Юкаменск ёросысь Одинцы: Тамак но сур уг вузало

Удмурт Дунне
By Удмурт Дунне 28 июня, 2018 11:03

Юкаменск муниципал кылдытэтэ 11 гурт пыре. Одинцы гурт ёрос центрлэсь ог 12 иськеме интыяськемын. Документъёсъя учконо ке, гуртын 44 улӥсез лыдъяське, пӧлысьтызы тросэз пенсионеръёс луо.

Пумиськон интызы — магазин.

Магазинзэс возё

Юкаменск — Красногорск сюрес вылэ интыяськем гуртын тупаса уло бигеръёс, ӟучъёс но удмуртъёс. Но гуртоослэн лыдзы арысь аре кулэсме, документъёсъя 44 ке, отын улӥсез 34 гинэ. Егитъёс палэнэ кошко: ужзы но, дэмен шутэтскон интызы но ӧвӧл. Арлыдоос, вордскем палъёссылэсь люкиськыны ӵыдытэк, ялан маке-маке юрт котыразы берганы выро. Гуртлэн шорсюлмыз герӟаськемын райпо магазинлэн пу юртэныз. Уно аръёс ӵоже отын ужа Рашида Бекмансурова. Вазенгес пенсие потэмын ни ке но, воштыны, пе, нокинэн. Магазинлэн юртэз векаса сылэ, толалтэзэ пуэн эстоно, озьы но шуныт уг луы. Кӧня ке ар талэсь азьло гуртоос куро вал магазинзы интые пичигес юрт яке вагончик пуктыны, но соосты кылӥсь ӧз луы.

— Мынам малпамея выль магазин но милемлы кулэ ӧвӧл, татчы ичи калык кылемын, басьяськыны малпасьёс асьсэ машинаосазы, автобусэ я таксие пуксё но Юкаменск черкогуртэ ширто, — шуэ вузаськись Рашида Назиповна. — Магазинам нуналлы быдэ 6-7 адями пыра. Дорам пукысал, шутэтскысал ни, дӥням пырасьёс жаль пото.

Магазинэ нуналлы быдэ кадь кулэ луись вуз вортто: нянь но йӧл, кеньыръёс. Гурт сюрес вылын интыяськемын бере, машинаен ортчисьёс но ӵемысь дугдыло, сур я тамак юаса.

Ошмессэс утялтыса возё.

— Милям магазинамы ӵапак та вузъёсты уг вузало, умойлы гинэ со, — малпанзэ шарая вуз карись. — Машинаен ортчись сое мукет гуртысь но басьтыны быгатоз, со понна милям гуртоосмы тросэз юонлэсь но, тамак кысконлэсь но куштӥськизы ни. Урод шат со?

Утялтӥсько дэмен

Гуртлэн кылдэмез сярысь тупен-тупен мадиз татын улӥсь Насима Бекмансурова. Та гуртэз, пе, кылдытӥллям ӟучъёс. Кӧня ке ар улэмзы бере соос быдэс странае пазьгиськиллям, тросэз улыны интыяськиллям Глазов городэ. Ӟучъёс интые Одинцые улыны вуиллям артысь Зяглуд но Юнусенки гуртъёсысь бигеръёс. Соос но кема ӝегаллямтэ, тросэз палэнэ кошкиллям. Та вакытэ гуртын пӧртэм выжыос вань, азьвыл улэмъёс берен вуэмын, выльёсыз лыктэмын. Насима Маликовна но Глазов городын улэм, вордскем гуртаз 3 ар талэсь азьло бертэм песянайзэ эскерыны.

— Аслам машинае вань бере, кытчы мынэме потэ, отчы ик ширтӥсько, — шуэ кышномурт. — Арлыдоос жаль пото, больницае я эшшо маке кулэен Юкаменск черкогуртэ мыно ке, ӵемысь таксиез ӧтё, огпала сюрес дунзы 250 манет тыр усе. Куд-ог дыръя Ижевске ветлӥсь автобусэн мыно-берто, берло дыре солэсь но рейсъёссэ ичигес кельтӥзы. Таксилы коньдонзы уг тырмы ни ке, сюрес вылэ потыса, попутка витё.

Насима Маликовна — интыяз пуконэз тодӥсьтэм кышномурт. Шаплызэ шӧдыса ик, гуртоос сое старостае бырйиллям. Кыӵе ке сюлмаськонъёссы кылдо ке, кышномурт соку ик гурт поселениен яке ёросэн кивалтӥсь доры дыртэ.

— Гурт кенешъёсы но кивалтӥсьёс мыло-кыдо пырисько, котькуд адямилэсь верамзэ сак кылзо, — шуэ Н. Бекмансурова. — Кылем арын, кылсярысь, гуртысьтымы ошмес котырез утялтыны пиломатериал висъязы. Ошмес — милям данъяськонмы, со милемыз ческыт вуэныз шумпоттэ. Ульчаын колонкамы вань, но отысь пож ву вия, юыны ум дӥсьтӥське, со вуэз бакча сиёнъёс вылэ гинэ кисьтаськомы.

Колонка нергезы.

Ошмес котырзэс быдэс гуртэн чылкытатӥзы. Будка но ошмес доры мынон тротуар лэсьтӥзы, тулыслы быдэ быдэс гуртэн отын бадӟым утялтӥськон ортчыто, нылкышноос сяськаос мертто.

Инкуазьзы но синмаськымон. Гуртлэн мукетыз данъяськонэз — кызьпу арама. Отын шулдыръяськонъёс ортчытъяло. Жаляса верано, сое мерттӥсьёс сярысь гуртын вераны уг тодо ни. Кызьпу арамазы шулдыр ке но, куд-ог дыръя жуг-жаген тымиське. Палэнысь адямиос но гуртысьтызы кызьпу арамаын ӵынатэм сӥль сиыны ярато уго, нош бервылзэс, пе, ваньзы уг утялто. Гуртысь арлыдоос муртъёс понна утялтӥськыса жадиллям ни, оло, пе, ёросысь инкуазез утисьёс дорамы юрттӥськыны вуылысалзы.

— Старосталэсь верамзэ ми сак кылзӥськомы, — шуэ Юкаменское муниципал кылдытэтлэн йырыз Александр Широких. — Кызьпу арамаысьтымы но жуг-жаг куян интыосты утялтӥмы. Татысь калык огкылысь улэ, кыӵе ке уж борды басьтӥсько ке — дэмен. Мукетъёс но соослэсь адӟем мед карысалзы вылэм.

3 ульча пӧлысь огез.

Ог-огзэс уг кушто

Гуртын 3 ульча: Мухинской, Школьной но Ключевой. Насима Васильева Ключевой ульчаын улэ.

— Трос ветлыны уг быгатӥськы, секыт луэ, — шуэ Насима Назиповна. — Райцентре мынон понна сюрес вылэ потоно. Куазь кӧс дыръя вамышъяны умой, нош зор-кот дыръя ӝог юрттэт сётӥсь машинаос гинэ но дӥням уг вуо. Эмъясьёс машиназэс артысь ульчае кельто но, дорозям пыдын лыкто. Соос но жаль пото, быдэс нунал ӵоже нӧд коласа ветлӥзы ке, мукет висисьёс доры ку вуозы на.

Кышномурт огназ улэ. Соин ик юртъер котыраз берганы юртто гуртысь воргоронъёс. Кылсярысь, Гриша Шоломов песянайлы юрттӥськыны ветлэ, ачиз инвалид ке но. Насима Назиповна ужамзы понна пичильтык коньдон сётэ. Воргоронъёс нокытын уг ужало шуыны уг луы. «Родина» огазеяськон Одинцыын гужем лагерь возе, отын 2 воргорон тырше. Эшшо кӧняез ке ужаны ветло на артысь Красногорск ёросысь Черныши гуртысь фермае, но уждунзы, пе, туж пичи.

Алина Гуляева

Удмурт Дунне
By Удмурт Дунне 28 июня, 2018 11:03
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<