Можга ёросысь Вуж Карамбай: Гурт узыр ческыт вуэн но гыбедэн

Удмурт Дунне
By Удмурт Дунне 4 июля, 2018 16:31

Можга ёросысь Вуж Карамбай палэнысен улэп кадь адӟиське — ог 12 корка сылэ. Зэм, ваньмыз сямен бушесь. Со дыре ик нуналысь нуналэ гуртлэн нимыз шаерамы вӧлме. «Петухово» хозяйство татысь поттэ минерал ву.

Арлыдоос ялан чаклало юрт бервылъёссэс.

Юртъёс бушамын

Вуж Карамбай 19-тӥ даурлэн кутсконаз кылдэм. Нырысетӥ улӥсьёс — Константиновъёслэн, Поярковъёслэн но Тихоновъёслэн семьяоссы — татчы, Тугошур дуре, бускель Пужмесь-Шудья но Вуж Бия гуртъёсысь лыктӥзы. Соослэсь адӟем карыса, артысь гуртъёсысь но адямиос кыстӥськизы. В. Старостинлэн «Книга Вятских родов» ужаз пусъемын: 1920-тӥ арын татын 189 адями лыдъяськиз. 1930-тӥ аръёсы Вуж Карамбайын 3 урам вал. Быдӟым тылож вакытэ гуртэ вуизы эвакуацие шедем адямиос. Озьы эшшо одӥг урам кылдӥз. Шур сьӧры интыяськеменыз, сое Заречной нимазы — отын ӟучъёс гинэ улӥзы. Нош тылож йылпумъяськем бере со урам чылкак чусомиз, гуртэ удмуртъёс гинэ кылизы. Куспазы тупаса улӥзы. Гуртын соку 40 пала корка ни вал. Йыг-йыгесь, чебересь. «Красное знамя» колхоззы но адӟем карымон вал. Сое эшшо юнматон вылысь «Пычасское» совхозэн огазеязы. Ӝужазы фермаос, музъем гыриськиз-кизиськиз. Карамбайёс ёросын котьку азьветлӥсьёс пӧлын возиськизы йӧл кысконъя, удысын данэ потэм адямиоссы но вал. Кылсярысь, Нина Белоусова «Знак Почёта» орденэн пусъемын, нош Семён Захаров но Валерий Гусев — Горд Знамя орденэн.

— Но 1970-тӥ аръёсы татысь гыбед шедьтӥзы, котыраз усьтӥзы сьӧд сюй поттонъя предприятие. Уждун йӧнала тыро шуыса, совхозысь уноез калык татчы интыяськиз. Мынам анае-тятяе но гыбед поттонэ кутскизы. Тятимы ужысь чёрт кадь сьӧд-сьӧд луыса бертэ вал — пиньёсыз гинэ тӧдьы чиляллязы. Солы мисьтӥськыны нуналлы быдэ мунчо эстылӥмы, — тодаз вае татын вордӥськем но будэм Зоя Андреева.

Гурт дорысь потто гыбед.

Зэм, гыбед поттон кема ӧз кыстӥськы — предприятие пумен пытсаськиз. Но совхозэ берытскисез трос ӧй вал. Совхозэз но отӥяз пичиесь эштосъёслы люкылыны ӧдъязы. Калык артысь гуртъёсы кыстӥськиз.

— Тятяен анаен Вуж Карамбайысь 1976-тӥ арын Гозек гуртэ кошкизы, — вера Зоя Андреева. — Монэ жаляса но, вылды. Мельниково гуртысь 8 классэз йылпумъяме бере Можга педучилищее пыри. Бертаны секыт луиз: сюрес алама, толалтэ воксё но пытсаське, автобус уг ветлы. 7 иськемез трос-а пыдын ветлод, шуизы. Озьы трасса дурегес пуксем гуртэз утчазы. Пумен юртмес кесяса пулы нуизы. Туннэ корка бервылмес кызьпуя гинэ на тодмасько.

Льӧмпуос ӧтё

З. Андреева калыкез арлы быдэ люкалля.

— 1983-тӥ арын тапала лыктыкум, Вуж Карамбайын ужасьёс гинэ 20-лэсь трос вал, — вера «Петухово» хозяйствоысь фермаен кивалтӥсь Людмила Поздеева. — Туннэ гурт шорын телефон сылэ. Кие трубкаез кут но жингырты кадь. Юбоосысь лампаос но быдэсэсь, электро лэзид ке, котыр югыт луоз кадь. Ма, гурт но палэнысен гурт кадь адӟиське. Но коркаос зор-кот улын сисьмемын — ӧйтӧд, кӧня чидалозы на.

Туннэ Вуж Карамбайын 3 юрт гинэ улыны ярамон. 2-сэ выльдӥз «Петухово» хозяйство, ужасьёслы улон инты кулэ шуыса. Гуртын 100 йыр пала кунянъёссэс гужемлы лагере интыяллязы. Эшшо 2-аз уло вал Комышев агай-вынъёс — пудо сюдӥсьёс но утялтӥсьёс. Но миым гужем агайёслэн юртъёссы сутӥськизы, огез Комышев воксё но бырыны шедиз. Та ик Евгений Комышевлэн артысь Атасгуртэ выжемез луиз.

— Гуртысь воксё кошки шуыны нокызьы уг луы, — лулӟе 52 аресъем Евгений Семёнович. — Юртъере ӝуам бере гидам улыса утчай. Курегъёсме, кроликъёсме но сюдоно вал. Но толалтэ гидын уд улы — кезьыт. Аслам сюлэмы али но Карамбайын. Юртме выльысь ӝутэме потэ.

Гуртоос гуртсэс уг вунэто. Гужемлы быдэ люкаськыло. Соосты огазеясьёс пӧлысь огез — Зоя Андреева. Куд-огез тулыс бакчаосаз мерттӥськыны вуылэ. Кедр мерттыса кельтӥсьёсыз но вань. Тужгес шулдыр татын тулыс. Котькуд юрт вӧзын угось вашкала дырысен будэ льӧмпу.

Уж возьма

Гуртэз выльысь улӟытӥсь шедёз на шуыса осконъёссэ вера Пычас гурт поселениен кивалтӥсь Анатолий Шихарев. Туннэ угось сюрес вань, колодча гудэмын. «Петухово» хозяйствоен кивалтӥсь Ильсур Фаизов 100 гектар пала бусыосты гыре-кизе. Со сяна, гыбед поттонэз выльысь улӟытӥз. Отын ужасьёс уноез — Вуж Карамбайысь потэм пиос. Ву поттонъя лицензия басьтӥз на, скважина пуктӥз. Можга ёросын вузэ яратыса юо ни.

Можга ёросын вузэ яратыса юо ни.

— Гурт быриз ке но, нимзэ кельтон понна вуэз «Карамбайский родник» шуимы, — шуэ Ильсур Фаизов. — Макем чебер кылӥське ук. Зэм, толалтэ сое поттыны секытгес. Но гужем ужмес паськытатом. Али 0,5, 1,5 но 5 литръем пластик посудаосын вузаськомы.

Предлэн Вуж Карамбае кунянъёслы лагерь но выльысь усьтэмез потэ. Татын улӥсь луысал ке, ферма ӝутысал, шуэ.

Елена Сараматова

Удмурт Дунне
By Удмурт Дунне 4 июля, 2018 16:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<