратыны но ӧй на кутскы, но малпай ини вуоно нылпиосмы сярысь. Мынам ӵемысь луылэ озьы: азьпалзэ шӧдыны быгатӥсько. Али малпасько, Инмар, дыр, милемды герӟаз. Бӧрысь матэгес тодматским, ог-огмес яратӥм ини.

Но сюанмы ортчем бере но куддыръя уйин пушкы тырыса сайкалляме вань: мынам кузпалы, семьяе ӧвӧл кадь. Вӧзысьтым Наташаме чакласько, иське, та уйвӧт ӧвӧл, ваньмыз — зэмос улон. Сыӵе асме шудоен шӧдылӥ! Кузпалы — ӟуч, Ижын будэмын. Анай-атае ӟучсэ вайыны туж пумит вал, но мылкыдзы пумен воштӥськиз. Наташа быземезлэсь азьвыл ик, кыллюкам шедьтыса, удмурт кылэз дышетыны выриз, туж сюлмаськиз, пересь бабушеным ог-огзэс уз валалэ шуыса.

Морозов кузпалъёс ялан ӵош. Кыкназы но школа-интернатын ужало, Наталья Михайловна пичиоссэ нылпиосты дышетэ, Василий Николаевич — бадӟымъёссэ.
Наталья Морозова — республикаямы нылпиослы ватсаса тодон-валан сётонъя эксперт, Россиысь культура удысысь дано ужась, зол дышетӥсь.

«Мон, дыр, укыр удмурт»
Палэнысен учкыса, Василий Морозовлэн ваньмыз огсыр но туж ӟеч радъяське. Та гань-гань, капчи мылкыдо воргорон вӧзын ачид но вань сюлмаськонъёстэ вунэтӥськод. Но вань, дыр, ук солэн но быдэсмымтэ осконъёсыз, сюлэмшугъяськонъёсыз.

— Соос сярысь уг малпаськиськы, угось нуналмысь лэсьтоно ужъёсы, малпанъёсы трос, — шуэ суредась. Озьы ке но огшап шып улэмез бӧрсьы усьтӥське ик.
1990-тӥ аръёсы Москваысь епархия пыр солы ӧтён вуэ: Лос-Анджелесысь (Америка) храмез суреданы художникъёс кулэ. Палехын ӵош дышетскем эшез В. Морозовлы вазиськем: ойдо ветлом, ми тодӥськом, кызьы тон ужаськод, гожтӥськы контракт улэ.

Егит суредась ыштӥськиз, угось контракт 2 арлы чакламын. Наташаез со вакытэ нырысетӥ пиналзэс возьма вал, улӥзы пичигес гинэ коркан Восточной посёлокын. Кызьы сое огназэ кельтод? Но контрактъя туж ӟеч уждун сӥзё (нуналаз 60 доллар!).

— Лос-Анджелесэ ӧтемзы пумысен кышноелы верай, со бӧрдыны кутскиз, — тодаз вае Морозов. — Наташае жаль потӥз, кызьы со пичи пиналын монтэк улоз?
Озьы удмурт суредась контракт улэ ӧз гожтӥськы, эшеныз ӵош Америкае ӧз кошкы.
Ортчиз кӧня ке ар. Наташаеныз соос 2-тӥ пиналзэс витё ни вал. Таяз учыре Удмурт епархиысь ӧтён вуэ: доразы Грециысь вазиськиллям, отысь храмез суреданы бригада, пе, кулэ. Ойдо, пе, дасяськы Грецие мыныны. Морозов нош ик семьяез вӧзы кылёно кариське, кызьы кузпалыз 2 пичи пиналъёсын берытскоз?

Ортчизы эшшо аръёс. Морозовлэн кема дыр ӵоже пуктыны вырем коркаез йылаз-пумаз вуэ ни, тани-тани быдэс семья отчы улыны выжоз. Шӧдтэк шорысь Москваысь жингырто. Ми, пе, тӥледыз ӧтиськом Москва дорысь «Софрино» предприятие валтӥсь суредась луыса ужаны.

«Софрино» — Москваысь Патриархатлэн черк арбериос лэсьтонъя тужгес бадӟым предприятиез. Отын 2 сюрслэсь трос адями ужа. Нырысь вакытаз, пе, служебной квартира сётом, нош собере — музъем. Отчы йыг-йыг чебер корка пуктоды, уждунъёс татын бадӟымесь, ӝутскыны луонлыкъёс трос.

Ма кароно? Малпаськыны 3-4 нунал дыр сётӥзы. Та дыр ӵоже Морозовлэн йырыз пилиське ни вал. Кошконо ке, нылпиосызлы школазэс воштоно луоз, сомында кужымзэс сётыса пуктэм корказы но макем жаль… Тазэ но ӧтёнэз Морозов палэнтӥз.

— Ӧйтӧд, малы мынам улонам со 3 ӧтёнъёс вал, — малпаське али суредась. — оло со чагыр тылобурдолэн тылыосыз вал, оло шайтанлэн монэ эскеремез, искушение шуон. Со учыръёс туж юн воштысалзы, дыр, улонме, мон пыраклы кошкысал мурт дуннее, бергасал воксё мукет калык пӧлын.

Но мон, дыр, укыр удмурт, отчы-татчы кыстаськыны уг яратӥськы.Мон яратӥсько аслэсьтым гуртме, городме, шаерме. Мон яратӥсько аслэсьтым коркаме, семьяме, кышноме, нылпиосме. Соослы луыса мон бурдо, мон шудо. Табере вань ини нунокъёсы но.

Зэм, бадӟым юртам арня вискын буш луэ. Но котькуд шутэтскон нуналъёсы пиналъёсы асьсэ семьяосынызы вуо, мунчое пырыны, бадӟым ӝӧк сьӧрын пукыны — туж шулдыр луэ. Мон бордам ӝиптӥсько пичи нунокъёсме, соос сыӵе мусоесь. Ки вылам зарни комокез лэйкатыкум, кузпалылэсь юасько:

— Нош малы мон воксё уг ни тодӥськы аслэсьтым пиосме тазьы веттамме, соослэсь пичи дырзэс?
Наташае пальпотэ: тон, пе, ялан ужад ук, ялан суредаськид но суредаськид…

Елена Миннигарева

Удмурт Дунне
By Удмурт Дунне Июль 17, 2018 15:51
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<