Вольэг Иники. «Юсьёс но куӵъёс» романысь люкет

Удмурт Дунне
By Удмурт Дунне Июнь 19, 2018 17:05

Суредаз Касим ГАЛИХАНОВ.

Кенеш

— Тырмоз милемлы дась нянь сиисьёсты сюдыны-вордыны! Ми кошкиськом! — кеськемзэ ик ӧз шӧды ни Бака Додэ.

Солэн лек тылын ӝуалскем синъёсыз эксэйзы шоры мертчиськизы.

— Кошкод ке кошкод ни-а, мар-а, Додэ. Но тани ма верало мон тыныд кошкон азяд, — огесэп малпаськыса сылэмез бере зӧр* доры матэктӥз Пеле эксэй. Тачыртыса гомась тылскем доры кыштырак гинэ кӧчизы мукетъёсыз но быдӟым кенеше люкаськем муртъёс. Ваньмыз сак кариськыса кылзӥсько эксэйзылэсь верамзэ.

— Асьме выжыысь калык татчыозь ноку но аслэсьтыз сьӧсь но аксым луэмзэ ӧз возьматъя. «Мон тынэсьтыд золгес ужасько, соин ик тынэсьтыд тросгес басьтӥсько» шуыса, нокин ӧз вералля. — Бадӟым кымессэ но синъёссэ бур киыныз ӵоксаз, паллянэныз пурысьтам кузь йырсизэ пужалтӥз. Калыкез пала берытскиз но йылэтӥз: — Песятайёсмы умоесь сямъёс кельтӥллям асьмелы. Огез соос пӧлысь вера: «Кужмоез но етӥзэз лябезлы но аламаезлы котьку ик кизэ мыче». Мукетыз: «Вӧжъем* муртлы берпум нянь юдэстэ но эн жаля». Асьмелы со ӟеч сямъёс юрттӥзы урод бабасыръёсты, периосты, тушмонъёсты но эзельёсты вормыны, сьӧськаб луонлэсь утялскыны. Озьы-а, бӧляке? — меӵак вазиськиз выжыез шоры эксэй.

— Озьы, озьы, — чусомем Кам шур кузя кыдёке килязы пиосмуртъёслэн но кышномуртъёслэн куараоссы.

— Быдӟым Инмармы-Утисьмы янгышам, шӧдске, тӥлесьтыд улыдэс* мултэсгес сӥлы карыса. Уть, кыӵе йӧно пиос кузьмам со тыныд, Додэ! Эсьма, та ӧрӟи пиосыд, мурт выжыосысь чебер но веськрес кышноос вайыса, эшшо но ӟечомытысалзы выжымес. Токма шорысь гинэ ӧлексы вордскем нуныосмес ум виылӥське, дыр.

Оло, Инмар но куке-соку янгыша — созэ ум тодӥське, но мон тазьы малпасько, Додэ: урод инмаръёс но лулъёс ки улэ сюремын тон. Соин ик матысь дыре вазиськоно луод асьмелэн гажано вӧсясьмылы. Со юрттоз тыныд урод инмаръёслэсь но лулъёслэсь мозмытскыны. Сьӧсь Акташез* лӥятон вылысь бадӟым курбон сётытэк уд луы. — Огвис малпаськыса сылӥз но шуиз: — Мон тодӥсько, кинъёс йыръёстэс берыктӥзы тӥлесьтыд. ӟонкаос но поскаос. Соослэн узыр муртъёссы курданзэс ыштӥллям: куанер иськавынъёссэс, ӵошалъёсын но кырлудъёсын улӥсь калыкъёс сямен, уаре* поттыны, нош ваньбурзэс но музъемзэс таланы дӥсьто. Асьмеос но поскаослэсь адӟем карыны кутскимы ке, Быдӟым Низьӧг воршудмылэсь кылзӥськемысь дугдӥмы ке, ӝогак гинэ тушмон зӥбет улэ шедёмы, — пӧсекъяса вера сано эксэй. — Ӟеч улонлы пум вуоз.

Низьӧгъёсын валтӥсьлэн синъёсыз пеймытын кионлэн кадь лек тылын пишто.

— Тӥ синмаллямды Гурлуд но ӝомъявыл бусыосысь самой ӟеч музъемез гинэ! Неужто оскиськоды, асьме калык сое тӥледлы сётоз шуыса?! Шат тон но, Дуналак, Додэ сямен ик, кепырандэ ыштӥд ни? — вазиськиз эксэй Бака Додэ вӧзын сылӥсь арлыдо воргоронлы.

Музъем сярысь кылпум потӥз гинэ — калык соку ик огыр-бугыр луиз.

— Ум сётэлэ музъемез убиръёслы, Низьӧгез вузасьёслы!.. Мар укылтэмъёсын пичи нуныосын кадь выриськод, Пеле!.. Кошко бере, сюрессы мед удалтоз!.. У-у, возьыттэмъёс!.. У-у, сьӧськабъёс!.. — отын но татын огсыр лек тачырто куараос но шуак чусомо.

ӝамдэ Москал сьӧд ягын, кытын ортчытъяло низьӧгъёс бадӟымесь кенешъёссэс, чал-чал луэ. Табере татчы лыктэмъёслэсь сюлэмъёссэс ӝожмыт мылкыд писыръяны кутске. Ваньмыз витё эксэйзылэсь кенешез азинтэмзэ. Тае шӧдыса, визьмо эксэй кыл сётоно кариськиз сӥё-буро адямиослы.

— Юлтошъёс, асьмелэн вань туж сӥё-дано но визьмо муртъёсмы… Оло, соос йыромем бӧлячиосмылэсь синъёссэс усьтыны быгатозы но урод вамыш лэсьтэмзылэсь алозы? Ойдолэ кылзӥськомы… Кин бордысен кутскомы ай? — Йырберзэ кормаса сылэмез бере Пеле нош улӟе. Котькудӥз сано адями шоры эксэй нимаз юанэн вазиське: — Мар малпаськод та пумысен, гажано Воль, азьло эксэймы но кивалтӥсьмы?.. Тон, гажано Дэй, быдӟым вӧсясьмы, кин быгатэ тупал дуннеысь лулъёсын вераськыны, уродъёссэ но умойёссэ инмаръёсты ас палаз кыскыса, калыкезлы шудбуро но дэлето улон вайыны, нош эрказъяськись лулъёсты кортнаны?.. Тон, гажано Роч, азьпал улонлэсь погылянъёссэ адӟисьмы но висисьёсмес йӧнатӥсьмы?..

— Куке но асьме выжымылэсь шудзэ вордӥсь но утись Низьӧг айымы, — вераны кутскиз пересь Воль, азьло эксэй, — тазьы индылоз вал нодтэмгес адямиосмылы: эн палдэлэ, муш палэпъёс сямен, — выжыдылэн кужымез быроз, эрикез ышоз но пазьгиськисьтэм калыклы ляльчи луоз. Данзэ ыштоз но алама кылёз. Эн жалялэ — ас киыныды виылэ ӧлексы вордскем нуныостэс но жалялэ Инмарлэсь нымы-кибызэ, будоссэ но изь-верзэ. Ас калыкедлэсь вань визьзэ, кужымзэ но сюлэмшугъяськонзэ сӥзёно малпанэзлы-эсэпезлы: даурысь дауре ас выжыдэ умоятонлы. Эн улэлэ сьӧсь но кыть* курок выжыос сямен, кинъёс дышемын мурт калыкъёслэсь ваньбурзэс киултыса улыны. Та выжы — азьтэм выжы. Пушъёз со дырозь гинэ, куке ужась выжыослэн пезьдэт сётыны кужымзы уггес тырмы на. Но куке но одно ик тыршись выжыос мозмытскозы асьсэлэн убиръёссылэсь. Соку ужаны яратӥсьтэмъёслы бырон вуоз.

Пересь Воль верамысь огесэп дугдэ но, кокро боды бордаз пыкъяськыса, мур лулӟиське. Юг-юг тӧдьы пурысьтам йырсиен но ыж гонлэсь куэм тӧдьы дэремен со Быдӟым Нюнялы — нюлэслэн но тунопиослэн Инмарзылы — укша. Песятайлэсь кӧтӝожзэ ваньзы шӧдо.

— Ох, пиосы, пиосы! Мар луыса кошке та, ачим но копак ӧй вала на, — паллян киыныз йыркобызэ корма пересь Воль. — Огзэ мон зол шӧдӥ: пушкамы Додэ но Дуналак кадь муртъёсмы уногес луизы ке, асьмеды Инмар но, Кылдысин но, Мукылчин но уз утьы ни. Азьланяз но ченгешыса, ыр-ар пуныос сямен уломы, олокыӵе но уродэсь периос, убиръёс но инмаръёс улэ пачкаломы. Тырмоз шузияськыны! — бодызэ ик вылӥе ӝутыса, витьымтэ шорысь черетске пересь. — Эн мыскыллялэ Быдӟым Инмармес, уллялэ сюлмысьтыды сьӧдкыльдэс! Тон, Додэ, — ядӥё* но кышкасьтэм Бакалэн пиез. Тон, Ичӧт, — ӟумъя бӧлякысь усто дурись но лякыт сямо Дэрилэн пиез. Тон, Югек, — юн зэмлыкез гажась ӟуӟиклэн пиез. Тон, Дуналак, — Вортча бӧлякысь эрикез но умой улонэз утчась Донкалэн пиез. Тон, Куака… — Котькудӥз доры матэ ик лыктыса, нимаз вазиське Воль, азьло эксэй. Синъёсыз умой адӟо на. Тылскем азьын сылӥсь вань пиосмуртъёсты тодма со. Мӧйы пиосмуртъёс солэсь кылзӥськозы но умойтэм малпанзылэсь палэнскозы шуыса осконэз пересьлэн юнма. Соин ик со пуроме, эшшо но ӟырдытгес вера: — Инмарен курисько, пиосы, эн кошкелэ! Эн куштэлэ, буркарик*, вордскем кардэс. Та дыре тушмонъёсмы нош асьме вылэ ожалскыны дасясько ук. Тӥляд сэзь, чырткем, нокинлэсь но курдасьтэм пиосты тушмонъёслэсь урдлыоссэс тӥяны, Низьӧгмылэсь данзэ утьыны туж кулэ луысалзы али. Нош тӥ, мечъёстэс шерон, калыктэс сантэманлэсь утён интые, олокытчы пегӟиськоды!

Азьло эксэйлэн берпуметӥ кылъёсыз воксё ӵушказы мурт дуннее потыны дасяськем адямиосты. Йыг-йыг, егитэсь но кужмоесь пиослэн йыръёссы ошиськизы… Пересь Вольлы пумит вераны тодытэк, ӟудэм муртъёс кадь сыло.

Сӥё-дано вӧсясьсы Пелелэн пуктэм юанэзлы тазьы вераз:

— Бадӟым сьӧлык усёз кошкисезлы но, кошкисьтэмезлы но. Ӟеч лулъёслэн но инмаръёслэн туж зол вожзы потоз. Соос дугдозы асьмелы дурбасьтэмысь. Албастыослэн, убиръёслэн, бабасыръёслэн но урод инмаръёслэн секыт, чидантэм зӥбет улазы шедёмы. Соин ик соос ашкынозы, улыны воксё но маза уз сётэ ни, — чик керӟегъяськытэк, горд тушсэ калленак маялляса, боз-боз куараеныз басылак вера Дэй вӧсясь. — Уродэз но, умоез но инмаръёс асьмелы ӧжытгем изъянъёс мед ваёзы шуыса, трос кузьмаськоно луоз. Кошкисезлы — эшшо но уногес, малы ке шуоно соос ик керетон-ченгешон ӝутӥзы. Кин тросгес сӥль яке нянь сётоз инмаръёслы, ӟечгес лӥятыны быгатоз соосты — соослы умойгес луоз. Урод инмаръёс но лулъёс ичигес исалозы таоссэ.

Вӧсясьлэн кылъёсыз, адями сюлэме пырыса, ӝуась тыллы пӧрмо — лекос зол йыркурен гомась тылперилы. Калык уллёын гиж-гуаж луэ. Отын но татын чузъясько кошкисьёслы пумит кышкатыса вазем лек куараос: «Лэзёно ӧвӧл инмаръёсты вузасьёсты!.. Малы ми убиръёс понна кайгырыны кулэ! Сьӧлыксэс ас выламы басьтыны!..»

— Виёно укылтэмъёсты! — гольтрес кеське кыӵе ке кышномурт.

Сьӧд нюлэс солы эшшо но гольтресгес вазе.

— Ворсалэ ымдэс! — гудыртэ Пеле эксэй, ас калыкезлы туж вожез потыса. — Кылзӥське, мар верало мон! Ӟеч улэмды потэ ке, сук эн выре! Эн жалялэ инмаръёслы такадэс но, ошпидэс но. Нош тӥ, ас выжыдылэсь висъяськыны малпась улыос, кепыранды воксё бырем ни ке, али ик кошке син азьысь! Кызьы ке тӥтэк но улыны быгатом ай.

Додэ эксэйзылы пумит мар ке вераны ымзэ усьтӥз ни вал но — дырыз дыръя ӵоксаны вуиз. Со умой тодэ эксэйзылэсь сямзэ. Ӟырдам ки улаз кемдӥд ке, отчыяд ик меченыз йырдэ ӵогыса куштоз яке чыртыдэ бералтоз. Додэлэн огезлэсь пӧртэм егит но батыр пиосыз, кышкытлыкез шӧдыса, айызы котыре ӝиптӥськизы, киоссы амалтэк мечъёссылэн ныдъёсазы йӧтскизы. Кӧдэктэм Нюньы кузпалыз картэзлэн паськыт пельпум сьӧраз ватӥськиз.

Ваньзы шып кариськыса, чик вырӟылытэк витё ӟырдыт сямо эксэйзылэсь диватскемзэ*. Соиз буйгаз. Ассэ кутыны быгатымтэезлэсь кӧбераса гуньдэм мурт кадь, мырдэм куаразэ поттӥз на:

— Мар вералоз меда та вылӥ кенешамы гажано туномы?

Роч кияз кӧня ке улвай но горд чашка кутӥз. Матэктӥз тылскем доры. Тылӝу акшан дыре льӧль-горд шунды кадь гинэ кылем на. Туно улвайзэ гыбдась тылӝуэ куштӥз. Соку ик горд чашка тачыртыса гоманы кутскиз. Инме позыръяськыса лобизы тылкизилиос. Котырын югыт но шуныт луиз. Роч, мӧйы ке но ини, сыӵе ик ӝужыт, веськрес, Инмар кадь чебер адями. Со но, эксэй кадь ик, тӧдьы дэра дэрем дӥсям. Пыдъёсаз — ыж ку ката. Гара гадяз ыргонлэсь кисьтэм низь пӧйшурлэн кабез* ошемын. Со — ибырвесь. Урод лулъёслэн но инмаръёслэн шукыръяськемзылэсь утись арбери.

— Кулэм муртъёслы виро но курбон сётэмлэсь азьло, уйшор вакытэ, пумиськи вал мон асэныз Быдӟым Нюняен.

Мар пумысен со дӥне лыктэмме верам бере Кылчин монэ кунултӥз но… ми сьӧд ягъёс вадьсытӥ кыӵе ке но тодмотэм, паймымон шаере лобимы. Кема лобимы. Ошмес син дуре лэзиським. Тём-тём пеймыт вал котырын. Малпамтэ шорысь Быдӟым Нюня толэзь кадь пиштыны кутскиз. Котырак воль-воль* луиз. «Учкы ай, Роч, та ошмес синучконэ. Отысь ваньзэ адӟод но валалод, мар возьма выжыдэс азьпал улонын», — шуиз тӧдьы песятай. Тани ма синйылтӥ мон отысь. Лымшор но шундыӝужан палан — пичи но бадӟым кузьыли муӵъёс. Нош шундыпуксён но уй палан — лачак векчиосыз. Лыдӟыны луонтэм трос. Ӝуаса но ӵындыса быризы уноез муӵъёс. Тросгес — шундыпуксён но уйшор палась, нош быгылес кылизы шундыӝужан палась тазаесь муӵъёс. Шоро-куспоосыз но ӧжытак кылизы на…

Кузьыли муӵъёс — со пӧртэм калыкъёслэн выжыоссы луо. Кинъёс, огазе люкаськыса, бадӟымесь но тазаесь «муӵъёс» кылдытыны быгато, соос ик самой ядӥё но ӟеч улыны кутско. Палдӥсез, висъяськисез, одӥг бадӟым «муӵ» карын улыны быгатӥсьтэмез род* луэ. Соин ик, ваче ожмаськыку, пичи «муӵъёсын» улӥсьёслэн каръёссы котьку туркамын луо, нош асьсэос яке уаре, яке ляльчие сюро…

 

http://udmdunne.ru/2018/06/kyzy-l%D3%A7psho-pedun-kulonehz-serekyatyny-vyriz-nikolajj-bekhmatovlehn-vyl-gozhtosehz-pumysen-malpanjos/

Удмурт Дунне
By Удмурт Дунне Июнь 19, 2018 17:05
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<