Улон даур кузёме

Удмурт Дунне
By Удмурт Дунне Июль 10, 2018 10:36
udmurt.ru

Пенсие потон арлыд сярысь законлэн проектэзъя кенешизы Правительстволэн Тӧроез Ярослав Семёнов но Профсоюзъёслэн федерациенызы кивалтӥсь Сергей Шерстобит.

Россиысь Правительство пенсиосты тыронъя федерал законэ воштонъёс пыртон пумысен проектсэ Кун Думае ыстӥз. Депутатъёс сое кутӥзы ке, 2019-тӥ арын 1-тӥ январьысен пенсие потон арлыд йылоз.

Выль законопроектъя воргоронъёс пенсие потозы 65 аресазы, нош нылкышноос — 63 аресазы. Ваньмыз со шуак уз луы — пенсие потон дырез арен-арен кузёмытозы. Нырысь ик со пыр ортчозы 1959-тӥ арын вордӥськем пиосмуртъёс но 1964-тӥ арын вордӥськем нылкышноос. Соос угось вуоно арын пенсие потыны дасясько. Но закон кутӥзы ке, таос эшшо одӥг ар ужано луозы на.
Пенсиосъя фонд ивортэмъя, Европаысь но СНГ-ысь кунъёс пӧлын Россия пенсиосъя реформа борды бер басьтӥськиз. Мукет кунъёсын угось 1980-тӥ аръёсы ик пенсие потон арлыдэз йылтӥзы ни.

Кылсярысь, Молдавиын, Азербайджанын воргоронъёс 65 аресын пенсие пото, нылкышноос — 63 аресын. Кунамы пенсие потон вакыт 60 ар ӧз вошъяськы ни. Россиын туннэ 1 пенсионерез 1,8 мурт сюдэ. 1970-тӥ аръёсы та лыдпус 3,7 возиськиз. Озьыен, страховой взносъёс кулэсмо, со йӧнала пенсия тырыны уг сёты. Та ужпумез сэрттон-пертчон борды басьтӥськытэк, югдур уката секытомыны быгатоз. Пенсие потон арлыдэз ӝутон пенсиез йылтыны луонлык кылдытоз.
Росстат ивортэмъя, 2000-тӥ арын пиосмуртъёслэн шоро-куспо улон даурзы 59 арес вал ке, миым со 67,5 арозь йылӥз, нылкышноослэн 72,26-сен 77,64-озь будӥз. 2024-тӥ арын воргоронъёс 72,3 аресозь улыны кулэ шуыса чакламын, нылкышноос — 82,1 аресозь.

Удмуртстат ивортэмъя, 2016-тӥ арын шоро-куспо улон арлыд 70,8 арес вал, миым со 72,1 арес луиз. Миым ар кутсконын шаерамы пусъемын 1 миллион 516,8 адями. Таос пӧлысь ужаны быгатӥсь адямиослэн лыдзы — 840,9. 2015-тӥ арын та лыдпус 872,1 вал.

Туала пенсионеръёсты реформа уз йӧтылы. Пайда гинэ ваёз — арлы быдэ пенсизэс 1 сюрс манетлы йылтыны чакламын. Талы шумпотозы 46,5 миллион арлыдоос. Али кадь вазь пенсие потыны быгатозы секыт ужын тыршисьёс — шахтёръёс, корт ӵыжатӥсьёс, чугун сюрес вылын тыршисьёс. Льготаоссэс уз ыштэ 5 но солэсь трос нылпи ваем нылкышноос, 1-тӥ группаысь инвалидъёс, военнойёс, бадӟым стажен адямиос.

Росстат ивортэмъя, вань пенсионеръёс пӧлысь 26,4 процентэз али ке но ужало. Удмуртиысь калыкез улон-вылонын утён политикая но ужъя министр Татьяна Чуракова пусъемъя, миым шаерысьтымы уже интыянъя центръёсы 1 сюрс 6 пенсионер вазиськиз. Таос пӧлысь 392-ез — 55-59 арессэс тырмытэмъёс. 60-69 аресъемъёс 598 кузя лыдъяськизы. 70 арессэс ортчемъёс 16 кузя пусъемын. Вань вазиськемъёс пӧлысь 199-лы уж шедьтэмын. Ӵемгес интыясько утялскисе, стороже, эмсузэре, администраторе, кладовщике. 53 муртлы выль тодон-валан сётэмын.

29-тӥ июне пенсие потон арлыдэз будэтон сярысь законлэн проектэзъя кенешизы Удмуртиысь Правительстволэн Тӧроез Ярослав Семёнов но шаерысьтымы Профсоюзъёслэн федерациенызы кивалтӥсь Сергей Шерстобит. Россиысь Правительство пенсие потон пумысен законопроектсэ Кун Думае келяз ни бере, улосъёсын со пумысен кенешонъёс мыно.

— Асьме азьын ужпум — Кун Кенешысь депутатъёсын дэмен законопроект пумысен огъя малпанэ вуоно, — журналистъёслы шуиз Ярослав Семёнов. — Профсоюзъёслэн федерацизытэк та ужез лэсьтыны уз луы, угось со шаерысьтымы 150 сюрс адямиосты огазея.

Та ужез эскерон понна улосамы кылдытэмын нимысьтыз комиссия. Профсоюзъёсын кивалтӥсьёс пумиськылӥзы ни Удмуртилэсь Кун Думае быръем депутатъёсын. Чакламын котырес ӝӧк сьӧрын кенешонъёс ортчытъяны. Отын уж сётӥсьёслэсь но, ужасьёслэсь но мылкыдъёссэс санэ басьтозы. Правительство, профсоюзъёс но уж сётӥсьёс куспын кылдытэм комиссия люкаськыны кулэ июль шорын, пусйиз Ярослав Семёнов.

Алёна Александрова

Туспуктэм: udmurt.ru

Удмурт Дунне
By Удмурт Дунне Июль 10, 2018 10:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<