Жуг-жаг понна тыроно луоз

Удмурт Дунне
By Удмурт Дунне Июнь 25, 2018 15:30

2019-тӥ арын 1-тӥ толшорысен быдэс Россиын жуг-жаг поттонъя вань ужпумъёсты ас вылазы басьтозы улосвыл операторъёс. Элькунамы со быръемын ни. Кун Кенешысь «КПРФ» фракция выль сямен ужанлы дасяськон пумысен кенешон ортчытӥз.

Туспуктӥз Э. Степанов

Дэри ёросысь Пероггурт бордын ик ялан кылдэ жаг куян инты.

2019-тӥ арысен жуг-жаг поттон пӧрмоз коммунальной услугалы. Потэ-а, уг-а, но котькуд корка яке квартира кузё со понна коньдон тыроно луоз. Адями огкыл кутоз улосвыл операторен яке управляющей компаниен. Но компанилэн озьы ик луыны кулэ операторен договорез. Элькунамы со оштолэзе быръемын вал конкурс пыр. Отын вормиз «Спецавтохозяйство» огазеяськон.

Лэчыт ужпумъёс та удысын, жуг-жаг гурезьёс кадь ик, ялан йыло. «КПРФ» фракция котырес ӝок сьӧры вераськонэ люказ ваньзэ, кин кыл кутэ жуг-жаг поттонэз радъян понна. Ваньзэ сюлмаськытӥсь ужпум — тарифъёс. Туннэ соос юнматэмын ӧвӧл ай. Тарифъёсты кутозы 20-тӥ толсурозь. Жуг-жагез поттонъя но быдтонъя услугалы тариф быдэс элькунлы одӥг кадь луоз, вераз лэсьтӥськонъя, жилищно-коммунальной хозяйствоя но энергетикая министрлэн воштӥсез Алексей Бобырь. Улосвыл оператор кыл кутоз кылем-мылемъёсты поттэм, быдтэм понна. Озьы ик сое косо свалкаосы люкам арбериослы 2-тӥ улон сётӥсь переработка усьтыны.

Выль радлыке выжонын бадӟым уж оскемын гурт администрациослы. Соос чаклано луозы, кыӵе амалэн гуртысь жагез люкано. Контейнеръёс ке пуктоно, нимысьтыз куронъёслы тупась инты быръёно. Кун Кенешысь Гурт удысъя, музъем кусыпъёсъя, инкуазь узырлыкъёсъя но инкуазез утёнъя ялан ужась комиссиен кивалтӥсьлэн Владимир Варламовлэн малпамезъя, та амал гуртлы туж ик уг тупа. Умойгес луоз, пе, сигнальной нимаськись амал. Калык жуг-жагзэ пакетъёсы люка но, нимысьтыз юнматэм дыре соосты бичаны машина лыктэ. Ӵапак озьы Пичи Пурга черкогуртын но мукет гуртъёсын.

Куд-огаз ёросъёсын каро пакетъёсты возён интыос усьтытэк уз луэ. Уго вань на сыӵе гуртъёс, кудъёсаз сюресъёс гужем но толалтэ гинэ кылдо.

Таин ӵош бадӟым валэктон уж нуоно гуртоос пӧлын. Туннэ элькунамы лэзьымтэ интыосын кылдэм 168 свалкаос шараямын. Тросэз жагзэс потто шур дуръёсы, бакча беразы, тэльёсы. Талы пум поныны кулэ. Кенешын пусъемын вал: кылем-мылемъёсты поттон культуралы пичиысен дышетоно. Школаосын кыӵе ке нимысьтыз занятиос нуыны ӵектӥзы. Пичиысен дышетыса гинэ, пӧрмоз, пе, инкуазез гажанлы дышетыны.

Гурт администрациосысь лыктэмъёс кенешын ӝутӥзы мукет лэчыт ужпумъёсты. Мар кароно куштӥськем юртъеръёсын? Кирпич бервылъёсты сюрес вылэ кисьталод ик. Нош вуж коркаосты пулы гинэ но нокин уг басьто ни. Та юанлы рос-прос валэктон сётӥсь ӧз шедьы.

Коньдон ужпумъёсын ик герӟаськемын эшшо одӥгез лэчыт юан. Мар кароно кизер кылем-мылемъёсын? Туннэ гуртъёсысь коркаосын пож ву люкан гуоссы вань. Со кырсьёссэс тросэз машинаосын кытчы сюрем потто. Туж шер нуо пож вуосты сузян станциосы. Трос интыосын соос туж вужесь яке чылкак ӧвӧл. Уго соосты лэсьтон туж дуно усе. Ува ёросын сыӵе станция пуктон 20 арлэсь кема кыстӥське ни. Татын юрттозы туала технологиос. Но куддыр люкетэ документъёсты аръёсын эскерон.

Котырес ӝок сьӧрын чузъяськем вань дэмланъёс пыризы резолюцие. Сое фракция келяз Правительствое, ёрос но гурт администрациосы но жуг-жаг поттонэн вырись мукет огазеяськонъёсы.

Эдуард Степанов

Удмурт Дунне
By Удмурт Дунне Июнь 25, 2018 15:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<