Сю сюрес… Дэри ёросысь Куӵос гурт

Удмурт Дунне
By Удмурт Дунне 31 июля, 2018 17:26
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

 

Дэри ёросысь Ожмос черкогурт дорысь ог 4 иськеме лабыр-лабыр пуксемын Куӵос. Азьло улӥсьёс пӧлысь тросэз отысь кошкиллям, но гуртлы бырыны уг сёто лыктэмъёс.

Пугачёв вуылэм, пе

Кытысь кылдӥз гуртлэн нимыз — туннэ нокин тыро-пыдо уг тоды ни. Но пересьёс вералляло, пе, вал: татчы куке соку нырысь ик интыяськем Кияса ёросысь Куӵосысь яна потэм семья. Гуртлэн ӟуч нимыз — Коньки. Тазэ тазьы валэктылӥллям: шаертӥмы ортчыкуз, та чебер интыосын валъёссэ возе вылэм Емельян

Пугачёв.

Озьы-а, тазьы-а, Куӵос котырысь узыен-борыен узыр бамалъёслы синмаськытэк кылисьёс али но ӧвӧл, вылды. Ки сузьымонын гинэ нюлэс, гурт сьӧртӥ ик бызе пичи шур. Нош кӧня ошмесъёс жильырало! Одӥгзэ вӧсяны вуылэм баӵко но. Табере со пӧртэм висёнъёслэсь бурмыны юрттэ шуыса оскисьёс вань.

Та интыосты туж яратэ вылэм нылпи кылбурчи, Удмуртиысь дышетон удысысь сӥё-дано ужась Юлия Байсарова но. Татысь бамалъёстӥ поръякум, аслым кужым басьтӥсько, шуылэм со. Ошмесэз но вӧсяны курыса, со ик баӵкоез нуллэм. Юлия Байсарова калык амалъёсъя адямиосты йӧнатонэн но вырылӥз.

Зэм, кылем даурысь 80-тӥ аръёс кутсконын гурт ӧжыт гинэ ӧз быры. Ӵапак со вакытэ ини татысь быдтӥллям медпунктэз но, клубез но, школаез но. Вазен гуртын бадӟым фермазы вылэм — вал, скал, парсьёс возиллям. Сое но быдтӥллям. Гуртысь цивилизация быриз бере, гуртоос но пумен пазьгиськыны кутскиллям — тросэз артэ гуртъёсы, Ожмос-Пургала, Ожмосэ кошкиллям.

Скал вордо на

Туннэ гуртын 45 корка пусъемын ке но, улӥсез 40 но ӧвӧл ни.

— Мон татчы лыктыку, 1987-тӥ арын, пичи гинэ магазинзы вал на, — тодаз вае Наталья Акилова. — Алнаш ёросысь Шадрасак-Кибьялась ачим. Артысь Ожмос-Пурга школае Можга педучилище бере направлениея вуи. Бӧрысь ини заочно амалэн дышетски Москваысь психолого-социальной иститутын. Аслым паймисько: ог 2 толэзь ужаса вуттӥ — сюан шудӥм ни.
Юраелэн анай-атаез соку ик монэ кен карыны соглаш луиллям: таиз пимес палэнэ уз нуы, пе, ужез умой.

Юра семьяязы пичиез бере, анай-атаезлэн сое бордазы кельтэмзы потӥз, дыр. Мамаен, тятяен туж тупаса улӥм — зэмзэ но, соосты татчы кельтыны жаль потӥз…

Табере Акиловъёс асьсэос песянай-песятай луизы ни. Пизы Иже кошкиз, бордазы та вакытэ Светлана нылзы семьяеныз улэ. Светлана но дышетӥсь. Рулез кияз, анаеныз ӵош машинае пуксё но уже, Ожмос школае, кошко.

— Лавка гуртамы арняяз одӥг пол гинэ ветлэ, — ватса Наталья Ивановна. — Но ми ум шугъяськиське, Ожмосысь ик магазинэ но нялтас пыраськом.

Нош дышетскисьёсты, пе, нулло школа автобусэн. Школьникъёс 4 кузя кылемын на, ваньзы бадӟым классъёсын тодон-валан люкало ни. Зэм, нӧд куазен пиналъёс ог 2 иськемез пыдын ортчо. Автобус уг дӥсьты Ожмос-Пурга гурезь улэ васькыны, нош Куӵос — Ожмос-Пурга сьӧрын ай.

Гуртоос одӥг ымысь сямен шуо: сюлмаськонзы одӥг — гуртэ пырон сюрессы алама. Угось котькуд хозяйствоын ик туннэ машина сылэ ни. Нош ульчаосын асфальт ӧвӧллы соос дышемын, чик дэри ӧвӧл кадь, пе. Пудо уг лёга. Скал вордӥсьёс вань на — 4-5 хозяйство. Но пастухе уг поттало. Гидкуазязы возё, турын ворттыса сюдо.

Светлана Фирсова ӟуч Чернушказэ гозыен думыса сюдэ.

— Ма, мон сое Гольянысь ӟучъёслэсь басьтӥ вал, соин ӟуч сямен ик вераськисько, «Стой!» шуисько ке, дугдэ, — серектэ нылкышно. — Кузпалы пӧламы ӧвӧл ни, нылы чакла, скалэз сюдэ.

Йӧлме садоогородэ вузаны нуллӥсько, татын ог иськемын вырйылын гинэ со. Мукетъёс но отчы вузаськыны но, басьяськыны но ветло.

Светлана Фирсова — лыктэм адями. Можга ёросысь Оштырысь потэмын, бызем Иже, «Ижмаш» заводын ужам. Но гуртысь потэм муртэ гурт улон ик гочатылэм. Озьы 1989-тӥ арын ни семьяеныз лыктэм татчы, чебер интыослы синмаськыса.

Гурт котырысь инкуазез кельшытэм Алнашысь Туймыйылын вордскем Михаил Шулаков но. Городын будэм ӟуч кышнозэ но, эсьма, кыскем татчы.

— Ма, кышномуртлэсь кин юа? — серектэ со. — Лыктэммы бере фермер кариським вал. Пудо но вордыны вырылӥм, бусыос но возим. Али 1 гинэ на скалмы, мушен выриськом, чечымес вузаськом. Нылмы городын улэ ни, но гужемлы быдэ бордамы внукмы — умой юрттӥськись.

Уж вань

Гуртын улӥсьёс пӧлысь тросэз пенсиын ни. Но пенсизы борды, йӧл-вӧй, чечы, бакча емышъёс вузаса, уксё потто. Но уж но вань татын! Ижысь Леонид Чернышев «ЛИД» огазеяськонзэ возе. Пудо уг ворды, но котырысь бусыосы рапс но, кӧжы но, чабей-йыды но кизе. Отчы артэ гуртъёсысь но воргоронъёс уже ветло.

Гурт сьӧрын ик, аран вакытэз возьмаса, сыло ни 2 комбайнъёсыз, вань ю тысь возён складэз, КЗС-эз. Али нош ик бадӟым-бадӟым шуныт склад пуктэ. Бордаз ужасьёс но уг тодо на: мар отын луоз. Но шумпото: иське, матысь аръёсы бусыос уз аналме.

Гуртоос оско: гуртсы но улоз. Толалтэ коркаос мӧзмыт сыло ке, гужемзэ соос выльысь улӟо — сад-бакча возисьёс вуо. Пӧлазы — садоводъёслы школа нуись, «Календарь садовода» передачалэн авторез Вера Орлова но. Ялан улӥсьёсыз но, гужемлы гинэ вуылӥсьёсыз гинэ но жин-жин коркаос пукто.

Элина Кумачёва

Туспуктэмъёс: Максим Егоров

Удмурт Дунне
By Удмурт Дунне 31 июля, 2018 17:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<