Атайёс пото шур дуре

Удмурт Дунне
By Удмурт Дунне 23 июля, 2018 15:22
Максим Егоров

Дэри ёросысь Ожмосысь тыметын пыласькыны уг яра

Гужем ӵоже Удмуртиын 8 нылпиос выйизы ни. Пиналъёссы понна нырысь ик кыл куто анай-атайёс. Но пыласькон интыос, коть лэземын пыласькыны отын, коть ӧвӧл, ваньмыз эскериськыса улыны кулэ. Таин валче ёрос но гурт администрациос азе чурытэсь куронъёс пуктэмын.

Коньдон ӧвӧл

Та дырозь тросэз ву дурын шутэтскон интыосты дасянлэсь но выён учыръёсты алонлэсь палэнскыны вырылӥзы. Ваньмыз огкадь валэктон сёто: бюджетын уксё ӧвӧл. Соин ик котькуд ар одӥгзэ куронэз сяна уг быдэсъяло: ву дуре пыласькыны уг яра шуыса пус пукто но тӥни. Туннэ Удмуртиысь 9 ярдуръёсын гинэ шутэтскыны яра, соос пӧлысь 6-яз пыласькыны лэземын. Кышкыт статистика возьматэ — пиналъёс выйылэмын сыӵе тыметъёсын но шуръёсын, кытын чаклась-эскерисьёс ӧвӧл.

Зэм, гурт кивалтӥсьёслы капчи палэнскыны пляж усьтонлэсь. Но калыклы улон, ужан, шутэскон инты кылдытон понна ӵапак гурт администрациос сюлмаськыны кулэ, та сярысь гожтэмын интыысь аскивалтон сярысь законын. Озьы гурт но ёрос администрациосты индылӥз МЧС-лэн Удмурт Республикая Валтӥсь управлениезлэн кивалтӥсез Пётр Фомин. Кайтаысен поселениосын кивалтӥсьёслэн али сямен ужамзы уз луы ни. Соосты кыл кутытозы.

Со сяна, куд-ог ужрадъёсты уксётэк но радъяны луэ. Кылсярысь, Россилэн Президентэз бордысь Нылпиослэн правооссыя уполномоченнойлэн дэмламезъя, ваньмаз улосвылъёсын кылдытъяны кулэ атайёслэсь патрульёссэс. Элькунамы та ужез радъян борды басьтӥськиз Нылпиослэн правооссыя уполномоченной Ольга Авдеева.

Гужем бырытозь,уз вуттӥське

Дэри ёросысь Ожмос поселениын 3 тыметъёссы. Ваньмыз совето вакытэ ӵыпемын. 2-аз пыласькисез уг луылы. Нош бадӟымез, Молдаванской нимаськисез, дуре, пӧсь луэ ке, соку ик туж трос калык люкаське. Нош со пыласькыны лэзем интыос пӧлы уг пыры. Тыметэз утялтон борды ӧм ик кутскылэ ай, шуэ черкогуртысь администрацилэн йырыз Виктория Варламова.

Пыдэссэ спасательёс дунтэк сузялозы, тымет дурез утялтыны но ярдураз кӧня ке машина луо вайыны быгатом, шуэ Виктория Варламова. Нош мукет ужъёс укыр дуно, пе, усёзы. Вузэ, сумедзэ (пыдэсысь сюйзэ) эскеронлы гинэ но трос коньдон кулэ. Туэ со уз шедьы ни. Уксё сюриз ке, сое вуоно арлы бюджетэ гинэ пыртыны быгатом, пе.

Но тыметэн туж валантэм югдур кылдэмын. Ӵыпетсэ кин ке куке нимаз адямилы вузам. Выль кузё ачиз но номыр уг кары, мукетъёсзылы но уг сёты. Тулыс, толалтэ вузэ лэзьяны но уг вуылы. Черкогуртысь администрация тае чакласа возе. Ӵыпетэз кыриз ке, Ожмосысь уноез бакчаос, юртъеръёс ву улэ шедёзы.

Тыметысь ву чылкыт шуыса, туж ик осконэз ӧвӧл. Шурлы матын интыяськем Чуньыгуртын кема аръёс ӵоже дуст возизы. Дасо аръёсын кышкыт сурет музъем вылын кыллиз. Кӧня ке ар талэсь азьло сое утялтӥзы. Но кин тодэ, пе, кӧняез музъем пушкы кылиз, тудвуэн ӵош котыр ошмесъёсы но шуре шедиз.

Кайталы бюджетазы тымет вуэз эскеронлы уксё чакланы малпало. Уго татчы шутэтскыны лыктӥсьёс азьланяз эшшо йылозы. Тымет вӧзысь бусыын быдэс выль микрорайон кылдэ, шуыны луоз. Татын ик музъем висъязы трос нылпиё семьяослы.

Ожмосын кылдытӥзы атайёслэсь патрульзэс. Отчы пыризы черкогурт Кенешысь депутат воргоронъёс, спортсменъёс но физкультураен дышетӥсь. Табере котькуд нунал 20 часысен 23 часозь 2 пиосмуртъёс тымет дуре чакласькыны потало. Ӵапак та вакытэгес, пе, пыласькыны ветло быдэ вуымтэос.

Сётомы арендае!

Пичи Пурга ёросысь Кечол администрацилы тыметъёсын эшшо но «удалтӥз». Татын соос 4 интыын ӵыпемын. «Мир» колхоззы соосты куке но тылпулэсь утиськыны шуыса лэсьтэм вылэм. Туннэ та хозяйство ӧвӧл ни. Тыметъёс кузётэк кылемын. Вузэ лэзьыны уг яра, тылпулэсь утиськыны кулэ, шуэ гурт администрациысь специалист Елизавета Козлова. Нош пыласькисез, пе, луэ ваньмаз.

Элькунын луэм шудтэм учыръёс бере администрациын ужасьёс асьсэос потало огназы пыласькись нылпиосты алыны. Кечолысь нылпиос пелязы поно, пе, индылэмез. Но вань на сад-бакчаосазы шутэтскыны вуэмъёслэн пиналъёссы. Таосыныз вераськыны шуггес.

Пиналъёсты утён ужлэсь школа но ӧз палэнскы. Котькуд гуртысь тыметъёсты син азязы возё родительской комитетлэн ёзчиосыз. Марысь мар ке, огназы пыласькыны лыктэм нылпиосты улляны пото. Татын но мылкыдзы вань тыметъёссэс чылкытатыны. Но шедёз-а коньдон — уг тодо.

Пыласькыны лэзем пляжъёс пӧлысь тросэз нимаз адямиослы арендае сётэмын. Соос отын коньдон потто. Валамон, вань тыметъёсты, уката ик кыдёкысь гуртъёсысьёссэ, кулэ карись ужбергатӥсьёс уг сюро. Дэри черкогуртын одӥгезлы гинэ тыметсылы арендатор шедьтӥллям.

Озьыен, пыласькон интыосты утялтыса возён, чылкытатон понна интыысь кивалтӥсьёслы ик амал утчано луоз. Нош туннэ пиналъёссылэн улонзы но тазалыксы сярысь нырысь ик анай-атайёс сюлмаськыны кулэ.

Эдуард Степанов

Туспуктэм: Максим Егоров

Удмурт Дунне
By Удмурт Дунне 23 июля, 2018 15:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<