Пунэмъёс тыремын. «Ижсталь» Хоккей команда лыктӥсь сезонын вылӥ лигаын шудоз?

Элькун Правительстволэн Тӧроезлэн нырысетӥ воштӥсез пумиськылӥз «Ижсталь» командалэн «висисьёсыныз». Отын вераськон мынӥз асьме хоккей клублэн азьлань сюресэз сярысь.

Тодады вайытом, «Ижсталь» клублэн уждунъя, социальной тыриськонъёсъя но вытъёсъя трос пунэмъёсыз люкаськемын вал. Соин йырин ваньбурез вылэ арест ялылӥзы.

13-тӥ пӧсьтолэзе солэсь вань пунэмъёссэ элькун коньдэтысь уксёен берыктӥзы. Но вуоно сезонлы хоккеистъёс дасяськыны ӧз кутске ай, валтӥсь тренер юнматымтэ на. Али «Ижстальын» 8 шудӥсьёсыз лыдъясько, эшшо 8-сэ эскерыны ӧтемын.

Александр Свинин пусйиз, командалэн азинскон сюресэз — кивалтӥсьёсызлэн киын. Али команда элькун казан чотын улэ. Клублы коньдон бюджетысь гинэ висъяськыны кулэ ӧвӧл. Азьланяз клублы кулэ луись коньдонлэсь 50 процентсэ спонсоръёслэсь шедьтыны тыршозы.

Клублэн кузёез элькун луэ бере со ик, спонсоръёсты утчалоз, вераз вице-премьер. Вуоно арын йӧ аренаез выльдон борды басьтӥськозы. Озьы ик со осконзэ вераз, «Ижсталь» вуоно сезонын но ВХЛ-ын ик шудоз шуыса.

Сергей Захаров

Туспуктэм: udmurt.ru