Ижкарын эскеризы кун программая выльдэм 3 сюресъёсты

Удмурт Дунне
By Удмурт Дунне 2 июля, 2018 14:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ижкарын эскеризы «Кышкыт луисьтэм но ӟеч сюресъёс» кун программая выльдэм 3 объектъёсты. Комиссиен кивалтӥз Правительстволэн Тӧроез Ярослав Семёнов.

Ижысь выль тупатъям Маслюков ульчаез эскериз нимысьтыз комиссия. / Туспуктӥз Э. Карипов

Ижкарын та программая нырысь ик тупатъязы Маслюков урамез. Та ульчаысь сюреслэн кулэлыкез бадӟым, шуиз транспортъя но сюрес хозяйствоя министр Алексей Горбачёв. Тапалан интыяськемын 6 нылпи сад, 3 школа, Устинов ёросысь загс, ӝог эмъюрттэт сётонъя станция но мукет учреждениос. Дорожникъёс сюреслэсь уродмем вылӥ сӥзэ басьтӥзы, гоп кылдылэм интыосты юнматӥзы, ӵоксазы. Собере 10 сюрс квадрат метрез асфальтэн шобыртӥзы. Озьы выльдӥськизы Маслюков урам но соин герӟаськем Курченколэн ульчаез.

Туннэ дорожникъёслэсь ужамзэс ялан чакласа уло калык огазеяськонъёслэн ёзчиоссы. Ӵапак соос Маслюков урамысь тырмымтэосты нырысь ик шараязы вал.

Дорожникъёс ваче пумит мынон сюресъёсты нимаз лэсьтӥллям вылэм. Огполскын вӧлдымтэ асфальт машинаос улын озьы ик нимаз люкиське, сюрес шортӥ ик пилиськыса кошке. Косэмын вал нырысь но берло вӧлдэм асфальтэз «итыны». Милесьтым индылонмес кылӥзы, сюрес лэсьтӥсьёс шексэс палэнтӥзы, шуиз «Автомобильная Удмуртия» огазеяськонлэн кивалтӥсез Борис Ломаев. Табере сюрес вылысь вандыса басьтэм но лабораторие чакланы келям асфальт юдэсъёс вань куронъёслы тупало.

Маслюков урамен герӟаськем Калашников проспектын тупатъян ужъёс ӧз йылпумъяське ай. Но комиссия ремонтлэсь мынэмзэ чаклано кариськиз. Дорожникъёс технологиосты тӥямен, татысь ужъёс дугдылӥзы ни вал. Ижысь администрация индылэмъя подрядчик 150 метр сюрес вылэ понэм асфальтэз утялтӥз, выльысен вӧлдоно луиз. Озьы предприятие, аслэсьтыз шекъёссэ дыраз адӟымтэен, аслыз трос сюрсъёсын ыштонъёс вайиз.

Та объектэз чаклакуз, Ярослав Семёнов катоклэн водителезлэсь янгыш ужамзэ адӟиз. Одӥг интыетӥ сюрес дурысь асфальт пӧсь дыръяз вандытэк ортчемын. Берло сыӵе интыос пырдыны кутско. Дорожникъёс оскытӥзы, сюрес дурез берло вандозы шуыса. Малы асьтэлы асьтэос шугъяськон кылдытӥськоды, кынмем асфальтэз вандыны трослы шуггес но дуногес, пусйиз Правительстволэн Тӧроез. Ярослав Семёнов предприятилэсь кивалтӥсьёссэ ужасьёсты сак чакласа улыны косӥз.

Таӵе ӵектонэз одно быдэсъяно шуыса, валазы ни Пушкинской ульчаын ужасьёс. Оглом та урамысь 23 сюрс квадрат метръем 2 участокъёс выльмизы. Озьы ик 80 пала канализационной но зор ву кошкон люкъёс воштэмын. Янгышъёс бордын ужатэк ӧз луы. 12 люк котыръёс соку ик паньгазы. Та учыр мукет дорожникъёсты но мед дышетоз, вераз Ярослав Семёнов. Тырмымтэос шараяськизы ке, сюрес лэсьтӥсьёсты ас уксёенызы выльысь со ужъёсты быдэстыны косозы. Шекъёсты палэнтытэк, сюреслэн дась луэмез сярысь документъёс улэ комиссилэн ёзчиосыз кинюртэмъёссэс уз пуктэ.

Та арня вискын комиссия кутыны чакла эшшо кӧня ке объектъёсты. Оглом Ижевск агломерацие пырись 43 участокъёс выльдӥськыны кулэ «Кышкыт луисьтэм но ӟеч сюресъёс» кун программая. Сое улонэ пыӵатыны федерал но элькун бюджетъёсысь 1 миллиард 460 миллион манет висъямын. Али ужъёс мыно 13 интыосын: шоркарамы сяна, городлэсь 100 иськем сюресъёс вылын. Кылсярысь, али кутскемын Уваысь Сьӧлтае мынон трассаез тупатъян. Сюрес лэсьтӥсьёсты быръёнъя конкурсъёс чотын 30 миллион манет шыръяны луиз. Со уксёен Камбаркаысь 8 урамъёсты лэсьтозы. Али отын подрядчикез быръён мынэ.

Эдуард Степанов

Удмурт Дунне
By Удмурт Дунне 2 июля, 2018 14:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<