Пенсиос тыронэз тупатон сярысь законлы проектэз Кун Дума умоен лыдъяз

Удмурт Дунне
By Удмурт Дунне Июль 19, 2018 17:23

duma.gov.ru

Кун дума 1-ти лыдӟонын эскериз пенсиос тырон радлыкез тупатон сярысь законлэсь проектсэ. Депутатъёс лыдъямъя, выль радлык арлы быдэ пенсиосты будэтыны луонлык сётоз. Озьы ик та чотын пенсиослы тырмыт уксё луоз, пе.

Выль законэз эскерон 3 час ӵоже кыстӥськиз. Со пумысен вераськизы Россиысь Ужъя но калыкез улон-вылонын утёнъя министр Максим Топилин, Кун Думаысь комитетъёслэн кивалтӥсьёссы. Асьсэлэсь юанъёссэс сётъязы 4 фракциосысь ик азьветлӥсьёс.

Максим Топилин вераз, выльдӥськон чотын кайтаысен ужасьтэм пенсионеръёслэн уксёзы арлы быдэ 12 сюрс манетлы йылоз шуыса. Пенсиос инфляцилэсь 2 поллы трослыгес будозы. Таӵеез ноку вылымтэ ай.

Ужъя, социальной политикая но ветеранъёслэн ужъёссыя комитетлэн кивалтӥсез Ярослав Нилов законопроект пумысен индылонъёссэ вераз. Кылсярысь, со 1-тӥ лыдӟонлы дасям документысь пенсиосты будэтон механизмзэ адӟымтэ. Озьы ик комитетлэн кивалтӥсез малпамъя, выль радлыке выжон ужъя рынок вылын шӧдиськоз. Егитъёслы но пенсие потыны вуэм арлыдоослы уже интыяськыны юрттонъя программа кулэ. Оглом та комитет проектэз умоен лыдъяз. Но тырмымтэосты 2-тӥ лыдӟонлы палэнтыны куриз.

Дмитрий Морозов вераз, Тазалыкез утёнъя комитет ӵектэм воштиськонъёсты кулэен лыдъяз шуыса. Кулэ ужрадъёс кутытэк, ужасьтэм калыкез возьыны ӝоген уксё уз тырмы ни, пе. Озьы ик Дмитрий Морозов арлыдоослэсь тазалыксэс утёнъя программа кутыны ӵектӥз.

Улосвыл политикая, Уйпалась но Дальний Востокысь улосвылъёслэн ужпумъёссыя комитетлэн тросэзгес ёзчиосыз куаразэс сётӥзы пенсиосъя выль закон кулэ шуыса. Солэн кивалтӥсез Николай Харитонов верамъя, правительство реформаез улосвылъёслэсь аспӧртэмлыкъёссэс чакласа ортчытыны кулэ.

Бюджетъя но вытъёсъя комитетлэн кивалтӥсез Андрей Макаров вераз, туннэ тужгес дуноез адямилэн улонэз луэ шуыса. Соин ик котькуд ужрад, кудӥз адямилэсь улонзэ 1 арлы ке но кузёмытэ ке, со номырин ӵошатонтэм дуно ни, пе. Адямилэсь гумырзэ кузёмытон кунлэн валтӥсь ужез луэ, шуиз Андрей Макаров.

Бюджетъя но вытъёсъя комитетлэн кивалтӥсезлэн воштӥсез Ирина Гусева юаз, кыӵе юрттэт сётӥськоз уже интыяськон ласянь пенсие потонзы вуымтэ арлыдоослы.

Максим Топилин верамъя али соослы ужан интыос кылдытонъя но выль профессиослы дышетскыны юрттонъя программа дасяське. Федерал бюджетысь улосвылъёслы та ужпумез тупатыны 5 миллиард манет висъяны чаклало.

Ужан интыос ваньмызлы тырмыны кулэ, пе. 90-тӥ аръёсы Россиын туж ӧжыт нылпиос вордскизы. Ӵапак соослэн али ужаны кутскон вакытсы вуэмын. Соин ик та ласянь югдур шуак воштӥськыны кулэ овӧл. Берло шугъяськонъёс медаз кылдэ шуыса, али озьы ик ужтэк кылемъёслы пособиос тырон радлыке но воштонъёс дасясько, ивортӥз Максим Топилин.

Кунэз но кат радлыкез утись ёзэсъёсын тыршисьёслэн «выслуга» понна пенсие потон вакытсы сярысь воштон пумысен законын номыр гожтымтэ.

Пенсиос сярысь законэ воштонъёс пыртон понна куаразэс сётиз «Огъя Россия» фракция. Кун Думаысь мукет депутат огазеяськонъёс соослы пумит луизы.

Кун думалэн Тӧроез Вячеслав Володин верамъя, табере законопроект улосвылъёсы келямын луоз, 2-тӥ лыдӟон дыръя отысь вуэм ӵектонъёсты лыдэ басьтон понна. Интыосысь вуэм дэмланъёсты чаклан понна ик документэз учкон дырез но кузёмытӥзы.

Сергей Захаров

Туспуктэм: duma.gov.ru

Удмурт Дунне
By Удмурт Дунне Июль 19, 2018 17:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<