Кинлэн телевизорез кысоз

Удмурт Дунне
By Удмурт Дунне Июль 24, 2018 16:26

Туннэ Россиын трос вераськон мынэ паськыт вӧлмись цифровой телевидение сярысь. Мар со сыӵе? Ку вань телеканалъёслэн сигналъёссы вуозы выль амалэн гинэ? Возьматозы на-а соку вуж телевизоръёс? Та но мукет юанъёслы валэктон сётӥз Россиысь телерадиовещательной сетьлэн элькун ёзэтэзлэн кивалтӥсез Дмитрий Добродеев.

Россиысь 52 миллион нимаз коркаос пӧлысь 27 миллионэз гуртъёсын интыяськемын. Та лыдпусъя Китай гинэ азьпалтэ странамес. Гуртъёсын шугъяськытэк телевизор учкон понна цифровой эфирной телевидение воштонтэм луэ.

Удмуртиын туннэ 99 процентэз улӥсьёс, дун тырытэк, учкыны быгато 10 яке 20 телеканалъёслэсь передачаоссэс выли ӟечлыкен. Тросэз цифровой видеосуредлы дышизы ни. Вуж аналоговой сигналэн вуисьёсыныз сое уд ӵошаты.

Ваньмыз чебер, яркыт адске, суредэз уг «шуды», куараос умой кылӥсько. Сыӵе луонлык кылдӥз «Россиын телерадиовещаниез азинтонъя» федерал программалы луыса.

Выль амалэн сигналзэс вӧлмытӥсь телеканалъёсты кӧня ке мультиплекслы (группалы) люкизы. Нырысь ик цифровой амалэ ужанэ выжтӥзы 10 федерал каналъёсты. Кылсярысь, Первый канал, Россия-1, НТВ но мукетъёсыз. Соосты туннэ учкыны быгато ни, кызьы ке бадӟым городъёсын, озьы ик пичи гуртъёсын но.

Пусйыны кулэ, Россия-1 каналысь цифровой ӟечлыкен адӟыны луэ «Удмуртия» ГТРК-лэсь телеадӟытонъёссэ но. Кылсярысь, та каналын пото удмурт кылын «Иворъёс» программа, «Мон» но «Мылысь-кыдысь» передачаос. Цифровой сигналэн вӧлмытӥсько ни «Радио России» радиостанция пыр чузъяськись удмурт радиоверанъёс но.

2-аз ик мультиплексэ пырись яке ваньзэ 20 федерал каналъёсты али вылӥ ӟечлыкен учкыны луэ Ижын, Воткаын, Сарапулын, Глазовын, озьы ик соос вӧзысь гуртъёсын но черкогуртъёсын. Та ар пумозь сыӵе луонлыксы кылдоз быдэс элькунын улӥсьёслэн.

Эдуард Степанов

Телеканаллэн нимыз вӧзын «А» буква гожтэмын ке — озьыен учкиськоды аналоговой сигналэн вуись передача

Кызьы тодоно, кыӵе сигналъёсты кутыса, возьматэ телевизорды? Инвожо толэзьысен сое умой валаны луэ ни. Экран урдсады яке улады, телеканалъёслэн нимзы вӧзын, «А» буква гожтэмын ке — озьыен учкиськоды аналоговой ӟечлыкен передача. Озьыен, цифровой сигналэз кутон пумысен сюлмаськоно ни. Уго вуоно арысен вуж сямен сигалъёсты вӧлмытэмысь дугдытыны чаклало.

Телевизорды цифровой сигналъёсты уг куты ке, одно выльзэ басьтыны кулэ уз луы. Вуж телевизор борды кулэ луоз приставка. Соос туннэ туж пӧртэмесь вань. 200 манетысен кутскыса, 4 сюрс манетозь сыло. Ог-огзылэсь туж ик уг висъясько. Эшшо басьтоно луоз дециметровой шуиськись тулкымъёслы чаклам антенна. Сое пуктоно кыре, кылсярысь корка липет вылэ. Кыдёкысь гуртын ке улӥськоды, басьтоно усилителензэ. Макем кужмозэгес быръёно — валэктоз вуз карись. Со чаклалоз ,макем кыдёкын улӥськоды телебашнялэсь.

Дунтэк возьматӥськись цифровой телеканалъёсты шедьтыны ӧд ке пӧрмытэ, жингыртыны луоз Ижысь валэктонъёсын юрттонъя центре, телефонэз (3412) 56-10-56. Отын валэктонъёс сёто ужан нуналъёсы 8:00 часысен 17:00 часозь. Озьы ик юан сётыны луоз нимысьтыз висъям федерал номере жингыртыса — 8-800-220-20-02. Таиз «пӧсь линия» уен нуналэн ужа.

Сергей Захаров

Туспуктэм: Эдуард Степанов

Удмурт Дунне
By Удмурт Дунне Июль 24, 2018 16:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<