Гурт удыс уг яраты юрдэмез но кышкамез… Тӧр шорын Удмуртиысь Гурт удысъя министр Ольга Абрамова

Удмурт Дунне
By Удмурт Дунне Июль 20, 2018 10:08

О. Абрамова

Гурт удысъя министерствоез валтыны капчи ӧвӧл. Соин но, лэся, та ӧрын нылкышноосты шер пумиталод. Но Калининград, Тюмень улосъёс но Удмурт Республика висъясько: гуртоосты азьлане быгатыса нуо кышномуртъёс. Шаерамы туэысен гурт удысъя но сиён-юонъя министре юнматэмын Сарапул ёросысь Сигаево черкогуртын кыдам, ас вакытаз Сарапулысь «Удмуртия» но Дэри ёросысь «Бабинский» агрокомплексъёсын кивалтэм нылкышно, экономика наукаосъя кандидат Ольга Викторовна Абрамова. Солы 36 арес гинэ ай, но хозяйствоосын кивалтӥсьёс но ужасьёс синмасько быгатонлыкъёсызлы но визьмызлы.

— Ольга Викторовна, анай-атайды — дышетӥсьёс. Нош тӥ экономист луиды…
— Бабуше но дышетӥсь. Соос шоры учкыса, мынам но потылӥз покчи пиналъёсты дышетэме. Сарапул городысь педколледже пырыны малпасько вал. 9-тӥ классэз йылпумъяме бере анаелэн бордысьтыз кыдёке лэземез ӧз поты, жаляз, мон угось 3 пинал пӧлысь пичиез но кема возьмамез, бадӟымъёсыз — пиос.

Та ик луиз Сигаево черкогуртысьтымы совхоз-техникуме пыреме, экономист луэме. Анаелы пумит мыныны но ӧй дӥсьты — кылзӥськись вал. Зэм, шаплы луэмелы паймылӥзы. Агайёс вӧзын будыку, мукет луыны но уг луы, вылды. Эшъёсы пӧлын нылъёс ик ӧй вал. Знамяез лушкаса, войнаен шудыса — ваньмыз пыр потӥ, агайёсылэсь бере чик ӧй кыльылы. Пияш кадь будӥ. Соин но палэнысен куддыр вормонтэм крепость кадь адӟиськисько.

Но улонын мон ненег, ваньзэ сюлэм пыртӥм поттӥсь, шара, котькинлы усьтэмын. Куддыр талэсь аслым ик секыт. Валасько: ваньмыныз мултэс шара луыны уг яра. Но йырын ялан берга: адямиосын астэ озьы возь, кызьы тонэн асьсэды мед возёзы кадь потэ. Соин но бадӟыменыз нылыным бадӟым муртэн кадь вераськисько, котьку шара, ог-огмес валамтэос медаз кылдэ шуыса. Макем умойгес усьтӥськид, макем умойгес ог-огдэ валад, сокем ӧжытгес луозы валамтэос.

— Туэ февраль толэзе гурт удысъя но сиён-юонъя министрлэсь ужзэ быдэсъясь луыны дэмлакузы, пичиезлы нылдылы 1 арес сяна ӧй вал на. Уен-нуналэн ужын, солы дырдэс тырмытӥськоды-а?
— Семьяелы саклыке тырме шуыны уг быгатӥськы. Тау анай-атаелы: соос — мынам борддоре. Соостэк мон татчыозь ӧй ӝутӥськысал. Коркась потыкум, мон тодӥсько: дорын ваньмыз умой.

Нош министре ӵектэмзы сярысь ке… Таӵе дыръя кема уг малпасько. Министре ӵектон — со оскемзэс возьматон, сое дунъяны но быдэстыны кулэ. Соин ик Удмуртилэн Тӧроезлы Александр Бречаловлы «мынам пиналы пичи, уг мыны» шуыны уг быгатӥськы вал. Чигнан сямы но ӧвӧл.

Улонын мон туж дӥсьтӥсь, кужымелы оскись адями. Нялтас вераса, 2-тӥ нылыным декрет отпускын ӧй пукы. Роддоме выдон нуналозям уже но тренировкае ветлӥ. Хозяйствоын ужасьёсы паймылӥзы. Нылы вордӥськем бере 3 арня ортчыса, мон нош ужын вал ни.

— Кытысь сыӵе уртчись мылкыдды?
— Совхоз-техникумез «витьёслы» йылпумъяме бере малпасько вал: сюлэмелы кельшымон уже курисько, котькытын кутозы. Озьы гинэ вылымтэ. Ваньзылы кулэ вылӥ образованиен адями, эшшо ке — опытэд медло. Соин ик заочно амалэн дышетскыны пыри. Сарапулысь нянь пыжонъя комбинатын ужаны кутски.

Предприятиосын валче ужанъя огкылъёс гожъялляй, продукциез палэнэ келян бордын ужай. Отӥяз кытын гинэ асме ӧй эскеры. Но сюресэ гурт удысэз азинтон ӧръя кошкиз. Огзэ валай: скал кыскись, пудо утись, экономист, хозяйствоен кивалтӥсь — котькин луыса ужа, капчи ӧвол нокытын. Котькытын — кыл кутон.

Сарапулысь «Удмуртия» агропромкомпание валтӥсь экономистэ юнматыкузы, мыным 24 арес вал. Отӥяз директоре пуктӥзы. Механизаторъёс, пудо котырын бергасьёс — ваньмыз пиос. Шорам нырысь-валысь серекъяса кадь учкылӥзы, мар ай та милемлы вераны турттэ шуыса.

Кытчы гинэ ӧй кутскылы (тросэз кышномуртъёс таин пумисько, малпасько), возьматыны кулэ луылӥз, мон татын нылкышно ӧвӧл, мон татын профессионал но специалист шуыса. Калыкен гинэ ӧвӧл, ачид бордын но ужано. Та уката кужмогес кариз.

— Кивалтӥсьёс пӧлын веран вань: хозяйствоен кивалтэм адями кивалтыны быгатоз котьмаин.
— Со шонер. Хозяйствоен кивалтон — со стратегия гинэ ӧвӧл. Со гурт улонэз азинтонъя проект. Колхозъёсын кивалтӥсьёс четлыкын кадь: шуг-секытъёс кылдо нуналлы быдэ. Скалъёслы уд вера, туннэ йӧл эн сётэ, доярка висьыны усиз шуыса. Ачид мынод но кыскод.

Эшшо ке туж трос эскерисьёс, соос ялан зӥбо, нош куронъёссэс быдэстыны куддыр уг луы. Кылсярысь, фермаосты котыртыны но шуг, кыед поттон интыос лэсьтыны но уг луы — котыр коркаос ӝутэмын. Хозяйстволы кыед поттон понна олокӧня пумо лицензия кулэ. Озьы нуналмысь, зор шапыкъёс вискытӥ бызьылыса, кӧс кыльыны кулэ.

-«Бабинский» агрокомплексэс малпаса но, тае вераськоды-а? Хозяйствоез син куспын азинтӥды, шуо.
— Коллективе вуыса, ачим но, специалистъёс азе но ужпум пуктӥ: малпаськыны кулэ выль сямен. Кызьы но мар кароно предприятиын, мултэс трос уксё кисьтытэк, ужазинлыкез будэтон понна? Хозяйствоез азинтыны сюлмаськись котькуд кивалтӥсь сямен ик кунян, скал гидъёс лэсьтонъя пӧртэм проектъёсты йырам бергатылӥ. Но кытысь мултэс 100 миллион манет? Оло, ужез трослы капчиятыны луэ, уксё быдтытэк?

Озьы хозяйствоысь вань пудоез лыдъяса потӥмы. Тросгес йӧл сётӥсь скалэз нимаз, кунян вайыны дасяськисьсэ нимаз, висисьсэ нимаз — ваньзэсты пӧртэм сэрегъёсы висъяно кариськимы. Кунян ӝоггес мед катьяськоз шуыса, вордскемез бере мар бӧрсьы мар кароно шуыса, дэмланъёсты бумага вылэ печатламы но гидъёсы ошылӥмы. Отӥяз басьтӥськимы скал кыскон борды.

Нырысь ик скал кысконын дышетон радъямы. Тросэз ужасьёс соку уг тодо на вал, вера борды кырмиськем бере ик скаллэн йырвизяз сигнал вуэ, йӧл сётыны кутсконо шуыса. Одӥг минутлы бере кылиськод, йӧл ичигес кыскод, со вуттэ маститозь, ноныосыз пильылӥсько, вераез эмъяны трос кужым кулэ. Соин ик скал кысконэ вуылӥмы трос кузя: мон, фермаен кивалтӥсь, зоотехник, пудо эмъясь.

Доярка ужа, нош ми мышказ учкыса сылӥськомы, лыдъяськом дырез. Нуналаз котькуд скаллэсь шорлыдын 17 литр йӧл кыскиськомы вал ке, тазьы дышетон радъяммы бере 3-4 толэзь ортчыса, скаллы быдэ 5 литрлы уногес йӧл поттыны ӧдъямы. Соин ик туннэ хозяйствоосын кивалтӥсьёслы вераны тыршисько: азинскон понна одно ик выль гид пуктоно ӧвӧл, выль гид луоз, но ужасьёс уз воштӥське. Нырысь дышетсконо адямиосын ужаны, соос киын угось пудоос.

— Ваньмыз тыбыр сьӧрын сылэмез уз чида…
— Зэм, секыт. Мышказы султэмелы быдэ дояркаослэн киысьтызы мазы ке но усе вал. Но ваньмыз потэ, кызьы тон ужасьёсыдлы югдурез валэктод. Соин ик дояркаосмылы нырысь ик верамы: премиез кулэстон, ужысь уллян бордын ужпум воксё ӧвӧл. Шуимы: висёнлэсь мозмытскон, тросгес но ӟечгес йӧл кыскон, ужез ӝоггес карон но сое радъян понна та ваньмыз лэсьтӥське.

Гидэ пыремелы будэ буйгатыны вырылӥ, мон ачим но скал кыскыны уг быгатӥськы шуыса. Ог-огдэ валан, ог-огедлы юрттон гинэ коллективен огкылысь ужаны юрттэ. Гуртоосты уг луы кужмысь маке карытыны — берытскозы но кошкозы. Одӥг-кык арня ортчыса, дояркаос чылкыт но ӝог ужаны дышизы. Ми но чакламысь дугдӥмы.

Пудо шӧдэ яратэмез

— Таин валче но тӥ туннэ зоотехникъёсын, агрономъёсын огкыл шедь-тӥськоды-а? Куд-огез пайме ук, мае но уд тодӥське, кыедэн саптаськемлэсь уд кышкаське шуыса.
— Соос мукетызлы паймо, вылды: фермае пырыкум, соос уг возьмало, удысэз тодӥсько шуыса. Учке ай шорам: йырсие тӧдьы, кышномурт… Мае мынэсьтым возьманэз? Но макем мургес пудо вордон ӧре выйисько, сокем тодон-валанме эшшо но паськытатон бордын ужасько.

Со тунсыко. Нош саптаськон сярысь ке, гид — со нырысетӥ инты, кытчы пырыны кулэ. Хозяйствоосын кивалтӥсьёсын кенешиськомы, соос ӝожтӥсько, йӧл, уксё ӧвӧл шуыса. Сыӵе дыръя гидэ мынӥсько, вуэн тусе гырпумозям киме лэзисько, нош пыдсысьтыз поттӥсько сюй но чырсам силос. Скал сыӵе вуэз улэп кылён понна гинэ юоз, но нокызьы но трос йӧл уз люка.

Гурт удыс — со чылкыт уж ӧвӧл, но кутскид ке, кышкано но, юрдоно но ӧвӧл. Бадӟым нылылы 17 арес тырмоз. Гужем каникулъёсыз дыръя улонлы дышетон вылысь сое хозяйствое вайи, скотникын ужалод, шуи, фермаен кивалтӥсь доры нуыса кельтӥ. 6 часын ӵукна саник борды кутскыса, нылы ӝыт 9 часозь воксё катьтэммемын вал ни. Вань тусьёсты тазатэм, кыед поттэм.

Но тужгес куалектэмын вал со, бордысьтыз кыед зын лыктэ шуыса. Азбарын ик кылиськиз, корка зын медаз пыры шуыса. Ӵуказеяз кизэ-пыдзэ мырдэм вырӟытъя. Фермаен кивалтӥсь шуэ: Ольга Викторовна, оло, жаляно? Ужатоно, шуи. Нылы скалъёслэсь кышка, нош татын скалъёсты одӥг интыысь мукетаз улляны юрттӥськоно.

Арня ортчыса, скалъёслэсь кышкамысь но, зынлэсь нырзэ чатыртэмысь но дугдӥз. Быдэс толэзь шутэтскытэк ужаз. Бератаз, эш луэм специалистъёсты жаляса, юаз: мама, кӧня уждун басьтэ доярка? 23-26 сюрс манет, шуисько. Республикаын та огез умоез лыдпус. Соку нылы ӧз чида: таӵе секыт уж понна сыӵе уждун тырыны уг яра, доярка весь кыедын, весь секыт ӝутъя. Малы ужасьёстэ уд жаляськы? Озьы верамез бӧрсьы хозяйствоын ужан радлыкез воштӥ. Дояркаос со дырысен скал гинэ кыско, кыед донгаса уг ветло ни.

— «Бабинский» агрокомплексын уждун умой ай. Нош мукетъёсаз бӧрдо…

— Шаерысьтымы хозяйствоосы вуылыкум, котьку юасько: кӧня скалэз кыске одӥг доярка? «Бабинскийын» 1 муртлы 90-100 скал оскемын. Мукет ёросъёсысь «Бабинскийын» кадь линейной молокопроводъёсын ужась, пудоез думылыса возись предприятиосын шорлыдын 1 доярка кыске 45-50 скалэз. Асьсэос ужасьёссы уг тырмо шуыса ӝожтӥсько.

Юасько: малы одӥг муртлы тросгес скал осконтэм? Котькуд доярка, пе, аслэсьтыз скалзэ тодэ. Юн ужасьёсты кельтыса, тросгес йӧл кыскыса, уждунэз но йылтыны луэ ук. Бадӟым нагрузкаен ужаны соглаш, пе, уз луэ. Тани мар бордын ужпум: ми малпаськыны кутскиськомы, соглаш луоз-а калык я уз. Кинлэн мултэс ужамез потоз? Соос «ум ужалэ» шуозы. Соин ик фермаосын ӵемысь кивалтӥсьёс уг кивалто. Вань кивалтӥсьёс гидъёсы уг ик пырало. Ми асьмеос адямиослы луонлык ум сётӥське йӧнала уждун басьтыны.

Мон уг быгатӥськы котькуд кивалтӥсез косыны фермае пыралляны. Но кадръёслэсь тодон-валанзэс будэтонъя проектэз пыӵатыны малпаськомы. Азьвыл зоотехникъёслы семинаръёс радъялляськомы вал. Ваньзы кылзо, доразы берто но малпало: нош мар ветлӥм, кылэммес кинлы гуртын вераломы, кивалтӥсь но уз кылзы, номыр уз воштӥськы.

Можга ёросысь «Заря» эштосын Удмуртилэн Тӧроеныз ӵош

Али бырйиськомы базовой площадкаос. Отын командаосын-командаосын адямиосты дышетомы ужаны. Кивалтӥсь, фермаен кивалтӥсь, пудо эмъясь, зоотехник со площадкаын ужалозы-дышетскозы, дэмен адӟозы, кызьы но мар кароно асьсэ хозяйствоязы. Кивалтӥсь специалистъёсыныз огкадь малпаськыны кутскиз ке, пайдаез тросгес луоз.

— Тӥ кыӵе кивалтӥсь?
— Тыршисько зэмлыко луыны. Та дунне вылын янгышатэк улӥсь адямиос ӧвӧл. Янгыш уг лэсьто ке, озьыен, соос номыр уг лэсьто. Но куд-ог адямиос юромо я валамтэенызы сэрен янгышало. Осконэз тӥясьёсты уггес яратӥськы. Хозяйствоын кивалтыкум, котькыӵе юн мед кулэяськомы трактористлы, дояркалы, юисьлы сюрес пытсамын вал. Дорад котьма кар, но ужаны кулэ оскымон.

Лыдъясько: министерствоын но специалистъёс куспын котькыӵе мылкыдъёссы медло, но со мылкыдъёсты татын возьматыны уг яра. Паськытатэм кенешъёс дыръя шуисько: ми колхозникъёс понна ужаны кулэ, колхозникъёс ми понна ужаны кулэ ӧвӧл. Соин ик дасяно программаос, радъяно документъёсты, сюлмаськоно 2019-тӥ ар сярысь.

— Кыӵе ужпумъёс али нырысетӥ интыын?
— Вуоно арын огсыр ужан понна документъёсты радъяськомы. Кылсярысь, хозяйствоосын кивалтӥсьёс несвязанной поддержкалы, кредитъёслы процентсэс берыктон но йӧллы субсидия басьтон вылысь пӧртэм ведомствоостӥ но министерствоетӥ, дырзэс быдтыса, солань-талань медаз ветлэ шуыса, кылдытыны малпаськомы Интернет вотэс пыр ужась «укно». Котькуд кивалтӥсь аслаз кабинетысеныз вань документъёсты министерствое келяны мед быгатоз. Проект ужаны кутскоз сентябрьысен. Пӧрмиз ке, вань субсидиосты люкылонэз но вуоно арысен озьы ик радъяломы.

— Пичи но ляб хозяйствоосты юнъёсыныз юнматонъя ужпум макем туннэ син шорын но кыл йылын?
— Та ужпум — санация — шоры кин кызьы учке: одӥгъёсыз солы дурбасьто, мукетъёсыз пыкисько. Нокин нокинэ кужмысь кытчы ке уз кыскы. 2 гурт предприятиос асьсэос одӥг малпанэ вуыны кулэ, соослы огазеяськыса капчигес луоз шуыса, сотэк номыр уз пӧрмы.

Дуно комбайн нимаз-нимаз басьтыны уз ворме, вормизы ке но, кыкезлы ик хозяйствоослы со секытэн сётӥськоз, нош дэмен бусыосты но гырыны капчигес луоз шуыса валанэ вуисьёс вань ни. Республикамылэн уйпалаз но, лымшор палаз но сыӵе проектъёс кисьмало. Соос та ар пумозь огкылэ вуыны кулэ, кыӵе амалъя огазеяськозы.

Алигес Удмуртиын ортчиз йӧл поттонлы сӥзем калыккуспо форум

Курон одӥг: производствоез но, ужан интыосты но утьыны кулэ. Сыӵе огазеяськисьёслы ми юрттыны дасесь. Валаны кулэ: асьмелы асьмеос ӧм юрттэ ке, озьы ик огсыр ужаломы, но азинсконъя вормонъёс басьтыны ум быгатэ. Дыр туж ӝог воштӥське, соя асьмелы но воштӥськоно. Кунгож сьӧрысь предприятиос кооперациосын ужало, со бордын кужымзы.

— Пичи гуртъёс бырон калэ вуэмын. Газетмылэн «Сю сюрес» проектэзъя ми 260 гуртэ вуылӥмы ни. Унояз нокыӵе предприятиос ӧвӧл. Но куд-огаз гуртэз возись, калыкез сюдӥсь фермеръёс ужало. Кылсярысь, Ува ёросысь Пуштовай гуртысь Андрей Пчельников ас кожаз берга. Таӵеослы юрттонъя программаос чакламын-а?

— Жаляса верано, Пуштовайысь кадь фермеръёс сярысь тодытэк-адӟытэк ик кылиськомы — соос асьсэ понна ужало, милемлы вазиськыны уг валало, — гуртлэсь нимзэ аслыз гожтыса, шуиз Ольга Викторовна. — Инты адямиез чебер уг кары, адями — интыез.

Туж тросэз потэ гуртын улӥсьёс бордысь. Соослэн гуртазы улэмзы потӥз ке, ваньзэ лэсьтозы азинскон понна. Эгра ёросысь Мувыр гуртысь Александр Корепанов фермер буш бусы вылын быдэс гурт кылдытӥз, производство усьтӥз. Кун ласянь грантъёсын юрттыны луэ фермеръёслы, кооператив кылдытӥсьёслы. Алнашын 10 фермеръёс огазеяськизы, 12 миллион манет басьтӥзы. Соин ик сыӵе пичи гуртъёсты азинтыны луонлык утчаломы, та юанэз эскеромы.

Гуртъёсы егитъёсты кыскон понна но йырмес висьытӥськомы. Подъёмной тырон гинэ — секыт югдурысь потыны уг юртты. Котькӧня уксё сёт, гурт улон адямилэн сюлэмаз ӧвӧл ке, со отчы уз кыльы. Специалистъёс уг тырмо бере, сервисной службаос кылдытоно, профессионал, хозяйствое лыктыса, ужез мед радъялоз, ӵектонъёссэ мед кельтоз. Озьы адӟисько югдурысь потон амалэз. Гуртоос валазы ке, та кулэ шуыса, соку уж мыноз.

Кужым сётэ спорт

— Спортэн но вырыны кызьы ке дыр висъяськоды. Кытысь ваньмызлы кужым?
— Спорт ик кужым но мылкыд сётэ: уясько, бызьылӥсько, боксэн вырисько. Туж яратӥсько машинаен ворттылыны. Руль сьӧрын малпанъёсме радъясько. Сигаевоысь нуналлы быдэ Иже лыктытозям, план лэсьтӥсько. Кужым сётэ семьяе но. Монэ уг вунэто «Бабинский» агрокомплексысь специалистъёс. Алигес туспуктэмъёссэс келязы, выль селекциен вордэм кунянъёссэс возьматӥзы.

Кивалтӥсь бордысь туж тросэз потэ. Кивалтӥсь мылкыд ӧз сёты ке, уж уз вырӟы. Уноез малпало: капчи улонэ вуон, секыт югдурысь потон — со субсидия басьтон. Со озьы ӧвӧл. Субсидия гинэ уз утьы. Утиськомы соку, куке вань сюлмысь ужаны дышомы.

Елена Сараматова

Удмурт Дунне
By Удмурт Дунне Июль 20, 2018 10:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<